Kryetari i Nismës Socialdemokrate, Fatmir Limaj deklaroi se qëndrimi i tyre për bashkëpunim me Lëvizjen Vetëvendosje është vetëm për bashkëpunim në nivel parlamentar.

Kështu u shpreh ai para nisjes së seancës, ku deputetët u mblodhën për herë të 22-të në një tjetër tentim për konstituimin e legjislaturës së nëntë.

“Ashtu siç kemi thënë mbrëmë, vazhdojmë të qëndrojmë në atë, bashkëpunim në nivel parlamentar”, deklaroi ai.

Policia e Kosovës me urdhër të Prokurorisë Speciale të Republikës së Kosovës është duke zhvilluar bastisje në Ministrinë e Bujqësisë.

Bastisjet po zhvillohen mbi dyshimet për Fabrikën për përpunimin e mbetjeve shtazore, kanë konfirmuar për KosovaPress, nga Prokuroria e Shtetit.

“Ju njoftojmë se Policia e Kosovës, me urdhër të Prokurorisë Speciale të Republikës së Kosovës është duke zhvilluar bastisje në katër lokacione. Bastisjet po zhvillohen mbi dyshimet për Fabrikën për përpunimin e mbetje shtazore. Për detaje të tjera, publiku do të njoftohet gjatë ditës”, thuhet në përgjigjen e Prokurorisë.

Partia Demokratike e Kosovës i ka bërë thirrje Albin Kurtit që “të reflektojë” për zgjidhjen e ngërçit në Kuvend.

Nënkryetarja e kësaj partie, Vlora Çitaku tha se bllokada është si pasojë e “kokëfortësisë së Albin Kurtit dhe ambicies së Albulena Haxhiut”.

“Partia Demokratike e Kosovës përgjatë gjithë kësaj periudhe ka qenë jashtëzakonisht korrekte dhe konstruktive dhe kemi ofruar rrugëdalje nga kjo gjendje e bllokadës në të cilën jemi futur ekskluzivisht falë kokëfortësisë së zotëri Albin Kurti, dhe ambicies së zonjës Albulena Haxhiu. Edhe sot ju bëjmë ftesë që të reflektojnë, Kosova është shumë më e madhe sesa secili emër i përvetshëm në atë sallë. Ne jemi të gatshëm për zgjidhje, i kemi dhënë propozimet tona në këtë pikë, shpresojmë që zotëri Kurti të reflektojë”, tha Çitaku para se të hyjë në Kuvend për vazhdimin e seancës konstituive”, tha ajo.

Ajo tha se nuk e kanë asnjë obligim që të votojnë propozimin e Lëvizjes Vetëvendosje, megjithatë sipas saj, kanë ofruar opsionin e tyre për ndërrim të kandidatit.

“Është bërë e papërballueshme për një pensionist që të kalojë muajin në Kosovë, e ne vijmë këtu tash e 22 herë, pa asnjë rezultat, pse, sepse zotëri Kurti nuk do marrëveshje dhe nuk do kompromis. E ftojmë edhe sot që të reflektojë. Nuk varet nga ne, kemi ofruar alternativat tona, janë 40 emra që Kurti i ka në dispozicion. Ndonëse, keni parasysh, ne nuk kemi asnjë lloj obligimi që të votojmë propozimin e Lëvizjes Vetëvendosje, është detyrë e zotëri Kurti që të krijojë shumicën parlamentare, por meqë nuk ka shumicë parlamentare, ne kemi dhënë opsionet tona, zotëri Kurti të duhet të reflektojë”, tha ajo.

Edhe sot ka dështuar konstituimi i Kuvendit të Kosovës. Kjo është përpjekja e 22-të me radhë që prej 15-të prillit kur ka filluar seanca konstituive.

Kryesuesi i seancës sërish vazhdoj seancën me kërkesën për anëtarët për komisiono për votim të fshehtë por opozita nuk dha emrat. Pastaj është hedhur në votim komisioni që nuk mori votat e mjaftushme dhe kështu seanca është ndërprerë për të vazhduar pasnesër.

Nga Lëvizja Vetëvendosje, kanë propozuar edhe që vazhdimet e seancave të mos bëhen çdo 48 orë – siç e kërkon rregullorja e Kuvendit, por të bëhen një herë në javë.