Lajmet

AAK kërkon të dihet vlera e koeficientit të Ligjit të Pagave

Nga AAK thonë se mospërcaktimi i vlerës së koeficienteve është mashtrim.

Published

3 years ago

November 2, 2022

Betim Gashi

Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri po e konsideron dëshpëruese mospërfshirjen e Ligjit të Pagave në buxhetin e vitit 2023, derisa shprehet se mospërcaktimi i vlerës së koeficienteve është mashtrim.

Ai këto komente i bëri pas takimit me kryetarin e Sindikatës së Bashkuar për Arsim, Shkencë dhe Kulturë (SBAShK), Rrahman Jasharaj, i cili po ashtu shprehu brenga që ende nuk dihet vlera e koeficienteve.

Në këtë takim krahas deputetit Tahiri, morën pjesë edhe deputetët tjerë të AAK-së, si Bekë Berisha dhe Albana Bytyqi. Tahiri u shpreh me këtë qasje shihet qartë se Qeveria e Kosovës nuk dëshiron ta fut në zbatim Ligjin e Pagave gjatë vitit 2023.

“Ka një mungesë të madhe të transparencës që lidhet me vlerën e koeficientit se çka është vlera e koeficientit më thënë më troç në këtë ligj të Pagave nuk dihet sa është rroga e një zyrtari publik. Gjendjen e bënë më të keqe fakti që në buxhetin që e kemi pranuar ne në Kuvend nuk ekziston as buxhetimi i Ligjit të Pagave dhe njëkohësisht nuk ekziston as vlera e Ligjit të Pagave. AAK kërkon nga Qeveria që me urgjencë të përcaktoj vlerën dhe të buxhetojë Ligjin e Pagave për të hyrë më 1 janar të vitit 2023. Në rrethanat dhe përmbajtjen që sot e ka Ligji i Pagave dhe Ligjit për Buxhet shihet që qartë që kjo Qeveri nuk do ta fut në zbatim rritjen e pagave, ligjin e Pagave në vitin 2023”, tha ai.

Deputeti i AAK-së, Besnik Tahiri mos përfshira e Ligjit të Pagave në buxhetin e vitit 2023 është mashtrim dhe lojë për kapje të sektorit publik.

Tahiri bëri thirrje që të ndalet lufta ndaj sindikatave, dhe kjo luftë të kthehet në luftë të përbashkët për Qeverinë dhe opozitën për ta jetësuar Ligjin e Pagave.

“Duhet të ndalet lufta ndaj sindikatave dhe kjo luftë të kthehet në luftë të përbashkët të Qeverisë dhe opozitës për ta bërë dhe jetësuar Ligjin e Pagave, kjo qasje e dëmton Kosovën, dëmton organizimin e Administratës Shtetërore dhe mbi të gjitha e cenon të drejtën elementare të zyrtarëve publikë që në këtë kohë të vështirë të paguhen dhe të kenë trajtim të dinjitetshëm. Ky ligj nuk e ka të përcaktuar koeficientin, ky nuk është ligj i pagave, ky është ligj i hierarkisë protokollare të njerëzve që janë në administratë të shtetit, kjo përcaktohet me rregullore dhe punë të tjera. Është tepër dëshpëruese që të shihet që në Ligjin për Buxhet të vitit 2023 të mos ekzistojë buxhetimi i Ligjit të Pagave, rrjedhimisht të mos dihet vlera e koeficientit, ky është një mashtrim i pa precedent dhe një mashtrim që i bëhet 80 mijë njerëzve që punojnë në administratën publike. Loja që bëhet me sektorin publik është lojë për kapje, kapja e shtetit ka vazhduar në shumë institucione tani synimi është me u kap edhe organizata sindikale”, tha Tahiri.

Kryetari i SBAShK-ut, Rrahman Jasharaj tha se brenda kryesore e tyre është mos përcaktimi i vlerës së koeficientit. Ai dyshon se është mashtrimi i radhës ngase mund të kenë koeficient të larë por me vlerë më të ulët.

Duke bërë thirrje që deputetët e Kuvendit të Kosovës të bëhen zëri i sindikatave, Jasharaj u shpreh se mund të ketë zhgënjim kur për vlera e koeficientit varet nga “teket” e ministrit të Financave, Hekuran Murati.

“Vërejtja jonë e kamotshme është pse ligji është vonuar kaq dhe pikërisht kjo vonesë e ligjit nga dërgoi te telashet dhe te greva, ngase po ta kishte realizuar premtimin Sveçla dhe partia në pushtet që na kishin thënë se më 31 mars do të shkonte në parlament, nuk ndodhi as në qershor dhe na doli pastaj ajo kërkesa 100 euro që u demonizua disi…. Në muajin mars, kemi dorëzuar versionin për secilin koeficient, por brengë e jona është dhe dyshojmë se është një mashtrim i radhës kur nuk përcaktohet qartë vlera e koeficientit ngase mund të kemi koeficient në dukje tepër të mëdha, por kur vlera nuk dihet apo bëhet sipas tekeve të ministrit Murati mund të ketë një zhgënjim të ardhshëm ku shihet se ai e cakton vlerën dhe pagat mund të mbesin këto që janë, dhe ne nuk kemi çka fshehim kemi pritur që Ligji i Pagave ta bëjë sistemin arsimor në vendin meritor dhe të kemi paga më të mëdha nga këto që janë”, theksoi ai.

Jasharaj shpreson që nga janari të nisë zbatimi i këtij ligji, në të kundërtën ai thotë se Qeveria do të bëjë lojëra të ndryshme.

“Uroj që janari të na e sjellë ligjin, por një ligj do si do, por një ligj me kërkesat tona me një koeficiente të ditur dhe të jetë janari e jo të jetë siç është thënë atje pas 8 muaj, sepse në ata 8 muaj mund të bëhen lojëra të ndryshme nga qeveria dhe të mos e kemi fare ligjin e shumëpritur për paga”, tha Jasharaj.

Tashmë për Projektligjin aktual të Pagave kanë përfunduar diskutime publike.

Grupi Parlamentar i AAK-së gjatë ditës së sotme do të takohet edhe me Sindikatën e Pavarur të Administratës së Kosovës dhe Sindikatën e Policisë së Kosovës.

Up Next

Homazhe në 33-vjetorin e rënies së Fahri Fazliut dhe Afrim Zhitisë

Don't Miss

Koreja Veriore lëshon gjashtë raketa të tjera, duke e çuar totalin në 25 në ditë

Lajmet

Haradinaj takohet me ambasadoren greke, kërkon njohjen e Kosovës nga Greqia

Published

8 minutes ago

September 18, 2025

UBTnews

Kreu i AAK-së, Ramush Haradinaj, ka takuar sot shefen e Zyrës Ndërlidhëse të Greqisë, Heleni Vakali.

Haradinaj përmes një postimi në Facebook ka shkruar se temë e diskutimit ishin zhvillimet në Kosovë dhe rajon si dhe raportet mes dy vendeve, transmeton KosovaPress.

“Sot prita në selinë e Aleancës Shefen e Zyrës Ndërlidhëse të Greqisë, znj. Heleni Vakali.Biseduam për zhvillimet në Kosovë dhe rajon, për raportet ndërmjet dy vendeve tona, si dhe për mundësitë e thellimit të mëtejshëm të tyre“, ka shkruar ai.

Tutje, Haradinaj tha se ka kërkuar edhe njohjen e Kosovës nga Greqia, duke potencuar se nga kjo do të përfitonin të dy vendet dhe i gjithë rajoni.

“Ambasadores Vakali i shpreha mirënjohje për mbështetjen e dhënë proceseve për Kosovën dhe e ftova që të mbështesë vendin tonë në angazhimet për njohjen e shtetit të Kosovës nga Greqia dhe në proceset e integrimit euro-atlantik. Njohja e Kosovës nga Greqia do të krijonte horizonte të reja zhvillimi, nga e cila do të përfitonin jo vetëm vendet tona, por i gjithë rajoni“, përfundoi ai./D.B/KP

Lajmet

Armatimi i kapur në Zveçan, Elshani: Dyshohet se lidhen me të akuzuarin Nemanja Radivojeviq – Gandi

Published

35 minutes ago

September 18, 2025

UBTnews

Policia e Kosovës ka gjetur armë, uniforma të ushtrisë serbe, karikatorë me municion e helmeta të cilat besohet që lidhen me rastin e sulmit terrorist në Banjskë.

Këtë e ka konfirmuar për KosovaPress, zëvendëskomandanti i Policisë së Kosovës për rajonin e veriut, Veton Elshani i cili tha se në një rimorkio u gjetën të gjitha këto mjete dhe dyshohet se i takojnë të akuzuarit për sulmin terrorist në Banjskë, Nemanja Radivojeviq.

Elshani tha se për rastin asnjë person nuk është arrestuar.

“Sot kemi pranuar një informacion lidhur me një vend të dyshimtë që dyshohet se mund të ketë armë në një prokolicë të veturës prapa veturës janë gjetur uniforma, gjoksore me vende ku mund të lihen armët pesë karikatorë te mbushur me municion besojmë janë të armës AK47, mandej kaqketa për kamuflazh, helmeta e gjera të tilla. Ne dyshojmë se ky vend lidher me një person i cili është i dyshimtë dhe është në kërkim nga ana e Prokurorisë Speciale. Nuk kemi persona të arrestuar me këtë rast, besojmë që lidhet me atë person…i cili është në kërkim për rastin e Banjskës… Nemanja Radivojeviq me pseudonimin Gandi”, tha ai./D.B/KP

Lajmet

Spanja diskuton tërheqjen nga Botërori 2026 nëse kualifikohet Izraeli

Published

1 hour ago

September 18, 2025

UBT News

Qeveria e Spanjës ka sugjeruar largimin nga Botërori 2026, nëse Izraeli kualifikohet në fazën e grupeve. Kjo konsiderohet një situatë e pazakontë pasi që sjell kërcënim te FIFA.

Spanja është një ndër favoritët për të fituar trofeun më të rëndësishëm, ndërsa mendimi për t’u tërhequr nga Botërori lidhet enkas me veprimet e Izraelit në Gaza.

Madje, vetë kryeministri i Spanjës, Pedro Sançes, ka kërkuar përjashtimin e Izraelit nga kompeticionet e futbollit.Kjo për shkak se kryeministri spanjoll pretendon se Izraeli duhet të trajtohet si Rusia, përsa i përket çështjes së luftës.

Patxi Lopez i ka sugjeruar Qeverisë që të votojë për tërheqjen nga Botërori 2026, nëse Izraeli kualifikohet dhe ka mundësinë për të luajtur në grupe.

Shtetet e Bashkuara të Amerikës, Kanadaja dhe Meksiko do të presin kompeticionin në verën e ardhshme./S.K/EO/

Aktualitet

Rektori i UBT-së, folës kryesor në Konferencën Shkencore Ndërkombëtare të Institutit Pedagogjik të Kosovës

Published

2 hours ago

September 18, 2025

Driton Iseni

Në kuadër të Konferencës Shkencore Ndërkombëtare me temën: “Arsimi gjatë gjithë jetës: qasje gjithëpërfshirëse nga fëmijëria e hershme deri te arsimi profesional”, të organizuar nga Instituti Pedagogjik i Kosovës, Rektori i UBT-së, Prof. Dr. Edmond Hajrizi, ishte folës kryesor, ku ndau vizionin e tij për transformimin e arsimit në Kosovë dhe rajon.

Në fjalën e tij, Rektori Hajrizi theksoi se nuk mjafton vetëm pjesa universitare për të ndërtuar një sistem funksional, por është e domosdoshme lidhja e saj me arsimin parauniversitar.

“Procesi i ndërtimit të një sistemi arsimor gjithëpërfshirës nuk ka qenë i mjaftueshëm vetëm me arsimin universitar. Është dashur të krijojmë edhe sistemin parauniversitar, në mënyrë që nxënësit dhe studentët të kenë një qasje më të lehtë në tregun e punës”, tha ai.

Ai foli për kalimin nga klasa tradicionale drejt klasave digjitale, duke prezantuar konceptet inovative të zhvilluara edhe në UBT:

Klasa 2.0 – me laboratorë, kompjuterë, hapësira për gaming, hackathon dhe eksperimente praktike.

Klasa 3.0 – që solli dimensionin virtual dhe perceptimin 3D, duke rritur njohuritë dhe kompetencat e studentëve.

Klasa 4.0 – sistemi më i avancuar, që integron të gjitha teknologjitë smart dhe Inteligjencën Artificiale (AI).

“Nga klasa tradicionale kemi kaluar në klasa 2.0 e 3.0, ndërsa sot jemi në gjendje të aplikojmë edhe klasën 4.0, ku studentët përjetojnë kompetencat e së ardhmes në mënyrë reale dhe të menjëhershme”m u shpreh Rektori Hajrizi.

Ai shtoi se për Kosovën ky transformim ka pasur një rëndësi të madhe, pasi teknologjitë e reja e kanë bërë arsimin më të qasshëm dhe më të lirë.

“Nëpërmjet digjitalizimit, ne e kemi ulur koston e arsimit deri në 60%. Arsimi sot është më i shpejtë, më i qasshëm dhe më i lidhur me nevojat e tregut”, theksoi ai.

Një tjetër pikë e rëndësishme që ai ngriti ishte vendosja e Inteligjencës Artificiale (AI) në gjithë strukturën arsimore të UBT-së.

“Ne kemi integruar AI në të gjithë strukturën e UBT-së, duke krijuar një qendër unike në Ballkanin Perëndimor, ku studentët dhe nxënësit detyrimisht përdorin teknologjitë e së ardhmes”, theksoi Rektori Hajrizi.

Konferenca vazhdoi me një panel diskutimi mbi temat e trajtuara nga folësit kryesorë. U theksua se, përkundër zhvillimeve teknologjike, roli i familjes, brezit dhe shoqërisë nuk mund të eliminohet, pasi mbeten elementë themelorë të modelit tradicional të edukimit.