

Lajmet
Shkallë e lartë e Informalitetit, mbi 10 mijë biznese të pafiskalizuara
Published
4 years agoon
By
Betim GashiRreth 12 mijë biznese, veçanërisht pika të shitjes me pakicë vazhdojnë të mos jenë të fiskalizuara, e që për pasojë informaliteti në Kosovë mbetet në shkallë të lartë.
Ndonëse, ATK me rritje të mbikëqyrjes në terren synon që deri në mesin e vitit të ardhshëm ta përmbyll procesin e fiskalizimit.
Kështu u tha gjatë diskutimit mbi domosdoshmërinë̈ e përfundimit të procesit të fiskalizimit dhe luftimit të ekonomisë joformale, organizuar nga Oda Ekonomike Amerikane në Kosovë në bashkëpunim me Odën Ekonomike të Kosovës në tryezën me temë “Luftimin e Ekonomisë Joformale: Fiskalizimi në Fokus”.
Drejtori ekzekutiv i OEAK, Arian Zeka tha se shpesh herë raportohet që një numër i madh i bizneseve vazhdojnë veprimtarinë e tyre duke mos qenë të fiskalizuara.
Për këta, Zeka ka kërkuar nga ATK-ja dhe institucionet përkatëse që të krijojnë kushte të favorshme për një mjedis të barabartë në treg.
“Një proces i cili ka nisur tash e më tepër se një dekadë, shpeshherë raportohet që një numër i madh i ndërmarrjeve të sektorit privat, sidomos të pikave të shitjes me pakicë, edhe më tej vazhdojnë të mos jenë të fiskalizuara. Pra, fokusin po ashtu dëshirojmë edhe tek çështja se sa mbikëqyret procesi i fiskalizimit në përgjithësi, dhe sa janë kapacitetet e ATK-së në këtë aspekt për të mbikëqyrur fiskalizimin dhe përdorimin e arkave fiskale ashtu që të mund të krijojmë një mjedis të barabartë dhe I kryejnë detyrimet e tyre tatimore karshi shtetit dhe buxhetit të Republikës së Kosovës”, theksoi Zeka.
Po kështu edhe kryetari i Odës Ekonomike të Kosovës, Berat Rukiqi ka kërkuar nga institucionet përgjegjëse që të trajtojnë informalitetin në vend.
Rukiqi theksoi se bizneset nëpër vendet periferike nuk lëshojnë kuponë fiskal sikur bizneset nëpër qytete.
“Në qendra urbane ose në qytete sheh më shumë kuponë fiskalë, por sa më shumë që shkon më thellë në vendet periferike pothuajse nuk ekziston si proces. Pajisjet ekzistojnë, por ne kemi thënë gjithmonë që nuk mjafton vetëm pajisja, prandaj, njerëzit(bizneset) duhet me lëshuar kuponë fiskal”, theksoi Rukiqi.
Në anën tjetër drejtori i ATK, Ilir Murtezaj tha në bazë të vlerësimeve rreth 31 për qind është shkalla ekonomisë së zezë, ndërsa 28 për qind shkalla e ekonomisë së hirtë.
Duke pranuar se ka informalitet në vend, Murtezaj shpreson që deri nga mesi i vitit të 2022, ATK-ja ta përmbyll fiskalizimin.
Po ashtu tha se në dy muajt e fundit kanë inspektuar rreth 8 mijë biznese, derisa janë shqiptuar masa ndëshkuese rreth 16 mijë gjoba.
“Për që kemi informale në vend, pa dyshim që të gjithë jemi dëshmitarë që kemi dhe atë për shkak të shumë faktorëve. Vet fakti që të gjithë jemi në terren, shohim që ka laramani të zbatimit të ligjit nga ana e bizneseve. Kjo neve na ka bërë që të mobilizohemi më shumë për të krijuar një treg të barabartë për të gjithë tatimpaguesit dhe për një konkurrencë lojale. Masat ndëshkuese të aplikuara nga ana jonë fatkeqësisht nuk po prodhojnë efektin e mjaftueshëm që të vetëdijesohen bizneset, dhe për këtë në draft-ligjin për ATK, i cili është ende në qeveri, ne kemi propozuar disa masa të reja shtesë që për fenomenin e mos lëshimit fiskal të merren masa deri te vendosja e shiritave ose ndërprerja e aktivitetit për bizneset me faza të caktuara. Do të rritet efikasiteti gjatë muajve në vijim dhe njëkohësisht shpresojmë që deri kah mesi i vitit të ardhshëm do të kemi një përmbyllje të procesit të fiskalizimit”, theksoi Murtezaj.
Ndërsa, Valon Jahaj nga Shoqata e operatorëve të autorizuar për fiskalizim-PEF, theksoi se në bazë të të dhënave llogaritet se mbi 10 mijë biznese janë të pafiskalizuara.
Derisa përmendi se tashmë çmimet janë të volitshme për t’u pajisur me arka fiskale.
“Ne mendojmë që me këtë ofertë që e kemi bërë sa i përket gjeneratës së re të pajisjeve fiskale, besoj që nuk kishte me pasur më probleme, sepse është çmim lehtësisht i përballueshëm edhe për këto bizneset sa janë 10 mijë ose 12 mijë që nuk kanë pajisje, e të cilat ndoshta edhe hezitojnë me marrë faturë dhe kështu bëjnë atë shkëputjen e zinxhirit të përcjelljes deri te klienti i fundit”, theksoi Jahaj.
Ndërsa, në fund, drejtori i ATK-së, Murtezaj, ka ftuar të gjithë konsumatorët që të kërkojnë kuponin fiskal për shërbimet që marrin nga ana e bizneseve.
Lajmet
A është kosi i kulluar më i shëndetshëm se kosi i zakonshëm?
Published
3 hours agoon
September 9, 2025By
UBT News
Kosi i trashë apo kosi i kulluar është bërë një nga ushqimet më të dashura të dietës mesdhetare. Që nga viti 2017, prodhimi i kosit të kulluar në New York e ka tejkaluar atë në Greqi (pasi njihet si kos grek).
Ky kos i trashë e kremoz përftohet duke i hequr hirrën (lëngun) kosit, gjë që e bën më të koncentruar dhe më të pasur me lëndë ushqyese.
The New York Times ka folur me ekspertët e ushqyerjes që tregojnë disa arsye pse kosi i kulluar është kaq i shëndetshëm.
I pasur me proteina
Pasi i hiqet hirra, kosi i trashë ka përqendrim të madh proteinash. Një kuti prej 150 gramësh kos të kulluar pa yndyrë përmban 15.4 gramë proteina, më shumë se dyfish krahasuar me kosin e zakonshëm. Kjo është më shumë se një e katërta e nevojës ditore për një të rritur që peshon 72 kilogramë.
“Proteinat e kosit të kulluar janë të plota, që do të thotë se përmbajnë nëntë aminoacidet esenciale që trupi nuk mund t’i prodhojë vetë”, tha Ethan Balk, profesor në Universitetin e New Yorkut.
Sipas Angie Hasemann Bayliss, drejtoreshë në UVA Health, ani pse shumica e njerëzve marrin mjaftueshëm proteina, është më mirë që ato të vijnë nga ushqime të pasura me lëndë ushqyese si kosi i kulluar, sesa nga suplementet.
I mirë për zorrët
Kosi i trashë, si çdo lloj kosi, përmban probiotikë, bakteret “e mira” që ndihmojnë ekuilibrin e mikrobiomës së zorrëve.
“Probiotikët ndihmojnë në ruajtjen e shëndetit të sistemit tretës e kanë rol në parandalimin e disa llojeve të kancerit”, ka theksuar dietologia Elaine Siu nga City of Hope Cancer Center.
Edhe gastroenterologu Andrew T. Chan nga Harvard Medical School ka gjetur se ata që konsumonin kos të paktën dy herë në javë kishin 20 për qind më pak gjasa të zhvillonin një lloj kanceri të zorrës së trashë, krahasuar me ata që hanin më rrallë.
Edhe pse studimi nuk provon drejtpërdrejt se kosi ul rrezikun, Chan thotë se “gjetjet përforcojnë idenë se ushqimet e fermentuara si kosi mund të ndihmojnë në mbrojtjen nga kanceri”.
Burim i vitaminës B12
Një porcion 150 gramë kos të trashë pa yndyrë ofron pak më shumë se 1 mikrogram vitaminë B12, gati gjysmën e sasisë që një i rritur ka nevojë. “Vitamina B12 është thelbësore për krijimin e qelizave të kuqe të gjakut, për energjinë dhe funksionimin e sistemit nervor”, tha shpjeguar Bayliss.
Si ta konsumoni më mirë kosin e kulluar?
Ekspertët këshillojnë që të zgjidhni kos të trashë sa më natyral dhe me pak përbërës. Versionet e aromatizuara shpesh përmbajnë shumë sheqer të shtuar apo aditivë. Për më tepër, është mirë ta kombinoni me fibra, pasi probiotikët ushqehen me to.
“Mund të shtoni fruta si manaferra, mango apo pjeshkë, ose fara dhe arra”, ka sugjeruar Elaine Siu.
Kosi në fjalë mund të përdoret edhe në ushqime të kripura, si salcat e sallatat.
Për shembull:
-si bazë për salcë me tranguj dhe nenexhik apo majdanoz (ngjashëm me tarator),
-për marinimin e salmonit apo mishit të pulës,
-si përbërës në sallata me perime të freskëta.
Lajmet
Maqedonci në paradën kroate për 30 vjetorin e operacionit “Stuhia”: Kosova dhe Kroacia kontribojnë për paqe në rajon
Published
5 hours agoon
September 9, 2025By
UBTnews
Ministri në detyrë i Mbrojtjes, Ejup Maqedonci, ka marrë pjesë në paradën e ushtrisë kroate, në rastin e shënimit 30 vjetorit të operacionit “Stuhia”.
Ky operacion i ushtrisë kroate ishe vendimtar në çlirimin e Kroacisë.
Maqedonci tha se në këtë operacion morën pjesë edhe shumë shqiptarë – duke kontribuar në çlirimin e Kroacisë.
Tutje, ka thënë se sot – dy shtetet, Kosova dhe Kroacia kontribojnë për paqe në rajon.
“Në paradën e ushtrisë kroate, për të shënuar 30 vjetorin e Operacionit “Stuhia” (“Oluja”), vendimtar për çlirimin e Kroacisë. I ftuar nga Zëvendëskryeministri dhe Ministri i Mbrojtjes i Republikës së Kroacisë, z. Ivan Anušić, me nderime e ndoqa këtë parakalim të Forcave të Armatosura të Republikës së Kroacisë, më i madhi i tillë i ushtrisë kroate që nga pavarësimi i Kroacisë më 25 qershor 1991. Operacioni “Stuhia” (Operacija Oluja), ishte një operacion i ushtrisë kroate (HV) i zhvilluar nga 4 deri më 7 gusht të vitit 1995, kundër trupave të kuazi-shtetit të vetëshpallur, Republikës Serbe të Krajinës. I pasuar me luftime deri më 14 gusht, Operacioni “Stuhia” ishte vendimtar në Luftën Kroate për Pavarësi (1991 – 1995)”, ka thënë ai.
“Shumë shqiptarë ishin pjesë e këtij operacioni dhe luftuan krah për krah me ushtarët kroatë, duke i kontribuar çlirimit të popullit kroat dhe pavarësimit të Kroacisë nga Jugosllavia e dominuar nga Serbia. Luftërat në Jugosllavi gjatë dekadës së fundit të shekullit XX, e kanë përafruar popullin shqiptar me popullin kroat, përballë politikave hegjemoniste dhe kriminale të Serbisë. Kosova dhe Kroacia janë dy shtete aleate që angazhohen për paqe në rajon, sepse shqiptarët dhe kroatët janë dy popuj miq, që besojnë te demokracia dhe fqinjësia e mirë. Ne nuk e harrojmë të kaluarën, andaj do të angazhohemi së bashku që ajo të mos përsëritet”, ka thënë Maqedonci./D.B/EO
Lajmet
Transportonte marihuanë drejt Kosovës, kërkohet paraburgim për shtetasin e Shqipërisë
Published
5 hours agoon
September 9, 2025By
UBTnews
Prokuroria Themelore në Gjakovë ka njoftuar se ka paraqitur kërkesë në Gjykatën Themelore në Gjakovë për caktimin e masës së paraburgimit prej 30 ditësh ndaj të dyshuarit me inicialet G.B., shtetas i Republikës së Shqipërisë, nën dyshimin për veprën penale të shitblerjes së paautorizuar të narkotikëve të Kodit Penal të Republikës së Kosovës.
Sipas njoftimit të Prokurorisë, më 08.09.2025, rreth orës 17:55, në fshatin Ponoshec, Komuna e Gjakovës, gjatë një kontrolli rutinë të realizuar nga patrulla e policisë kufitare e SPMK–Ponoshec, është ndalur një veturë me targa të huaja, e cila drejtohej nga i dyshuari G.B., i cili kishte hyrë në Kosovë nga Shqipëria.
Gjatë komunikimit me të dyshuarin, policia ka ndier një aromë të dyshimtë për substanca narkotike.
Pas pyetjes nëse posedonte ndonjë send të jashtëligjshëm, i dyshuari kishte mohuar, por me asistimin e njësisë K9 dhe gjatë kontrollit të detajuar të automjetit, janë zbuluar dy qese me narkotik të dyshuar të llojit marihuanë, të fshehura në bagazh, me peshë prej 1 kg e 048 gram, një qese e vogël me peshë 1.77 gram, e fshehur nën plastikën e fshesave të automjetit, si dhe automjeti, 246 euro dhe 5,000 lekë shqiptare janë sekuestruar nga autoritetet policore si prova materiale.
Prokuroria ka bërë të ditur se ekziston dyshimi i bazuar se i pandehuri ka kryer veprën penale të blerjes, posedimit, shpërndarjes dhe shitjes së paautorizuar të narkotikëve dhe për këtë arsye ka kërkuar që ndaj tij të caktohet masa e paraburgimit për shkak të rrezikut të ikjes dhe mundësisë së përsëritjes së veprës penale.
I dyshuari ndodhet aktualisht në ndalim 48-orësh, me vendim të Prokurorit të Shtetit, dhe do të dalë para gjykatës për shqyrtimin e kërkesës për paraburgim./D.B/KP
Lajmet
Arrestohet një person i dënuar për posedim të paautorizuar të armëve dhe narkotikëve
Published
5 hours agoon
September 9, 2025By
UBTnews
Policia e Kosovës në Prishtinë ka arrestuar një person të dënuar me 1 vit burgim i cili ishte në kërkim. Bëhet fjalë për një 38 vjeçar – shtetas i Kosovës, me inicialet J.XH.
Personi i kërkuar ishte i dënuar me 1 vit burgim për veprën penale “Blerje, posedim dhe shitje e paautorizuar e narkotikëve dhe mbajtje ose posedim i paautorizuar i armëve”.
I njëjti pas arrestimit nga ana e policisë është dërguar në vuajtje të dënimit./D.B/KP

A është kosi i kulluar më i shëndetshëm se kosi i zakonshëm?

Revolucion në teknologji, telefoni më i hollë i lakuar deri më sot

Dasma e Selena Gomez, zbulohet lista e të ftuarve

Eminem i kërkoi ndjesë publike të ëmës për këngën e dikurshme fyese – nuk e interpreton më

Maqedonci në paradën kroate për 30 vjetorin e operacionit “Stuhia”: Kosova dhe Kroacia kontribojnë për paqe në rajon

Transportonte marihuanë drejt Kosovës, kërkohet paraburgim për shtetasin e Shqipërisë

Arrestohet një person i dënuar për posedim të paautorizuar të armëve dhe narkotikëve

Njoftim për prindërit nga Lugina e Preshevës, Maqedonia e Veriut, Shqipëria dhe vendet tjera të banuara me shqiptarë

Bayrou niset t’ia dorëzojë dorëheqjen Macronit
Të kërkuara
-
Aktualitet2 weeks ago
Profesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis
-
Kërkime2 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA
-
Aktualitet2 months ago
BSc në Shëndet Publik dhe Shkenca Mjekësore në UBT – Investim për të ardhmen e shëndetit të popullatës
-
Lajmet nga UBT2 months ago
UBT shpall konkurs për pranimin e studentëve të rinj për vitin akademik 2025/26