Lajmet

Selimi: Kemi arritur progres në fushën e sundimit të ligjit

Published

5 years ago

January 11, 2021

Betim Gashi

Ministri në detyrë i Drejtësisë, Selim Selimi thotë se viti 2020 për ministrinë që e drejton ka qenë shumë i suksesshëm. Hartimi i modaliteteve për veting, nisja e fazës së tretë të rishikimit funksional të sektorit të sundimit të ligjit, Gjykata Komerciale janë disa nga sukseset që ai i përmend.

Selimi në një intervistë për KosovaPress thotë se përkundër pandemisë, ministria që e drejton ka arritur të shënojë progres në shumë fusha brenda fushëveprimit të saj.

Gjatë vitit të kaluar, ai thotë se janë angazhuar në zbatimin e prioriteteve strategjike të Qeverisë së Republikës së Kosovës për fushën e drejtësisë dhe në realizmin e objektivave, programeve dhe projekteve sektoriale si pjesë e dokumenteve strategjike të saj.

Po ashtu, ai thotë se është punuar në ndryshime substanciale të legjislacionit në sektorin e drejtësisë, duke rishikuar dhe hartuar projekt-kode, projektligje, koncept-dokumente dhe akte të tjera nënligjore.

“Ne kemi pasur një plan ambicioz me marrje të mandatit, një plan ambicioz i cili e ka pasur një agjendë legjislative shumë të ngjeshur, gjithashtu kemi nisur edhe disa iniciativa të cilat kanë qenë përtej agjendës legjislative në ndërtimin e politikave. Unë e konsideroj që shuma e këtyre intervenimeve apo bilanci i këtyre intervenimeve të politikave, por edhe ligjore ka qenë pozitiv. Ne kemi arritur që të dërgojmë një numër të madh të ligjeve në Kuvend, disa prej tyre janë votuar disa prej tyre qëndrojnë atje. Jemi duke punuar gjithashtu në disa ligje tjera që janë të rëndësishme, për shembull procedurën penale, Gjykatën Komerciale që kanë me qenë ligje jashtëzakonisht të rëndësishme për sistemin tonë juridik. Kemi kryer planin e vetingut, kemi kryer gjithashtu rishikimin funksional që është reforma e thellë e sistemit të drejtësisë, të cilin jemi momentalisht në fazën e pastrimit edhe do ta hedhim në diskutim publik. Unë e di që është e njëanshme me fol se jam ministër i Drejtësisë, po mendoj që ka qenë një punë shumë intensive dhe shumë e suksesshme”, thotë ai.

Selimi thotë se grupi punues për hartimin e modaliteteve dhe skenarëve për çështje të reformës në sistemin e drejtësisë, me qëllim të adresimit të llogaridhënies duke përfshirë edhe vetingun, kanë bërë një punë të mirë dhe se tashmë kanë katër opsione dhe se njërin prej tyre edhe do ta zgjedhin.

Ai thotë se nuk do të ketë ndikim vendimi i Gjykatës Kushtetuese, që ka vendosur se qeveria e udhëhequr nga Avdullah Hoti është zgjedhur në mënyrë jokushtetuese, që të shtyjë përpara këtë reformë në drejtësi. Sipas tij, gjatë këtij muaji do të shohim se për cilin nga katër opsionet do të vendosin.

Opsioni i parë është vazhdimi i status quo-së apo gjendjes ekzistuese, opsioni i dytë adreson problemet përmes ndryshimeve ligjore që kanë të bëjnë me llogaridhënien. Opsioni i tretë parasheh mundësinë e adresimit të të metave në llogaridhënie përmes masave të kombinuara, përkatësisht, vetingut në njërën anë dhe përmirësimit të performancës dhe disiplinimit përmes ndryshimeve ligjore në anën tjetër, ndërkaq opsioni i katërt sheh si zgjidhje zhvillimin e veting-ut për gjyqtarë dhe prokurorë.

“Tash dokumenti ekziston, dokumenti është gjithëpërfshirës se kanë marrë pjesë të gjithë hisedarët e drejtësisë, është udhëhequr nga shoqëria civile që është shumë pozitive. Kanë dalë me 4 propozime, njëri prej këtyre katër propozimeve duhet të implementohet. Për ta zgjedhur njërin prej katër propozimeve duhet një raund i konsultimeve se cili është versioni më i mirë. Unë mendoj personalisht që duhet ta kemi një sistem të qëndrueshëm të vetingut, do të thotë një veting të përhershëm”, thotë ai.

Sa i përket efikasitetit të institucioneve të zbatimit të ligjit gjatë vitit 2020, Selimi thotë se përkundër vështirësive që i ka shkaktuar pandemia këto institucione kanë vazhduar punën.

Ndërsa, shprehet i lumtur derisa thotë se tek rastet e shenjëstruara ka pasur një rritje prej 100 përqind gjatë vitit 2020.

“Unë jam i lumtur që rastet e shënjëstruara kanë pasur një rritje për 100 përqind, pra ia kanë nisur para shumë kohe me 30 raste, tash i kemi mbi 60 raste dhe është pozitive për shkak që e kemi pa rezultatin konkret të prokurorisë. Për me pas rezultate të mira prokurori duhet të ketë dinjitet, e dinjiteti jepet duke i ofruar kushte të punës, rrogat janë rritur, emërimet do të thotë janë bërë në mënyrë më objektive dhe kushtet e punës i kanë më të mirë. Andaj edhe ky dinjiteti përkthehet në guxim, guximi është ndjekja e rasteve të korrupsionit të profilit të lartë. Kemi pasur ngritje të aktakuzave edhe këtë vit dhe e di që në bazë të raportimeve që ka edhe hetime tjera të cilat janë duke u zhvilluar. Unë mendoj që sa më pak që politika përzihet tek ta aq më shumë sukses kanë me pas ata”, thekson ai.

Ministri në detyrë i Drejtësisë, thotë se sfidë vazhdon të jetë korrupsioni, derisa tregon se çka kanë ndërmarrë për të përmirësuar luftën kundër kësaj dukurie.

“Kemi sfida edhe me korrupsion sepse ka aktakuza që po ngriten për korrupsion, ka gjykime që po mbahen për korrupsion, që tregon që është një problem. Ne si Ministri e Drejtësisë nuk ndjekim, as nuk burgosem, as nuk gjykojmë, ne rregullojmë politika. Ne i kemi marrë dy iniciativa për të përmirësuar luftën kundër korrupsionit: 1. Në ligjin për Avokaturën Shtetërore avokatët shtetërorë janë ata që e mbrojnë shtetin në konteste, shumë prej këtyre kontesteve janë konteste të tenderëve edhe avokatët e shtetit tash me ligjin e ri do të jenë të obliguar të tregojnë korrupsioni për shkak që edhe nëse e mbron shtetin por e sheh ndonjë veprim që kategorizohet në pjesën e korrupsionit do ta kenë obligim të kallëzim penal. 2. E kemi përmirësuar Ligjin e Agjencisë për Parandalimin e Korrupsionit, Agjencia Kundërkorrupsionit tash do të quhet Agjencia për Parandalimin e Korrupsionit ku ne do t’i mundësojmë që të mos dyfishohen veprimet do të thotë Agjenci, Prokurori, Polici e të mos dihet kush cilin vendim po e merr, por Agjencia do të koncentrohet në parandalim, por do t’i rrisë kapacitetet e hetimit dhe për herë të parë do ta ketë për detyrë që të merret me sinjalizuesit”, thotë ai.

Për këtë fillim vit, Selimi thotë se është lajm i mirë që do të mund t’i ndjekin dhe gjykojnë në mungesë, siç thotë ai, kriminelët serbë që janë të lirë në Serbi e që kanë kryer krime gjatë luftës.

“Procedura penale e cila do të na mundësojë që t’i ndjekim dhe t’i gjykojmë në mungesë të gjithë ata kriminelë që ecin të lirë në Serbi. Do të thotë, ne me ndryshimet në procedurë penale do të kemi mundësi që ta sjellim sado pak drejtësi të mohuar që 20 vite, do të thotë ata kriminelë që nuk dorëzohen nga Serbia këtu por janë të lirë atje ne së paku procedurat tona këtu do t’i ndjekim pa pengesa, do t’i ndjekim penalisht ata dhe do t’i gjykojmë në mungesë. Në këtë mënyrë ne do të tregojmë që ka shumë njerëz që pushteti kriminal serb i mbron atje edhe do t’i tregojmë botës që kemi një sistem të drejtësisë të paanshëm, por i cili e ka për detyrë që të sjell drejtësi për viktimat”, thotë Selimi.

Krejt në fund ministri në detyrë i Drejtësisë, Selim Selimi, bënë të ditur se Agjencia për Administrimin e Pasurisë së Sekuestruar ose të Konfiskuar gjatë vitit 2020 ka ekzekutuar gjithsej 92 vendime të dërguara nga gjykatat, për administrimin e pasurisë të sekuestruar ose të konfiskuar. Nga këto vendime, thotë se 54 vendime janë për sekuestrim, 22 vendime për konfiskim, 16 vendime për kthimin e pasurive. Gjithashtu, nga 6 ankande dhe janë realizuar të hyra nga shitja në shumën e përgjithshme prej më shumë se 33 mijë euro.

Selimi thotë se në vitin 2020 një punë të mirë në menaxhimin e pandemisë ka bërë Shërbimi Korrektues, për çka thotë se për shkak të menaxhimit të mirë kanë pasur vetëm një numër të vogël të të infektuarve me COVID-19.

Ai foli edhe për punën që ka bërë Instituti i Mjekësisë Ligjore, për çka tha se ka zbatuar urdhëresat për zhvarrime, duke marrë pjesë në 15 lokacione, 12 lokacione në Republikën e Kosovës dhe 3 lokacione në Republikën e Serbisë, si rezultat i këtyre zhvarrimeve janë gjetur gjithsej 11 trupa- mbetje mortore. Po ashtu, ka kryer autopsi për 230 raste, ekzaminime klinike për 62 raste, si dhe janë punuar 138 analiza nga laboratori i toksikologjisë.

Kujtesë

DITARI: Çfarë lajmesh kemi lexuar në çdo 22 prill, në vitet nëntëdhjetë

Published

1 hour ago

April 22, 2026

UBTNews

22 prill 1993

Lajmet kryesore:

Dr. Bujar Bukoshi në Ankara

Konferencë për shtyp për Kosovën në Pallatin e Kongresit të Shteteve të Bashkuara të Amerikës

Në Prishtinë policia serbe rrahu dy studentë

Kryetari i Degës së LDK-së së Suharekës në “bisedë informative”

Në “bisedë informative” edhe aktivistët e komunës së Lipjanit

Në Sekiraqë të Podujevës u bastis një familje

Një anije e Hondurasit provoi të shkelë hapësirën detare të Shqipërisë

Vizitat në Kosovë vetëm me përcjellje

Këmbëngulje për vendosjen e refugjatëve serbë në Deçan

Pesë gjykatës serbë nga Jagodina në Mitrovicë

22 prill 1994

Lajm i plotë:

Konferencë për gazetarë e kryetarit të Republikës së Kosovës dr. Ibrahim Rugova

Javën që po shkon e karakterizoi një sulm represiv e terror. Vështirë se mund të numrohen viktimat e këtij represioni që po zgjat qe sa vite në Kosovë, tha në konferencën e sotme për gazetarë kryetari i Republikës së Kosovës dr. Ibrahim Rugova.

U intensifikuan bastisjet me pretekst të kërkimit të armëve në rrethinat e qyteteve të Podujevës, Gjakovës, Lipjanit, Vitisë, Malishevës, Mitrovicës, Skënderajt, Istogut, Klinës, Vushtrrisë, Ferizajit, Prizrenti, Gjilanit, Kamenicës, Prishtinës e Deçanit. Bastisjet përcillen me demolime, me maltretime, arrestime e dënime të njerëzve. Për shkak se kërkoheshin armë prej tij, u dënua me burg Ymer Bala, deputet nga Mitrovica. Ndërsa në lokalitete të ndryshme të Kosovës, si në fshatin Bokshiq të Klinës, në aeroportin e Dumoshit afër Podujevës dhe në disa shkolla, forcat serbe shtinë edhe me armë.

Gjatë javës u bë një represion i madh ndaj nxënësve shqiptarë, në shkollat e Deçanit, Klinës e Kijevës. Janë kërcënuar e janë rrahur nxënës e arsimtarë dhe është djegur një pjesë e dokumentacionit të shkollës. Po shfaqet alergji aq e madhe ndaj shkollës shqipe dhe ndaj nxënësve shqiptarë, theksoi kryetari Rugova.

Pati lëvizje të ushtrisë në kufirin me Shqipërinë, në Vërmicë – në vendkalimin kufitar të Kosovës me Shqipërinë, i cili më nuk është vendkalim, por është i mbyllur, ndërsa në Dragash pati vendosje të reja të ushtrisë, tha dr. Rugova dhe shprehu keqardhje për vrasjen e dy qytetarëve shqiptarë javën e kaluar në kufirin Shqipëri – Kosovë. Ai theksoi se qytetarët ishin të paarmatosur. Kjo do të thotë se kufiri i Kosovës me Shqipërinë vazhdon të jetë mur i fundit i Berlinit dhe mur mjaft i rrezikshëm në Evropë.

Vazhdoi ndjekja e aktivistëve politikë të të gjitha partive politike, ndërsa këtu në Prishtinë filloi edhe një proces i montuar politik kundër 14 shqiptarëve. Ky proces, si dhe ato nga fundi i vitit të kaluar dhe fillimi i këtij viti, bëhet me qëllim që të diskreditohet lëvizja paqësore e shqiptarëve dhe e popullit të Kosovës.

Pasi përkujtoi se gjatë javës që shkoi pati plaçkitje të mëdha të mallit, përzënie të njerëzve nga banesat e dërgime me dhunë në ushtri, kryetari Rugova konstatoi se është mjaft e rrezikshme kjo peshë e represionit që po e rëndon Kosovën.

Në vazhdim, ai kërkoi që bashkësia ndërkombëtare ta ketë parasysh situatën në Kosovë, e cila mund të eskalojë.

Dr. Rugova dënoi maltretimin e znj. Adelajde Felike – Timan, gazetare e “Dojçe Veles”, e cila ishte në Kosovë dhe e cila u keqtrajtua nga policia serbe derisa po kalonte në vendkalimin kufitar Kosovë – Shqipëri.

Në vazhdim, kryetari Rugova shfaqi keqardhje për tragjedinë në Gorazhde. Kjo tragjedi po e habit gjithë botën, edhe për shkak të paaftësisë së institucioneve ndërkombëtare që ta ndalojnë atë. Edhe në këtë kontekst Kosova u përmend si një vatër e krizës në ish-Jugosllavi që kërkon zgjidhje.

“Ne na vjen keq në rast se legalizohet dhuna dhe agresioni në Bosnjë. Nëse bëhet kjo atëherë do të ketë probleme në Ballkan dhe në gjithë Evropën. Të gjitha parimet e institucioneve ndërkombëtare dhe të Kombeve të Bashkuara janë që të mos shpërblehen dhuna dhe agresioni, por përpjekjet për paqe. Dje edhe sekretari i shtetit amerikan Kristofer shprehu pikëpamjet për rrezikun e shpërthimit të luftës në Kosovë apo në Maqedoni. Nëse vazhdon projekti i krijimit të Serbisë së Madhe në Bosnjë, ai mund të vazhdojë edhe në pjesët tjera”, theksoi kryetari Rugova.

Ai përshëndeti planin e presidentit Klinton për intervenime më të gjëra në Bosnjë. Ai shfaqi shpresën se bashkësia ndërkombëtare do të bëjë çmos që ta pengojë këtë tragjedi dhe se do të gjindet një zgjidhje për të gjitha problemet në ish-Jugosllavi.

Në rast se mbahet një samit në nivelin më të lartë midis SHBA-ve, Bashkimit Evropian dhe Rusisë, siç është propozuar, kryetari Rugova tha se do të kërkojmë me ngulm që Kosova patjetër të jetë pjesë e kësaj zgjidhjeje, pasi Kosova ishte pjesë e ish-federatës jugosllave, ishte njësi federale, që kishte statusin e barabartë me njësitë e tjera. Kosova edhe si vatër e krizës, po të mos zgjidhet në bazë të vullnetit politik të popullit dhe të konteksteve ballkanike, do të jetë një rrezik i vazhdueshëm.

Në fund, kryetari Rugova pasi përkujtoi zhgënjimet që ndodhën me institucionet ndërkombëtare, kërkoi që Kosova të vihet në mbrojtje ndërkombëtare të Kombeve të Bashkuara apo të institucioneve të tjera ndërkombëtare.

Duke u përgjigjur në pyetjen se a është shpërblyer lëvizja paqësore e shqiptarëve në Kosovë dhe se a mund të ketë kjo lëvizje alternativë, kryetari Rugova tha se tash kjo lëvizje, udhëheqja dhe populli i Kosovës gëzojnë në botë një autoritet për qëndresën dhe durimin që kanë treguar deri më tash. “Shpresoj se do të shpërblehet kjo politikë. Kryesore është të ndalet lufta e tragjedia në Bosnjë dhe të pengohet përhapja e konfliktit në Kosovë. Ne e kemi thënë edhe shumë herë më parë se duke pasur parasysh situatën tonë prej vitit 1990 e këndej, çdo alternativë e lëvizjes paqësore do të ishte katastrofale”, theksoi ai.

Duke komentuar një lajm për ngritjen e shtëpive për refugjatët eventualë ose fatkeqësitë natyrore në verilindje të Shqipërisë, kryetari Rugova, pasi tha se nuk ka informacione të tjera pos atyre që janë publikuar shtoi: “Nuk kisha dëshiruar të ndodh diçka këtu në Kosovë, pasi, siç kemi thënë, nëse ndodh diçka në Kosovë, pak do të ketë edhe refugjatë. Nuk duhet ta marrim me ndonjë panik këtë lajm që mund të ndikojë negativisht te popullata. Me siguri Kryqi Kuq ka menduar që të marrë masa preventive për çdo rast eventual”, përfundoi kryetari Rugova.

Lajme të tjera:

Qeveria e Kosovës kërkon përfshirjen e Kosovës në bisedimet për paqe

Amerikanët pohojnë se është diskutuar edhe mundësia e bombardimit të pozicioneve në Serbi

U.Kristofer: Serbia synon të përhapë konfliktin në Kosovë

Në Vërbicë të Kamenicës serbët provokojnë me të shtëna armësh

Ushtria dhe policia serbe bastisi disa shtëpi në Dimcë të Hanit të Elezit

Policia konfiskoi librezat e nxënësve të SHF “H.Dobruna” në Junik

Vdiq Mehmet Hajrullahu, i cili ishte torturuar para dy javësh në polici

Represioni në Kosovë

Kaçanik: Në “cirilikë” edhe mbishkrimet e firmave private

Të hënën fillon procesi kundër 10 shqiptarëve në Shkup

U ndërprenë punimet e Parlamentit të Maqedonisë

Shaban M.Çelaj për Fondin e Qeverisë së Kosovës dha 5.000 dollarë

Në Prizren katër shqiptarë u dënuan për armë

Serbët e Varvarinit u shitën armë shqiptarëve

Komunistët serbë ftojnë shqiptarët për bisedime

22 prill 1995

Lajmet kryesore:

Kryetari Rugova u takua me Sabri Godon dhe monsinjor Rok Mirditën

Delegacioni i Kosovës u takua me delegacionin parlamentar të Këshillit të Evropës

Ish-policët në Pejë mohojnë akuzën

B.Luzha: Në polici kërkonin që me çdo kusht t’i pranojmë akuzat

Plaçkitje e re përmes taksave për ujë

Dhuna e përditshme në Kosovë

Plaçkitje në tregun e Istogut

Republika e imagjinuar serbe në Bosnjë i shtriu duart edhe në Kosovë

Si u plaçkit ndërmarrja “Luks” e Mitrovicës

22 prill 1997

Lajmet kryesore:

Dr. Esat Stavileci u takua me kryetarin e Gjykatës Kushtetuese të Austrisë

Konferencë për gazetarë në PSHDK

Nano nuk është deklaruar rreth statusit të Kosovës as të shqiptarëve në Maqedoni

Në vend të refuzimit, reklamim i ndërmarrjeve të pushtuesit

Gjermani: Një refugjat kthehet e dhjetë shkojnë

Katër shqiptarë po mbahen në aeroportin e Beogradit

Në Irzniq u përkujtua studenti martir Armend Daci

E burgosura Shukrie Rexha merret edhe më tutje në pyetje

U mor në pyetje kryetari i Degës së UNIKOMB-it në Suharekë

Dhuna e përditshme në Kosovë

Në Gjykatën e instaluar serbe në Suharekë u nxor në gjyq një inkasant i KKF-së

Një qytetari nga Podujeva iu plaçkitën cigare në vlerë prej 5. 000 DM

Rënie e vlerës së markës gjermane – çmimet në rritje

Në Gllogoc policia ndërpreu ndeshjen midis Ferronikelit dhe Prishtinës

Vllasi akuzoi regjimin serb për ligjet diskriminuese ndaj shqiptarëve

Në komunën e Podujevës u ndihmuan 505 familje shqiptare

Lajm i plotë:

Policia srebe në Klinë vrau një djalosh serb

Pardje policia serbe vrau në Klinë djaloshin 14 vjeçar Zharko Dubiq nga fshati Llukavc, njofton gazeta “D. telegraf”.

Pranë djaloshit të vrarë është gjetur një pushkë gjuetie. Sipas kësaj gazete ai gjoja ka dashur ta marrë hakun e xhaxhait të tij Dragolubit, i cili para katër vjetësh ishte vrarë para stacionit të policisë në Klinë.

Organet serbe nuk kanë dhënë kurrfarë njoftimi për këtë vrasje.

22 prill 1998

Edicioni i parë (ora 10:00)

Lajm i plotë:

GJENDJE SHUMË E RREZIKSHME NË DEÇAN

Barikadim i forcave serbe dhe të shtëna sporadike në fshatin Baballoq

Sot në mëngjes forca të mëdha ushtarako-policore janë stacionar dhe janë barrikaduar në vendbanimin e kolonëve, kurse në rrugën magjistrale që kalon afër vendbanimit të kolonistëve serbë në Baballoq janë ngritur postblloqe të policisë dhe po vazhdon kontrollimi rigoroz.

Baballoqi është një fshat shqiptar, me 180 familje dhe rreth 1600 banorë, ndërsa rreth 300 metra larg tij është ngritur kampi i kolonistëve serbë.

Komisioni për Informim i Degës së LDK-së në Deçan njofton se nga fshati Baballoq edhe sot po dëgjohen të shtëna sporadike.

Në orën 7. 30 një konvoj ushtarak, i pajisur me armatim të rëndë, arriti në Deçan nga Peja dhe pastaj shkoi në drejtim të këitj fshati.

Baballoqi ishte cak i një sulmi gjatë ditës së djeshme prej orës 10:45 deri në orën 20:15. Në sulmin nga largësia kishin marrë pjesë policë, ushtarë dhe kolonistë serbë të vendosur në kampin e refugjatëve serbë, rreth 300 metra larg fshatit Baballoq.

Për konfrontime të armatosura gjatë ditës së djeshme njoftojnë sot edhe gazetat serbe, duke e hedhur përgjegjësinë për këto në anën e shqiptarëve. Thuhet se në kampin e refugjatëve, afër Baballoqit në rrugën për Gramoçel e Glloxhan policia e Deçanit ka formuar një punkt të policisë, të cilin e kanë sulmuar shqiptarët. Policët janë përgjigjur me zjarr, ndërsa anën e policisë nuk ka të vrarë e të plagosur.

Aktivistët e LDK-së shkuan mbrëmë vonë në Baballoq. Ata i thanë QIK-ut se nuk dihej për të vrarë ose të plagosur gjatë sulmit të djeshëm serb.

Sulmi i djeshëm kundër fshatit Baballoq është i pari sulm masiv pas atij kundër fshatit Glloxhan më 24 mars, kur në shtëpitë e veta u vranë tre të rinj shqiptarë dhe disa të tjerë u plagosën.

Ka disa ditë që gjendja në Deçan është para shpërthimit. Politika dhe forcat serbe kanë bërë përgatitje të gjithanshme për një sulm masiv kundër fshatrave shqiptare, të cilat kanë mbetur etnikisht të pastra pasi nga shtëpitë e veta me urdhërin e policisë serbe janë larguar serbët e malazezët.

Lajme të tjera:

Pozicionime të forcave ushtarake në brezin kufitar

Policia u largua nga stacioni në Irzniq

Edicioni i dytë (ora 13:00)

Lajmet kryesore:

Forcat serbe vazhdojnë të shtijnë kundër banorëve të Baballoqit

Përforcime të ushtrisë jugosllave në kufi me Shqipërinë dhe në Dushkajë të Gjakovës

U rrah përkthyesi shqiptar i gazetarit të sevrisit anglisht të “Dojçe veles”

Çështja e Kosovës – me rëndësi të jashtëzakonshme për paqen në Evropë

Gjendje e tensionuar në kufirin verilindor të Shqipërisë

Parakalime të ushtrisë nëpër fshatin Shkabaj

Rreth stacioneve të policisë në Podujevë janë vendosur thasë me rërë

Edicioni i tretë (ora 15:30)

Lajmet kryesore:

Kryetari Rugova priti përfaqësuesit e Komitetit Ndërkombëtar të Kryqit të Kuq

Vazhdon gjendja e rëndë në komunën e Deçanit

Regjimi serb përsëri po i instrumentalizon refugjatët

Mbi 20 mijë veta morën pjesë në shëtitjen e sotme protestuese në Prishtinë

Mitrovicë: Me pretekst se dalin në shetitje protestuese u keqtrajtuan shumë qytetarë

Edhe në Vushtrri merren në polici pjesëmarrësit e shëtitjeve protestuese

Ushtria bën stërvitje në fshatrat e Vushtrrisë

Vushtrri: Policia arrestoi një të ri shqiptar

Ushtarët serbë provokuan kalimtarët në Prishtinë

Vëzhgime të ushtrisë serbe në Samadraxhë të Suharekës

Lëvizje të ushtrisë serbe drejt Hanit të Elezit

Nuk dihet asgjë për fatin e Emin Kuçit nga Suhareka

Edicioni i katërt (Ora 19:30)

Lajmet kryesore:

Në mbrëmje pushoi granatimi i fshatit Baballoq

Refugjatët serbë në Baballoq sulmuan gazetarët e huaj

Dje u granatua shtëpia e Halil Gecit në Llaushë, të shtëna vazhduan edhe sot

Kryetari Rugova priti ambasadorin e Italisë

Debat për Kosovën në Senatin e Belgjikës

Foto: Dr. Bujar Bukoshi

Lajmet

Nafta dhe benzina lirohen lehtë në Kosovë

Published

2 hours ago

April 22, 2026

UBTNews

Çmimi i naftës në tregun e Kosovës ka shënuar një rënie prej 3 centësh këtë të mërkurë, krahasuar me vlerat e ditës së djeshme.

Aktualisht, një litër naftë tregtohet me 1.65 euro, ndërsa të martën çmimi ishte 1.68 euro.

Rënie të lehtë ka pasur edhe benzina, e cila sot shitet me 1.39 euro për litër (nga 1.41 sa ishte dje), ndërkaq çmimi i gazit ka mbetur stabil në 0.88 euro.

Pavarësisht këtij uljeje të lehtë, çmimet mbeten të larta që nga fundi i shkurtit, si pasojë e konfliktit mes SHBA-së, Izraelit dhe Iranit.

Tensionet gjeopolitike kanë shkaktuar mbylljen e Ngushticës së Hormuzit, një pikë kyçe strategjike përmes së cilës qarkullon rreth 20% e furnizimit global me naftë, duke ndikuar drejtpërdrejt në shtrenjtimin e karburanteve në mbarë botën.

Vendi

Arrestohet një person në Isniq të Deçanit për armëmbajtje pa leje

Published

2 hours ago

April 22, 2026

UBTNews

Policia e Kosovës në Deçan ka arrestuar një burrë, i cili dyshohet se posedonte armëmbajtje pa leje të llojit AK-47 me 60 fishekë dhe një pistoletë me tetë fishekë.

Sipas raportit, armët dhe municioni u gjetën gjatë një kontrolli që u krye në shtëpinë e të dyshuarit në fshatin Isniq të Deçanit.

Ndërkaq, me vendim të prokurorit, i dyshuari pas intervistimit është dërguar në mbajtje.

Lajmet

Gjashtë raste të dhunës në familje brenda një dite në Kosovë

Published

3 hours ago

April 22, 2026

UBTNews

Sipas raportit të fundit të Policisë së Kosovës, brenda një dite janë regjistruar gjashtë raste të dhunës në familje në rajone të ndryshme. Kryeqyteti prin me numrin më të madh të incidenteve, ku u raportuan tri raste të sulmeve, ndërsa situata të ngjashme janë shënuar edhe në Pejë, Gjakovë e Malishevë.

Në Prishtinë, policia ka ndërhyrë në tri incidente të ndara. Në rastin e parë, një grua ka raportuar se është sulmuar fizikisht nga një burrë, i cili pas intervistimit është liruar që rasti të vazhdojë në procedurë të rregullt.

Ngjashëm ka ndodhur edhe në incidentin e dytë në kryeqytet, ku viktima ka pranuar tretman mjekësor pas dhunës së ushtruar ndaj saj. Ndërkaq, në rastin e tretë, policia ka dërguar në mbajtje një burrë i cili dyshohet se nën ndikimin e alkoolit ka sulmuar fizikisht një grua.

Në Pejë, një grua ka kërkuar ndihmën e autoriteteve pas keqtrajtimit psiqik që ka pësuar nga një burrë. Edhe për këtë rast, prokurori ka vendosur që procedurat të vazhdojnë në rrugë të rregullt pas marrjes në pyetje të palëve.

Një situatë më specifike është raportuar në Malishevë, ku një grua dyshohet se është sulmuar fizikisht dhe psiqikisht nga tre persona – dy gra dhe një burrë. Viktima ka marrë ndihmë mjekësore, ndërsa të dyshuarit janë shoqëruar në stacionin policor për sqarimin e rrethanave të ngjarjes.

Ndërkohë, në Gjakovë është arrestuar një burrë i cili dyshohet se ka ushtruar dhunë të vazhdueshme psiqike ndaj familjarëve të tij. Për shkak të rrezikshmërisë dhe vazhdimësisë së veprës, me vendim të prokurorit, ai është dërguar direkt në mbajtje.