Në Greqi, është regjistruar vdekja e parë nga gripi H1N1 në qytetin Volos, duke shkaktuar tronditje në rajonin e Magnezisë. Ioanna Tzouma, një grua 58-vjeçare, vdiq në repartin e terapisë intensive të Spitalit të Volos, pas një periudhe të gjatë qëndrimi në spital.

Ajo kishte shfaqur simptoma të gripit, duke përfshirë temperaturë të ulët, që më pas përkeqësuan ndjeshëm gjendjen e saj, duke e detyruar dërgimin në spital, ku u diagnostikua me gripin H1N1. Megjithë përpjekjet për trajtim, ajo nuk arriti të mbijetojë për shkak të dështimit të shumë organeve.

Një tjetër pacient, një burrë 70-vjeçar, është shtruar gjithashtu me grip H1N1, por ka arritur të kapërcejë rrezikun dhe të shërohet. Ky rast ka nxitur shqetësim tek autoritetet shëndetësore, të cilët kanë apeluar për vazhdimin e vaksinimit të qytetarëve për të parandaluar përhapjen e gripit dhe komplikacioneve të mundshme./UBTNews/

Komisioni Qendror i Zgjedhjeve njofton se ka filluar shtypja e fletëvotimeve për Zgjedhjet për Kuvendin e Kosovës, të cilat do të mbahen më 9 shkurt 2025.

Shtypja e fletëvotimeve po realizohet në shtypshkronjën e dokumenteve me siguri të lartë, “Cetis”, në Celje të Sllovenisë, ka njoftuar Zëdhënësi i KQZ-së, Valmir Elezi.

Ky proces po zhvillohet sipas standardeve ndërkombëtare dhe nën mbikëqyrjen e një delegacioni të KQZ-së të udhëhequr nga kryesuesi, Kreshnik Radoniqi dhe stafit të Sekretariatit të KQZ-së.

Gjithashtu, përveç fletëvotimeve, janë duke u shtypur edhe broshurat me listat e kandidatëve, të cilat do të jenë të disponueshme për votuesit në vendvotime gjatë ditës së zgjedhjeve.

Në mbledhjen e mbajtur më 15 janar, KQZ mori vendim për numrin e fletëvotimeve dhe broshurave që do të shtypen. Sipas vendimit të KQZ-së do të shtypen 1,752,650 fletëvotime, prej të cilave 1,664,100 për votimin në vendvotime të rregullta; 28,450 për votimin me kusht; 38,650 për votimin e personave me nevoja të veçanta dhe si fletëvotime rezervë; dhe 21,450 për votimin në përfaqësi diplomatike.

Bazuar në Listën Votuese të certifikuar nga Komisioni Qendror i Zgjedhjeve numri i shtetasve të Kosovës me të drejtë vote është 2,075,868 votues, prej të cilëve 1,970,944 votues janë votues që i takojnë Listës Votuese brenda Kosovës dhe 104,924 votues janë pjesë e Listës Votuese jashtë Kosovës. Andaj, sipas vendimit të KQZ-së, do të shtypen 323,218 apo 15.57% fletëvotime më pak se numri i votuesve. Kjo është një praktikë e ndjekur nga KQZ edhe në proceset e kaluara zgjedhore.

Operatori i Sistemit, Transmisionit dhe Tregut (KOSTT) sot ka inauguruar nënstacionin në Ferizaj dhe ky projekt që kap vlerën afro tetë milionë euro ka për qëllim që të zgjidh problemet e furnizimit me energji elektrike për banorët dhe bizneset e kësaj zone.

E pranishme në këtë ceremoni ishte edhe ministrja e Ekonomisë, Artane Rizvanolli, e cila ka theksuar se ky investim gjithashtu ndikon edhe reduktimin e humbjeve teknike prej 5 mijë megavat orë energji elektrike në rrjet.

“Me energjezimin e këtij nënstacioni sot po zgjidhen problemet e furnizimit me energji për banorët dhe bizneset e kësaj zone, dhe po mundësohet lehtësimi i ngarkesës për vendbanimet që furnizohen nga linjat e ndërlidhura në komunën e Kaçanikut, Shtërpcës, përfshirë qendrën e skijimit të Brezovices dhe do të ketë ndikim pozitiv edhe tek një pjesë e konsumatorëve në Komunën e Shtimes. Ky investim gjithashtu ndikon edhe reduktimin e humbjeve teknike prej 5 mijë megavat orë në rrjet. Ky investim e rrit stabilitetin me furnizim me energji elektrike dhe eliminon ndërprerjet që kanë ndodhur, duke përmirësuar kështu kushtet e jetesës, mirëpo edhe duke mundësuar zhvillim më të qëndrueshëm ekonomik dhe social të qytetit dhe të Komunës së Ferizaj”, tha Rizvanolli.

Kryesuesi i Bordit të drejtoreve në KOSTT, Gëzim Tosuni ka thënë se efektet e këtij nënstacioni pritet që të ndjehen në ditët dhe muajt e ardhshëm në aspektin energjetik.

“Një projekt i cili është gati, kryesisht i mbështetur financiarisht, investim i KOSTT. Efektet e tij pritet që të ndjehen në ditët dhe muajt e ardhshëm… Mirëpo për shkak të kushteve të vështira, temperaturave të ftohta, kontraktoret dhe ekipet e KOSTT-it kanë bërë maksimumin e mundshëm për të përshpejtuar lansimin e këtij projekti. Prej sot qytetarët e Ferizaj nuk do të ngelen pa rrymë për shkak të KOSTT-it”, tha Tosuni.

Në anën tjetër, kryeshefi ekzekutiv i KOSTT-it, Evetar Zeqiri tha se ky investim është i një teknologjie të fundit dhe do të sigurojë furnizim të pandërprerë me energji elektrike.

“Sot po e energjizojme nënstacionin Ferizaj 3. Ky nënstacion është i një rëndësie të veçantë, sepse mbështet qytetarët e Komunës së Ferizaj. Ky nënstacion ka pas sfidat e veta të përfundimit të cilat në bashkëpunim me gjitha palët i kemi tejkaluar. Ky është projekt strategjik i realizuar me përkushtim dhe vizion të të gjithë neve dhe shënon një periudhë të re në Komunën e Ferizaj, sepse do të mbështet qytetarët dhe bizneset në tërësi. Ky nënstacion kap vlerën prej rreth 7.8 milionë euro së bashku me linjën 3.31 kilometra. Ky investim është i një teknologjie të fundit dhe do të sigurojë furnizim të pandërprerë…Kërkojmë ndjese për çfarëdo ndërprerje që ka ndodhur e cila është shkaktuar për nevojat e ruajtjes së stabilitetit të energjisë dhe shpresojmë që në të ardhmen nuk do të ketë më reduktime ”, tha Zeqiri.

Gjatë muajit dhjetor të vitit të kaluar, qytetarët e vendit, veçanërisht ata të zonës së Ferizajt u përballen me mungesë të energjisë elektrike.

Banka Evropiane për Rindërtim dhe Zhvillim (BERZH) i ka ofruar Ministrisë së Financave, Punës dhe Transfereve një kredi sovrane deri në 25 milionë euro në dobi të Kompanisë Rajonale të Ujësjellësit “Prishtina” për përmirësimin e trajtimit të ujërave të zeza, nëpërmjet ndërtimit të dy impianteve për trajtim të ujërave të zeza dhe zgjerimit të rrjetit.

Kjo hua do të financojë ndërtimin e impiantit të parë për trajtim të ujërave të zeza në Podujevë.

Impianti i ri me teknologjinë më të avancuar, do t’i shërbejë një popullate deri në 50 mijë banorë dhe do të zvogëlojë dëmet mjedisore të shkaktuara nga ujërat e zeza të pa trajtuara që lëshohen në lumin e Llapit.

Gjithashtu, projekti do të zgjerojë dhe përmirësojë rrjetin lokal të kanalizimeve të ujërave të zeza, si dhe do të ndërtojë një impiant në shkallë të vogël për trajtim të ujërave të zeza, duke përdorur zgjidhje të bazuara në natyrë.

Udhëheqësi i BERZH-it për Kosovën, Sergiy Maslichenko, tha se kjo iniciativë shënon një tjetër hap përpara në rritjen e kapaciteteve të vendit për trajtimin e ujërave të zeza, duke adresuar një nevojë kritike për përmirësimin e higjienës dhe reduktimin e ndotjes së mjedisit për mirëqenien e qytetarëve të Kosovës.

“Së bashku, jemi të përkushtuar për të krijuar zgjidhje të qëndrueshme që nxisin përparimin afatgjatë dhe një të ardhme më të shëndetshme për të gjithë”, tha ai.

Ministri i Financave, Hekuran Murati, ka theksuar se Qeveria e Kosovës tashmë realizuar një sërë projektesh për mbrojtjen e mjedisit dhe sigurimin e mirëqenies së qytetarëve, duke përfshirë projektet për trajtimin e ujërave të zeza në Prishtinë, Ferizaj, Gjilan dhe Mitrovicë.

Ndërsa, kryetari i Podujevës, Shpejtim Bulliqi, tha se ndërtimi i këtij impianti do të luajë një rol kyç në uljen e ndotjes së lumenjve dhe ruajtjen e burimeve ujore.

Agjencia Suedeze për Bashkëpunim Ndërkombëtar për Zhvillim (SIDA) po e mbështet Kompaninë Rajonale të Ujësjellësit Prishtina për përgatitjen e projektit duke ofruar një grant prej 270 mijë eurosh.

BERZH-i do t’i ndihmojë kompaninë edhe që të sigurojë bashkëpunim teknik shtesë dhe grante investimi në mënyrë që ta bëjë këtë investim më të realizueshëm dhe të përballueshëm për Qeverinë e Kosovës.

Ky projekt është plotësisht i përafruar me strategjinë e vendit të Bankës për Kosovën, e cila synon të mbështesë zhvillimin e infrastrukturës më të qëndrueshme dhe më reziliente ndaj klimës.

BERZH-i ka luajtur rol kyç në mbështetjen e përpjekjeve të qeverisë, duke ofruar financim për tri impiante të tjera për trajtimin e ujërave të zeza në Ferizaj, Gjilan dhe Mitrovicë. BERZH është investitor institucional kryesues në Kosovë, me 770 milionë euro përmes 120 projekteve deri më sot.