Lajmet

​Avokati i Thaçit ballafaqon dëshmitaren serbe me deklaratat e kaluara: Civilët serbë ishin të armatosur

Ishte Kehoe avokati i vetëm nga mbrojtësit e katër të akuzuarve, i cili e ka intervistuar dëshmitaren e shtatëmbëdhjetë të prokurorisë.

Published

on

Avokati i ish-presidentit Thaçi, Gregory Kehoe, e ka ballafaquar dëshmitaren e prokurorisë, Dragica Bozhaniq, me deklaratat e saj të mëparshme të cilat i ka dhënë në procese të tjera gjyqësore. Pas kësaj, ajo ka pranuar se civilët serb në fshatin e saj ishin të armatosur nga Serbia, para ngjarjes kur ajo thotë se UÇK kishte sulmuar banorët.

Ishte Kehoe avokati i vetëm nga mbrojtësit e katër të akuzuarve, i cili e ka intervistuar dëshmitaren e shtatëmbëdhjetë të prokurorisë. Ai e ka pyetur atë rreth armëve dhe municionit që kishin serbët në fshatin e saj.

Ajo fillimisht ka thënë se autoritet serbe u kishin dhënë armë serbëve civilë në Kosovë në një periudhë më të hershme se ngjarja e vitit 1998 për të cilin ajo ka dëshmuar para trupit gjykues në Hagë.

Avokati Kehoe: Kur gjërat u ndërlikuan në Kosovë në vitet ’90 a është e vërtetë që autoritet serbe ju dhanë armë civilëve nëpër fshatra?

Dëshmitarja Bozhaniq: Kjo ka ndodhur përpara, se në çfarë viti ka ndodhur kjo gjë nuk e mbaj mend, por nuk ka ndodhur atëherë, ka ndodhur më herët, nuk e di cili vit, por goxha më përpara sesa kanë ndodhur ngjarjet që përshkrova.

Avokati Kehoe: Por është fakt që burrat e fshatit tuaj kishin marrë armë nga Serbia, apo jo?

Dëshmitarja Bozhaniq: Po.

Avokati Kehoe: Autoritet serbe i jepnin armë civilëve edhe në demonstrata, kështu ka qenë?

Dëshmitarja Bozhaniq: Jo në protesta, armët janë shpërndarë për burrat, mendoj se armët i janë shpërndarë secilit burrë, ndërkohë bashkëshorti im nuk kishte armë, nuk ju dha asnjë armë, sepse nuk dinte të përdorte, dhe djali im ishte shumë i vogël, as ai nuk ka marrë armë.

Sipas dëshmitares ka thënë se armët u ishin dhënë në kohën e demonstratave të shqiptarëve në Kosovë.

Avokati Kehoe: Ditën kur ndodhi incidenti, shumë prej serbëve në fshat erdhën te shtëpia juaj, apo?

Dëshmitarja Bozhaniq: Po.

Avokati Kehoe: Kur ata erdhën në shtëpinë tuaj, ata kishin marrë me vete edhe armët që u kishin dhënë autoritet serbe, kështu?

Dëshmitarja Bozhaniq: Nuk e kam parë këtë.

Avokati Kehoe: Por ti e ke parë që ata kishin marrë pushkë apo armë me vete, e ke parë këtë gjë apo jo.

Dëshmitarja Bozhaniq: Nëse i kanë pasur me vete, i kanë pasur, por unë nuk i kam parë, vetëm kur filluan të shtënat, unë e mora vesh që ata kishin armë.

Avokati Kehoe: Kur filluan të shtënat ju e morët vesh qe burrat serb që ishin në shtëpinë tuaj kishin armë me vete, apo jo?

Dëshmitarja Bozhaniq: Po.

Avokati Kehoe: Kur mbërritën në shtëpinë tuaj ata gjithashtu kishin municion dhe jelekë antiplumb, kështu?

Dëshmitarja Bozhaniq: Jo, Slaavica Bandiq kishte një jelek që e kishte veshur, por nuk ishte e armatosur, por kishte një jelek të veshur.

Avokati Kehoe: Ishte një jelek që kishte edhe municion?

Dëshmitarja Bozhaniq: Jo, jo, ishte një jelek ushtarak, por nuk kishte asnjë gjë në të.

Gjatë kësaj bisede, avokati Kehoe ka lexuar një dëshmi që Bozhaniq e kishte dhënë në Beograd në vitin 2011 ku ajo kishte theksuar se të gjithë banorët serbë që kishin shkruar në shtëpinë e saj një natë para incidentit, ishin të armatosur.

Avokati Kehoe: Gjykatësi në Beograd ju pyet, më tregoni burrat a kishin armë më vete, dhe përgjigja që ju jepni është ‘po kishin’. Nga i kishin gjetur armët, përgjigja, ‘burri im nuk kishte armë, por ai nuk ishte me ushtrinë, as djali im nuk kishte, ndërkohë Nevica ishte oficerë rezervë i policisë në Rahovec, në Xerxë, edhe axha im kishte armë, ata kishin armë’. Pastaj gjykatësi ju pyet kush i kishte armët, më thoni emrat? Ti thua ‘Nevica’, por tjetër kush kishte armë, Dhe ti thua, ‘Nevica kishte një armë që ishte dhënë nga forcat rezervë. Edhe fqinjët kishin disa armë’…Për të gjithë individët që të pyet kryegjykatësi në Beograd, nëse kishin armë me vete përgjigja që ju keni dhënë është ‘po, ata kishin armë me vete’.

Kjo është pohuar pastaj nga dëshmitarja.

Avokati Kehoe: Të gjithë këta persona kur mbërritën në shtëpinë tuaj me datë 17, të gjithë kishin armë me vete, apo?

Dëshmitarja Bozhaniq: Po, por unë nuk i kam parë.

Avokati Kehoe: Atëherë nuk i ke treguar gjykatësit që nuk i ke parë armët.

Avokati Kehoe: Kur filloi shkëmbimi i zjarrit, u shtir në drejtim, të shtëpisë suaj nga shqiptarët dhe serbët ju përgjigjen zjarrit me zjarr, nga shtëpia juaj, po them që ka pasur shkëmbim zjarri. Ka qenë kështu apo jo?

Dëshmitarja Bozhaniq: Po. Ata ishin të parët që hapën zjarr duke shtënë në drejtim të shtëpisë sonë, menjëherë pasi thërriten emrin e bashkëshortit tim, tha në gjuhën tonë, mos dilni, hapën zjarr menjëherë nga të gjithë drejtimet, pastaj kush shtiu me armë e kush nuk shtiu nuk e di, ne ishim në bodrum, ne gratë, ndërkohë burrat ishin në katin tjetër.

Avokati Kehoe: Pra u shi me armë, nga shqiptarët, por ka pasur kundërpërgjigje nga burrat që kanë qenë në shtëpinë tua?

Dëshmitarja Bozhaniq: Po

Ajo ka folur edhe për një grua, Petra Kostiq, që sipas saj i ka treguar që ishin rrethuar në fshatin e tyre nga fqinjët.

Gjatë këtij intervistimi, dëshmitarja ka thënë se i ka njohur njerëzit e përfshirë në incidentin për të cilin ka folur, sepse sipas saj, ata ishin nga i njëjti fshat.

Me këtë ka përfunduar dëshmia e saj dhe procesi gjyqësor do të vazhdojë me 28 gusht me dëshmitarin e radhës.

Në këtë proces gjyqësor deri tani janë dëgjuar shtatëmbëdhjetë dëshmitarë të ZPS-së, vetëm dy prej tyre pa masa mbrojtëse dhe në seanca të hapura për publikun.

Gjykimi ndaj Thaçit dhe të tjerëve ka nisur me 3 prill me deklaratat hyrëse ku të gjithë janë deklaruar të pafajshëm për akuzat për krime të pretenduara të luftës.

Ndërsa ndodhen në qendrën e paraburgimit në Hagë prej nëntorit të vitit 2020.

Lajmet

Osmani pranoi letrat kredenciale nga ambasadori i ri i Hungarisë në Kosovë

Published

on

By

Presidentja Vjosa Osmani ka pranuar sot letrat kredenciale nga ambasadori i ri i Hungarisë në Prishtinë Laszlo Istvan Dux.

Gjatë ceremonisë, presidentja Osmani i uroi mirëseardhje ambasadorit Dux, duke theksuar faktin se Hungaria ka qenë ndër vendet e para që e ka njohur pavarësinë e Kosovës.

Osmani vlerësoi marrëdhëniet ndërmjet dy shteteve dhe shprehu përkushtimin për zgjerimin e mëtejshëm të bashkëpunimit në fusha me interes të përbashkët, veçanërisht në arsim dhe ekonomi, raporton KosovaPress.

Continue Reading

Lajmet

Punëtorët e “Pastrimit” në ditën e nëntë të grevës

Published

on

By

Punëtorët e ndërmarrjes “Pastrimi” kanë hyrë në ditën e nëntë të grevës para Komunës së Prishtinës, duke kërkuar pagesën e borxhit prej 2.7 milionë euro që komuna i detyrohet ndërmarrjes.

Pavarësisht ndryshimeve klimatike, ata qëndrojnë në tenda ditë e natë dhe paralajmërojnë se nuk do të tërhiqen pa u realizuar kërkesat.

Nënkryetari i Sindikatës, Shpend Qosa, në një intervistë për Ekonomia Online tha se janë në pritje të një takimi vendimtar me zyrtarët komunalë, ndërsa theksoi se kërkesat kryesore janë sigurimi i naftës, pagave dhe stabilizimi i kompanisë.

Sot kemi hyrë në ditë e nëntë të grevës, ne e kemi pasur një takim me zyrtarët komunal jemi në shqyrtim të kërkesave tona edhe sot jemi në pritje të një takimi. Deri sa të gjejmë një zgjidhje për kërkesat tona. Diçka konkrete nuk kemi që do të arrijmë një zgjedhje ne vazhdojmë punën dhe dalim në punë. Ato kërkesa tona që i kemi në takim kemi folur, edhe komuna ka dhënë disa zgjidhje të saj të cilat i kemi shqyrtuar. Sot i presim në takim për të arrijmë një marrëveshje, realisht kërkesat tona janë me pasur naftë paga dhe me stabilizuar gjendja e kompanisë. Punëtorët pagat i kanë marr”, ka thënë Qosa.

Punëtori Blerim Hajdini, i cili punon prej 16 vitesh në këtë ndërmarrje, tha se greva nuk do të ndalet pa u plotësuar kërkesat.

Ai shprehu shqetësimin për pagat e ulëta dhe borxhet personale, duke theksuar se paga mujore prej 425 euro është e pamjaftueshme për të përballuar jetesën.

Jemi në grevë deri të na plotësohet kërkesat tona dhe kushtet tona nuk e kemi ndërmend ta ndalim grevën. Unë punoj që 16 vite këtu të gjithë kanë kredi të majme, unë i kam 15 euro kredi nuk mund t’ia dal assesi për arsye se paga është shumë vogël, e kemi 425 euro në kontratë. Kërkesa jonë është të na kthej borxhin 100 për qind dhe ta ndërpresin privatin menjëherë”, shtoi ai.

Continue Reading

Lajmet

Ministria e Shëndetësisë paralajmëron 100 inspektorë të rinj për luftën kundër duhanit

Published

on

By

Ministria e Shëndetësisë po planifikon t’i punësojë edhe 100 inspektorë me qëllim të rritjes së kontrollit të përdorimit të duhanit në Kosovë, kështu tha ministri në detyrë i Shëndetësisë, Arben Vitia gjatë një konference për media në prag të Ditës Botërore Kundër Duhanit.

Ministri i Shëndetësisë, Arben Vitia tha se është lajm i mirë që në Kosovë ka rënie të përdorimit të duhanit për shkak të politikave të ndërmarra, por shtoi se ende duhet punë.

Vitia theksoi se miratimi dhe zbatimi i udhëzimit administrativ për vërejtjet e kombinuara shëndetësore në pakot e duhanit ka dhënë rezultatet e tij.

Në Kosovë sipas STEPS përdorimi i duhanit është në rënie krahasuar me vitin 2011 apo hulumtimin paraprak, që natyrisht kjo është një lajm i mirë, ky është trend inkurajues që dëshmon efektivitetin e politikave të deritanishme, por një trend i pamjaftueshëm për qëllimet që ia kemi bërë vetes,” tha ai.

Ministri në detyrë i Shëndetësisë, Arben Vitia tha se me Ministrinë e Financave po shohin mundësinë t’i shtojnë kapacitetet inspektuese edhe për 100 inspektorë me qëllim të rritjes më të madhe të kontrollit të duhanit.

Rritja e akcizës në 65 euro për kilogram sipas vendimit të qeverisë së Kosovës është tjetër sinjal që politikat fiskale po japin efekt… Kemi fuqizuar edhe kapacitetin inspektues përmes rekrutimit të rreth 30 inspektorëve të rinj që kanë ndihmuar në zbatim të ligjit, por natyrisht kjo akoma nuk është e mjaftueshme dhe vazhdon të mbetet sfidë serioze, prandaj kohëve të fundit në bashkëpunim me ministrinë e Financave po përgatisim një plan për angazhimin e rreth 100 vetave shtesë që ky ligj të zbatohet në përpikëri në të gjitha vendet ku nuk duhet të pihet duhani,” theksoi Vitia.

 

Continue Reading

Lajmet

PDK-ja dorëzoi zyrtarisht në ZRRE kundërshtimin për daljen e bizneseve në tregun e lirë

Published

on

By

Partia Demokratike e Kosovës (PDK) ka dorëzuar sot në mënyrë zyrtare kundërshtimin e saj ndaj vendimit të Zyrës së Rregullatorit për Energji (ZRRE) për daljen e bizneseve në tregun e lirë, duke e cilësuar këtë vendim si të paligjshëm dhe të papërballueshëm për qytetarët.

Në një konferencë për media, deputeti i PDK-së, Abelard Tahiri, bëri të ditur se partia ka ndërmarrë hapa ligjorë për ta sfiduar këtë vendim brenda afateve të përcaktuara.

Ngritja e çmimit e ka bërë të pamundur përballimin e kësaj kostoje të lartë nga rritja e çmimeve që do të pasojë nga vendimet e paligjshme të ZRRE-së. Ne sot, duke ndjekur hapat ligjorë, e kemi dorëzuar kundërshtimin tonë administratës në ZRRE. Jemi të bindur që qëndrimet e tyre do të jenë të njëjta. Ne do të presim 15 ditë për ta anuluar këtë. Nëse brenda 15 ditëve ata nuk e anulojnë, ne do ta procedojmë në departament,” tha Tahiri.

Continue Reading

Të kërkuara