Presidentja e Republikës së Kosovës, Vjosa Osmani, ka pritur sot në takim ambasadorin e Republikës së Turqisë në Kosovë, Sabri Tunç Angılı, me të cilin diskutuan për zhvillimet e fundit politike në vend si dhe thellimin e mëtejmë të raporteve bilaterale me Turqinë.

Gjatë takimit, Osmani vlerësoi mbështetjen e vazhdueshme të Turqisë dhe marrëdhëniet miqësore ndërmjet dy shteteve, duke potencuar se Turqia mbetet partnere strategjike dhe mbështetëse e fuqishme e Kosovës.

Osmani shtroi nevojën e vazhdimit të mbështetjes turke ndaj Kosovës për anëtarësim në organizatat ndërkombëtare, njohje të mëtejmë dhe vazhdimin e thellimit të bashkëpunimit në fushën e mbrojtjes.

Sipas një komunikate të presidencës, të dy bashkëbiseduesit u dakorduan për thellimin e bashkëpunimit dhe avancimin e interesave të përbashkëta të të dyja shteteve, duke përforcuar lidhjet miqësore dhe bashkëpunimin afatgjatë.

Sot, më 20 janar 2025, përfundon afati shtesë për subjektet politike të certifikuara për zgjedhjet e 9 shkurtit për të paraqitur kërkesat për akreditimin e vëzhguesve të tyre. Ky proces është një hap i rëndësishëm për garantimin e transparencës dhe besueshmërisë gjatë zhvillimit të zgjedhjeve. Zëdhënësi i Komisionit Qendror të Zgjedhjeve (KQZ), Valmir Elezi, konfirmoi se ky është afati përfundimtar për subjektet politike, ndërsa afatet për organizatat dhe institucionet e tjera që dëshirojnë të akreditojnë vëzhgues janë ende të hapura.

Përveç afatit për subjektet politike, janë dhënë edhe afate të tjera për akreditimin e vëzhguesve të organizatave joqeveritare, qeveritare, ndërqeveritare, si dhe mediave dhe përfaqësive të vendeve të huaja. Kështu, OJQ-të dhe organizatat qeveritare ndërqeveritare kanë kohë deri më 25 janar 2025 për të dorëzuar kërkesat për vëzhguesit, ndërsa afati për mediat vendore dhe ndërkombëtare është më 4 shkurt 2025. Po ashtu, përfaqësitë e vendeve të huaja dhe organizatat ndërkombëtare mund të aplikojnë deri më 25 janar 2025.

KQZ ka lehtësuar aplikimin përmes një platforme online, e cila mund të aksesohet në adresën https://apliko.kqz-ks.org. Përfaqësuesit e autorizuar të organizatave, mediave dhe përfaqësive të vendeve të huaja duhet të plotësojnë formularët në këtë platformë dhe të dorëzojnë të dhënat për akreditimin. Pas shqyrtimit dhe miratimit të aplikimeve, ata do të marrin kredencialet për t’u qasur në platformën online dhe për të regjistruar vëzhguesit e tyre. Ky proces është një mundësi për të siguruar që zgjedhjet të jenë të vëzhguara nga një gamë e gjerë organizatash dhe individësh, për të garantuar një proces zgjedhor të drejtë dhe të sigurt./UBTNews/

Një tragjedi e tmerrshme ka ndodhur në një azil për të moshuarit në Barajevë, një periferi e Beogradit, ku tetë persona humbën jetën dhe shtatë të tjerë u plagosën nga zjarri që shpërtheu rreth orës 3:30 të mëngjesit. Zjarri u përhap shpejt, duke përfshirë një pjesë të madhe të azilit ku qëndronin më shumë se 30 të moshuar, së bashku me stafin që përkujdesej për ta.

Policia ende nuk ka lëshuar një deklaratë zyrtare, por sipas ministrit të kujdesit social, Nemanja Starovic, dyshohet se zjarri ka shpërthyer kur një nga të moshuarit ka vendosur flakën një dysheku, i cili më pas u përhap me shpejtësi, duke shkaktuar përhapjen e flakëve dhe tragjedinë që ka tronditur vendin.

Pas shpërthimit të zjarrit, dyshimet janë të fokusuara tek ndihma e vonuar dhe pamundësia për të shpëtuar të gjithë të prekurit nga zjarri, që i mori jetën disa personave dhe lëndoi disa të tjerë. Autoritetet lokale janë duke hetuar më tej rreth kushteve të sigurisë dhe kontrollit të mundshëm që ka pasur ky institucion, dhe përpjekjet për të siguruar ndihmën e shpejtë për të mbijetuarit që ndodheshin në rrezik./UBTNews/

Shoqata “Miqtë e Amerikës”, për nder të inaugurimit të Presidentit të Shteteve të Bashkuara të Amerikës, Donald Trump, ka organizuar disa aktivitete.

Te shtatorja e presidentit Bill Clinton është zëvendësuar flamuri i mëparshëm me një flamur të ri, të shoqëruar me një fjongo.

Kryetari i kësaj shoqate Agim Rexhepi, tha se me këtë veprim respektohet populli aleat dhe mik amerikan.

“Shfrytëzoj rastin që t’u uroj SHBA-së për kryerjen në mënyrë perfekte të zgjedhjeve të tyre nacionale pa turbulenca. Elementi tjetër që dua ta potencoj është që ta përgëzoj partinë Republikane për fitoren e arritur, njëkohësisht ta përgëzoj presidentin Trump për fitoren edhe për inaugurimin që do ta bëjë sot. Me veprim e bërë ne respektojmë SHBA-në, respektojmë flamurin amerikan, respektojmë institucionin e presidentit të SHBA-së, si dhe popullin aleat dhe mik amerikan”, tha Rexhepi.

Ai theksoi se populli i Kosovës, në veçanti populli shqiptar di të respektoj aleatët,  di të respektoj SHBA-në dhe të vlerësoj veprimet e bëra jo vetëm gjatë kohës se fundit, por gjatë historisë që kanë bërë për Kosovën e Shqipërinë.

“Veprimi jonë ka për qëllim që të dërgoj mesazh që në populli i Kosovës në veçanti populli shqiptar di të respektoj aleatët, di të respektoj SHBA-në, dimë të vlerësojmë veprimet e bëra jo vetëm gjatë kohës se fundit, por gjatë historisë që kanë bërë për Kosovën e Shqipërinë… Shpresoj që presidenti Trump do ta vazhdoj politikën e gjithë atyre presidentëve të SHBA pavarësisht nëse kanë qenë demokrat apo republikan, pro interesave të popullit shqiptar. Shpresoj që presidenti Trump do ta vazhdoj veprimin e jashtëzakonshme politik sa ishte president nga e kaluara ku nëpërmjet tij arritëm ta sigurojmë një njohje të jashtëzakonshme që ishte Izraeli”, tha Rexhepi.

Ndërsa zv komandanti  i Zjarrfikësve Abdusamed Shkodra,  tha se zjarrfikësit morën pjesë në ndërrimin e flamurit si shenjë mirënjohje për Amerikën “se çka ka bërë për popullin shqiptar, në ditën e inaugurimit të presidentit të ri”.