Tri nga monumentet më të njohura historike të Shtutgartit janë sjellë në një formë të re mahnitëse përmes një filmi dinamik “hiperlaps”, që nxjerr në pah trashëgiminë arkitekturore dhe kulturore të qytetit, raporton agjencia Anadolu.

Videoja artistike përfshin pamje të Neues Schloss (Pallatit të Ri), Schlossplatz (Sheshit të Pallatit) dhe Johanneskirche (Kishës së Shën Gjonit), të realizuara me teknikën e avancuar “time-lapse”.

Ky stil krijon një sekuencë të shpejtuar që jep ndjesinë e lëvizjes së vazhdueshme në kohë, duke e bërë qytetin të duket sikur merr frymë.

Monumentet që marrin jetë në ekran

Johanneskirche (Kisha e Shën Gjonit)

Ndërtuar më 1876 në stilin gotik të Rilindjes, kjo kishë madhështore është kushtuar Shën Gjonit. E veçantë për faktin se i mbijetoi Luftës së Dytë Botërore pa dëmtime, ajo sot qëndron si simbol i qëndrueshmërisë dhe besimit, me pamje piktoreske pranë Liqenit Schlossgarten.

Schlossplatz (Sheshi i Pallatit)

Sheshi qendror dhe zemra e gjallë e Shtutgartit, i rrethuar nga kopshte, Kolona e Jubileut dhe godina historike. Ai është hapësirë ikonike për ngjarje publike, festivale dhe momente çlodhjeje për banorët dhe vizitorët e qytetit.

Neues Schloss (Pallati i Ri)

Ndërtuar mes viteve 1746–1807, Pallati i Ri përfaqëson arkitekturën baroke e shërbente si rezidencë mbretërore. I dëmtuar gjatë luftës, u rindërtua me kujdes dhe sot është selia e disa zyrave qeveritare të landit Baden-Württemberg.

Ky projekt audiovizual, që bashkon artin me teknologjinë, i jep një perspektivë të re trashëgimisë historike të Shtutgartit, duke e bërë qytetin të duket njëkohësisht i lashtë dhe modern, një vend ku historia dhe ritmi bashkëkohor ecin krah për krah. /A.Z/UBT News/

Sonte, në orën 21:00, në Prishtinë, do të ngrihet perdja për edicionin e tretë të Festivalit të Këngës në RTK, një ngjarje që do të zgjasë tri net dhe do të sjellë në skenë artistë të njohur e talente të reja.

Në garë do të jenë 20 këngë, nga artistë brenda e jashtë Kosovës, duke dëshmuar interesimin e madh për këtë ngjarje të rëndësishme.

Drejtori i festivalit, Rilind Gërvalla, ka bërë të ditur se përgatitjet janë realizuar nga punëtorët e RTK-së, nga dizajni dhe grafika, te skenografia e ndriçimi. Ai tha se skenografia ndërthur elemente tradicionale me moderne, duke reflektuar frymën e bashkimit të brezave.

“Sivjet kemi zbatuar një qasje të re organizuese: gjithçka që do të shfaqet në skenë është prodhim i drejtpërdrejtë i RTK-së. Në tri netët festive do të dëgjojmë zërat e të rinjve, që lindin nga tradita por shkojnë drejt së ardhmes”, deklaroi Gërvalla.

Ai shtoi se Organizata Evropiane e Transmetuesve po ndjek përgatitjet, duke vlerësuar përpjekjet e Kosovës për pjesëmarrjen e saj të ardhshme në garën evropiane të këngës, Euro Song.

“E kemi dëshmuar se Kosova është gati për ‘Euro Song’. Pavarësisht sfidave rajonale, EBU na ka ndjekur me interes dhe e ka vlerësuar progresin tonë, sidomos duke pasur parasysh kushtet e kufizuara financiare me të cilat punon televizioni publik”, shtoi ai.

Ndërkohë, drejtori artistik i festivalit, Florent Boshnjaku, u shpreh se ky festival është shndërruar në platformë të fortë artistike dhe teknike për artistët vendorë.

“Festivali i Këngës është bërë institucion dhe përbën një arritje të jashtëzakonshme për vendin tonë. Jam shumë i lumtur që jam pjesë e këtij rrugëtimi”, tha Boshnjaku.

Skenaristi i edicionit të tretë, Genc Salihu, bëri të ditur se fokusi do të jetë më shumë te muzika, duke reduktuar elementet dramaturgjike.

Ai paralajmëroi edhe një retrospektivë për historinë e këngës në Kosovë, si dhe ndarjen për herë të parë të Çmimit për Vepër Jetësore “Okarina e Artë”, që do t’i jepet një artisti me kontribut të gjatë në muzikë.

Festivali do të moderohet nga Rina Krasniqi dhe Dukagjin Podrimaj, ndërsa do të zhvillohet më 6, 7 dhe 8 nëntor në Prishtinë.

Gjatë këtyre netëve, 20 artistë do të garojnë për pesë çmimet kryesore, ndërsa publiku do të ketë mundësi ta ndjekë spektaklin drejtpërdrejt në RTK dhe nga salla, pasi rezervimet për biletat tashmë kanë nisur.

Këngët dhe artistët garues në ‘Fest 3’:

Almir Kraba – “Nuk ka si ti”

Arjeta Palushaj – “Andrra”

Arsi Bako – “Rreze Zjarr”

Art Lokaj – “Ty”

Bledi Kaso – “S’do të doja dy jetë”

Dea Berisha – “Afër”

Egzon Pireci – “Kënga Jonë”

Elmedinë Ramushi – “A po m’sheh”

Florent Abrashi – “Unë dhe ti”

Kiara Juba – “Nirvana”

Klea Dina – “At”

Laorjan Ejlli – “Një natë shkruajta për ty”

Nita Latifi & Algert Sala – “Pija”

Santino de Bartolo – “Naze Naze”

Semi Tafaj – “Vazhdoj”

Teutë Halili – “Amin”

Vlera Kastrati – “Nanë”

Vjosa Shehu – “Alo”

Xuxi – “Identitet”

Zergjina Hasanaj – “Pres”

Zgjedhja mes serumeve dhe kremrave për zonën e syve mund të duket e komplikuar.

Të dy produktet përmbajnë përbërës të dobishëm, por shërbejnë qëllime të ndryshme.

Serumet kanë teksturë të lehtë e të lëngshme, duke ofruar trajtim të synuar për probleme specifike si rrathët e errët, ënjtjet apo vijat e holla.

Kremrat, nga ana tjetër, janë më të dendur dhe më hidratues, duke e mbajtur lëkurën të ushqyer dhe të lagësht.

Si të zgjidhni produktin e duhur:

Nëse problemi kryesor janë rrathët e errët ose ënjtjet, zgjidhni serum.

Nëse shqetësimi është thatësia ose lëkura e pjekur, krema do të ofrojë hidratimin e nevojshëm.

Serumi kundrejt kremit

Ekspertët shpjegojnë se serumet për zonën e syve janë të formuluara për të çuar përbërës aktivë, si peptidet dhe antioksidantët, në thellësi të lëkurës. Ato kanë molekula më të vogla, gjë që lejon depërtimin më të thellë dhe thithjen e shpejtë.

Kremrat veprojnë si hidratues tradicionalë, mbajnë lagështinë në lëkurë e e forcojnë, duke e bërë ideal për lëkurë të thatë ose të ndjeshme.

Kur të përdorni serum dhe kur krem për zonën e syve?

Më e mira është të përdorni të dy produktet në kombinim.

Aplikoni fillimisht serumin, që ofron trajtim të përqendruar.

Shtoni një shtresë kremi, për hidratim dhe mbrojtje afatgjatë.

Nëse vendosni të përdorni vetëm një produkt:

Për rrathë të errët, ënjtje ose vijëza të holla, më efektiv është serumi.

Për lëkurë shumë të thatë ose të pjekur, krema ofron ushqyes dhe lagështi më të gjatë.

Këshilla për aplikimin:

Përdorni lëvizje të buta, me majat e gishtave, pa tërhequr lëkurën.

Një sasi e vogël mjafton.

Prisni që serumi të përthithet plotësisht para se të vendosni kremin.

Aplikoni gjithmonë nga cepi i brendshëm drejt jashtë, duke shmangur vijën e qerpikëve. /A.Z/UBT News/

Në një atmosferë kulturore e reflektuese, ku letërsia u bëri homazh lirisë, kulturës dhe identitetit kombëtar, në qytetin Soltau të Gjermanisë u përurua romani më i ri i autorit Ilir Shaqiri, me titull “Polifoni e mendjeve të lira”.

Ngjarja mblodhi studiues, krijues dhe dashamirë të letërsisë nga trojet shqiptare — Kosova, Shqipëria, Maqedonia e Veriut dhe viset e tjera — duke krijuar një atmosferë të veçantë shpirtërore dhe artistike.

Ilir Shaqiri shprehu falënderime të veçanta për të gjithë pjesëmarrësit që e nderuan me praninë dhe kontribuan në suksesin e promovimit.

Ai falënderoi nikoqirin e ngjarjes, mikun e tij Isa Gashi për mikpritjen vëllazërore dhe organizimin e shkëlqyer të aktivitetit.

Romani “Polifoni e mendjeve të lira” sjell një reflektim të thellë mbi lirinë, mendimin kritik dhe identitetin në kohët moderne, duke ofruar një zë të veçantë dhe të domethënshëm në letërsinë bashkëkohore shqiptare. /A.Z/UBT News/