Lajmet

​“Edhe n’shtet, edhe n’familje”, marshohet në përkrahje të komunitetit LGBTI

U tha se shteti dhe familja janë dy institucionet që po diskriminojnë më së shumti komunitetin LGBTI.

Published

on

“Edhe n’shtet, edhe n’familje”, ishte slogani i edicionit të gjashtë të javës së krenarisë. Nga sheshi “Skënderbeu” në drejtim të Katedrales e pastaj në Pallatin e Rinisë, me qindra qytetarë kanë marshuar në përkrahje të këtij komuniteti.

Në “Paradën e Krenarisë” u tha se shteti dhe familja janë dy institucionet që po diskriminojnë më së shumti vajzat dhe djemtë e komunitetit LGBTI.

Po ashtu, organizatorët e marshit kanë kritikuar qeverinë, meqë sipas tyre, janë në listën e fundit të prioriteteve. Ndërkaq, ministrja e Drejtësisë ka deklaruar se do të procedojnë sërish Kodin Civil, në organin më të lartë legjislativ.

Shemsije Çerkini thotë se është krenare me të birin e saj që i takon komunitetit LGBTI. Ajo pas përfundimit të marshit ka mbajtur fjalimin para masës, duke kërkuar që shtëpia të jetë vend i pranimit dhe dashurisë.

“Qëndroj sot para juve si një nënë krenare. Qëndroj sot para juve si një nënë krenare e djalit tim “gay”. Si nëna e çdo personi LGBTI që nuk e ka dashurinë e përkrahjen e familjes. Një fjalë e urtë popullore thotë se ‘evladi është bujashka e zemrës’. Edhe po, është shumë e vërtetë. Evladi është pika e dobët, zemra e çdo prindit. Çdo evlad, çdo fëmijë, qoftë vajzë, djalë a çka do, gay, lesbike apo trans, rehatia e djalit tim është më e rëndësishme se sa çdo gjë tjetër në këtë botë. Unë jam shumë krenare për djalin tim, për personalitetin e tij, seksualitetin, jam krenare që është ai që është”, u shpreh ajo.

Organizatori i kësaj parade, Lend Mustafa tha se familja e shteti nuk po përkrahin komunitetin.

“Mesazhi iu drejtohet dy institucioneve kryesore bazë të një fëmije dhe pjesëtari të komunitetit LGBTI, janë shteti edhe familja. Janë institucionet që më së shumti po e diskriminojnë komunitetin tonë… Ne tashmë e kemi kuptuar se komuniteti LGBTI gjithmonë është në listën e fundit të prioriteteve të shtetit tonë të Kosovës. Edhe kësaj here kemi qenë të dëshpëruar me vendimet që kanë dashur të merren sa i përket Kodit Civil, për shkak se nuk janë të drejta që na takojnë neve. Janë të drejta që po donë qeveria të na jap, ato nuk garantojnë asgjë për komunitetin LGBTI”, ka deklaruar ai.

Ambasadori Jeffrey Hovenier, i cili ishte nga të parët që iu bashkua paradës, tha se sot është bashkë me një grup nga Ambasada e Shteteve të Bashkuara të Amerikës për të treguar mbështetjen për këtë komunitet.

“Ne jemi këtu për të treguar mbështetjen për të drejtat e komunitetit LGBTI+, sepse besojmë fuqimisht që të drejtat e komunitetit LGBTI+ janë të drejta të njeriut. Por, shpresoj që unë nuk do të bëhem storia e sotme, rrëfimi i sotëm, por do t’i shohim kolegët e mi, pjesëtarë të shoqërisë civile, korpusit diplomatik dhe qytetarët e Kosovës, të cilët janë këtu për të marshuar këtu dhe për të siguruar që gjithë qytetarët e popullit të Kosovës, pa marrë parasysh veçoritë e tyre të ndryshme, përfshirë edhe orientimin seksual që i gëzojnë të drejtat e tyre. Do ta them edhe një herë që të drejtat e komunitetit LGBTI+, janë po ashtu të drejta të njeriut”, ka thënë ai.

Ushtruesja e detyrës së shefes së Grupit Parlamentar të Lëvizjes Vetëvendosje, Mimoza Kusari-Lila ka thënë se sot po festojnë të drejtat për personat e komunitetit LGBTI.

“Si popull që kemi qenë të robëruar, cenuar duhet të dimë më së miri se çfarë do të thotë të mohohet një e drejtë. Ajo çfarë ka ndodhur në Parlamentin e Kosovës uroj të mos përsëritet, në kuptimin e procesit i cili duhet të rregullojë një të drejtë tjetër legjitime për të qenë bashkë në një union civil apo martesë të gjinisë së njëjtë. Pa koloritin e vet, shoqëria nuk mund të jetë shoqëri e drejtë dhe barabartë, demokratike dhe në funksion të të gjithëve”, ka thënë ajo.

Në një deklaratë, ministrja e Drejtësisë, Albulena Haxhiu u shpreh se deri më tani institucionet nuk kanë respektuar të drejtat e komunitetit.

“Në kohën kur është dashur që të tregojmë që jemi për respektimin e të drejtave të njeriut dhe këto nuk janë vetëm deklarative, por edhe me veprime konkrete me mundësinë për të votuar kodin civil, në këtë rast deputetët e opozitës sikurse edhe disa nga GP i LVV-së, nuk dhanë votën për një dokument që ishte jashtëzakonisht i rëndësishëm. Unë mund të kuptoj mendimet ndryshe për çështje të ndryshme, por konsideroj që është roli i deputetit që duhet të punojë në emancipim të shoqërisë. Ai duhet të jetë shembull se si respekton të drejtat e njeriut”, tha ajo.

Po ashtu, ajo deklaroi se do të procedojnë sërish në parlament Kodin Civil.

“Ne do ta procedojmë sërish draftin e Kodit Civil dhe jemi të interesuar të bashkëpunojmë me deputetët që kanë një mendim tjetër që të shohim se cila është rruga për ta shtyrë përpara. Por që të drejtat e njeriut nuk mund të negociohen”, ka thënë ajo.

Gjatë marshimit, është evidentuar një rast kur në drejtim të qytetarëve është hedhur një mjet piroteknik. Drejtori i përgjithshëm i Policisë së Kosovës, Samedin Mehmeti tha se qëllimi i vizitës është që të tregojnë mbështetjen për të grupet që jetojnë në Kosovë.

“Ne si Polici e Kosovës e respektojmë çdo diversitet që e kemi në shoqëri, natyrisht që e mbështesim çdo event që ka të bëjë me promovimin e kulturën e diversitetit… Deri më tani nuk kemi ndonjë problem, përveç një incidenti që patëm te “Hotel Grand” ku u hedh një mjet piroteknik, por nuk kemi pas diçka që është serioze dhe që e dëmton imazhin dhe respektin ndaj diversitetit”, ka përfunduar Mehmeti.

Më tej, ai tha se nuk ka shifra se sa ka qenë numri i pjesëmarrësve në “Paradën e Krenarisë”.

Në marshin e gjashtë në përkrahje të këtij komuniteti kanë marrë pjesë edhe ambasadorë të akredituar në vendin tonë, kryetari i Prishtinës Përparim Rama, Vlora Çitaku nga Partia Demokratike e Kosovës, ish-presidentja Atifete Jahjaga, deputetë të Lëvizjes Vetëvendosje dhe pjesëtarë të shoqërisë civile. 

Lajmet

Tahiri: Humbësi i këtyre zgjedhjeve është Vetëvendosje

Published

on

By

Deputeti i Partisë Demokratike të Kosovës (PDK), Abelard Tahiri, fajësoi Lëvizjen Vetëvendosje për bllokimin e procesit të konstituimit të Kuvendit të Kosovës.

Secili deputet e ka përgjegjësi kushtetuese të jetë në seancën e Kuvendit dhe t’i japë drejtim formimit të organeve të Kuvendit të Kosovës, si kryesia dhe kryetari. Këtu nuk jemi duke bllokuar nga partitë e tjera, por jemi të bllokuar nga partia e parë. Duke qenë se është në të drejtën e saj për të bërë propozime dhe duke pasur parasysh që nuk ka shumicë parlamentare këta kanë vendosur ta bllokojnë situatën. Asnjë parti nuk mund ta bllokojë, përpos partisë së parë.” , tha Tahiri.

Continue Reading

Lajmet

​Berisha: Duhet të lejohet debati parlamentar në seancën konstituive

Published

on

By

Deputeti i Aleancës për Ardhmërinë e Kosovës(AAK), Bekë Berisha ka kërkuar lejimin e debatit në seancën konstituive të Kuvendit të Kosovës.

Duke hyrë në objektin e Kuvendit për përpjekjen e 36-të të konstituimit të legjislaturës së nëntë, Berisha tha se i ka humbur kuptimi vazhdimit të seancës pa arritur një zgjidhje.

Ai tha se duhet të shkelet rregullorja e Kuvendit dhe të mundësohet debati gjatë seancës konstituive dhe të bëhen përpjekje për gjetjen e një rrugëdalje nga kriza politike.

Ka humbur kuptimi gjithçka. Ne jemi mbetur peng dhe po thirremi në ligj. Këtyre po iu themi po e shkelni Kushtetutën dhe jemi mbetur peng i një rregulli që nuk bën me marrë fjalën. Në parlamentarizëm duhet me fol dhe zgjidh problemet. Duhet me bërë përpjekje me prish një rregull dhe me nisë me komuniku. Forma si jemi ne se 35 herë se kush është për dhe me shku e me ardh pas 48 orëve me të vërtet i ka humbur kuptimi. Ndoshta pasi të provojnë me mirëkuptim prej të gjitha partive politike me u mbledh dhe me këqyrë sesi me pas rrugëdalje ndoshta edhe t’u e shkel një rregull”, tha ai.

Kuvendi i Kosovës edhe pesë muaj pas zgjedhjeve parlamentare të 9 shkurtit nuk po arrin të konstituohet.

Continue Reading

Lajmet

Albulena Haxhiu paraqitet në gjykatë, shtyhet seanca gjyqësore për gaz lotsjellës në Kuvend

Published

on

By

Ministrja në detyrë e Drejtësisë, Albulena Haxhiu, u paraqit këtë paradite në Gjykatën Themelore në Prishtinë, ku po mbahet seanca gjyqësore lidhur me hedhjen e gazit lotsjellës në Kuvendin e Kosovës në vitin 2016. Por, seanca u shty për shkak të mungesës së të akuzuarve të tjerë.

Albulena Haxhiu, Besa Baftiu, Donika Kadaj-Bujupi e Pal Lekaj akuzohen se në shkurt të 2016-tës kanë futur bombola të gazit lotsjellës në Kuvendin e Kosovës, duke e kryer veprën penale “armëmbajtje pa leje”.

Aktakuza lidhet me periudhën kur partitë atëherë në opozitë, Lëvizja Vetëvendosje, Aleanca për Ardhmërinë e Kosovës dhe Nisma Socialdemokrate, kundërshtonin marrëveshjen Kosovë-Mali i Zi për demarkacionin e kufirit dhe marrëveshjen Kosovë-Serbi për themelimin e Asociacionit të Komunave me Shumicë Serbe.

Continue Reading

Lajmet

Katër raste të dhunës në familje u raportuan gjatë 24 orëve të fundit

Published

on

By

Katër raste të dhunës në familje janë raportuar gjatë 24 orëve të fundit në Prishtinë dhe Lipjan.

Sipas raportit 24-orësh të Policisë, në Prishtinë janë shënuar tri raste të dhunës në familje. Në njërin prej tyre, një burrë është arrestuar nën dyshimin se ka sulmuar fizikisht dy persona.

Prishtinë / 22.06.2025 – 10:50.Dyshohet se pas një mosmarrëveshje, i dyshuari mashkull kosovar ka sulmuar fizikisht dy viktimat kosovarë të cilët kanë pranuar tretman mjeksorë. I dyshuari është arrestuar dhe pas intervistimit me konsultim të prokurorit lirohet në procedurë të rregullt”, thuhet në njoftim.

Në rastin e dytë në Prishtinë,një grua ka raportuar se u sulmua fizkisht nga një burrë.

Prishtinë 22.06.2025, 11:00-17:00. Ankuesja femër kosovare ka raportuar se pas një mosmarrëveshje është sulmuar fizikisht nga i dyshuari mashkull kosovar. Viktima nuk ka pranuar tretman mjekësor, ndërsa lidhur me rastin po zhvillohen hetime”, njofton Policia.

Kurse, në rastin e tretë në Prishtinë, dy persona u arrestuan nën dyshimin se janë rrahur mes vete.

Prishtinë 22.06.2025, 20:45.Janë arrestuar dy të dyshuarit një femër dhe një mashkull kosovarë pasi që të njëjtit pas një mosmarrëveshje janë rrahur në mes vete. Të njëjtit pas intervistimit me vendim të prokurorit janë liruar në procedurë të rregullt”, thuhet në njoftim.

Kurse, në Lipjan një person u shoqërua në Polici për intervistim nën dyshimin për dhunë ndaj një gruaje.

“Lipjan 22.06.2025, 14:00. Është shoqëruar për intervistim i dyshuari mashkull kosovar, pasiqë i njëjti dyshohet se ka kryer veprën e lartcekur ndaj viktimës femër kosovare. Me vendim të prokurorit rasti procedohet në procedurë të rregullt”, thuhet në njoftim. /BetimipërDrejtësi

Continue Reading

Të kërkuara