Paolo Maldini dhe Leonardo kanë vendosur të japin dorëheqje nga postet e tyre në Federatën Italiane të Futbollit, raportoi të hënën mbrëma “Sky Sport Italia”.

Dyshja largohet vetëm 16 ditë pasi mori detyrat në federatë. Maldini ishte emëruar drejtor teknik me misionin për të riorganizuar dhe rikthyer stabilitetin në përfaqësuesen italiane, ndërsa Leonardo shërbente si këshilltar i tij.

Vendimi për dorëheqje erdhi menjëherë pasi ish-mesfushori i Italisë, Andrea Pirlo, bëri të ditur se nuk ishte më kandidat për postin e përzgjedhësit të “Azzurrëve”.

Sipas raportimeve, Pirlo ishte kandidati i preferuar i Maldinit për të marrë drejtimin e kombëtares, pasi Pep Guardiola kishte refuzuar ofertën e Federatës Italiane të Futbollit.

Pas largimit të Maldinit dhe Leonardos, mediat italiane raportojnë se Roberto Mancini është favoriti kryesor për t’u rikthyer në stolin e Italisë.

D.L

Goli spektakolar i Sidny Lopes Cabral për Kepin e Gjelbër ndaj Argjentinës në fazën e 1/16 së finales është shpallur goli më i bukur i Kupës së Botës, ka njoftuar FIFA.

Cabral realizoi një supergol me një goditje të fuqishme nga krahu i majtë, duke e dërguar topin në këndin e portës dhe duke mos i lënë asnjë mundësi reagimi portierit argjentinas, Emiliano Martínez. Para finalizimit, ai u lirua me mjeshtëri nga mbrojtja falë një driblimi ndaj Alexis Mac Allister.

Futbollisti i Kepit të Gjelbër shënoi në minutën e 103-të për të barazuar rezultatin në 2:2. Megjithatë, Argjentina siguroi kualifikimin në çerekfinale falë një autogoli të Diney në minutën e 111-të, duke triumfuar me rezultat 3:2 pas vazhdimeve.

Në renditjen e golave më të bukur të turneut, vendi i dytë i takoi Eldor Shomurodovit të Uzbekistanit, ndërsa i treti Wilson Isidorit të Haitit.

“Çdo futbollist ëndërron të shënojë një gol në Kupën e Botës. Por ta bësh këtë në një mënyrë të tillë, në një skenë kaq të madhe dhe kundër një kundërshtari si Argjentina, është diçka e jashtëzakonshme. Isha vërtet shumë i lumtur”, ka deklaruar Cabral.

D.L

Fisnik Asllani vazhdon të jetë një nga emrat që Barcelona po e monitoron për repartin ofensiv, por një zhvillim tjetër në merkato mund ta komplikojë kalimin e sulmuesit të Hoffenheimit në “Camp Nou”.

Sipas gazetës spanjolle AS, Asllani është një prej alternativave që klubi katalonas po shqyrton në rast se Ferran Torres largohet gjatë kësaj vere. Megjithatë, situata mund të ndryshojë në varësi të lëvizjeve të tjera në treg.

Nëse talenti nga Bregu i Fildishtë, Yan Diomande, përfundon te Real Madridi, atëherë RB Leipzig pritet të rrisë interesimin për transferimin e Asllanit. Klubi gjerman e konsideron sulmuesin kosovar si zëvendësuesin ideal dhe është i gatshëm të veprojë shpejt për ta siguruar shërbimin e tij.

Një kalim i mundshëm i Asllanit te Leipzig do t’ia vështirësonte ndjeshëm Barcelonës realizimin e planeve të saj, pasi klubi spanjoll mund të mbetet pa një nga objektivat kryesorë për zëvendësimin e Ferran Torresit.

Kështu, transferimi i mundshëm i Diomandes te Real Madridi mund të krijojë një efekt domino në merkato, duke ndikuar drejtpërdrejt në të ardhmen e Fisnik Asllanit.

Ndërkohë, për transferimin e Diomandes te Reali kanë mbetur vetëm disa detaje. RB Leipzig kërkon rreth 120 milionë euro si shumë fikse, ndërsa klubi madrilen raportohet se po ofron afërsisht 100 milionë euro plus bonuse.

D.L