Pesë ankesa janë dorëzuar në Panelin Zgjedhor për Ankesa dhe Parashtresa (PZAP) kundër rezultateve përfundimtare të zgjedhjeve të parakohshme për Kuvendin e Kosovës, duke shtyrë përkohësisht procesin e certifikimit të tyre.

Sipas të dhënave të publikuara nga PZAP, ankesat janë paraqitur nga Partia Demokratike e Kosovës (PDK), Lista Serbe dhe Nova Demokratska Stranka (NDS). Dy ankesa janë dorëzuar nga PDK, dy nga NDS dhe një nga Lista Serbe.

Lidhur me këtë çështje, zëdhënësi i Komisionit Qendror të Zgjedhjeve (KQZ), Valmir Elezi, tha se institucioni nuk komenton rastet që ndodhen në procedurë ankimore.

“Komisioni Qendror i Zgjedhjeve nuk komenton çështjet që janë në proces ankimor. Si në çdo rast, KQZ do t’i përgjigjet, brenda afatit, kërkesës së PZAP-it, institucionit kompetent për shqyrtimin e ankesave në procesin zgjedhor, duke sqaruar të gjitha çështjet e nevojshme”, ka deklaruar Elezi.

Ai theksoi se certifikimi i rezultateve do të bëhet vetëm pasi të përfundojnë të gjitha procedurat ligjore.

“Pasi ndaj rezultateve përfndimtare të shpallura nga KQZ janë parashtruar disa ankesa, KQZ do të presë vendimmarrjen e PZAP-it dhe të Gjykatës Supreme, të zbatojë vendimet e tyre nëse përmbajnë obligime për KQZ dhe pastaj do të mund të procedojë me certifikimin e rezultateve përfundimtare të zgjedhjeve të parakohshme për Kuvendin e Kosovës”, u shpreh Elezi.

Ankesat kanë të bëjnë kryesisht me pretendime për parregullsi në procesin e numërimit të votave dhe mungesë të votave.

Pas vendimit të PZAP-it, palët do të kenë të drejtë të paraqesin ankesë edhe në Gjykatën Supreme. Vetëm pas përfundimit të të gjitha procedurave ligjore, KQZ do të mund të certifikojë rezultatet përfundimtare të zgjedhjeve./A.K/

Instituti Kombëtar i Shëndetësisë Publike të Kosovës (IKSHPK) u ka bërë thirrje qytetarëve që të tregojnë kujdes të shtuar gjatë ditëve me temperatura të larta, pasi Instituti Hidrometeorologjik i Kosovës ka paralajmëruar se temperaturat do të arrijnë deri në 38 gradë Celsius.

Sipas IKSHPK-së, për të zvogëluar rrezikun nga i nxehti, qytetarët duhet të shmangin qëndrimin dhe aktivitetet në ambiente të hapura, veçanërisht gjatë orëve më të nxehta të ditës.

Instituti rekomandon që të qëndrohet sa më shumë në ambiente me hije ose të freskëta, ndërsa gjatë ekspozimit në diell të mbrohen koka dhe fytyra me kapelë, si dhe të përdoren syze dielli dhe krem mbrojtës për lëkurën.

Po ashtu, IKSHPK-ja thekson rëndësinë e hidratimit, duke u bërë thirrje qytetarëve që të konsumojnë ujë rregullisht gjatë gjithë ditës për të shmangur dehidratimin dhe pasojat që mund të shkaktojnë temperaturat e larta.

Autoritetet shëndetësore u bëjnë apel veçanërisht të moshuarve, fëmijëve, grave shtatzëna dhe personave me sëmundje kronike që të tregojnë kujdes të shtuar gjatë kësaj periudhe me vapë./A.K/

Kandidatët për deputetë nga Partia Demokratike e Kosovës (PDK), Bekim Haxhiu dhe Qëndrim Kryeziu, kanë dorëzuar ankesë në Panelin Zgjedhor për Ankesa dhe Parashtresa (PZAP), duke kundërshtuar rezultatin përfundimtar të zgjedhjeve të 7 qershorit të publikuar nga Komisioni Qendror i Zgjedhjeve (KQZ).

Haxhiu tha se rezultati i shpallur është i pasaktë dhe nuk duhet të certifikohet pa u bërë një rinumërim i plotë.

“Sot bashkë me kandidatin për deputet Qëndrim Kryeziu, kemi dorëzuar ankesën në PZAP, në rezultatin përfundimtar të publikuar nga KQZ-ja, për arsye se rezultati i publikuar dhe përfundimtar është i pasaktë. Nga rinumërimi i 5,201 votave të PDK-së janë evidentuar 221 vota të regjistruara gabimisht. Mua si kandidat në këtë rinumërim më janë shtuar gjashtë vota”, deklaroi Haxhiu.

Ai shtoi se diferenca për mandatin e deputetit është vetëm 102 vota, ndërsa gabimet e evidentuara e tejkalojnë këtë numër.

“Marzhi i gabimit që është evidentuar është shumë i lartë dhe e tejkalon diferencën prej 102 votash. Prandaj kërkojmë që PZAP-ja të urdhërojë rinumërimin, në mënyrë që rezultati përfundimtar të jetë i saktë dhe i pakontestueshëm”, u shpreh ai.

Haxhiu kujtoi se një situatë e ngjashme kishte ndodhur edhe në zgjedhjet e 28 dhjetorit të vitit të kaluar.

“Në zgjedhjet e 28 dhjetorit, pas rinumërimit total më janë shtuar 522 vota. Edhe tani kemi një rast të ngjashëm, ndonëse me përmasa më të vogla”, tha ai.

Edhe kandidati tjetër i PDK-së, Qëndrim Kryeziu, tha se kërkesa e tyre synon vetëm respektimin e votës së qytetarëve.

“Ligji nuk thotë që duhet t’i falim gabimet, sado të vogla qofshin ato. Ligji thotë që duhet të zbatohet për të gjithë njëjtë dhe votë për votë të numërohet çdo votë. Ne nuk po kërkojmë asgjë të jashtëzakonshme, por vetëm që votat e qytetarëve të numërohen saktë”, deklaroi Kryeziu.

PZAP-ja ka afat katër ditë për të vendosur lidhur me ankesën. Në rast se ajo refuzohet, Haxhiu dhe Kryeziu kanë të drejtë ta dërgojnë rastin në Gjykatën Supreme, e cila sipas Ligjit për Zgjedhjet e Përgjithshme ka pesë ditë afat për të marrë vendim.

Pas përfundimit të procedurave ankimore, KQZ-së do t’i hapet rruga për certifikimin e rezultateve përfundimtare të zgjedhjeve të 7 qershorit./A.K/

Në Kampusin Inovativ të UBT-së është mbajtur forumi akademik me temë diskutimi “Nga Çlirimi te Lidershipi: Edukimi i Gjeneratës së Ardhshme përmes Partneritetit Kosovë–SHBA”, i organizuar për nder të 250-vjetorit të Shteteve të Bashkuara të Amerikës.

Në këtë ngjarje mori pjesë profesori dhe analisti amerikan për Ballkanin, Daniel Serwer, i cili u fokusua në zhvillimin e Kosovës, ndryshimet historike dhe rëndësinë e arsimit.

Në fillim të fjalës së tij, Serwer falënderoi stafin akademik dhe komunitetin e UBT-së për organizimin.

Duke reflektuar mbi ecurinë e Kosovës, ai theksoi se vendi ka shënuar progres të dukshëm ndër vite. “Kosova ka bërë një rrugë të gjatë,” u shpreh Serwer, duke kujtuar vitin 1998 kur kishte vizituar vendin për herë të parë, periudhë në të cilën përmendi takimet me Adem Demaçin dhe zhvillimet ku përfshihej edhe Albin Kurti.

Serwer përshkroi rrethanat e asaj kohe, kur të rinjtë shqiptarë detyroheshin të ndiqnin mësimet nëpër bodrume dhe shtëpi-shkolla private për shkak të masave të regjimit të atëhershëm.

Ai e krahasoi atë periudhë me infrastrukturën dhe gjendjen e sotme arsimore në vend.

“Disa thonë se asgjë nuk ka ndryshuar, por përgjigjja ime është: gjithçka ka ndryshuar,” deklaroi ai, duke iu referuar ndryshimeve institucionale dhe arsimore.

Në përmbyllje të fjalës së tij, profesori amerikan ndau me të pranishmit edhe një reflektim mbi sistemet politike dhe funksionimin e demokracisë në SHBA dhe në botë, duke nënvizuar se zhvillimet dhe ndryshimet historike janë procese të pakthyeshme. /A.K/