Lajmet

​Takimi i Komisionit për Arsim përfundon pa zgjidhje për grevën

Bashkimi i Sindikatave të Pavarura të Kosovës ka hyrë në grevë më 25 gusht 2022.

Published

4 years ago

on

Takimi i përfaqësuesve të Sindikatës së Arsimit, Shkencës dhe Teknologjisë me ministrin e Financave dhe atë të Arsimit ka përfunduar pa ndonjë zgjidhje për ndërprerjen e grevës. Takimi i cili u zhvillua me ftesë të Komisionit Parlamentar për Arsim është përcjellur me përplasje në mes të ministrit Hekuran Murati dhe përfaqësuesve të SBAShK-ut. Këta të fundit kanë deklaruar se e pranojnë shumën prej 50 euro të ndarë nga qeveria por duan rritje të pagës bazuar në rritjen ekonomike të vitit të 2021 (10.45%).

Nënkryetarja e SBAShK-ut, Vjollca Shala tha se gjithashtu kërkojnë që në vitin 2023 të rishikohet rritja ekonomike e vitit paraprak dhe të bazë të saj të bëhet rritja e pagës nga janari 2023.

 “Tani ka një ndryshim sa i përket kërkesës së parë, ne kemi bërë këtu një lëshim, kemi pranuar pakon ekonomike prej 50 euro por kërkojmë edhe rritjen e pagës në bazë të rritjes ekonomike të vitit 2021 që ka qenë bruto[produkti vendor e që sipas ASK-së është 10.45%. Kemi bërë lëshim, e pranojmë këtë pakon ekonomike 50 euro por njëherit të rritet paga për vlerën 10.45. Njëherit kërkojmë që në vitin 2023 të rishikohet prap sa do të jetë rritja ekonomike e vitit 2022 dhe të shikohet sa është shkalla e inflacionit dhe në bazë të rritjes ekonomike në 2022-ën dhe shkallës së inflacionit, të bëhet rritja e pagës që nga janari 2023”, tha ajo.

Ajo tha se kërkojnë që komentet e tyre të merren parasysh në projektligjin për paga.

Ndërsa ministri i Financave, Hekuran Murati tha se qeveria dizajnon pako për të gjitha kategoritë dhe nuk mund të ketë rritje për kategori të caktuara.

 “Çdo lëvizje tjetër tash, nëse shtohet te një kategori duhet me marrë te kategoria tjetër, pra nëse kërkohet këtu që të rritet për një kategori siç janë për shembull mësimdhënësit, apo punëtorët e sektorit publik duhet me marrë edhe te pensionistët, pra duhet me zvogëlu me heq ose te studentët ose te një kategori tjetër. Pako prej 150 milion euro korrespondon me shumën që e kemi kaluar në rishikim buxhetor, besoj ju kujtohet. Nëse pretendohet që mundet më shumë duhet të tregohet cilës kategori po sugjeroni me ua marrë, unë nuk jam, unë mendoj që familjet me asistencë sociale kanë nevojë më shumë, mendoj që pensionistët kanë nevojë më shumë, mendoj edhe studentët kanë nevojë, prandaj si qeveri e kemi dizajnuar këtë pako që gjithë qytetarët e republikës t’i mbështesim nga pak”, tha ai.

Ai ka kritikuar përfaqësuesit e Këshillit Grevist se qëllimisht po synojnë mosmarrëveshje.

 “Këta as që ua kanë prezantuar anëtarësisë ofertën që e kanë marrë nga qeveria, as që e kanë prezantuar para anëtarësisë, kemi të bëjmë me këtë nivel të diskutimit. U tha se i keni kërkesat, prandaj e pyeta a janë të njëjtat, sepse negocimi dhe diskutimi bëhet, janë kërkesat fillestare dhe tentohet të gjendet një kompromis, nuk mund të arrihet marrëveshje duke tentuar kompromis me kërkesa të cilat vazhdimisht ndryshojnë, ju ftoj media të nderuara, mund të shikoni kërkesat fillestare që kanë qenë të këshillit grevist të publikuar më datë 17 gusht kur është nisur greva dhe krahasoni me këto kërkesa që kemi sot, nuk janë të njëjta dhe normalisht që nuk mund të merresh vesh me dikë që qëllim e ka mos marrëveshjen sepse sapo qeveria lëvizë diçka këta shtojnë kërkesë tjetër ose e ndryshojnë kërkesën”, tha Murati.

Por sipas Ymer Ymerit nga SBAShK-u, ata komunikojnë në vazhdimësi me anëtarësinë dhe të njëjtit janë të njoftuar për çdo propozim nga ana e qeverise.

 “Ende pa dalë ju me 50 euro ne e kemi pyet anëtarësinë dhe anëtarësia na ka thënë jo, po më dëgjojnë se jam duke folur publikisht, ende pa dalë të shtunën me ofertën me 50 euro ne i kemi pyetur, janë duke dëgjuar anëtarësia. Lexo drejtë kërkesën për ligjin e sigurimeve shëndetësore dhe mos e interpreto keq se ke qëllim mos me arrit marrëveshje. Thotë deri në fund të vitit 2022 të miratohet plotësim ndryshimi i ligjit për sigurime shëndetësore ose në të kundërtën të fillojë zbatimi i ligjit aktual të sigurimeve shëndetësore nga janari i vitit 2023. Nuk kemi thënë rrimë në grevë derisa të bëhet ligji”, tha ai.

Në këtë takim përplasje ka pasur edhe pasi ministri Murati tha se Ymer Ymeri i SBAShK-ut është i afërt me subjekte të caktuara politike.

 “Nga ana e përfaqësuesve të këshillit grevist u tha se kush janë dhe çfarë pozita mbajnë, por konsideroj që megjithatë duhet t’i njohim më mirë. Prandaj nëse më lejohet kisha disa pyetje për anëtarët, për shkak se për zotëri Ymerin është raportuar që është i afërt me subjekte të caktuara politike…”, ka thënë Murati.

Ndërsa ministrja e arsimit, Arbërie Nagavci kërkoi që mësimi të fillojë menjëherë dhe të vazhdojë dialogu social.

 “Greva është shpallur nga BSPK, për të gjithë zyrtarët publik, përfshirë edhe zyrtarët këtu në Kuvend, ministri gjithandej, kërkesat janë për të gjithë, të gjithë janë duke punuar, vetëm fëmijët nuk janë në shkollë. Ju lutem shumë, e vazhdojmë diskutimin, fëmijët i dërgoni në shkollë, le ti lejojnë edhe arsimtarët të punojë si të gjithë të tjerët”, tha Nagavci.

Kërkesë për hapje të shkollave kanë pasur edhe deputetët e këtij komisioni, por të njëjtit kanë kërkuar që qeveria të ofrojë zgjidhje.

 “Ministër, shkruaj kryeministrit, kryetarit të Kuvendit, bisedo me kryeministrin, të gjejmë një zgjidhje. Me përulësinë më të madhe e them për shkak të ardhmërisë sonë, ne e dimë që dimri po vjen është krizë gjithandej në rajon e në botë, do të ballafaqohemi me mungesë të energjisë, shkollat tona me këto kushte të cilat i kanë, a do të ketë ngrohje, a duhet me u ndërpre mësimi, ne kaluam periudha të vështira në kohën e pandemisë ju lus që me këtë paketën e 150 milionëshit të cilën ju e keni dizajnuar, uluni rishikoni dhe ta bëjmë një zgjidhje”, tha deputetja e LDK-së, Vlora Dumoshi.

Ndërsa kryetari i komisionit, Ardian Gola ka paraqitur një propozim për të cilin përfaqësuesit e SBAShK-ut janë zotuar se do t’ua përcjellin anëtarësisë.

 “Mos më jepni përgjigje tani, ju kisha lutë mbi të gjitha si prind a është e mundur që deri të arrihet një marrëveshje të themi një lloj moratorium të këtij procesi të mos marrëveshjes, që fëmijët t’i rikthejmë në proces mësimor, të mos ua vendosim notat që prap po them mund të jetë presion goxha i fuqishëm sindikal në raport me qeverinë, dhe ditëve në vijim ta intensifikojmë komunikimin me qeverinë dhe sindikatat dhe jam shumë i sigurt që përgjatë kohës pashmangshëm do të përafrohen pozicionet dhe do të mund të gjendet një zgjidhje. Por mos të paguajnë fëmijët dhe t’i përdorim notat si formë të presionit sindikal”, tha ai.

Në këtë takim, ministrja Nagavci tha se e vetmja pikë me të cilën nuk pajtohen me SBAShK-un është kërkesa për 100 euro.

 “Kërkesa jonë është që të vazhdojmë dialogun dhe flasim për plot çështje, qysh kemi bashkëpunuar deri tash të vazhdojmë edhe tutje, të fillojë mësimi ju lutem të gjithëve. Për të gjithë ata që janë të ndershëm këtu dhe gjithë ata që ia duan të mirën arsimit, kërkojmë me u hap shkollat menjëherë, pastaj e vazhdojmë diskutimin sepse kemi shumë gjëra me diskutu për arsimin, ka shumë gjëra që duhet me punu të gjithë bashkë, mos na merrni edhe energji me diskuktu për gjëra që nuk është dashur me u diskutu. Sikurse i kemi zgjidh 99% të kërkesave e zgjidhim edhe këtë të fundit, e zgjidhim por filloni mësimin…”, tha Nagavci.

Kjo deklaratë e Nagavcit ka bërë që deputetët e PDK-së ta lëshojnë takimin pak para se ai të përfundojë.

 “Ne nuk kemi këtu nevojë me dalë dhe me duartrokitë as asaj dhe as kësaj pale, situata është shumë më shumë serioze sesa kaq, a ka propozim të ri zotëri kryetar, nëse ka propozim të ri, sot je në pushtet nesër nuk je, nesër vjen tjetri, kalohet ky petku politik, nëse nuk ka propozim të ri me i dëgju ne këta e me u bë spektrorë, fjalime të kalamajve që kanë dalë prej çerdheve e kanë ardhur këtu, atëherë ne nuk rrimë nëse nuk ka propozim të ri”, tha ai.

Bashkimi i Sindikatave të Pavarura të Kosovës ka hyrë në grevë më 25 gusht 2022. 

Related Topics:
Continue Reading

Vendi

United Hospital fuqizon shërbimet e kardiologjisë me Dr. Banush Gashin, specialist me 40 vjet përvojë në mjekësi

Published

12 hours ago

on

November 13, 2026

By

Prishtinë – Përvoja shumëvjeçare, ekspertiza në trajtimin e sëmundjeve të zemrës dhe njohuritë e avancuara në fushën e aritmologjisë tashmë janë pjesë e ekipit të United Hospital. Institucioni shëndetësor njofton se në ekipin e tij mjekësor është bashkuar Dr. Banush Gashi, internist, kardiolog dhe aritmolog, me një karrierë 40-vjeçare në mjekësi dhe 24 vjet përvojë në Qendrën Klinike Universitare të Kosovës (QKUK).

United Hospital vazhdon të zgjerojë kapacitetet e veta profesionale, duke sjellë për pacientët ekspertizë të specializuar në diagnostikimin dhe trajtimin e sëmundjeve kardiovaskulare.

Bashkimit të Dr. Banush Gashit me ekipin mjekësor të këtij institucioni i jepet rëndësi e veçantë, duke marrë parasysh përvojën e tij të gjatë në mjekësinë interne, kardiologji dhe veçanërisht në aritmologji – fushë e specializuar që merret me diagnostikimin dhe trajtimin e çrregullimeve të ritmit të zemrës.

Gjatë karrierës së tij profesionale, Dr. Gashi ka realizuar mbi 400 procedura në fushën e aritmologjisë dhe implantimit të pajisjeve kardiake. Përvoja e tij është plotësuar edhe përmes pjesëmarrjes në kongrese, trajnime dhe aktivitete profesionale ndërkombëtare në qendra të njohura evropiane, përfshirë Londrën, Parisin, Romën, Barcelonën dhe Vjenën.

Shërbime të avancuara për diagnostikimin dhe trajtimin e zemrës

Me angazhimin e Dr. Gashit, pacientët e United Hospital do të kenë qasje në një gamë të gjerë ekzaminimesh diagnostikuese dhe procedurash specialistike kardiologjike.

Shërbimet përfshijnë:

Diagnostikimin kardiologjik: Ekokardiografi, testin e stresit dhe monitorimin Holter 24–72 orë për vlerësimin e aktivitetit dhe ritmit të zemrës.

Trajtimin e çrregullimeve të ritmit: Implantimin e stimuluesve kardiakë (Pacemaker DDD dhe CRT), si dhe kontrollin dhe ndërrimin e baterive të pajisjeve PM/ICD.

Procedurat specialistike: Perikardiocentezën dhe kardioversionin, sipas indikacioneve mjekësore.

Këto shërbime kanë rëndësi të veçantë për diagnostikimin në kohë, përcjelljen klinike dhe trajtimin e pacientëve me sëmundje të ndryshme kardiovaskulare.

Përvoja dhe përkushtimi në shërbim të shëndetit të zemrës

Sëmundjet kardiovaskulare kërkojnë vlerësim të kujdesshëm, diagnostikim të saktë dhe trajtim të individualizuar. Për këtë arsye, prania e specialistëve me përvojë të gjatë profesionale përbën një element të rëndësishëm në ofrimin e kujdesit shëndetësor cilësor.

United Hospital, përmes zgjerimit të ekipit specialistik, synon të ofrojë shërbime bashkëkohore kardiologjike, duke vënë në dispozicion të pacientëve përvojën profesionale dhe teknologjinë diagnostikuese e terapeutike.

 

Kontakti për termine dhe informata:

UNITED HOSPITAL

046 60 70 70

M2, Prishtinë–Ferizaj, km 7, Prishtinë

United Hospital – ekspertizë profesionale dhe kujdes i specializuar për shëndetin e zemrës./rajonipress/

Continue Reading

Vendi

Hyn në fuqi Ligji për Byronë e konfiskimit të pasurisë së pajustifikueshme

Published

16 hours ago

on

November 13, 2026

By

Presidentja Justina Shiroka-Pula ka dekretuar Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme, i cili ishte miratuar në Kuvendin e Kosovës dy javë më parë.

Lajmin e ka bërë të ditur kryetarja e Kuvendit, Albulena Haxhiu, e cila ka njoftuar se gjatë ditës e ka pranuar nga Presidenca dekretin për shpalljen e ligjit.

Haxhiu ka thënë se me dekretimin e tij, ligji po hyn në fazën e zbatimit, duke theksuar se Kuvendi do ta përcjellë nga afër procesin e themelimit të Byrosë.

“Për secilin që ushtron funksion publik, është e qartë se çdo pasuri duhet të ketë burim të ligjshëm dhe të dokumentuar. Kuvendi do ta përcjellë nga afër ngritjen e Byrosë. Qytetarët do ta matin këtë ligj me rezultatet që do të japë”, ka shkruar Haxhiu.

Miratimi i ligjit në Kuvend ishte kundërshtuar nga deputetët e opozitës, të cilët kishin ngritur shqetësime lidhur me zbatueshmërinë e tij.

Nga 24 amendamentet e propozuara për këtë ligj, 12 ishin paraqitur nga opozita, ndërsa deputetët e partisë në pushtet kishin mbështetur vetëm njërin prej tyre.

/A.K/

Continue Reading

lajme

UBT prezanton dy punime shkencore në Konferencën Ndërkombëtare “AI Horizon” të Akademisë së Shkencave të Shqipërisë

Published

16 hours ago

on

November 13, 2026

By

UBT po merr pjesë në Konferencën Ndërkombëtare Shkencore “AI Horizon – A New Era of Creativity and Innovation”, të organizuar nga Akademia e Shkencave e Shqipërisë, më 12–13 nëntor 2026, në Tiranë, ku UBT është një nga partnerët e kësaj ngjarjeje të rëndësishme shkencore ndërkombëtare.

Në këtë konferencë, UBT përfaqësohet nga rektori, Prof. Dr. Edmond Hajrizi, dekani i Fakultetit të Shkencave Kompjuterike, Besnik Qehaja, dhe asistenti Elton Boshnjaku, të cilët prezantuan dy punime shkencore që trajtojnë zhvillimet më të fundit në fushat e Internetit të Gjërave (IoT), Qyteteve të Mençura (Smart City), Vizionit Kompjuterik dhe Inteligjencës Artificiale.

Dy punimet shkencore të prezantuara janë: “Mobile Augmented Reality with an LLM Assistant Connected to Live Sensor Data for Remote Learning in a University Campus Digital Twin”

Punimi trajton integrimin e realitetit të shtuar mobil me një asistent të bazuar në modele të mëdha gjuhësore (LLM), të ndërlidhur me të dhëna në kohë reale nga sensorët, duke krijuar mundësi të reja për mësim interaktiv dhe në distancë përmes binjakut digjital të kampusit universitar.

“Secure Protocol Translation and Weather-Referenced Drift Detection for Commercial IoT Devices on Azure IoT Hub: A 4G Node Case Study in a University Smart City”

Ky punim fokusohet në sigurinë dhe ndërveprimin e pajisjeve komerciale IoT, përmes përkthimit të protokolleve të komunikimit dhe zbulimit të devijimeve të të dhënave në raport me kushtet atmosferike, duke u mbështetur në një rast studimor me nyje 4G në kuadër të një Smart City universitar.

Përmes këtyre dy prezantimeve, përfaqësuesit e UBT-së sollën para komunitetit shkencor ndërkombëtar rezultate kërkimore dhe qasje inovative që ndërlidhin inteligjencën artificiale, sensorët inteligjentë, realitetin e shtuar dhe infrastrukturën e qyteteve të mençura.

Pjesëmarrja e UBT-së në këtë konferencë, krahas prezantimit të rezultateve shkencore, përfaqëson edhe një mundësi të rëndësishme për zgjerimin e bashkëpunimit me institucionet akademike dhe kërkimore, shkëmbimin e përvojave dhe avancimin e projekteve inovative.

UBT vazhdon të dëshmojë përkushtimin e tij ndaj kërkimit shkencor, inovacionit dhe bashkëpunimit ndërkombëtar, duke kontribuar aktivisht në zhvillimin dhe zbatimin e teknologjive të së ardhmes.

Continue Reading

Lajmet

Ditari: Lajmet kryesore që shënuan datën 13 nëntor 1992-1998?

Published

16 hours ago

on

November 13, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998. 

13 nëntor 1992

“The Wall Street Journal” për rrezikun e luftës në Kosovë

Gazeta autoritative amerikane “The Wall Street Journal” në një kryeartikull të saj të botuar dje thekson se “diplomatë të shumtë ndërkombëtarë dhe organizata humanitare kanë paraparë se nëse lufta arrin në Kosovë do t’ia kalojë të gjitha tmerreve të mëparshme ballkanike”. Gazeta pohon se agresorët serbë janë duke zhvilluar një fushatë të spastrimit etnik ndaj popullsisë shqiptare të Kosovës gjatë dy vjetëve të fundit. “Kjo është një spastrim etnik i heshtur”, i tha kësja gazete kryetari i Republikës së Kosovës, dr.Ibrahim Rugova duke bërë fjalë për nja 200 mijë shqiptarë që kanë qenë të detyruar të largohen nga shtëpitë e tyre në Republikën e Kosovës për shkak të kërcënimeve serbe.

 

13 nëntor 1993

Policia plaçkit dyqanet e shqiptarëve në Han të Elezit

Komisioni për Informim i Degës së LDK-së në Han të Elezit, njofton se policia financiare mbylli të vetmen furrë private në Han të Elezit, pronë e Ramadan Ymerit. Policia konfiskoi nga depoja e furrës 29 ton miell.

Të njëjtën ditë, policia financiare në dyqanin e Bedri Dacit konfiskoi ushqim për kafshë në një vlerë prej afro 12.000 markash gjermane.

 

13 nëntor 1995

Polici serb rrahu tri herë të miturin në Mitrovicë

Më 7 nëntor, rreth orës 10, në stacionin e autobusëve në Mitrovicë, një polic serb rrahu të miturin Daim H. Çubrelin (14) dhe ia plaçkiti atij 7 pako cigare, njofton Komisioni për Informim i Degës së LDK-së në Mitrovicë.

Po ky polic, më 11 nëntor, rreth orës 18, po ashtu në stacionin e autobusëve në Mitrovicë, keqtrajtoi sërish Daimin, me pretekst se nuk deshi t’ia japë një pako cigare pa para.

Më 12 nëntor, rreth orës 12, në stacionin e autobusëve në Mitrovicë polici serb, i cili kishte rrahur dy herë Daim Çubrelin e rrahu sërish dhe ia plaçkiti 70 pako cigare.

 

13 nëntor 1996

Në Universitetet e Shqipërisë edhe maturantë shqiptarë nga Mali i Zi

Edhe maturantët shqiptarë të këtij viti nga Mali i Zi do të vazhdojnë studimet e tyre në universitetet e Shqipërisë pasi po tejkalohen disa vështirësi procedurale.

Fjala është për 24 kandidatë që përcaktoi komisioni përkatës i LD në MZ. Mirëpo, në ndërkohë Ministria e Arsimit e Shqipërisë miratoi vendimin për t’iu nënshtruar provimeve klasifikuese edhe studentët shqiptarë nga viset e ish-Jugosllavisë. Sipas komisionit të përmendur, kandidatët shqiptarë nga Mali i Zi nuk u paraqitën në këto provime për shkaqe parimore dhe kohore. Por, me kontaktet midis përfaqësuesve të LD në MZ dhe atyre të Qeverisë Shqiptare kjo çështje po merr zgjidhje pozitive. Kështu, kryetari i LD në MZ, Mehmet Bardhi në takimin e tij të paradokohshëm me kryeministrin e Shqipërisë, Aleksandër Meksin, mori garancinë se studentët shqitparë nga Mali i Zi do të pranohen edhe këtë vit në universitetet e Shqipërisë. Kryetari Bardhi për çështjen e studentëve zhvilloi bisedime edhe me dr.Gjergj File, drejtor i Arsimit të Lartë. Në të mirë të realizimit pozitiv të kësaj çështjeje flet edhe vendimi më i ri i Ministrisë së Arsimit të Shqipërisë, sipas të cilit “nga kuotat e përcaktuara për vitin mësimor 1996/97 mund të përfitojnë kandidatët shqiptarë me banim jashtë kufijve”.

 

13 nëntor 1997

Serbët e pranojnë disfatën me Kroacinë

Gazeta britanike “Indipendent” vendosjen e lidhjeve hekurudhore mes Serbisë e Kroacisë e vlerëson se serbët pranuan disfatën. Sipas kësaj gazete serbët tash sikur pranojnë se kufiri me Kroacinë është i përhershëm dhe i pandryshueshëm.

13 nëntor 1998

Uiliem Uoker: Ka shqetësime serioze për sigurinë në Kosovë

Në një intervistë dhënë sot radio BBC-së shefi i Misionit Verifikues të OSBE-së në Kosovë, Uiliem Uoker duke u përgjigjur në pyetjen se për çfarë është biseduar në takimin e tij në Prishtinë me ndërmjetësin amerikan në Kosovë, Kristofer Hill, u përgjigj:

– Në thelb ambasadori Hill ishte për vizitë për disa arsye, jo më pak për t’u takuar edhe me mua, dhe për të na njoftuar se cili është statusi aktual i procesit të tij të negociatave shqiptaro-serbe. Është e qartë se kjo ka të bëjë me atë që ne po fillojmë të bëjmë këtu si p.sh. kur mund të filllojmë periudhën nëntëmujore sa i përket mbikëqyrjes së zgjedhjeve në Kosovë. Kjo vjen pas zgjidhjes politike, prandaj ne u desht të dëgjonim nga ambasadori Hill se si po ecen procesi, tha z.Uoker.

I pyetur se çfarë përshtypje kishte ai për procesin e negociatave dhe nëse ishte më afër arritja e një marrëveshjeje politike për Kosovën, z.Uoker tha:

– Ambasadori Hill na njoftoi me të rejat më të fundit, por ju duhet ta dini se unë ndodhem në Kosovë vetëm këto 24 orët e fundit dhe kjo ishte hera e parë që bisedova me z.Hill. Pra një pjesë e madhe kishte të bënte me sfondin e ecurisë së procesit. Por, do të thosha se informimi që më dha ambasadori Hill më bëri optimist se është duke shënuar progres.

Duke u përgjigjur në pyetjen se cilat janë përshtypjet e tij për gjendjen në terren, z.Uoker u përgjigj:

– Është e qartë se ka arsye për shqetësim të konsiderueshëm ndonëse kemi shënuar progres javët e fundit, dhe siç thashë dje rruga ende është e gjatë për të bërë diçka për sa i përket respektimit të marrëveshjes dhe premtimeve të palëve të përfshira por ende ka shumë punë për t’u bërë. Ditëve të fundit çdo ditë kemi dëgjuar për incidente, prandaj edhe më tej kemi shqetësime serioze për sigurinë në Kosovë.

I pyetur lidhur me incidentet e fundti se kush është fajtor për vazhdimin e dhunës në Kosovë, ambasadori Uoker tha:

– Dy incidentet më të fundit për të cilat kam dëgjuar kanë të bëjnë me ato që këtu po quhen rrëmbime dhe duket sikur janë hakmarrje midis palëve. Njëra palë i filloi ato, ndërsa tjetra u hakmor, duke bërë pothuajse të njëjtën gjë. Nga informacionet që kam nuk jamë në gjendje tani të them se çfarë i kanë bërë palët njëra tjetrës. Por vetë fakti se këto incidente kanë ndodhur, përmbajnë shqetësim.

Në pyetjen tjetër se a do të jetë në gjendje Misioni Verifikues në Kosovë të ndikojë që incidentet e tilla të mos ndodhin në të ardhmen, shefi i misionit të OSBE-së në Kosovë tha:

– Mendoj se kryesuesi i radhës i OSBE-së, ministri i jashtëm polak, Bronislav Geremek, tashmë ka thënë publikisht se ai beson se vetëm njoftimi për krijimin e Misionit Verifikues ka zbutur deri diku tensionet e këtushme. Sigurisht jo të gjithë tensionin por deri diku edhe fakti se ne kemi filluar të mbërrijmë dhe të tregojmë praninë tonë, do të ndihmojnë në këtë situatë. Se a do të ndikojë që njerëzit të ndihen rehat të gjithë që të kthehen në shtëpitë e tyre apo t’i kthehen jetës normale, kjo ende duhet të shihet, – tha ambasadori Uiliem Uoker.

 

Continue Reading

Të kërkuara