Lajmet

​Varhelyi: Qytetarët dhe bizneset do të përfitojnë nga marrëveshja roaming

Sipas tij, kjo marrëveshje është tregues që do të ketë një shtytje të rëndësishme në tregun e telekomunikacionit.

Publikuar

Komisionari i Bashkimit Evropian për Zgjerimin dhe Fqinjësinë, Oliver Varhelyi ka thënë se me nënshkrimin e marrëveshjes për tarifat roaming do të përfitojnë qytetarët dhe bizneset. Ai ka shtuar se marrëveshja e nënshkruar në Tiranë, është tregues që do të ketë një shtytje të rëndësishme në tregun e telekomunikacionit.

Pas nënshkrimit të kësaj marrëveshje, para mediave ministrja e Infrastrukturës dhe Energjetikës, Belinda Balluku ka thënë se kjo e integron rajonin në sistemin e të drejtave themelore.

“Nënshkrimi nga një sërë operatorësh të telefonisë celulare të Bashkimit Evropian dhe të Ballkanit Perëndimor, të deklaratës së përbashkët për jetësimin e udhërrëfyesit të heqjes së tarifave të roamingut mes Bashkimit Evropian dhe Ballkanit Perëndimor, përbën një nga arritjet madhore të viteve të fundit. Emërtesa e këtij dokumenti mund të duket teknike në të vërtetë, por impakti i tij është sa konkret dhe real për jetën e qytetarëve tanë kudo që ata banojnë dhe sigurisht me një impact të jashtëzakonshëm sa i përket përshpejtimit të të gjitha hapave integruese”, ka thënë ajo.

Zgjerimi i tarifave të roamingut mes BE-së dhe Ballkanit Perëndimor, Balluku tha se bën të mundura dy dukuri.

“Së pari redukton frakturën digjitale mes evropianëve në të dy anët e Adriatikut dhe nga ana tjetër patjetër komplimenton aspektet më kyçe të ndërlidhjes, atë shoqërore dhe njerëzore dhe një përafrim jo thjesht të politikave dhe të normave por padyshim të shkëmbimeve sociale, ekonomike dhe njerëzore. Së dyti, falë përfshirjes se rajonit tonë në një bashkësi evropiane të përdoruesve fundor që përmes një lundrimi pa kosto shtesë në internet me shpejtësi të lartë dhe shumë të lartë përfitojnë njësoj nga mundësi të panumërta të shoqërisë digjitale duke bërë të mundur qarkullimin e ideve, projekteve, qarkullimin e çdo inovacioni që deri sot ka qenë e pamundur. Në këtë mënyrë marrëveshja e sotme e integron rajonin më shumë dhe më mire në sistemin e te drejtave themelore të çdo evropiani, atë të qarkullimit të lirë të personave, të mallrave, të ideve dhe ndërveprimeve ekonomike që padyshim janë shumë të rëndësishme”, tha ajo.

Edhe komisionari i Bashkimit Evropian për Zgjerimin dhe Fqinjësinë, Oliver Varhelyi e ka konsideruar hap të rëndësishëm nënshkrimin e kësaj marrëveshjeje.

“Duke bërë telefoninë mobile me shërbimet e tij të përballueshme dhe të arritshëm për të gjithë qytetarët, që është element themeltar i çdo tranzicioni digjital gjithëpërfshirës dhe të suksesshëm. Sot, dhe deklarata e sotme shënon një hap të rëndësishëm në këtë lloj drejtimi dhe kahje, dhe kjo duhet të jetë në të mirë të çdo njërit prej nesh. Mirëprita nënshkrimin e kësaj marrëveshje mes gjithë operatorit të Ballkanit Perëndimor, disa prej tyre pra që janë zotuar që do të punojnë drejt uljes së tarifave të roaming mes vendeve të Ballkanit Perëndimor dhe BE-së që qytetarët e Ballkanit Perëndimor do të vizitojnë BE-në dhe kur qytetarët e BE-së do të vizitojnë rajonin e Ballkanit Perëndimor ata pra të ndihen në shtëpinë e tyre”, ka thënë ai.

Ai ka shtuar se me marrëveshjen e tarifave roaming, më së shumti do të përfitojnë qytetarët dhe bizneset.

“Operatorët kanë nënshkruar këtë deklaratë të sotshme, janë ata që përbëjnë shumicën e trafikut të telekomunikacionit mes Bashkimit Evropian dhe Ballkanit Perëndimor. Jam më se i sigurt se nuk janë vetëm shumica, por do bëhen përmes kësaj marrëveshje, shumica dërrmuese. Sepse jam i bindur që ky zotim i nënshkruar sot, është tregues që ne do të kemi një shtytje të rëndësishme në tregun e telekomunikacionit. Qytetarët dhe bizneset do përfitojnë shumë prej tregjeve të arritura, duke quar përpara aktivitetet tregtare të atyre që marrin pjesë”, ka shtuar ai.

Operatorët telefonikë të Bashkimit Evropian dhe ata të Ballkanit Perëndimor kanë nënshkruar marrëveshje të reduktimit të tarifave të roaming-ut. Kjo marrëveshje do të nisë të zbatohet më 1 tetor të vitit të ardhshëm.

Vazhdo të lexosh

Lajmet

Paga mesatare në sektorin publik 75% më e lartë se në sektorin privat

Dallimi mes pagave mesatare në sektorin publik dhe privat deri me tani ishte 45 për qind në krahasim me sektorin privat.

Publikuar

nga

Paga mesatare në sektorin privat në vend është 419 euro, kurse në sektorin publik me koeficinetin e ri të propozuar nga qeveria në 105 euro, paga mesatare pritet të jetë 730 euro ose 75 për qind më e lartë se në sektorin privat.

Këtë dallim në paga e konfirmoi sot edhe ministri i Financave, Hekuran Murati gjatë raportimit në Komisionin për Buxhet.

Dallimi mes pagave mesatare në sektorin publik dhe privat deri me tani ishte 45 për qind në krahasim me sektorin privat.

Sipas raportit të fundit të ASK-së, paga mesatare deri para hyrjes në fuqi të Ligjit të pagave për sektorin publik ka qenë 612 euro, ndërsa tash me vlerën e koeficientit të ri arrin 730 euro ose 20 për qind më shumë.

Ndërsa, paga mesatare bruto në sektorin e ndërmarrjeve publike në vitin 2012 ishte 561 Euro, derisa në vitin 2021 ishte 768 euro.

Vazhdo të lexosh

Lajmet

​LDK përkujton aktin çnjerëzor në Mitrovicë që ndodhi 23 vjet më parë

U plagosën 25 persona dhe u dëbuan nga shtëpitë e tyre 11 mijë e 364 të tjerë.

Publikuar

nga

Lidhja Demokratike e Kosovës përkujton 23-vjetorin kur në natën mes 3 dhe 4 shkurtit të vitit 2000, u vranë dhjetë shqiptarë, u plagosën 25 dhe u dëbuan nga shtëpitë e tyre 11 mijë e 364 të tjerë.

‘Sot, më 3 shkurt, ne përkujtojmë 23-vjetorin e një nate tmerri në Mitrovicë; ndër aktet e rënda, tronditëse dhe të dhimbshme ndaj popullit të Kosovës. Në natën mes 3 dhe 4 shkurtit të vitit 2000, u vranë 10 shqiptarë, u plagosën 25 dhe u dëbuan nga shtëpitë e tyre 11,364 të tjerë. Ngjarje si kjo na dëshmojnë përjetime tona si popull dhe duhet të na freskojnë kujtesën për të mos harruar kurrë kalvarin e mundimeve tona. Ne e paguam shtrenjtë çmimin e lirisë. Një ndër përgjegjësit kryesor të kësaj masakre e spastrimi etnik, ishte edhe Oliver Ivanoviq, i cili për të gjitha aktet dhe veprat çnjerëzore ndaj popullsisë shqiptare, ishte dënuar me 9 vite burg. Lidhja Demokratike e Kosovës bashkëndjejnë me familjet e viktimave të 23 vjetëve më parë, ashtu siç dhe kujton sot e gjithherë sakrificën e madhe të popullit tonë për liri e pavarësi. Mbi këtë sakrificë, LDK do të përkushtohet në vazhdimësi për një Kosovë të zhvilluar, të mirëqenë dhe për një jetë të dinjitetshme për qytetarët tanë”, thuhet në komunikatën e LDK-së.

Vazhdo të lexosh

Lajmet

​Ziv: Urrejtja hebreje ende ekziston

Kështu tha ajo gjatë ceremonisë përkujtimore në Ditën Ndërkombëtare të Përkujtimit të Holokaustit.

Publikuar

nga

Antisemitizmi që çoi në Holokaust ende ekziston, pasi sot shihen lëvizje në ekstremet e politikës evropiane dhe botërore, të cilët me krenari ngrenë flamurin e shëmtuar të antisemitizmit, i cili më shumë kërcënon t’i kthejë shoqëritë demokratike dhe të qytetëruara në ato që gllabërojnë njerëzit e tyre.

Kështu ka thënë ambasadorja e Shtetit të Izraelit në Republikën e Kosovës, Tamar Ziv, gjatë ceremonisë përkujtimore në Ditën Ndërkombëtare të Përkujtimit të Holokaustit.

Ziv tha se kjo ditë përkujtimore vjetore është një mundësi e vërtetë për të kujtuar ata që u vranë, për të nderuar ata që mbijetuan dhe ata që rrezikuan jetën e tyre për të shpëtuar të tjerët, si dhe për të vazhduar punën për t’u siguruar që tmerret e shkuara nuk do të ndodhë më kurrë.

“Është detyra jonë të punojmë pa pushim për të vazhduar kërkimin, edukimin dhe luftimin e mohimit. 78 vjetori i çlirimit të Aushvicit u shënua me përpjekje të gjera për të mbledhur dëshmitë e tmerreve, për të mbledhur prova, për të dokumentuar ngjarje të tmerrshme dhe për të kryer kërkime ende të vazhdueshme për të siguruar që kujtimet e viktimave nuk do të harrohen kurrë, si dhe duhet punuar në mënyrë që shumë mësime vendimtare për të gjithë njerëzimin që duhet të jenë në mendjet dhe zemrat tona, nuk do t’i shpëtojnë kurrë ndërgjegjes sonë kolektive. Të dashur miq, le të mos bëhemi indiferentë. Antisemitizmi që çoi në Holokaust ende ekziston. Sot, ne shohim lëvizje në ekstremet e politikës evropiane dhe botërore, të cilët me krenari ngrenë flamurin e shëmtuar të antisemitizmit, i cili më shumë kërcënon t’i kthejë shoqëritë demokratike dhe të qytetëruara në ato që gllabërojnë njerëzit e tyre”, tha ai.

Sipas saj, kujtimi i tmerreve të Holokaustit, bëhet edhe më i vështirë me kalimin e çdo viti, sikundër çdo vit, gjithnjë e më shumë, numri i të mbijetuarve që kanë qenë dëshmitarë të këtyre mizorive, zvogëlohet.

“Diskurset antisemite nuk jetojnë vetëm në burgjet tona, por edhe në zemrat e perëndimit të lirë dhe demokratik. Urrejtja hebreje ekziston ende. Antisemitizmi ekziston ende. Mohimi i Holokaustit ekziston ende. Ai është aktiv në platformat virtuale… duke përhapur helm. Ne duhet të përdorim çdo mjet në dispozicionin tonë, nga arsimi dhe legjislacioni, siguria dhe zbatimi, për të penguar dhe zhdukur urrejtjen, racizmin, antisemitizmin dhe të gjitha format e tjera të urrejtjes. Mjerisht, në botën e sotme, ka ende zëra duke përfshirë edhe ata zyrtarë, si në Iran, që predikojnë një narrativë se Holokausti është një trillim. Në një botë të lajmeve të rreme dhe teorive konspirative, ka përpjekje të vazhdueshme për të rishkruar historinë përmes përdorimit të tregimeve të shtrembëruara që përdorin qëllimisht informacionin e nxjerrë jashtë kontekstit”, tha ajo.

Kurse kryeministri Albin Kurti tha se për të parandaluar që diçka si Holokausti të ndodhë përsëri në të ardhmen, nuk duhet të harrojmë kurrë atë që ndodhi në të kaluarën.

“Ka gjithashtu shumë histori të njerëzve të guximshëm në mbarë Evropën dhe më gjerë – duke përfshirë familje nga Kosova – të cilët me dëshirë u siguruan strehim miqve, fqinjëve dhe refugjatëve hebrenj, ndonjëherë në rrezik të madh për vetveten. Jo vetëm tmerret e Holokaustit, por edhe shembulli i këtyre njerëzve të guximshëm, duhet të na frymëzojë sot. Ata duhet të na frymëzojnë që të bëjmë gjithçka që mundemi, për të parandaluar dhe luftuar dhunën sistematike shtetërore – deri dhe duke përfshirë gjenocidin – kudo që ndodh në botë. Këtu në Kosovë, ku u krye gjenocidi i fundit i shekullit të 20-të, ne jemi më se të gatshëm të bëjmë pjesën tonë në këtë detyrë të shenjtë. Pas pushtimit ilegal të Ukrainës nga Rusia, ne iu bashkuam menjëherë sanksioneve të SHBA-së dhe BE-së kundër atyre që ishin përgjegjës. Në nivel ushtarak, ushtarët e Kosovës kanë marrë pjesë me entuziazëm në Defender Europe dhe këtë vit ne do të jemi nikoqirë të stërvitjeve në vendin tonë. Pas marrjes së Afganistanit nga Talibanët, ne mirëpritëm 1,893 refugjatë afganë në Kosovë, dhe jemi gjithashtu të gatshëm të pranojmë deri në 5,000 refugjatë nga Ukraina. Së fundi, si pjesë e programit tonë Gazetarët në Rezidencë, kemi pranuar 12 gazetarë nga Ukraina dhe katër nga Afganistani”, tha ai, duke shtuar se mënyra më e mirë për të nderuar kujtimin e të humburve nuk është vetëm përmes fjalëve, por edhe përmes veprimeve tona.

Në këtë ceremoni me nga një fjalë rasti të pranishmit i përshëndeti edhe Matthias Konrad, zëvendësambasador i Republikës Federale të Gjermanisë, dhe Lekë Rezniqi trashëgimtar i Asllan Rezniqi, i cili kishte shpëtuar hebrenj gjatë Holokaustit dhe është njohur nga Qendra e Përkujtimit të Holokaustit “Yad Vashem” si “Fisnik mes Kombeve”.

Ndërkohë, artistët kosovarë Valton Beqiri, ish-ministër i Kulturës i Republikës së Kosovës, njëherësh kompozitor, pianist, aranzhues e dirigjent, dhe sopranoja Besa Llugiqi interpretuan dy këngë që identifikohen me Holokaustin. Kurse, aktorja Fitore Jashari interpretoi një monolog bazuar në romanin e Annelies Marie “Anne” Frank, një vajzë hebreje e lindur në Gjermani, e cila mbante një ditar në të cilin dokumentonte jetën e fshehur nën persekutimin nazist.

Gjithashtu, është paraqitur dokumentari “Ata më dhanë jetë” me protagoniste Rena Quint, e mbijetuar e Holokaustit.

Në fund, janë ndezur gjashtë qirinj, një nga një, në kujtim të gjashtë milionë viktimave të Holokaustit, nga ana e Ambasadores Ziv, kryeministrit Kurti, zëvendësambasadorit Konrad, kryetarit të Bashkësisë Hebraike të Kosovës, Votim Demiri, si dhe Lekë Rezniqi e Zana Mustafa-Bukoshi, trashëgimtare e Faik Sharri dhe Sabrije Sharri, të cilët kishin shpëtuar hebrenj gjatë Holokaustit dhe janë njohur nga Yad Vashem si “Fisnikë mes Kombeve”.

Vazhdo të lexosh

Lajmet

Rahoveci kompenson mbi 450 bujq që pësuan nga vërshimet

Kështu njoftoi kryetari Latifi.

Publikuar

nga

Komuna e Rahovecit në bashkëpunim me Ministrinë e Bujqësisë pritet t’i kompensojnë 243 bujq të cilët u dëmtuan nga vërshimet.

Sipas një njoftimi publik nga kryetari i Rahovecit, Smajl Latifi, paraprakisht janë kompensuar 214 bujq derisa në pritje janë edhe 83, të cilët tha se do të kompensohen në ditët në vazhdim.

“Komisioni për Shqyrtimin e Ankesave të MBPZHR-së, pas shqyrtimit të ankesës së bazuar në faktet, argumentet dhe dëshmitë e ofruara prej komunës së Rahovecit, dje i ka kualifikuar edhe 243 bujq, të cilët do të dëmshpërblehen. Sipas raportit të Drejtorisë Komunale për Bujqësi, i cili po vazhdon të shqyrtohet në MBPZHR, përkatësisht në Komisionin për Ankesa të kësaj ministrie, nga: 540 bujq që u janë dëmtuar kulturat e tyre nga fatkeqësitë natyrore, ditë më herët 214 bujq janë kompensuar, kur i shtojmë edhe 243 të kualifikuar që do të kompensohen, na mbetet ta vazhdojmë ‘betejën’, edhe për 83 bujq”, ka shkruar Latifi.

Përmes një postimi në Facebook, Latifi ka thënë se e falënderon Komisionin për Shqyrtimin e Ankesave të MBPZHR-së për bashkëpunimin konstruktiv me Drejtorinë Komunale të Bujqësisë e cila i ka ofruar këtij komisioni dëshmi shtesë.

Vazhdo të lexosh

Të kërkuara