Mesfushori 21-vjeçar, Leon Avdullahu, ka marrë vendimin për të përfaqësuar ekipin kombëtar të Kosovës, duke lënë pas vetes mundësinë për të luajtur me Zvicrën. Edhe pse i rritur në Zvicër dhe pjesë e ekipeve zinxhir të të rinjve në këtë shtet, Avdullahu ka vendosur të ndjekë një rrugë tjetër në karrierën e tij ndërkombëtare.

Federata Zvicerane e Futbollit (SFV) ka reaguar pas konfirmimit të vendimit të futbollistit. Drejtori i ekipeve kombëtare, Pierluigi Tami, ka shprehur zhgënjimin e institucionit që përfaqëson.

“Leoni na informoi për vendimin e tij. Jemi të zhgënjyer që ai tani dëshiron të ndjekë një rrugë tjetër”, tha Tami.

Ai theksoi se Federata është e vetëdijshme për situatat e tilla dhe ka pasur përvoja të ngjashme edhe më parë.

“Por, gjithashtu e bëj të qartë se ne duam vetëm ata lojtarë në ekipet tona kombëtare që identifikohen 100 për qind me vendin dhe ekipin tonë kombëtar”, shtoi ai.

Avdullahu pritet t’i bashkohet ekipit kombëtar të Kosovës në muajin shtator, për dy ndeshjet kualifikuese kundër Zvicrës dhe Suedisë.

Veterani i Real Madridit, Lucas Vazquez, ka gjetur një skuadër të re pas dy muajsh pa klub. Pas një karriere 17-vjeçare te “Los Blancos”, e ndërprerë vetëm për një sezon huazimi te Espanyol, Vazquez mbeti pa kontratë këtë verë, pasi Real Madrid vendosi të mos i ofrojë rinovim, veçanërisht pas transferimit të Trent Alexander-Arnold.

Gjatë viteve të fundit, Vazquez ka qenë një mbrojtës i djathtë alternativ, pas rikthimit nga pozicioni i tij origjinal si sulmues i djathtë. Edhe pse ishin përfolur oferta nga Espanyol, Juventus dhe Milan, sipas gazetarit të njohur Fabrizio Romano, Vazquez ka arritur marrëveshje për t’u transferuar te Bayer Leverkusen në Bundesligë — klub ku më parë ka punuar trajneri i fundit i Real Madridit, Xabi Alonso, dhe ku ka luajtur edhe Dani Carvajal.

Sezoni i fundit për Vazquezin ishte sfidues, sidomos pas dëmtimit serioz të Carvajal, dhe pavarësisht disa vështirësive, ai arriti të zhvillojë 53 ndeshje, duke shënuar dy gola dhe dhënë tetë asistime. Ky bilanc tregon kontributin e tij edhe në moshën 34-vjeçare.

Ky transferim përbën lëvizjen e parë të madhe të Vazquez jashtë Spanjës, duke i dhënë një drejtim të ri karrierës së tij.

Mesfushori i talentuar Leon Avdullahu ka marrë një vendim të rëndësishëm në karrierën e tij, duke zgjedhur të përfaqësojë Kombëtaren e Kosovës dhe duke refuzuar mundësinë për të luajtur për Zvicrën.

Lajmin e bëri të ditur presidenti i Federatës së Futbollit të Kosovës, Agim Ademi, i cili në një postim në rrjetet sociale theksoi se Avdullahu ka zgjedhur me zemër të mbrojë ngjyrat e Kosovës.

“Pritjes i erdhi fundi, Leoni është i Kosovës. Ai më njoftoi për vendimin e madh pas takimit tonë të fundit, ku diskutuan të gjitha detajet. Ky është një lajm i gëzuar për futbollin kosovar, pasi dëshmon se identiteti dhe prejardhja janë të pathyeshme”, shkroi Ademi.

Ky vendim forcon mesfushën e Kosovës, duke shtuar thellësi dhe kualitet në skuadër. Avdullahu pritet të sjellë energji, vizion dhe kreativitet në përballjet e ardhshme kualifikuese për Kampionatin Botëror 2026.

Ai ka filluar karrierën e tij te Baseli, ndërsa këtë vit u transferua për 8 milionë euro te Hoffenheim në Bundesligë. Avdullahu ka debutuar me paraqitje të spikatur ndaj Bayer Leverkusen, ndërsa vlera e tij në Transfermarkt ka arritur në 10 milionë euro.

Me këtë përforcim, trajneri Franco Foda do të ketë një alternativë të re dhe të fortë në mesfushën e Kosovës, e cila në grupin eliminator për Botërorin do të ndeshet me Suedinë, Zvicrën dhe Slloveninë.

Klubi turk Kasımpaşa ka bërë një ofertë zyrtare për sulmuesin 27-vjeçar, Mërgim Berisha, i cili aktualisht është pjesë e skuadrës gjermane Hoffenheim, por që ka mbetur në hije gjatë kohës së tij aty.

Lajmin e bëri të ditur gazetari Yagız Sabuncuoglu, i cili konfirmoi se Kasımpaşa ka paraqitur një propozim formal për transferimin e Berishës te Hoffenheimi.

Berisha ka kontratë me Hoffenheimin deri në vitin 2027, ndërsa vlera e tij në treg sipas faqes Transfermarkt është rreth 3.5 milionë euro.

Përveç Kasımpaşas, interesim për sulmuesin janë shfaqur edhe nga klubet Kayserispor dhe Hertha BSC, ndërsa Berisha, i cili dikur refuzoi të luante për Kosovën në favor të Gjermanisë, nuk ka arritur të bëjë një hap të madh në karrierë deri më tani.

Nëse kalimi në Turqi do të realizohet, kjo do të përbënte një rikthim për Berishën, pasi më parë ka luajtur edhe te Fenerbahçe.

Gjatë karrierës së tij, Mërgim Berisha ka luajtur për skuadra të ndryshme si FC Liefering, Red Bull Salzburg, LASK Linz, 1. FC Magdeburg, SCR Altach, Fenerbahçe, FC Augsburg dhe aktualisht për TSG Hoffenheim.