Lajmet

​Sarrazin: E dënojmë fuqishëm sulmin kriminal e terrorist ndaj Policisë së Kosovës

Ai gjatë qëndrimit në Prishtinë tha se ka afirmuar qëndrimin e qartë të Gjermanisë në krah të Kosovës.

Published

3 years ago

on

I dërguari special i qeverisë gjermane për Ballkanin Perëndimor, Manuel Sarrazin, sulmin e djeshëm ndaj Policisë së Kosovës në veri, e ka quajtur kriminal dhe terrorist.

Sarrazin pas takimit të zhvilluar me kryeministrin e Kosovës, Albin Kurti, theksoi se të dielën është parë një situatë e tmerrshme në veri. Ai gjatë qëndrimit në Prishtinë tha se ka afirmuar qëndrimin e qartë të Gjermanisë në krah të Kosovës.

“Është shumë e rëndësishme për mua të jem sot në Prishtinë, në Kosovë. Gjatë fundjavës, dje, pamë një situatë të tmerrshme dhe dua të them shumë qartë, ne po e dënojmë fuqishëm këtë sulm kriminal dhe terrorist ndaj Policisë së Kosovës dhe jemi këtu për të shprehur solidaritetin dhe ngushëllimet tona, si për familjen dhe fëmijët e policëve të Policisë së Kosovës, ashtu edhe mbarë vendit të Kosovës. Ne jemi këtu në solidaritet dhe jemi në anën tuaj në këtë situatë”, theksoi ai.

Ai ka thënë se për të zgjidhur çështjen e sigurisë në veri, duhet të ketë një dialog të suksesshëm ndërmjet Kosovës dhe Serbisë.

“Mendoj se është shumë e qartë dhe shumë e rëndësishme që në këtë situatë siguria është e rëndësishme dhe reagimi duhet të jetë i qartë dhe i vendosur për këtë. Por është gjithashtu e qartë se, nëse doni ta zgjidhni çështjen e sigurisë për kohë afatgjate, duhet të kemi një dialog të suksesshëm dhe angazhimi në dialog për normalizimin e Kosovës dhe Serbisë mund të jetë një nga gurët e themelit të zhvillimeve të ardhshme. Ne nuk duhet ta ndalojmë dialogun tani, duhet të vazhdojmë dhe të përdorim forcat tona dhe të përpiqemi të gjejmë zgjidhjen për zbatimin e marrëveshjes së Ohrit dhe për të pasur një dialog të suksesshëm”, theksoi Sarrazin.

Ai theksoi po ashtu se janë në koordinim të ngushtë me autoritetet e Kosovës që nga momenti i paraqitjes së situatës së rëndë në veri.

“Së pari dua të them se kam qenë aty për t’ia shprehur atë që kam thënë këtu edhe atij, për t’i shprehur solidaritetin dhe ngushëllimet dhe për të riafirmuar qëndrimin e qartë të Gjermanisë në krah të Kosovës. E dyta është se ne jemi në koordinim të ngushtë me partnerët tanë në Kosovë që nga momenti i paraqitjes së situatës. Por sigurisht, ai na informoi edhe për situatën aktuale nga këndvështrimi i tij që ishte shumë i rëndësishëm për ne. Unë mendoj se sot nuk është dita për të diskutuar më tej këtë”, theksoi ai.

Ai në fund ka thënë se është me rëndësi që të zbatohet marrëveshja e Ohrit.

“Dialogu sigurisht që mund të vazhdojë dhe është e rëndësishme që të përpjekkemi për të gjetur rrugën për zbatimin e marrëveshjes së Ohrit. Ajo që dëgjoj në Beograd dhe në Prishtinë është se marrëveshja e Ohrit është një gur themeli në një moment historik dhe mund të çojë në një drejtim shumë pozitiv të marrëdhënieve. Por sigurisht, ne e shohim që për momentin nuk është zbatuar me sukses dhe mendoj se ky nuk është momenti për të ndaluar përpjekjet për zbatimin e suksesshëm të marrëveshjes së Ohrit, është e kundërta”, theksoi ai.

Policia e Kosovës është sulmuar mëngjesin e së dielës ndërsa si pasojë humbi jetën rreshteri Afrim Bunjaku, dhe kanë plagosur dy të tjerë.

Autoritet në Kosovë drejtuan gishtin nga Beogradi zyrtar se qëndrojnë mbrapa këtij sulmi.

Komuniteti ndërkombëtar e dënoi aktin e së dielës ndërsa bëri thirrje që përgjegjësit të dalin para drejtësisë.

Nga operacioni i policisë janë arrestuar edhe 6 persona të tjerë, dy prej të cilëve janë të plagosur.

Related Topics:
Continue Reading

Aktualitet

Diplomojnë 100 kadetë të rinj të Shërbimit Korrektues të Kosovës

Published

4 minutes ago

on

August 14, 2026

By

Shërbimit Korrektues të Kosovës (SHKK) nga sot do t’i bashkohen 100 kadetë të rinj, të cilët kanë përmbyllur me sukses përgatitjen e tyre profesionale në kuadër të gjeneratës së 46-të.

Gjatë ceremonisë solemne të diplomimit, u vendos theksi te rëndësia e këtij brezi të ri për fuqizimin e sigurisë, rendit dhe proceseve të rehabilitimit brenda institucioneve korrektuese në të gjithë vendin.

Drejtori i Përgjithshëm i SHKK-së, Ismail Dibrani, u bëri thirrje zyrtarëve të rinj që detyrën ta ushtrojnë me profesionalizëm, integritet dhe respekt për dinjitetin njerëzor, duke e cilësuar këtë ditë si marrjen e një përgjegjësie të madhe shtetërore.

“Të jesh zyrtar korrektues nuk do të thotë të veshësh thjesht një uniformë. Do të thotë të mbash mbi vete besimin që institucionet e Republikës së Kosovës vendosin mbi ju. Ne duhet të garantojmë sigurinë, por njëkohësisht të krijojmë mundësi për rehabilitim dhe riintegrim,” deklaroi Dibrani gjatë adresimit të tij.

Në këtë ceremoni mori pjesë edhe Kryeministri në detyrë, Albin Kurti, i cili vlerësoi përkushtimin e kadetëve të rinj dhe theksoi se kjo detyrë kërkon disiplinë dhe lartësim të figurës së shtetit.

“Të jesh zyrtar korrektues është përgjegjësi e madhe e cila kërkon disiplinë, integritet dhe përkushtim për sigurinë, rendin dhe dinjitetin e personave të privuar nga liria. Republika e Kosovës ka nevojë për ju dhe pret shumë prej jush,” u shpreh Kurti.

Me përmbylljen e kësaj përgatitjeje, 100 pjesëtarët e rinj pritet të marrin menjëherë detyrat zyrtare nëpër qendrat e ndryshme korrektuese dhe të paraburgimit në Kosovë. /Ekonomia Online/

 

Continue Reading

Lajmet

Të maskuar dhe nën kërcënimin e armës, tentojnë t’i grabisin në Rahovec

Published

8 minutes ago

on

August 14, 2026

By

Dy persona kanë raportuar në Polici se një person i maskuar ka tentuar t’i grabisë në vendin e tyre të punës në Rahovec.

Sipas raportimit, i dyshuari i ka kërcënuar me armë, ndërsa dy ankuesit kanë arritur të largohen nga vendi i ngjarjes. Gjatë ikjes, i dyshuari dyshohet se ka shtënë me armë zjarri, me ç’rast njëri nga ankuesit është lënduar dhe ka pranuar tretman mjekësor.

Në vendin e ngjarjes është gjetur dhe sekuestruar një gëzhojë e pistoletës me gaz.

Policia ka nisur hetimet për rastin, ndërsa i dyshuari ende nuk është identifikuar./A.K/

Continue Reading

Lajmet

Përleshje për një kontest pronësor, arrestohen gjashtë persona në Malishevë

Published

9 minutes ago

on

August 14, 2026

By

Gjashtë persona janë arrestuar në Malishevë pas një përleshjeje që dyshohet se ka nisur për shkak të një kontesti pronësor.

Sipas Policisë, të dyshuarit meshkuj kosovarë janë përleshur fizikisht mes vete, ndërsa gjatë rastit dyshohet se është përdorur edhe armë zjarri.

Nga njëri prej të dyshuarve janë konfiskuar dy brisqe, një pistoletë me një fishek dhe një gëzojë, që dyshohet se është përdorur për të shtënë në ajër.

Pas intervistimit, me vendim të prokurorit, pesë nga të dyshuarit janë dërguar në mbajtje, ndërsa njëri është liruar. Rasti mbetet në procedurë hetimore./A.K/

Continue Reading

Lajmet

Shantazh përmes fotografive, arrestohet i dyshuari në Prizren

Published

15 minutes ago

on

August 14, 2026

By

Një person është arrestuar në Prizren nën dyshimin për shantazh dhe ngacmim, pas hetimeve që lidhen me një rast të nisur në qershor të vitit 2025.

Sipas Policisë, i dyshuari kosovar dyshohet se në vazhdimësi e kishte kanosur një grua se do t’i publikonte në rrethin e saj familjar dhe shoqëror fotografi që cenonin integritetin e saj, nëse ajo nuk i jepte para.

Pas hetimeve, përmes masave të veçanta hetimore, i dyshuari është kapur në flagrancë duke pranuar para nga viktima.

Gjatë kontrollit në shtëpinë e tij, policia ka gjetur dhe sekuestruar edhe 21 mijë e 100 euro, për të cilat ende nuk dihet prejardhja.

Me vendim të prokurorit, i dyshuari është dërguar në mbajtje./A.K/

Continue Reading

Të kërkuara