BE-ja ka miratuar një ligj historik për të mbrojtur natyrën, duke i dhënë fund një bllokimi prej muajsh midis shteteve anëtare që ishin skeptike dhe kundër miratimit të ligjit. Sipas këtij ligji, 20% e tokës dhe detit brenda bllokut do të restaurohet deri ne fund të dekadës.

Ligji, që kur u propozua është përballur me diskutime dhe skepticizëm të madh nga shumë vende anëtare brenda bllokut. Ligji ka rezultuar të jetë  pjesa më e diskutueshme e marrëveshjes së gjelbër.

Pro votuan 20 vende, 6 ishin kundër ndërsa Belgjika abstenoi. Vendet që ishin kundër e kritikuan miratimin e ligjit, pasi sipas tyre vendos kosto shtesë administrative dhe financiare mbi shtetet. Ligji detyron shtetet anëtare që të marrin masa dhe të kontribuojnë në mbjelljen e të paktën 3 miliard pemëve të reja. Cesar Luena, eurodeputet i qendrës së majtë nga Spanja që udhëhoqi negociatat e Parlamentit Evropian, e cilësoi pozitive miratimin e ligjit, shkruan RTSH.

“Sot shënohet një ditë e rëndësishme për Evropën pasi ne kalojmë nga thjesht mbrojtja dhe ruajtja e natyrës në rivendosjen aktive të saj”, tha ai.

Ndërsa aktivistët e cilësuan  votimin si një fitore “historike” për natyrën e Evropës, por kritikuan “sulmet e vazhdueshme” që e hodhën poshtë atë dhe shkaktuan vonesa në miratimin  e tij./UBTNews/

Shirat e rrëmbyeshëm në shtetin amerikanoqendror të El Salvadorit u morën jetën të paktën 11 banorëve në fundjavë, raportuan të hënën autoritetet vendase. Shefi i Mbrojtjes Civile, Luis Amaja tha se viktimat janë edhe fëmijë, të cilët janë zënë poshtë nga rrëshqitjet e dheut ose rëniet aksidentale të pemëve në rrugë, shkruhet në Reuters.

“Nëse ju kërkohet të evakuoni zonën, bëjeni. Nëse jetoni pranë një pjerrësire lëvizni drejt një zone më të sigurt. Prioriteti numër një është siguria”, deklaroi Amaja.

900 banorë të El Salvadorit aktualisht po strehohen në godina të përkohshme si pasojë e shirave që ranë mbi brigjet e Paqësorit nga Meksika Jugore drejt Panamasë Perëndimore. Meteorologët kanë parashikuar që moti në vend do të mbetet i lagësht përgjatë gjithë javës dhe situata mund të bëhet më e rrezikshme me praninë e një stuhie, që pritet të formohet në Gjirin e Meksikës. Përmbytjet prekën edhe vendet fqinje me El Salvadorin, si Hondurasi dhe Panamaja, por pa dëme serioze.

Paqësori dhe Atlantiku kanë hyrë në sezonin e uraganeve. Rreziku nga pjesa atlantike do të jetë më i lartë për shkak të efekteve atmosferike nga La Ninja dhe ngrohjes së oqeaneve./UBTNews/

Në ujërat italiane në afërsi të bregdetit të Kalabrisë, një varkë me 66 emigrantë, përfshirë 26 fëmijë, është përmbysur, duke shkaktuar zhdukjen e të gjithë personave në bord. Ndërkohë, rojet bregdetare kanë shpëtuar 12 persona, nga të cilët njëri ka ndërruar jetë.

Emigrantët ishin nisur nga Turqia drejt Italisë dhe shumica e tyre ishin nga Afganistani, Iraku, Siria dhe Irani. Për shkak të kësaj tragjedie, zyra e Prokurorit Publik të Locrit ka filluar një hetim për të sqaruar rrethanat e ngjarjes.

Shakilla Mohammadi, ndërmjetës ndërkulturor i Mjekëve pa Kufij, ka treguar se të mbijetuarit kanë raportuar për kushtet e vështira të udhëtimit dhe mungesën e jelekëve të shpëtimit, si dhe për anijet që nuk ndaluan për t’i ndihmuar. Ndërsa Roberto Occhiuto, presidenti i Rajonit të Kalabrisë, ka theksuar nevojën për më shumë vëmendje nga Evropa dhe qeveritë kombëtare ndaj këtyre situatave.

Kjo tragjedi nënvizon rrezikun dhe vështirësitë që përballen emigrantët gjatë përpjekjeve të tyre për të arritur në Evropë, dhe ngre pyetje të rëndësishme mbi masat e sigurisë dhe ndihmën ndërkombëtare./UBTNews/

Presidenti rus Vladimir Putin do të vizitojë Korenë e Veriut këtë javë, për herë të parë pas 24 vjetësh. Vizita e tij, që do të zgjasë dy ditë dhe fillon të martën, është një ngjarje e rrallë dhe e rëndësishme ndërkombëtare, duke pasur parasysh se Putin ka bërë pak udhëtime jashtë vendit që nga fillimi i pushtimit të Ukrainës nga Rusia në vitin 2022.

Kjo vizitë shënon forcimin e marrëdhënieve midis Rusisë dhe Koresë së Veriut, dy shtete që ndajnë armiqësi të përbashkët ndaj Perëndimit. Kim Jong Un, lideri i Koresë së Veriut, e kishte ftuar Putinin për këtë vizitë gjatë një udhëtimi në Lindjen e Largët të Rusisë në shtator të vitit të kaluar.

Gjatë vizitës së tij, Putin dhe Kim pritet të nënshkruajnë një marrëveshje të re strategjike, që synon të zëvendësojë dokumentet e mëparshme të nënshkruara midis dy vendeve në 1961, 2000 dhe 2001. Kremlini theksoi se kjo marrëveshje nuk është provokuese dhe nuk synon kundër vendeve të tjera, por ka për qëllim sigurimin e stabilitetit në Azinë verilindore.

Vizita e Putinit do të pasohet nga një udhëtim dy-ditor në Hanoi, ku do të forcohen lidhjet e Rusisë me Vietnamit, një tjetër shtet i qeverisur nga komunistët. Kjo vizitë pritet të sfidojë influencën e Shteteve të Bashkuara në rajon.

Ndërkohë, përgatitjet për një paradë të madhe në sheshin qendror të Phenianit janë në vazhdim, me imazhe satelitore që tregojnë ndërtimin e një tribune dhe formacionet e marshimit që praktikohen nga koreano-veriorët./UBTNews/