Aktualitet

ATK ka mbledhur mbi 355 milionë euro të hyra për gjashtë muaj

Sipas ministrit të financave, parakusht për rritjen e suksesit është besimi i qytetarëve në institucionet e shtetit.

Published

3 years ago

July 12, 2022

UBT.News

Administrata Tatimore e Kosovës për gjashtë muajt e parë të këtij viti ka mbledhur mbi 355 milionë euro të hyra. Të dhënat janë prezantuar nga drejtori i këtij institucioni, Ilir Murtezaj, sipas të cilit, në rritjen e të hyrave ka ndikuar ndër të tjera fuqizimi i kontrollit të brendshëm dhe rritja e efikasitetit në mbledhjen e borxheve.

Ndërsa ministri i Financave, Hekuran Murati u ka bërë thirrje qytetarëve të kërkojnë kupon fiskal në çdo blerje, derisa ka theksuar se planifikojnë shtimin e numrit të inspektorëve.

Drejtori i ATK-së ka thënë se e kanë tejkaluar planin e të hyrave për 26 milionë euro, ndërsa ka shtuar se kanë shënuar rritje të të hyrave për 22% në raport me periudhën e njëjtë të vitit 2021.

“Gjatë kësaj periudhe raportuese të gjashtë mujorit ka arritur të mbledh të hyrat tatimore mbi 355 milionë euro, të hyra këto të cilat janë falë punës së madhe që është bërë nga stafi i ATK-së por njëkohësisht edhe deklarimi dhe pagesa e bizneseve që është bërë në respektim të kërkesave ligjore… Kjo ka bërë që gjatë kësaj periudhe të arrijmë të tejkalojmë planifikimet për 26.5 milionë euro apo 8.1%, si dhe të kemi tejkalim të të hyrave për periudhën e njëjtë të vitit të kaluar për 22.9% apo 66.3 milionë euro”, ka thënë ai.

Sipas Murtezajt, ndër faktorët që kanë ndikuar në rritjen e të hyrave janë edhe ngritja e përgjegjësisë dhe llogaridhënies, rritja e efikasitetit në mbledhjen e borxheve, dixhitalizimi i shërbimeve ndaj tatimpaguesve 100%, shërbimet profesionale, rritja e transparencës, rritja e bashkëpunimit me institucionet vendore e ndërkombëtare dhe zbatimi i rekomandimeve nga këto të fundit.

Ndërsa sipas ministrit të financave, Hekuran Murati, parakusht për rritjen e suksesit është besimi i qytetarëve në institucionet e shtetit.

“Jemi të interesuar të shohim edhe më tutje forcim të institucioneve shtetërore, normalisht kjo vije fillimisht me rritjen e besimit në to pra besimit në institucione nga ana e qytetarëve pastaj edhe forcim duke rritë integritetin por edhe duke përmirësuar sistemet të cilat edhe nëse do dikush me dalë pastaj jashtë kornizave të integritetit do ta ketë të pamundur sepse sistemi i identifikon dhe nuk i lejon”, ka thënë Murati.

Ndërsa, drejtori i ATK-së ka pranuar që vazhdojnë të përballen me sfida edhe në pjesën veriore të vendit. Lidhur me këtë, ministri i Financave ka thënë se është një proces gradual por sipas tij po vazhdon me një ritëm shumë më të shpejtë se vitet e kaluara.

“Për pjesën veriore të vendit, normalisht që ka sfida siç e tha edhe drejtori, ne në gjithë territorin po bëjmë thirrje që vet qytetarët të kërkojnë kuponin fiskal në mënyrë që çdo transaksion të jetë i fiskalizuar por po ashtu më duhet të theksoj se vetëm vitin e fundit ka pasur më shumë aksione sesa ndoshta komplet dhjetë vitet paraprake bashkë. Besoj e dini sidomos dogana, ndalimi i kontrabandës, luftimi i kontrabandës, por edhe ndërhyrjet e policisë për të luftuar aktivitetet e tjera ilegale kështu që është një proces gradual pro prapë po e them tempoja është më e shpejtë dhe më e mirë sesa që ka qenë ndoshta një dekadë më herët komplet bashkërisht. Është sfidë por po adresohet”, ka thënë Murati.

Murati gjithashtu ka thënë se vitin e ardhshëm pritet të shtohet numri i inspektorëve.

“Sa i përket shtimit të stafit ne për vitin e ardhshëm kemi paraparë të ketë shtim të inspektorëve pra në kornizën afatmesme të shpenzimeve janë alokuar disa pozita, qoftë për Administratën Tatimore, Doganën apo inspektorate të tjera, inspektorati i punës, tregut e të tjera, pra pritet që shumë shpejtë të ketë lëvizje edhe në atë drejtim, megjithatë, administrata publike në përgjithësi ka edhe sfida të tjera të cilat janë trashëgimi e disa ligjeve që janë miratuar më herët dhe kanë bërë një centralizim ndoshta të rekrutimit pa i përshtat kapacitetet rekrutuesen njëkohësisht”, ka thënë ai.

Në konferencën ku u prezantuan zhvillimet për periudhën janar-qershor 2022, drejtori i ATK-së ka thënë se janë duke punuar për gjetjen e një modaliteti për rimbursimin e qytetarëve nga kuponët fiskal, përmes ndonjë loje shpërblyese apo forme tjetër rimbursimi.

Sipas tij, po synohet nxitja e lëshimit të kuponëve fiskal dhe njëkohësisht përfitimi i qytetarëve nga një fushatë e tillë.

Ndërsa në mesin e sfidave, Murtezaj ka përmendur finalizimin dhe implementimin e projektit të IT-së, zvogëlimin e stokut të borxheve, përmirësimin e regjistrit të tatimpaguesve dhe reformën në kontrollin tatimor dhe administrimin e TVSH-së.

Bota

Trump thotë ‘është mirë që jam në Skoci’, zbarkon për një udhëtim katër-ditor

Published

20 hours ago

July 26, 2025

UBTnews

Presidenti amerikan Donald Trump tha se “është shumë mirë të jesh në Skoci” teksa zbarkoi për një vizitë private katër-ditore.

Pasi Air Force One zbarkoi në Aeroportin e Prestwick, pak para orës 20:30, presidenti amerikan u prit nga Sekretari Skocez Ian Murray dhe Warren Stephens, Ambasadori i SHBA-së në Mbretërinë e Bashkuar.

Trump foli me gazetarët përpara se autokolona presidenciale të nisej për në resortin e tij Turnberry, në South Ayrshire, ku pritet të luajë golf të shtunën, shkruan BBC.

Duke folur për Sir Keir Starmer, të cilin do ta takojë të hënën, ai tha: “Më pëlqen kryeministri juaj. Ai është pak më liberal se unë – siç ndoshta e keni dëgjuar – por është një njeri i mirë. Ai arriti një marrëveshje tregtare.”

Autokolona – e cila përmbante më shumë se dy duzina automjetesh – hyri në resortin e golfit Turnberry të Trump rreth orës 21:30, i shoqëruar nga automjete të Policisë së Skocisë dhe ekipe ambulancash.

Ndërsa mbërriti në hotelin luksoz, automjeti i presidentit – i njohur si Bisha – kaloi pranë një grupi të vogël protestuesish.

Trump do të qëndrojë në Turnberry gjatë fundjavës përpara se të shkojë në pronën e tij të dytë në Aberdeenshire, ku do të hapë një fushë të re me 18 vrima në Menie.

Ai u tha gazetarëve se një yll i ndjerë i James Bond luajti një rol vendimtar në projekt.

Trump tha: “Sean Connery më ndihmoi të merrja lejet – nëse nuk do të ishte për Sean Connery nuk do t’i kishim ato fusha të shkëlqyera.”

Bota

Monumenti për viktimat e gjenocidit të Srebrenicës u përurua në Paris

Published

2 days ago

July 25, 2025

UBTnews

Anëtari boshnjak i Presidencës së Bosnjës dhe Hercegovinës, Denis Beçiroviq dhe kryetarja e Bashkisë së metropolit francez, Anne Hidalgo përuruan sot në Paris monumentin kushtuar viktimave të gjenocidit të Srebrenicës.

Monumenti ndodhet në rrugicën e monumenteve përkujtimore në varrezat Père Lachaise, pranë atyre të dedikuara për viktimat e gjenocidit në Ruandë dhe ushtarëve francezë të vrarë në Luftën e Dytë Botërore.

Ai u ngrit me rastin e 30-vjetorit të gjenocidit kundër boshnjakëve, dhe iniciativa për ndërtimin e tij erdhi nga organizata joqeveritare Solidariteti me Bosnjën dhe Hercegovinën (SIBH-Francë), me mbështetjen e autoriteteve të qytetit të Parisit, transmetojnë mediat boshnjake.

“Kujtimi i gjenocidit të Srebrenicës duhet të jetë themeli për ndërtimin e një të ardhmeje më të mirë, më të sigurt dhe më të drejtë, sepse vetëm me të vërtetën, respektin për viktimat dhe përgjegjësinë mund të sigurohemi që gjenocidi të mos ndodhë më kurrë“, tha Beçiroviq.

Gjenocidi i Srebrenicës, i kryer nga forcat serbe të Bosnjës, konsiderohet krimi më i keq i luftës i kryer në Evropë që nga Lufta e Dytë Botërore. Më shumë se 8 mijë burra dhe djem boshnjakë u vranë në masakrën serbe në vitin 1995.

Kulturë

Dhoma e Tregtisë dhe Industrisë: Qeveria ta shtyjë procesin e liberalizimit të tregut energjetik

Published

2 days ago

July 25, 2025

UBT News

Dhoma e Tregtisë dhe Industrisë Kosovë dorëzon në Qeverinë e Kosovës kërkesën që të shtyhet procesi i liberalizimit të tregut energjetik.

Në konferencë të jashtëzakonshme për media, para objektit të Qeverisë, drejtori ekzekutiv i Dhomës së Tregtisë dhe Industrisë, Kushtrim Ahmeti tha se ky proces po vazhdon të përcillet me shkelje.

“Kemi edhe paralajmërime por edhe vet kërcënimet nga KEK-u sa i përket furnizimit me energji elektrike, e cila tashmë po u dërgon të gjitha bizneseve njoftimet kërcënuese e do tua ndërpres energjinë elektrike me 30 të këtij muaji. Asnjë biznes deri më sot nuk e ka marrë asnjë faturë sa u përket shpenzimeve që i ka bërë në periudhën qershor edhe korrik. Ky është një fakt i radhës qe dëshmon se i gjithë procesi i liberalizimit të energjisë elektrike në Kosovë është përcjell dhe vazhdon të përcjellët me një numër të madh të shkeljeve”, tha ai.

ZRRE dje ka njoftuar bizneset lidhur me përfundimin e periudhës së furnizimit të garantuar nga Furnizuesi i Mundësisë së Fundit.

Sipas ZRRE-së të gjithë konsumatorët që aktualisht furnizohen me energji elektrike nga (KEK) si Furnizues i Mundësisë së Fundit (FMF), se periudha maksimale e këtij furnizimi të garantuar përfundon më 30.07.2025, për konsumatorët që kanë shfrytëzuar këtë shërbim nga data 1 qershor 2025.

Gjithashtu edhe KEK ditë më parë ka njofuar se 30 korriku është data e fundit që do të furnizojë me energji elektrike të gjithë konsumatorët që nuk kanë gjetur furnizues në treg të hapur.

Në anën tjetër, më 12 qershor 2025 Bordi i Zyrës së Rregullatorit për Energji në mbledhjen e saj ka caktuar subjektin juridik KEK si Furnizues të Mundësisë së Fundit për periudhë gjashtë mujore.

Bota

ShBA kundërshton propozimin e Macron për njohjen e shtetit palestinez: Vendim i njëanshëm

Published

2 days ago

July 25, 2025

UBTnews

Kreu i diplomacisë amerikane e bëri të qartë të enjten se “kundërshton fuqishëm” vendimin e presidentit francez Emmanuel Macron për të njohur shtetin e Palestinës gjatë Asamblesë së Përgjithshme të OKB-së në shtator.

Ai e ka cilësuar si një vendim të njëanshëm dhe që, sipas tij, e largon paqen.

“Ky vendim i njëanshëm nuk shërben për asgjë tjetër përveçse për propagandën e Hamasit dhe përbën një hap prapa për procesin e paqes. Është një shuplakë në fytyrën e viktimave të 7 tetorit 2023,” deklaroi Sekretari amerikan i Shtetit, Marco Rubio, përmes një postimi në platformën X.

Ndërkohë, ambasadori amerikan në Izrael, Mike Huckabee, kishte deklaruar në muajin qershor se nuk e konsideron më prioritet të politikës së jashtme amerikane krijimin e një shteti të pavarur palestinez.