Sulmet me dronë kanë goditur një termocentral të madh në qytetin sudanez të Port Sudanit, duke shkaktuar një “ndërprerje të plotë të energjisë elektrike”, tha ofruesi i energjisë elektrike i vendit.

Shpërthime dhe zjarre të mëdha janë raportuar pranë aeroportit kryesor ndërkombëtar të qytetit, ndërsa një forcë paraushtarake ka synuar qytetin kyç për të tretën ditë radhazi.

Fluturimet janë anuluar pasi dronët goditën aeroportin ndërkombëtar dhe një hotel pranë pallatit aktual presidencial, thonë raportet.

“Shoh një re të madhe dhe zjarr që përhapet përreth qytetit… dhe tani dëgjova gjithashtu se ishin si dy shpërthime të tjera të forta. Duket mjaft apokaliptike”, raporton mediat e huaja.

Tymi i zi i dendur mund të shihej në agim në horizontin e qytetit që dikur ishte i sigurt, ku mijëra njerëz që ikin nga lufta civile dyvjeçare kanë kërkuar strehim.

Të martën, kompania e energjisë elektrike e Sudanit tha se po vlerësonte dëmet në nënstacionin e saj, të cilat kanë ndërprerë furnizimin me ujë, shëndetësi dhe shërbime të tjera.

Një dron shënjestroi pjesën civile të aeroportit të Port Sudanit dhe një tjetër goditi bazën kryesore ushtarake në qendër të qytetit, thanë dëshmitarët për agjencinë e lajmeve AFP.

Rusia ka konfirmuar zyrtarisht se do të respektojë një armëpushim tre-ditor në Ukrainë, nga data 8 deri më 10 maj, në kuadër të përkujtimit të 80-vjetorit të fitores mbi Gjermaninë naziste në Luftën e Dytë Botërore, pavarësisht refuzimit publik të propozimit nga Presidenti ukrainas Volodymyr Zelensky.

Zëdhënësi i Kremlinit, Dmitry Peskov, deklaroi se urdhrat për ndalimin e përkohshëm të luftimeve janë dhënë tashmë nga Presidenti Vladimir Putin.

“Iniciativa e Presidentit Putin për një armëpushim të përkohshëm gjatë festave mbetet e rëndësishme dhe urdhrat përkatës janë lëshuar tashmë,” tha Peskov para gazetarëve në Moskë.

Megjithatë, ai paralajmëroi se armëpushimi është i njëanshëm dhe i kushtëzuar. Nëse Ukraina nuk e respekton ndalimin e përkohshëm të zjarrit, Rusia rezervon të drejtën për të reaguar:

“Pala ruse do të pushojë zjarrin, por nëse regjimi i Kievit nuk përgjigjet dhe vazhdon të godasë pozicionet dhe infrastrukturën tonë, atëherë do të ketë një përgjigje të menjëhershme dhe të ashpër,” shtoi Peskov.

Nga ana tjetër, Presidenti Zelensky e ka përshkruar ofertën e Kremlinit si një “shfaqje teatrale” propagandistike, duke theksuar se nuk ka gatishmëri për marrëveshje të përkohshme pa garanci të qarta ndërkombëtare.

Perëndimi, përfshirë SHBA-në dhe Bashkimin Evropian, nuk ka komentuar ende në mënyrë zyrtare mbi këtë armëpushim të shpallur nga Moska.

Qeveria britanike mund të kufizojë aplikimet për viza nga studentë që jetojnë në vende që konsiderohen më të prirura të kërkojnë azil, në një përpjekje për të ulur migracionin, tha një zyrtar qeveritar.

Ky hap vjen pasi Partia Laburiste e kryeministrit Keir Starmer u ndëshkua në zgjedhjet lokale në Angli javën e kaluar nga votues të zemëruar për çështje si migracioni i paligjshëm.

Qeveria pritet të publikojë javën e ardhshme një dokument politik, i njohur si “libri i bardhë”, që do të paraqesë planin se si synon të ulë migracionin neto, i cili arriti 728,000 persona në viti deri në qershor të vitit të kaluar.

“Libri i bardhë për migracionin që po përgatisim do të paraqesë një plan gjithëpërfshirës për të rivendosur rregull në sistemin tonë të thyer të imigracionit”, thuhet në një deklaratë të Ministrisë së Brendshme raporton Reuters.

Nivelet e larta të migracionit legal kanë dominuar prej kohësh debatin politik në Britani dhe ishin një nga shtysat kryesore për referendumin e Brexit-it në vitin 2016.

Nga 108.000 persona që kërkuan azil në Britani vitin e kaluar, 16.000 kishin viza studentore, tregojnë të dhënat qeveritare. Qeveria nuk jep një ndarje sipas kombësive të atyre që kishin viza studentore dhe që më pas kërkuan azil.

Por qeveria tha se personat nga Pakistani, Nigeria dhe Shri Lanka janë më të prirur të kërkojnë azil në Britani pasi mbërrijnë me vizë pune, studentore apo vizitori.

Pas rezultateve të dobëta të Partisë Laburiste në zgjedhjet lokale javën e kaluar, disa deputetë laburistë i bënë thirrje qeverisë të marrë një qasje më vendimtare për çështje si ulja e migracionit./REL/

Lideri konservator gjerman Friedrich Merz nuk arriti të sigurojë shumicën parlamentare për t’u zgjedhur kancelar të martën, duke shënuar një pengesë të papritur për koalicionin e tij të ri me Socialdemokratët (SPD).

Merz, 69 vjeç, i cili udhëhoqi CDU/CSU-në drejt fitores në zgjedhjet federale të shkurtit, mori vetëm 310 vota në Bundestag, gjashtë më pak se shumica e nevojshme prej 316 votash, njoftoi presidentja e Bundestagut, Julia Kloeckner.

Pas votimit, Kloeckner ndërpreu seancën parlamentare për t’u dhënë grupeve mundësinë të konsultohen mbi hapat e ardhshëm.

Parlamenti gjerman ka tani 14 ditë kohë për të zgjedhur Merzin ose një kandidat tjetër me shumicë absolute, me një votim të mundshëm që mund të zhvillohet sërish edhe gjatë së martës, raporton Reuters.

Edhe pse konservatorët fituan zgjedhjet me 28.5 për qind të votave, ata kishin nevojë për një partner për të formuar qeveri shumice.

Të hënën, ata nënshkruan një marrëveshje koalicioni me SPD-në, e cila kishte dalë me rezultatin më të dobët në historinë e saj pas Luftës së Dytë Botërore, vetëm 16.4 për qind.

Aleanca CDU/CSU e udhëhequr nga Merzi dhe partneri në koalicion, Partia Socialdemokrate (SPD), janë zotuar se do ta ringjallin ekonominë e dobësuar dhe se do ta rindërtojnë ushtrinë në një kohë kur presidenti i Shteteve të Bashkuara të Amerikës, Donald Trump, e ka vënë në dyshim të ardhmen e sigurisë dhe lidhjeve tregtare transatlantike.

Merz gjithashtu është zotuar se do ta frenojë emigracionin e parregullt dhe se do ta ndalë rritjen e partisë kundër emigracionit, Alternativa për Gjermaninë (AfD), e cila doli në vend të dytë në zgjedhjet e parakohshme të shkurtit.

AfD-ja u shpall të premten “grup ekstremist i krahut të djathtë” nga shërbimi i inteligjencës së brendshme të Gjermanisë – një veprim që ka nxitur një përplasje të re me administratën Trump, dhe kundër të cilit AfD-ja nisi veprime ligjore të hënën.

Merz, i cili ka përvojë të madhe në biznes, por zero përvojë në poste drejtuese qeveritare, në ceremoninë e nënshkrimit të së hënës premtoi “qeverisje të fortë, të besueshme dhe të planifikuar mirë”.

“Ne jetojmë në kohë ndryshimesh të thella, përmbysjesh të thella… dhe pasigurie të madhe, dhe kjo është arsyeja pse ne e dimë se është detyra jonë historike të udhëheqim këtë koalicion drejt suksesit“, tha ai./REL/