Aktualitet

​Cilat janë synimet e diplomacisë ruse në Afrikë?

Kombet e Bashkuara thonë se 47 milionë njerëz të tjerë po përballen tani me “uri të thellë”.

Publikuar

2 vjet më parë

më

Ministri i Jashtëm rus Sergey Lavrov po bën një turne të zgjeruar në Afrikë, në përpjekje për të gjetur aleatë, mes zemërimit dhe izolimit global për mungesën e ushqimit pas sulmit rus të Ukrainës. Korrespondentja e Zërit të Amerikës, Cindy Saine, njofton.

Rifillimi i dërgesave të grurit ukrainas dhe rus ka qenë tema numër një në çdo ndalesë të turneut të ministrit të Jashtëm rus Sergey Lavrov në Afrikë këtë javë, përfshirë në qytetin Oyo të Republikës së Kongos.

“Kemi kënaqësinë të mirëpresim Sergei Lavrovin, i cili vjen me lajme të mira, përfshirë marrëveshjen që u nënshkrua në Turqi, e sponsorizuar nga Kombet e Bashkuara dhe Turqia, për rifillimin e eksportit të grurit ukrainas përtej Detit të Zi dhe përmes ngushticës së Bosforit”, thotë Jean-Claude Gakosso, ministër i Jashtëm i Republikës së Kongos.

Sulmi i Rusisë në Ukrainë më 24 shkurt dhe bllokimi i porteve të Ukrainës ka ndërprerë masivisht dërgesat e grurit, duke bllokuar miliona tonë drithë dhe duke shkaktuar rritje të çmimeve globale të mallrave. Kombet e Bashkuara thonë se 47 milionë njerëz të tjerë po përballen tani me “uri të thellë” – me vendet në Afrikë veçanërisht të goditura.

Lavrov e filloi turneun e tij në Egjipt të dielën, duke siguruar vendin se porositë e tyre për dërgesat ruse të grurit do të përmbushen dhe duke fajësuar sanksionet perëndimore ndaj Rusisë për mungesat. Ndërkohë, presidenti ukrainas Volodymyr Zelenskyy tha se bombardimi i Rusisë në Odesa të shtunën e vë në rrezik marrëveshjen e grurit të Stambollit të ndërmjetësuar nga OKB javën e kaluar. Zelenskyy tha se Moska gjen gjithmonë një mënyrë për të mos zbatuar premtimet e saj. Lavrov tha se sulmi në Odesa nuk do të ndikojë në dërgesat e grurit.

Një ekspert i tha Zërit të Amerikës se Lavrov synon ta paraqesë nën dritë tjetër krizën ushqimore gjatë vizitës së tij në Egjipt, Republikën e Kongos, Ugandë dhe Etiopi.

“Bllokada ruse e drithit në portet e Ukrainës dhe shkatërrimi i qëllimshëm i kapaciteteve bujqësore të Ukrainës është në qendër të kësaj përpjekjeje, pasi Rusia po përpiqet të lidhë në mënyrë të rreme eksportet e grurit të Ukrainës me sanksionet kundër Rusisë, dhe të përcaktojë në mënyrë të rreme Ukrainën si përgjegjëse në krizën globale të ushqimit”, thotë Nataliya Bugayova me Institutin për Studimin e Luftës.

Një tjetër eksperte konfirmoi se Afrika u godit veçanërisht rëndë nga ndërprerja në furnizimin me drithëra të shkaktuar nga agresioni rus.

“Sigurisht, rajoni po ndjen ndikimin dhe implikimet e pasigurisë ushqimore. Administratorja e USAID-it, ambasadorja Samantha Poëer, sapo ishte në rajon dhe njoftoi një pikë tre miliardë dollarë ndihma“, thotë Susan Stigant.

Stigant i tha Zërit të Amerikës se Afrika varet nga Rusia për rreth 40 për qind të furnizimeve të saj me drithëra, ndërsa rreth 60 për qind e tokës së papunuar në botë është në Afrikë./VOA/

Etiketa
Vazhdo të lexosh

Bota

Ekonomia gjermane sheh tkurrjen vjetore të pestë radhazi të PBB-së

Publikuar

2 ditë më parë

më

30 Prill, 2024

nga

Ekonomia gjermane është tkurrur me 0.2% në tremujorin e parë të vitit 2024 në bazë vjetore, deklaroi të martën departamenti i statistikave të vendit Destatis. Që nga fillimi i vitit të kaluar, ekonomia gjermane është tkurrur çdo vit për pesë tremujorë radhazi.

Vitin e kaluar, ekonomia gjermane u tkurr me 0.2% në tremujorin e parë, të dytë dhe të katërt, dhe 0.4% në tremujorin e tretë, në bazë vjetore. Në bazë tremujore, produkti i brendshëm bruto (PBB) i vendit u rrit lehtësisht me 0.2% në periudhën janar-mars.

PBB-ja u tkurr me 0.5% në tremujorin e fundit të vitit 2023. Për shkak të dy rënieve të njëpasnjëshme të PBB-së, ekonomia gjermane kishte hyrë edhe në një recesion teknik vitin e kaluar.

Vazhdo të lexosh

Aktualitet

Qeveria mban mbledhje elektronike

Merr dy vendime.

Publikuar

1 javë më parë

më

23 Prill, 2024

nga

Qeveria e Kosovës ka zhvilluar sot një mbledhje elektronike, në të cilën ka marrë dy vendime.

Sipas njoftimit të Zyrës së Kryeministrit, Qeveria ka miratuar Projektligjin për Ratifikimin e Amendamentit të Marrëveshjes për Themelimin e Bankës Evropiane për Rindërtim dhe Zhvillim (“Marrëveshja”) – Neni 1.

Qeveria po ashtu ka themeluar Komisionin e Pranimit për pozitën e Sekretarit të Përgjithshëm të Ministrisë së Punëve të Jashtme dhe Diasporës, sipas konkursit të shpallur me datën 14.03.2024.

Vazhdo të lexosh

Aktualitet

Rama nis vizitën zyrtare në Paris, takim ‘kokë më kokë’ me presidentin Macron

Vizita bëhet me ftesë të presidentit Macron.

Publikuar

3 javë më parë

më

11 Prill, 2024

nga

Kryeministri Edi Rama nisi sot një vizitë zyrtare dyditore në Paris me ftesë të presidentit francez, Emmanuel Macron, ku do të zhvillojë një sërë takimesh të përqendruara kryesisht në promovimin e potencialeve dhe klimës pozitive që Shqipëria ofron për zhvillimin e investimeve të huaja, si dhe në perspektivën e bashkëpunimit mes dy vendeve në fushën e teknologjisë dhe inovacionit.

Konkretisht, ditën e premte në orën 8:30, kryeministri Rama do të zhvillojë një mëngjes pune me Unionin e Sipërmarrësve të Francës MEDEF, nën drejtimin e z. Jean-Paul Agon, president i grupit L’Oréal dhe i komitetit Francë-Shqipëri në MEDEF, me pjesëmarrjen e 35 përfaqësuesve të kompanive prestigjoze franceze, si dhe të ftuar të tjerë nga bota e biznesit. Gjatë takimit do të prezantohen disa nga fushat prioritare për investime në Shqipëri, me interes të ndërsjellë për të dy vendet dhe më pas kryeministri Rama do të zhvillojë takime individuale me drejtues të sipërmarrjeve pjesëmarrëse, shkruan Top chanel, transmeton KosovaPress.

Të premten, në orën 12:30, do të zhvillohet ceremonia zyrtare e mirëseardhjes, e më pas në orën 13.00, Kryeministri Rama do të mbërrijë në Pallatin Elysee, ku do të mikpritet nga Presidenti francez Emmanuel Macron me të cilin do të mbajnë edhe një deklaratë për shtyp.

Më pas, në praninë e Kryeministrit Edi Rama dhe Presidentit francez Macron do të nënshkruhen disa marrëveshje ndërqeveritare dhe memorandume mirëkuptimi mes vendeve.

Në orën 14:45, Kryeministri Edi Rama dhe Presidenti Francez Macron do të zhvillojnë një takim kokë më kokë mes tyre.

Axhenda do të vijojë në orën 16.00 me vizitën dhe takimet në STATION F, inkubatori më i madh në botë i startup-eve dhe inovacionit, si dhe me mbledhjen inauguruese të Këshillit të Inovacionit Francë-Shqipëri –CIFA, ku do të marrë pjesë edhe Sekretarja franceze e Shtetit për Industrinë Numerike, përfaqësues të ministrive franceze të Jashtme dhe të Ekonomisë, si edhe operatorë të ndryshëm franceze e shqiptarë në fushën e inovacionit.

Së bashku me Kryeministrin Rama pjesë e delegacionit qeveritar do të jenë Ministrja e Arsimit dhe Sportit Ogerta Manastirliu, Ministrja e Turizmit dhe Mjedisit Mirela Kumbaro, Ministri i Ekonomisë, Kulturës dhe Inovacionit Blendi Gonxhe, Ministri i Shtetit për Pushtetin Vendor Arbjan Mazniku, si dhe Ministrja e Shtetit për Administratën Publike dhe Antikorrupsionin Adea Pirdeni.

Vazhdo të lexosh

Aktualitet

​Vdes ish-gazetari Arben Rugova

AGK-ja i shpreh ngushëllime familjes, miqve dhe komunitetit. 

Publikuar

1 muaj më parë

më

19 Mars, 2024

nga

Asociacioni i Gazetarëve të Kosovës me pikëllim ka marrë lajmin për vdekjen e gazetarit, Arben Rugova. Në njoftim thuhet se ai ka punuar në sektorin e arsimit dhe të politikës në disa media si Koha Ditore, Gazeta Express, Telegrafi, Gazeta Lajmi e të tjera.

Rugova punonte së fundi si Zyrtar për Qasje në Dokumente Publike në Ministrinë e Jashtme dhe të Diasporës. Për vdekjen e gazetarit Rugova, kanë njoftuar familjarët e të ndjerit në rrjetet sociale.

AGK-ja i shpreh ngushëllime familjes, miqve dhe komunitetit.

Vazhdo të lexosh

Të kërkuara