Një person ka humbur jetën si pasojë e lëndimeve të rënda që ka pësuar teksa ishte duke punuar në një kompani në rrugën “Industria” në Shtime.

Ngjarja ka ndodhur gjatë ditës së djeshme, ku viktima, burrë, u dërgua me urgjencë në Emergjencën e Ferizajt, por mjekët vetëm kanë mund të konstatojnë vdekjen e tij.

Në lidhje me këtë rast, Policia e Kosovës ka arrestuar një person i cili, me vendim të prokurorit, është dërguar në mbajtje për 48 orë.

Njësitë relevante policore kanë dalë në vendin e ngjarjes dhe kanë nisur hetimet për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Me urdhër të prokurorit, trupi i pajetë i viktimës është dërguar në Institutin e Mjekësisë Ligjore për obduksion.

Policia e Kosovës ka njoftuar se mbrëmjen e së mërkurës është gjetur pa shenja jete një burrë në Prishtinë.

Ngjarja është raportuar rreth orës 23:50, me ç’rast në vendin e ngjarjes kanë dalë menjëherë mjekët dhe njësitë relevante policore.

Sipas njoftimit zyrtar, mjeku kujdestar ka konstatuar vdekjen e viktimës në vendngjarje.

Me vendim të prokurorit të shtetit, trupi i pajetë është dërguar në Institutin e Mjekësisë Ligjore për obduksion, ndërsa rasti po hetohet si “hetim mbi vdekjen” për të zbardhur rrethanat e plota të ngjarjes.

Policia e Kosovës në Ferizaj ka njoftuar se gjatë dy operacioneve të ndara ka arritur të sekuestrojë tri armë zjarri dhe municion.

Rasti i parë u regjistrua më 13 prill, ku pas informacioneve të siguruara nga hetuesit rajonalë, është identifikuar 47-vjeçari me iniciale G.R. Gjatë kontrollit në banesën e tij në rrugën “12 Qershori”, policia gjeti dhe sekuestroi një pistoletë, ndërsa ndaj të dyshuarit është iniciuar rasti për armëmbajtje pa leje në procedurë të rregullt.

Ndërkohë, më 15 prill, policia ndërhyri në një rast kanosjeje në fshatin Nekodim, pas një mosmarrëveshjeje verbal mes dy personave.

Pas intervistimit, u konfirmua se i dyshuari P.R., 35-vjeçar, kishte kanosur personin tjetër.

Me autorizim të prokurorit, policia kreu kontroll në shtëpinë e tij, ku gjeti dhe sekuestroi një pistoletë me dy karikatorë, një pushkë gjahu dhe një sasi të municionit. Ndaj tij është iniciuar rasti për “Kanosje”, ndërsa hetuesit po vazhdojnë me verifikimin e dokumentacionit të armëve të gjetura.

Në kuadër të kontrolleve rutinë për sigurinë publike, Policia e Kosovës ka kryer një bastisje në një shtëpi në fshatin Vajnik të Skenderajt, mbrëmjen e se martës.

Gjatë këtij kontrolli, zyrtarët policorë kanë gjetur dhe sekuestruar tri pistoleta, dy armë të gjata dhe 695 fishekë të kalibrave të ndryshëm, të cilat posedoheshin pa leje përkatëse.

I dyshuari është shoqëruar në stacionin policor dhe pas intervistimit, me vendim të prokurorit, është liruar.

Rasti ka kaluar për trajtim në procedurë të rregullt nën kualifikimin “Armëmbajtje pa leje”.