Lajmet

​Osmani në Ditën e Pavarësisë: Për drejtësi thërrasim çdo ditë

Osmani ka thënë se FSK dhe Policia e Kosovës janë personifikimi më i mirë i shtetit të Kosovës.

Published

4 years ago

on

Ditën e shtetësisë Kosova e ka shënuar me parakalimin e kuadrateve të Forcës së Sigurisë së Kosovës dhe Policisë së Kosovës në sheshet e Prishtinës. Shumë qytetarë ishin mbledhur për t’i parë nga afër njësitet e këtyre dy institucioneve para së cilëve presidentja e vendit, Vjosa Osmani ka thënë se pavarësia e Kosovës është e arritura më e madhe.

Kryetarja e shtetit ka kujtuar sakrificën e familjes Jashari, në krye me komandantin legjendar Adem Jasharin, presidentin historik, Ibrahim Rugova, të gjithë dëshmorët dhe ata që mundësuan çlirimin dhe pavarësimin e Kosovës.

“Rreth 13 mijë civilë të vrarë prej të cilëve akoma shumë të zhdukur, rreth 20 mijë gra të dhunuara gjatë luftës që akoma kërkojnë drejtësi, e shumë e shumë dëme, shkatërrime të tjera që kishin synim shfarosjen tonë, tregojnë se drejtësia akoma nuk është vendosur e për drejtësi thërrasim çdo ditë. Në këtë ditë të madhe për shtetin tonë nuk duhet të rreshtim së përsërituri faleminderit Amerikë, faleminderit NATO dhe faleminderit të gjitha shteteve mike të cilat na dolën në ndihmë më 1999 për të na mbrojtur nga shfarosja prej regjimit gjenocidal të Millosheviqit”, ka thënë Osmani.

Presidentja Osmani ka thënë se Forca e Sigurisë së Kosovës dhe Policia e Kosovës janë personifikimi më i mirë i shtetit të Kosovës dhe garancia për çdo cep të territorit të Kosovës.

“Pavarësia e Kosovës është e arritura jonë më e madhe, ky është projekti ynë nacional, një realitet që mban vulën e angazhimit tonë kombëtar, i përmbledhur më së miri në qëndrueshmërinë e brendshme dhe integrimin e jashtëm, këto janë dy parakushtet themelore për të ardhmen e vendit tonë. Institucionet me të gjithë mekanizmat e vet janë garantues se nuk do të lejojmë cenimin e integritetit territorial dhe të rendit juridik të republikës sonë. Do të jemi të vëmendshëm e të vendosur, republika është interesi mbi të gjitha. Ne na lidhë shumëçka me Evropën, por asgjë nuk na ndanë. Në këtë rrugëtim duhet ta ruajmë lirinë, pavarësinë dhe demokracinë tonë, duhet ta forcojmë sundimit e ligjit, ta përmirësojmë edhe më tej qeverisjen në interes të qytetarëve, t’i forcojmë institucionet dhe edhe më tutje ta zhvillojmë ekonominë e vendit”, ka thënë ajo.

Ndërsa kryeministri i Kosovës, Albin Kurti, në 14-vjetorin e Pavarësisë së Kosovës ka thënë se shteti është i përcaktuar për anëtarësim në institucionet euroatlantike.

“Evropa është horizonti ynë i përkatësisë së të jetuarit ndërsa NATO është kushti i paqes për të gjithë neve. Ky është vlerësimi aktual i një republike në proces emancipimi, veprim dhe paqe. Rrugëtimi i popullit tonë deri në këtë ditë ishte i gjatë dhe i mundimshëm por edhe përplot me krenari e me nder. Mbi të gjitha sot i kujtojmë heronjtë tanë që dhanë më të shtrenjtën dhe të çmuarën, jetën e tyre, për atë që është më e shtrenjta dhe me çmuara e popullit tonë, liria e tij. Sot kujtojmë vuajtjen, flijimi e heronjve tanë, atyre që na e kujtojnë sa e shenjtë është liria dhe sa bukur që është të jetosh i lirë”, ka thënë Kurti.

Ai ka thënë se shteti i Kosovës është vend i të gjithë qytetarëve të saj, të barabartë para ligjit.

“Sot bashkohemi edhe në fuqi edhe në festë, në këtë ditë jemi mirënjohjes, jemi të bashkuar dhe reflektojmë idealet tona. Në ditën e pavarësisë së republikës e shikojmë të kaluarën dhe bashkohemi në aspiratat e së ardhmes së ndritur të popullit tonë, mirënjohës dhe të përkulur para sakrificës, krenar dhe vullnet të pashoq për të ardhmen të cilën së bashku po e ndërtojmë”, ka thënë ai.

Për të shënuar 14-vjetorin e Pavarësisë së Kosovës, Kuvendi i Kosovës ka mbajtur seancë solemne ndërsa krerët institucionalë kanë bërë homazhe në Kompleksin memorial “Adem Jashari” në Prekaz, pranë varrit të presidentit Ibrahim Rugova dhe veprimtarit të çështjes kombëtare, Adem Demaçi.

Related Topics:
Continue Reading

Lajmet

Prokuroria Speciale ngre aktakuzë ndaj Shpend Ahmetit për mosdeklarim të pasurisë

Published

2 hours ago

on

December 23, 2025

By

Prokuroria Speciale e Republikës së Kosovës ka ngritur sot aktakuzë ndaj Shpend Ahmetit, nën dyshimin për kryerjen e veprës penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.

Sipas aktakuzës, i pandehuri dyshohet se në periudhën nga viti 2018 deri në vitin 2022, në cilësinë e kryetarit të Komunës së Prishtinës, me dashje ka paraqitur deklarata të pasakta të pasurisë. Konkretisht, ai akuzohet se nuk ka deklaruar deponime në para të gatshme, të realizuara personalisht gjatë viteve përkatëse.

Prokuroria bën të ditur se shuma e përgjithshme e mjeteve të padeklaruara arrin vlerën prej 172 mijë e 600 eurosh.

Rasti i është përcjellë për shqyrtim Gjykatës Themelore në Prishtinë, Departamentit Special.

Shënim: Personi i përmendur në këtë artikull prezumohet i pafajshëm deri në një vendim të formës së prerë nga gjykata.

Continue Reading

Lajmet

30 të dënuar përfundojnë me sukses programet rehabilituese në burgun e Smrekonicës

Published

3 hours ago

on

December 23, 2025

By

Në burgun e Smrekonicës, kanë përfunduar me sukses dy programe rehabilituese për të burgosurit. Programi “Menaxhimi i Zemërimit” është ndjekur nga 20 të burgosur, ndërsa programi “Vendimmarrja Sociale” nga 10 të burgosur.

Shërbimi Korrektues i Kosovës, thotë se programet janë zbatuar në përputhje me politikat rehabilituese, planprogramin institucional dhe standardet profesionale të trajtimit.

Sipas njoftimi të ShKK-së, fokusi ka qenë zhvillimi i aftësive psikosociale, rritja e vetëkontrollit emocional, përmirësimi i sjelljes ndërpersonale dhe forcimi i aftësisë për marrjen e vendimeve të përgjegjshme dhe të ligjshme.

Me rastin e përfundimit të programeve është organizuar edhe ceremonia e shpërndarjes së certifikatave, derisa gjatë eventit u theksua rëndësia e programeve rehabilituese në përmirësimin e sjelljes së të burgosurve dhe në zvogëlimin e rrezikut të përsëritjes së veprave penale.

Continue Reading

Lajmet

Prattipati takon kryetarët e komunave veriore, kërkon qeverisje transparente

Published

3 hours ago

on

December 23, 2025

By

E Ngarkuara me Punë e Ambasadës së Shteteve të Bashkuara në Kosovë, Anu Prattipati, ka vizituar sot kryetarët e sapo inauguruar të Mitrovicës së Veriut, Zveçanit, Zubin Potokut dhe Leposaviqit.

Përmes një postimim, Ambasada e ShBA-së në Prishtinë tha se Prattipati nënvizoi pritshmëritë e Amerikës për qeverisje transparente, efektive, ofrim të barabartë të shërbimeve dhe rëndësinë e angazhimit me institucionet e sigurisë publike të angazhuara në shërbim të të gjitha komuniteteve.

“E ngarkuara me punë Anu Prattipati u takua sot me katër kryetarët e sapo inauguruar të Mitrovicës së Veriut, Zveçan, Zubin Potok, dhe Leposaviq dhe përfaqësues të shoqërisë civile serbe kosovare në veri të Kosovës. Ajo nënvizoi pritshmëritë e SHBA-së për qeverisje transparente, efektive, ofrim të barabartë të shërbimeve dhe rëndësinë e angazhimit me institucionet e sigurisë publike të angazhuara në shërbim të të gjitha komuniteteve”, thuhet në njoftimin e Ambasadës.

Continue Reading

Lajmet

Osmani: Me ShBA-në diskutuam për rikthimin e dialogut strategjik

Published

4 hours ago

on

December 23, 2025

By

Presidentja e Kosovës, Vjosa Osmani, ka bërë të ditur se gjatë takimit me zëvendëssekretarin e Shtetit të Shteteve të Bashkuara të Amerikës, Christopher Landau, kanë diskutuar për rikthimin e dialogut strategjik mes Kosovës dhe ShBA-së.

Në një video të publikuar në rrjetet sociale, Osmani tha se me zëvendëssekretarin amerikan kanë trajtuar gjithashtu një sërë çështjesh që lidhen me bashkëpunimin dypalësh, sigurinë, paqen, zhvillimin ekonomik dhe integrimin euroatlantik të Kosovës.

Presidentja u ndal edhe te nënshkrimi i një ligji nga presidenti amerikan, Donald Trump, i cili përfshin edhe Republikën e Kosovës. Sipas saj, ligji parashikon mbështetjen e sovranitetit dhe integritetit territorial të Kosovës, përjashton ndryshimet e kufijve dhe përcakton që dialogu me Serbinë duhet të bazohet në njohje reciproke.

“Diskutuam edhe për një sërë çështjesh të tjera, për të cilat është e domosdoshme të kemi koordinim të plotë dhe të vazhdueshëm me SHBA-në si aleatin tonë më të rëndësishëm strategjik, si dhe për hapat dhe veprimet që duhet t’i ndërmarrim për rikthimin e dialogut strategjik me SHBA-në”, deklaroi Osmani pas takimit.

Ajo theksoi se në këtë takim është rikonfirmuar mbështetja e Shteteve të Bashkuara për anëtarësimin e Kosovës në NATO, si dhe për rritjen e investimeve strategjike në sektorin ekonomik.

Presidentja Osmani nënvizoi rëndësinë e koordinimit të vazhdueshëm me SHBA-në dhe shprehu besimin e saj të plotë në administratën e presidentit amerikan, Donald Trump, duke e cilësuar partneritetin me SHBA-në si shtyllë kyçe të politikës së jashtme të Kosovës.

Continue Reading

Të kërkuara