Lidhja Demokratike e Kosovës (LDK) ka shprehur indinjatën e saj për refuzimin e 21 amandamenteve që kishte propozuar për buxhetin, gjatë një konference për media.

Shefja e Grupit Parlamentar, Jehona Lushaku, tha se projekti i buxhetit nuk përkrah arsimin, shëndetësinë dhe projektet kapitale si Unaza e Kryeqytetit, ndërtimi i Spitalit të Kryeqytetit dhe digjitalizimi i sistemeve arsimore e shëndetësore. Ajo shtoi se LDK do të insistojë që këto projekte të futen në buxhet.

Deputeti Besian Mustafa vuri në dukje se asnjë nga amandamentet e komunave, përveç buxhetit të Kryeqytetit, nuk janë miratuar, ndërsa deputeti Fadil Hadergjonaj kritikoi moskalimin e amandamentit të tij për punimet në Kompleksin Memorial të Betejës së Kosharës.

LDK deklaron se nuk do të mbështesë buxhetin përderisa nuk përfshin këto projekte kapitale dhe reformuese.

Në Klinikën e Pediatrisë të Qendra Klinike Universitare e Kosovës, është zhvilluar një mision për diagnostikimin dhe trajtimin e fëmijëve me sëmundje të lindura të zemrës nga 8 shkurt deri me 13 shkurt 2026. Ky misioni u mbështet nga Muntada Aid nga Londra dhe u realizua në bashkëpunim me mjekë nga Turqia dhe stafin e QKUK-së.

Gjatë kësaj kohe u kontrolluan 92 fëmijë, ndërsa 35 prej tyre u trajtuan me ndërhyrje kardiologjike dhe kardiokirurgjikale, disa prej të cilave u realizuan për herë të parë në Kosovë, sipas njoftimit të Shërbimit Spitalor Klinik Universitar të Kosovës (SHSKUK).

Aktualisht, tre fëmijë po marrin trajtim pas ndërhyrjeve kirurgjikale, ndërsa të gjithë pacientët e tjerë janë liruar në gjendje të mirë dhe vazhdojnë kontrollet në shtëpi.

Qeveria e Kosovës ka miratuar të premten pakon e 19-të të masave kundër Federatës Ruse dhe Bjellorusisë, në përputhje me situatën në Ukrainë. Kryeministri Albin Kurti ka theksuar se kjo është pjesë e vazhdimësisë së 18 pakove të mëparshme dhe se është në përputhje me masat e Bashkimit Evropian dhe SHBA-së.

Ministri i Punëve të Jashtme, Glauk Konjufca, ka sqaruar se pakoja synon sektorët e energjisë, financave, kompleksin ushtarako-industrial, tregtinë dhe zinxhirët e furnizimit me mallra ushtarakë, si dhe shërbimet strategjike përfshirë teknologjinë dhe inteligjencën artificiale. Po ashtu, masat përfshijnë kontrolle mbi diplomatët rusë dhe përgjegjësinë për rrëmbimin dhe deportimin e fëmijëve ukrainas, duke përfshirë edhe Bjellorusinë.

Kryeministri Kurti dhe ministri Konjufca kanë theksuar se vendimi i qeverisë kontribuon në forcimin e sundimit të ligjit, zhvillimin e administratës, mbrojtjen e të drejtave të njeriut dhe ruajtjen e bashkëpunimit të ngushtë me partnerët ndërkombëtarë.

Qeveria njofton se masat janë pjesë e politikës së Kosovës për të qëndruar në linjë me partnerët strategjikë ndërkombëtarë dhe për të mbështetur integritetin dhe paqen në rajon.

Në mbledhjen e saj të dytë, Qeveria e Republikës së Kosovës ka miratuar një sërë vendimesh dhe projektligjesh që synojnë forcimin e administratës, zhvillimin ekonomik dhe integrimin ndërkombëtar të vendit. Një nga vendimet kryesore është themelimi i Këshillit Shtetëror për shënimin e 28-vjetorit të Epopesë së Ushtrisë Çlirimtare të Kosovës (UÇK).

Kryesues i këshillit do të jetë ministri i Mbrojtjes, Ejup Maqedonci, me bashkëkryesues Andin Hotin, ministër për Punë, Familje dhe Vlerat e Luftës Çlirimtare, ndërsa anëtarë të tjerë janë kryetari i Komunës së Skenderajt, Sami Lushtaku, ministrja e Kulturës dhe Turizmit, Saranda Bogujevci, ministri i Administrimit të Pushtetit Lokal, Elbert Krasniqi, gjenerali Bashkim Jashari dhe drejtori i Policisë, Gazmend Hoxha.

Nga një përfaqësues janë gjithashtu edhe organizatat e dala nga lufta e UÇK-së, Zyrës së Presidentes, Kuvendit, Zyrës së Kryeministrit dhe Asociacioni i Komunave. Këshilli ka për qëllim organizimin dhe koordinimin e aktiviteteve përkujtimore për këtë përvjetor historik.

Në kuadër të agjendës ligjore, Qeveria ka miratuar Projekt-programin e projektligjeve për vitet 2026–2028, duke vendosur si prioritet procedimin e Projektligjit për Byronë shtetërore për konfiskimin e pasurisë së pajustifikueshme dhe Projektligjit të ri për çmimet tavan, të cilat sipas kryeministrit Albin Kurti janë masa kyçe për rritjen e transparencës dhe kontrollin e ekonomisë.

Po ashtu, janë miratuar projekt-rregullorja për fushat e përgjegjësisë administrative të ministrive dhe Projekt-programi i vlerësimit Ex-Post të Akteve Juridike, që synon përmirësimin e cilësisë së legjislacionit dhe efektivitetin e procedurave administrative.

Në fushën e marrëdhënieve ndërkombëtare dhe arsimit, qeveria ka miratuar Projektligjin për ratifikimin e marrëveshjes për qasje në arsimin e lartë dhe pranim për studime në Ballkanin Perëndimor, si dhe Projektligjet për ratifikimin e amendamenteve Nr. 2 dhe Nr. 3 të marrëveshjeve financiare me Bashkimin Evropian për programet IPA 2017 dhe IPA 2018. Këto hapa synojnë thellimin e bashkëpunimit rajonal dhe integrimin e Kosovës në projekte ndërkombëtare zhvillimore.

Në nivel lokal, Qeveria ka vendosur themelimin e ndërmarrjeve publike lokale “Fushë-Kosova” Sh.A. në Fushë-Kosovë dhe “Eko Drenasi” Sh.A. në Drenas, duke synuar përmirësimin e shërbimeve publike dhe menaxhimin e infrastrukturës lokale. Po ashtu është miratuar edhe projekt-rregullorja për procedurën e shqyrtimit administrativ të akteve të komunave, për të përmirësuar transparencën dhe efikasitetin e procesit administrativ.