Sport

Varane tërhiqet nga Kombëtarja e Francës

Ai njoftoi pensionimin nga Franca.

Published

4 years ago

February 2, 2023

Betim Gashi

Mbrojtësi i Manchester United, Raphael Varane ka lëshuar një mesazh befasues në rrjetet sociale ku njoftoi tërheqjen e tij nga futbolli ndërkombëtar, përkatësisht pensionimin nga Franca.

29-vjeçari bëri 93 paraqitje dhe shënoi pesë gola për “Les Bleus”, në një periudhë nëntëvjeçare që filloi me debutimin e tij në mars të vitit 2013 dhe përfshinte triumfin e Kupës së Botës në vitin 2018.

Varane ndihmoi gjithashtu skuadrën e Didier Deschamps të përfundonte si nënkampion në Katar 2022. Tani duket se humbja në finalen e Kupës së Botës ndaj Argjentinës më 18 dhjetor, në një nga ndeshjet më të mëdha të kompeticionit të të gjitha kohërave, ishte paraqitja e tij e fundit për vendin e tij.

Ai falënderoi edhe trajnerin, shokët e skuadrës dhe tifozët, në një postim që mund ta lexoni të plotë më poshë:

“Përfaqësimi i vendit tonë të madh për një dekadë ka qenë një nga arritjet më të mëdha të jetës sime”, shkroi Varane.

“Sa herë që vishja këtë fanellë të veçantë , ndjeva krenari të madhe. Detyra për të dhënë gjithçka, për të luajtur me zemër dhe për të fituar sa herë që hynim në fushë nuk ka munguar. Unë kam menduar për këtë për disa muaj dhe kam vendosur që është koha e duhur për mua të tërhiqem nga futbolli ndërkombëtar”, shtoi ai.

“Si fëmijë, mbaj mend që kam ndjekur Francën e vitit 1998, këtë ekip, këta lojtarë që na bënë të përjetojmë emocione të papërshkrueshme. Ëndërroja të isha siheronjtë tanë dhe 20 vjet më vonë përjetova një nga përvojat më të mira të jetës sime, ato që më bënë vërtet krenare. Ne sollëm kupën në shtëpi!”

“Nuk do ta harroj kurrë. Ende i ndjej të gjitha emocionet e ndjera në atë ditë, 15 korrik 2018. Ky ishte një nga momentet më mahnitëse dhe më të paharrueshme të jetës sime”.

“Kjo fitore që fituam të gjithë së bashku nuk do të ishte e mundur kurrë pa mbështetjen e Didier Deschamps, çdo anëtari të menaxhmentit dhe stafit ndër vite, dhe bashkëlojtarët e mi që kanë mbrojtur fanellën tonë në çdo ndeshje që kemi luajtur”.

“Por më e rëndësishmja, kjo fitore nuk do të ishte e mundur pa na mbështetur secili prej jush gjatë rrugës. Zelli juaj, festimet dhe kujtimet e kthimit tonë në Francë do të mbeten përgjithmonë të gdhendura në mua. Edhe pas humbjes në finale vitin e kaluar, ju na pritët si heronj kur u kthyem. Secilit prej jush, FALEMINDERIT një mijë herë!”.

“Do të më mungojnë këto momente me ju me siguri, por ka ardhur koha që brezi i ri të marrë përsipër ecurinë tutje. Ne kemi një grup lojtarësh të rinj të talentuar që janë gati të marrin përsipër përgjegjësi të reja, që meritojnë një shans dhe që kanë nevojë për ju. Nga thellësia e zemrës sime, faleminderit. Rafa”.

Up Next

Greenwood lirohet nga të gjitha akuzat për përdhunim dhe sulm në tentativë

Don't Miss

Vendet baltike dhe Polonia i bashkohen thirrjeve për ndalimin e sportistëve rusë nga aktivitetet sportive

Sport

Pas 19 ditësh, rikthehet Superliga e Kosovës

Published

6 hours ago

October 8, 2026

UBTNews

Pas 19 ditësh pauzë, këtë të premte rikthehet aksioni në Superligën e Kosovës në futboll me ndeshjet e xhiros së tetë.

Kjo ishte pauza më e gjatë në kampionatin kosovar gjatë dekadës së fundit dhe erdhi si pasojë e grumbullimit të përfaqësueses së Kosovës për katër ndeshjet e Ligës së Kombeve.

Xhiroja e tetë hapet me dy ndeshje. Në Podujevë, Llapi nga ora 14:00 pret Ballkanin, ndërsa në Gjilan, nga ora 18:00, Drita përballet me Malishevën.

Llapi vjen pas një forme të dobët, me vetëm një fitore në shtatë ndeshje. Skuadra e Tahir Batatinës pësoi humbje 4:0 nga Drenica në ndeshjen e fundit para pauzës.

“Besoj se na ka shërbyer për të mirë kjo pauzë, sepse janë kthyer nga lëndimet lojtarët dhe jemi të kompletuar si skuadër. Kishim pesë lojtarë të lënduar në fillim të kampionatit. Jemi gati”, ka thënë Batatina.

Edhe Ballkani nuk ka fituar në tri ndeshjet e fundit. Therandasit kanë humbur nga Malisheva dhe Gjilani, ndërsa kanë barazuar pa gola me Dukagjinin.

Ndërkohë, Malisheva renditet e dyta me 16 pikë, dy më pak se liderja Prishtina, por me një ndeshje më shumë të zhvilluar. Megjithatë, skuadra ka mbetur pa trajner pas largimit të Thomas Brdariq, i cili u prezantua te një klub i kategorisë së dytë në Arabinë Saudite.

Në përballjen ndaj Dritës, Malisheva do të drejtohet nga ndihmësi i Brdariqit, Kastriot Rexha. Drita, kampionia në fuqi, në ndeshjen e fundit mposhti Dukagjinin.

Të shtunën zhvillohen dy ndeshje të tjera: Vushtrria – Gjilani nga ora 14:00 dhe Drenica – Feronikeli 74 nga ora 18:00.

Xhiroja mbyllet të dielën me duelin Prishtina – Dukagjini, që nis në ora 18:00.

Xhiroja e tetë:

E premte
Llapi – Ballkani (14:00)
Drita – Malisheva (18:00)

E shtunë
Vushtrria – Gjilani (14:00)
Drenica – Feronikeli 74 (18:00)

E diel
Prishtina – Dukagjini (18:00)

D.L

Sport

Kurti pret legjendën e Prishtinës, Xhevdet Muriqin

Published

6 hours ago

October 8, 2026

UBTNews

Kryeministri i Kosovës, Albin Kurti, ka pritur në zyrën e tij legjendën e FC Prishtinës, Xhevdet Muriqi, me të cilin ka kujtuar vitet e arta të klubit nga kryeqyteti.

Kurti ka treguar se Muriqin e ka përcjellë nga afër në stadium, por edhe përmes radios e televizorit, ndërsa takimi i tyre i ka rikthyer te ndeshjet, emocionet dhe golat e paharrueshëm të viteve të 80-ta.

Gjatë bisedës, ata kanë diskutuar edhe për figura të njohura të asaj gjenerate, si Fadil Vokrri, Kujtim Shala dhe trajneri Qiro Bllazheviq, si dhe për vëllain e Xhevdetit, Fadil Muriqin, i cili jeton në Australi.

Muriqi kaloi 28 vite duke jetuar e punuar në Kroaci dhe 12 të tjera në Gjermani, ndërsa vitin e kaluar u rikthye për të jetuar në Kosovë.

Kurti ka thënë se FC Prishtina në atë kohë i mblidhte tifozët në stadium, por edhe pranë radios e televizorit, ndërsa sukseset dhe humbjet e klubit përjetoheshin me të njëjtin emocion.

Në takim është diskutuar edhe për futbollin aktual, me Kurtin dhe Muriqin që kanë folur për paraqitjet e fundit të Kosovës, ngritjen e përfaqësueses dhe ndeshjet e radhës që e presin Kosovën gjatë muajit nëntor.

D.L

Sport

Jeta Zeka, gjyqtarja e parë kosovare në garat evropiane të FIBA-s

Published

7 hours ago

October 8, 2026

UBTNews

Jeta Zeka ka shkruar historinë në basketbollin kosovar, duke u bërë gjyqtarja e parë femër nga Kosova që do të ndajë drejtësinë në garat evropiane të klubeve të FIBA-s.

Gjyqtarja nga Peja është nominuar për dy ndeshje të FIBA EuroCup Women, të cilat do të zhvillohen në Itali.

Më 14 tetor, Zeka do të jetë pjesë e ndeshjes Magnolia Basket Campobasso – Cinkarna Celje, në Campobasso.

Ndërsa më 21 tetor, ajo do të ndajë drejtësinë në përballjen GEAS Basket SSDRL – Panathinaikos A.C., në Milano.

Kjo përbën një arritje të rëndësishme për Zekën dhe një moment të veçantë për basketbollin kosovar, duke shënuar një tjetër hap të grave nga Kosova në skenën evropiane.

D.L

Sport

Xhaka dënohet për falsifikimin e certifikatave të COVID-19

Published

7 hours ago

October 8, 2026

UBTNews

Kapiteni i Zvicrës, Granit Xhaka, është dënuar për falsifikimin e certifikatave të vaksinimit kundër COVID-19.

34-vjeçari e bëri të ditur vendimin përmes një postimi në Instagram, duke treguar se është dënuar me 50 tarifa ditore nga 3 mijë franga, me kusht për një periudhë prove prej dy vitesh.

Kjo do të thotë se Xhaka nuk do të duhet ta paguajë gjobën, për sa kohë që gjatë periudhës së provës nuk kryen ndonjë vepër tjetër penale. Ai ka paguar tashmë shpenzimet gjyqësore.

Xhaka pranoi se kishte falsifikuar dy certifikata vaksinimi gjatë pandemisë, rast i cili ishte bërë publik pas një hetimi nga Prokuroria Publike e Luzernit.

“E pranoj vendimin dhe marr përgjegjësinë”, ka shkruar Xhaka në Instagram.

D.L