Edicioni i 20-të i Festës së Birrës ka nisur në hapësirën e re të Polit të Eventeve në Drenovë, duke mbledhur mbi 10 mijë vizitorë në natën e parë.

Më 12 gusht, arena e re u mbush me qytetarë, turistë dhe vizitorë nga vende të ndryshme, ndërsa festa solli muzikë, gastronomi, birrë dhe argëtim.

Kryeministri shqiptar Edi Rama publikoi pamje nga nata e parë, duke theksuar pjesëmarrjen e lartë dhe potencialin e hapësirës së re për organizimin e eventeve të mëdha.

Sipas tij, numri i sipërmarrjeve të përfshira në këtë edicion është trefishuar krahasuar me vitin e kaluar.

Zhvendosja në Polin e Eventeve në Drenovë i jep festivalit një dimension të ri, pasi hapësira është konceptuar për koncerte dhe aktivitete të mëdha kombëtare e ndërkombëtare.

Për vizitorët është siguruar edhe transport falas, me autobusë që nisen çdo 15 minuta nga ish-Agjencia në Pazarin e Vjetër drejt zonës së festivalit. Arena ka rreth 1 mijë vende parkimi dhe hapësira të dedikuara për koncerte, gastronomi dhe familje.

Festa do të vijojë edhe gjatë netëve në vazhdim, ndërsa hyrja për publikun është falas./A.K/

Shtetet e Bashkuara deklaruan të enjten se mund ta mbajnë bllokadën detare ndaj Iranit për një kohë të pacaktuar dhe se do të rrisin presionin ekonomik mbi Teheranin, në një kohë kur bisedimet për armëpushim kanë dështuar, oferta globale e naftës po bie dhe tensionet rajonale po rriten.

Sekretari i Mbrojtjes, Pete Hegseth, u tha gazetarëve se ushtria e SHBA-së ka kapacitetin për të mbajtur një prani detare në rajon për të zbatuar bllokadën ndaj Iranit, e cila i ka shkaktuar dëme të rënda ekonomike këtij vendi.

“Marina e Shteteve të Bashkuara mund ta mbajë një bllokadë të tillë për një kohë të pacaktuar sepse do të ndërrojmë anijet me rotacion, siç kemi bërë dhe do të vazhdojmë të bëjmë,” tha Hegseth për gazetarët gjatë një udhëtimi në Panama.

Sekretari i Thesarit, Scott Bessent, tha të enjten se Shtetet e Bashkuara planifikojnë t’i shkaktojnë edhe më shumë dëm financiar Iranit.

“Ndiqni me vëmendje njoftimet e javës së ardhshme, sepse ne do të aplikojmë masa të tilla që nuk janë parë kurrë në historinë e izolimit ekonomik të një vendi,” tha ai në një intervistë për programin “Rob Schmitt Tonight” në Newsmax.

Me dështimin e marrëveshjes tentative të qershorit për t’i dhënë fund luftës, Irani ka kërkuar të ushtrojë presion mbi Uashingtonin duke marrë kontrollin e ngushticës së Hormuzit.

Irani ka sulmuar disa anije që përpiqeshin të kalonin përmes kësaj rruge detare strategjike, përmes së cilës kalonte një e pesta e naftës dhe gazit natyror të lëngshëm të botës përpara se të niste lufta në shkurt.

Bi dy anije të kompanisë shtetërore të naftës të Abu Dhabit (Abu Dhabi National Oil Company) u sulmuan teksa po kalonin nëpër ngushticë të enjten mbrëma, njoftoi agjencia shtetërore e lajmeve e EBA-së, WAM. Qeveria e Emirateve të Bashkuara Arabe e dënoi atë si një sulm iranian.

Presidenti i SHBA-së, Donald Trump, është nën presion në vendin e tij për t’i dhënë fund një me një luftë që është mjaft jopopullore, ku çmimet e larta të karburantit po ulin nivelin e mbështetjes për të dhe potencialisht po zbehin kontrollin e partisë së tij në Kongres për zgjedhjet e mesmandatit në nëntor.

Trump ka pohuar vazhdimisht se SHBA ka “kontroll të plotë” mbi ngushticën, gjë që ka nxitur reagimin mohues të Iranit. Teherani ka deklaruar se nuk do të lejojë rihapjen e rrugës detare deri sa të plotësohen kushtet e tij. Këto kushte përfshijnë heqjen e sanksioneve ekonomike dhe lirimin e meve financiare të ngrira iraniane.

Trafiku i anijeve përmes Ngushticës së Hormuzit ra në tetë anije të martën, krahasuar me një mesatare 10-ditore prej rreth 12 anijesh, dhe 130 deri në 140 anije përpara fillimit të luftës.

Shtetet e Bashkuara e hoqën bllokadën e tyre ndaj transportit detar dhe porteve të Iranit për një muaj në mes të qershorit, por që nga ajo kohë e kanë rivendosur atë, duke prerë burimin kryesor të valutës së fortë për Teheranin dhe duke thelluar humbjet e mëparshme nga goditjet e kohës së luftës në infrastrukturën e tij energjetike.

Uashingtoni më parë kishte deklaruar se do ta hiqte bllokadën ndaj Iranit pasi Irani dhe Omani, të cilët ndodhen në të dyja anët e ngushticës, të arrijnë një marrëveshje për të rikthyer transportin tregtar detar. /BCC/

Baleti Kombëtar i Kosovës ka prezantuar mbrëmë dy shfaqje në kuadër të edicionit të 23-të të “International Bodrum Ballet Festival” në Turqi.

Trupa kosovare solli në skenë shfaqjet “Bolero”, me koreografi të Mehmet Balkan, dhe “Correr o Fado”, me koreografi të Daniel Cardoso.

Performancat u pritën ngrohtësisht nga publiku në Bodrum dhe u shoqëruan me duartrokitje të gjata, duke shënuar një tjetër prezantim ndërkombëtar të Baletit Kombëtar të Kosovës.

Kjo ishte pjesëmarrja e parë e trupës kosovare në këtë festival, i cili mbledh artistë dhe trupa baleti nga vende të ndryshme të botës.

Shfaqjet “Bolero” dhe “Correr o Fado” u prezantuan sërish mbrëmjen e 13 gushtit në skenën e festivalit në Bodrum./A.K/

Përfaqësuesit e tri partive opozitare Partisë Demokratike të Kosovës (PDK), Lidhjes Demokratike të Kosovës (LDK) dhe Aleancës për Ardhmërinë e Kosovës (AAK) — po kërkojnë që vazhdimi i seancës konstituive të legjislaturës së 11-të të mbahet sa më shpejt të jetë e mundur.

Në një konferencë të përbashkët për media, deputeti i PDK-së, Arian Tahiri, dhe ai i AAK-së, Besnik Tahiri, i bënë ftesë publike kryesuesit të seancës, Avni Dehari, që të ushtrojë përgjegjësitë e tij kushtetuese dhe të thërrasë vazhdimin e seancës në orën 11:00.

Deputeti Arian Tahiri konfirmoi se PDK-ja ka parashtruar edhe kërkesë zyrtare pranë kryesuesit.

“Kryesuesi duhet ta ushtrojë detyrën e vet në bazë të rregullores së punës së parlamentit, ta respektojë ligjin dhe Kushtetutën, si dhe ta thërrasë seancën në mënyrë që të konstituohet parlamenti e të rikthehet normaliteti. Po ashtu, i kemi ftuar të gjitha subjektet e tjera politike që të jenë të pranishme në orën 11:00.”Nga ana tjetër, edhe Lidhja Demokratike e Kosovës ka bërë të ditur se, pas sqarimit të qëndrimit të saj rreth negociatave me Lëvizjen Vetëvendosje, nuk sheh më asnjë arsye për të shtyrë konstituimin e institucioneve.

Gjatë adresimit, deputeti i AAK-së, Besnik Tahiri, e cilësoi bllokadën aktuale si një situatë emergjente për vendin, duke akuzuar për përpjekje të qëllimshme për parandalimin e funksionimit të Kuvendit.

“Rrethanat në të cilat ndodhet sot Kuvendi i Republikës së Kosovës tregojnë jo vetëm për një emergjencë kombëtare, por për një tendencë të shkatërrimit të rendit kushtetues. Kjo po pamundëson ushtrimin e mandatit të deputetit, aty ku na ka dhënë besimin sovrani,” u shpreh ai, duke paralajmëruar se opozita do të ndërmarrë edhe veprime të tjera politike nëse situata nuk zhbllokohet. /E.A/