Lajmet

​Qeveria merr një sërë vendimesh, miraton edhe Projektligjin për arsimin e lartë

Kabineti qeveritar, ndau edhe 30 mijë euro për strehimin e pesë gazetarëve nga Afganistani në Kosovë.

Published

on

Qeveria e Kosovës në mbledhjen e sotme ka marrë një sërë vendimesh. Ekzekutivi miratoi Projektligjin për arsimin e lartë dhe nismën për njohjen reciproke të patentë shoferëve me Britaninë e Madhe dhe Irlandën e Veriut.

Kabineti qeveritar, ndau edhe 30 mijë euro për strehimin e pesë gazetarëve nga Afganistani në Kosovë. Ndërsa, shtyu edhe për gjashtë muaj afatin për rimburësimin e 10 për qind të kursimeve pensionale që qytetarët kanë tërhequr në vitin 2020.

Ministrja e Arsimit, Shkencës, Teknologjisë dhe Inovacionit, Arbërie Nagavci, tha se përmes Projektligjit për arsimit të lartë do të përcaktohen kriteret e qarta për themelimin e institucioneve për arsimin e lartë dhe do të bëhet verifikimi i titujve akademik.

“Përcakton kriteret e qarta për themelimin e institucioneve për arsimin e lartë. Përcakton obligimet dhe detyrat e strukturës qeverisëse të institucioneve publike të arsimit të lartë. Përcaktimi i standardeve minimale dhe kushteve për emërime akademike. Financimi i institucioneve publike në bazë të kontratave të performancës. Vendosja e mekanizmave për sigurimin e integritetit akademik, komuniteti etik në nivel qendror, po ashtu edhe këshillat e etikës në çdo institucion të arsimit të lartë. Verifikimi i titujve akademikë dhe atyre të fituara para hyrjes në fuqi të këtij projektligji”, tha ajo.

Në anën tjetër, ministri i Punëve të Brendshme dhe Administratës Publike, Xhelal Sveçla, tha se përmes nismës për marrëveshjen ndërkombëtare me Britaninë e Madhe dhe Irlandën e Veriut do të njihen patentë shoferët në mënyrë reciproke.

“Kjo projekt-marrëveshje është në frymën e interesave të përbashkëta, në kuadër të bashkëpunimit ndërkombëtar me qëllim që të lehtësohet qarkullimi rrugor në territoret e dy shteteve, duke dëshiruar që me anë të kësaj marrëveshje të kryhen procedura efektive që qytetarët tanë që jetojnë në Mbretërinë e Bashkuar të kenë mundësi që patentë shoferin e Kosovës të zëvendësojnë me atë të Mbretërisë së Bashkuar dhe anasjelltas”, theksoi Sveçla.

Ndërkohë, zëvendësministri i Punëve të Jashtme dhe Diasporës, Kreshnik Ahmeti, tha se strehimi i pesë gazetarëve nga Afganistani i kontribuon mbrojtjes së vlerave demokratike.

Paraqitje të parë në kabinetin qeveritar pati edhe ministri i sapo emëruar në dikasterin e shëndetësisë, Arben Vitia. Ai paraqiti koncept-dokumentin për shëndetin mendor.

“Parashihet avancimi për kujdesin shëndetësor, të drejtat psikiatrike dhe përcaktimi i qartë i të drejtave dhe detyrave institucionale që do të arrihet me hartimin e ri të ligjit për shëndetin mendor”, tha ai.

Ndërsa, ministri i Financave, Punës dhe Transfereve, Hekuran Murati, kërkoi shtyrje të afatit edhe për gjashtë muaj të rimbursimin e qytetarëve që kanë tërhequr 10 për qind të kursimeve pensonale në vitin 2020.

“Afati të shtyhet deri në fund të qershori të vitit të ardhshëm”, tha ai.

Ndërkaq, ministrja e Ekonomisë, Artane Rizvanolli, tregoi performancën e ndërmarrjeve publike gjatë vitit 2022.

“Dhjetë ndërmarrje kanë operuar me humbje, ndërsa shtatë me fitim. Njëmbëdhjetë nga shtatëmbëdhjetë ndërmarrje ka pasur përmirësim në kuptimin e performancës financiare. Te KEK-u kemi pasur rritje të fitimit për 56 për qind, Trepça kemi ulje të humbjeve për 85 për qind, te Telekomi ulje të humbjeve gati në 50 për qind”, tha ajo.

Në mbledhjen e sotme, Qeveria miratoi edhe draftin e strategjisë së reformës në Administratën Publike 2022-2026 dhe projekt-udhëzimin administrativ për mënyrën dhe procedurat e shitjes dhe dhënies me qira të pasurisë së luajtshme dhe të paluajtshme të sekuestruar dhe konfiskuar.

Po ashtu miratuan edhe koncept-dokumentin për eficiencë të energjisë dhe koncept-dokumentin për rishikimin e ligjeve në sektorin e energjisë.

Rajoni

Rektori Hajrizi: Studentët e UBT-së, të gatshëm për tregun global të punës

Published

on

UBT ka dëshmuar se është institucioni lider në arsim, shkencë dhe inovacion në Kosovë e rajon, duke nxjerrë kuadro profesionale që sot kontribuojnë në kompani e industri të nivelit botëror. Në një intervistë në FIVE të Dukagjinit, Rektori i UBT-së, Prof. Dr. Edmond Hajrizi, thekson se përmes programeve moderne dhe industrive të krijuara brenda institucionit, studentët përgatiten jo vetëm për tregun e punës vendor, por edhe për atë global.

“Ne prodhojmë 400 arkitektë në vit, dhe nuk është se ka aq kompani vendore për t’i absorbuar. Ata punojnë për kompani globale. Po ashtu, ne përgatisim 1.000 programerë çdo vit, dhe kërkesa nuk është vetëm në Kosovë. Janë të mjaftueshme për tregun vendor, por ka kërkesa edhe në nivel botëror”, tha Rektori Hajrizi.

Ai nënvizoi se UBT ka arritur të harmonizojë kërkesat e tregut të punës me programet akademike, duke krijuar kushte që studentët të kenë qasje në teknologjitë më të reja, sikurse universitetet dhe industritë më të zhvilluara të botës.

“Studenti ynë ka mundësi të mësojë e të punojë me teknologjitë më të fundit, njësoj sikur studentët e universiteteve elitare në botë. Ne kemi krijuar edhe industri të brendshme, kompani ku studentët përjetojnë të gjithë ciklin organizativ të teknologjive dhe të kompanive moderne, në mënyrë që kur të dalin në treg të jenë të gatshëm menjëherë”, u shpreh Rektori.

Ai veçoi si shembull programet e arkitekturës dhe urbanizmit, ku studentët përgatiten me koncepte moderne të projektimit, por edhe fushën e “smart cities”, ku UBT është shembull ndërkombëtar për ndërtimin e qyteteve të mençura.

“Smart cities janë e ardhmja e qyteteve dhe e organizimit modern. Ne kemi treguar se edhe nga Kosova mund të ndërtohen modele të tilla të suksesshme. Nuk ka teknologji që e gjen në Amerikë, Gjermani apo Japoni, e që nuk mund ta hasësh edhe në UBT”, theksoi Hajrizi.

Duke folur për rolin e UBT-së në rajon, Rektori nënvizoi se institucioni ka qenë gjithmonë pararojë me programe unike dhe inovative, duke filluar që nga viti 2001 me menaxhimin inxhinierik, mekatronikën dhe më pas me teknologjitë e reja.

“Besoj se për Ballkanin gjithmonë kemi qenë një lloj lidershipi. Ne kemi qenë të parët që kemi hapur programe moderne, kemi krijuar qendra kërkimore dhe jemi pozicionuar ndërkombëtarisht, nga Londra, Vjena, deri në Finlandë. Ky është tregues se UBT është institucion proaktiv dhe inovativ në nivel global”, theksoi ai.

Në fund, Rektori Hajrizi potencoi se studentët e UBT-së nuk duhet të kenë kompleks inferioriteti, sepse tashmë kanë dëshmuar se janë të barabartë, madje shpesh më të mirë se bashkëmoshatarët e tyre në universitete ndërkombëtare.

“Shumë prej tyre sot punojnë në Zvicër, Gjermani, Amerikë, e më gjerë, duke kontribuar në zhvillime globale. Ky është konfirmim se UBT po udhëheq në Ballkan, duke prodhuar dije e kuadro të nivelit botëror”, përfundoi Rektori Hajrizi.

Continue Reading

Vendi

Në UBT Ferizaj u organizua sesioni informues për bursën prestigjioze Chevening Scholarship

Published

on

UBT Ferizaj ishte mikpritës i një sesioni të veçantë informues për bursën prestigjioze Chevening Scholarship, me pjesëmarrjen e përfaqësuesve të Ambasadës Britanike në Kosovë, në bashkëpunim me Chevening Alumni Foundation in Kosovo.

Gjatë këtij aktiviteti, studentët e UBT-së në Ferizaj u njohën me procesin e aplikimit, kriteret e përzgjedhjes dhe afatet e rëndësishme, si dhe morën këshilla praktike për një aplikim të suksesshëm.

Ky aktivitet synoi të nxisë interesimin e studentëve për të aplikuar në bursën Chevening dhe të ofronte njohuri të thelluara mbi mundësitë që kjo bursë ofron pas përfundimit të studimeve, si zhvillimi i aftësive profesionale dhe krijimi i perspektivave të reja karrierike.

Continue Reading

Lajmet

Kosova e Turqia vazhdojnë bashkëpunimin në fushën e mbrojtjes

Published

on

By

Komandanti i Forcës së Sigurisë së Kosovës, gjenerallejtënant Bashkim Jashari, ka pritur sot në takim shefin e Mbrojtjes së Turqisë, gjeneral Selçuk Bayraktaroğlu, me të cilin ka biseduar për zgjerimin e bashkëpunimit në fushat e trajnimeve, edukimit dhe mbështetjes në ngritjen e kapaciteteve ushtarake të FSK-së.

Jashari me këtë rast falënderoi Bayraktaroğlu për mbështetjen e vazhdueshme që Turqia i ka dhënë FSK-së në ngritjen e kapaciteteve profesionale, raporton KosovaPress.

Ndërsa, shefi i Mbrojtjes së Turqisë ri-konfirmoi përkushtimin e vendit të tij për të vazhduar dhe thelluar bashkëpunimin me FSK-në, duke vlerësuar lart zhvillimin dhe profesionalizmin e ushtrisë së Kosovës.

Të dy gjeneralët u pajtuan për vazhdimin e zgjerimit të mëtutjeshëm të bashkëpunimit bilateral në fushën e mbrojtjes, thuhet në njoftimin e FSK-së./D.B/KP

Continue Reading

Lajmet

UBT dhe AMIK nisin projektin “Inkuadrimi i Vajzave në Ndërmarrësi” me trajnimin e parë

Published

on

Në ambientet e Parkut Shkencor, Inovativ dhe Teknologjik të UBT-së u zhvillua hapja e projektit “Inkuadrimi i Vajzave në Ndërmarrësi”, një iniciativë e organizuar nga UBT në bashkëpunim me AMIK – Asociacioni i Institucioneve Mikrofinanciare të Kosovës.

Ky aktivitet ka për qëllim fuqizimin e vajzave dhe grave të reja përmes ofrimit të njohurive praktike, mentorimit dhe krijimit të mundësive të reja për angazhim në botën e ndërmarrësisë. Pjesëmarrëset do të pajisen me shkathtësi të rëndësishme për të ndërmarrë iniciativa profesionale dhe për të kontribuar në zhvillimin ekonomik dhe social të vendit, duke rritur mundësitë e tyre për punësim, krijim të bizneseve të vogla dhe inovacion.

Në hapje të aktivitetit, u theksua rëndësia e partneritetit mes institucioneve akademike dhe sektorit financiar për mbështetjen e gjeneratës së re të sipërmarrësve.

Rektori i UBT-së, Prof. Dr. Edmond Hajrizi, vuri në pah se projektet e tilla janë të nevojshme për të krijuar një platformë të qëndrueshme për ndërmarrësi dhe zhvillim ekonomik në nivel vendi, dhe se bashkëpunimi me sektorin financiar dhe organizatat që mbështesin inovacionin është kyç për suksesin e vajzave të reja.

Zëvendësguvernatorja e Bankës Qendrore të Kosovës, Nesrin Shileku-Shala, i inkurajoi pjesëmarrëset duke theksuar rëndësinë e edukimit financiar, planifikimit dhe guximit për të ndërmarrë iniciativa të reja, duke u bërë modele suksesi për komunitetet e tyre.

Drejtori i Bordit të AMIK, Adrian Alo, theksoi se fuqizimi i vajzave përmes projekteve të ndërmarrësisë kontribuon në stabilitetin ekonomik dhe përfshirjen sociale, duke nxitur edhe zhvillimin e sektorit mikrofinanciar dhe inovacionin në vend.

Përfaqësuesi i AMIK, Prof. Shpresim Vranovci, nënvizoi rëndësinë e mentorimit dhe krijimit të rrjetit të kontakteve për pjesëmarrëset, si një element kyç për arritjen e suksesit profesional dhe zhvillimin e projekteve të reja sipërmarrëse.

Ndërsa, Drejtori i Departamentit për Edukim dhe Zhvillim Profesional në UBT, Prof. Dr. Besnik Skenderi, theksoi se institucioni mbetet i përkushtuar të ofrojë platforma praktike për zhvillimin e studentëve dhe të rinjve, duke i lidhur ata me sektorët strategjikë të ekonomisë dhe aktorë që kontribuojnë drejtpërdrejt në krijimin e mundësive të reja për punësim, ndërmarrësi dhe inovacion.

Ky projekt shënon një hap të rëndësishëm drejt përfshirjes së vajzave dhe grave në ekonominë inovative dhe ndërmarrëse të vendit, duke nxitur një kulturë të barazisë, sipërmarrësisë dhe zhvillimit të qëndrueshëm ekonomik dhe social.

Continue Reading

Të kërkuara