Kryeministri i Shqipërisë, Edi Rama ka kërkuar nga Kosova që të përmbushë unilateralisht të gjitha marrëveshjet e dialogut me Serbinë. Sipas tij, Kosova duhet që normalizimin e raporteve me Serbinë ta lidh me Bashkimin Evropian dhe ta këpus siç e quajti ai kërthizën e reciprocitetit me Serbinë.

Ai në seancën e përbashkët të dy kuvendeve ”gozhdoi” homologun e tij nga Kosova, Albin Kurti.

“Derisa Shqipëria po bën hapa të shpejtë për anëtarësim në BE, Kosova gjendet në sanksione nga Bashkimi Evropian. Masat të hiqen dhe kemi siguruar që të gjitha fondet e BE mos të digjen”, tha ai.

Rama përmendi edhe ish krerët e UÇK-së që po gjykohen në Hagë.

Gjykimin e tyre e kualifikoi si një proces të parregullt ligjor.

Ai ngriti edhe një shqetësim qe sipas tij deputetët e Kuvendit të Kosovës s’kanë marrë ndonjë nismë për ta paraqitur një gjë të tillë para të gjitha vendeve sponsorizuese të kësaj gjykate.

Presidentja e Kosovës, Vjosa Osmani, ka kërkuar unifikim të politikës së jashtme me Shqipërinë.

Ajo tha se seanca e përbashkët e kuvendeve të Kosovës dhe Shqipërisë duhet të shërbejë si një thirrje për avancim të bashkëpunimit ndërmjet dy vendeve.

“Bashkëpunimi nuk është një zgjedhje por domosdoshmëri”, theksoi ajo.

Sipas saj, anëtarësimi i Kosovës në NATO do t’i jep fund apetiteve hegjemoniste të Serbisë ndaj Kosovës.

Osmani foli edhe siç tha ajo për tendencat për destabilizim në Maqedoninë e Veriut dhe cenimit të gjuhës shqipe.

“Ne nuk duhet të qëndrojmë të heshtur dhe as të mbyllim sytë para këtyre tendencave”, tha ajo.

Kryetarja e Kuvendit të Shqipërisë, Elisa Spiropali, ka thënë se Kosova është prioritet strategjik i Shqipërisë.

Ajo në mbledhjen e përbashkët të dy kuvendeve në Prishtinë, tha se bashkëpunimi ndërmjet dy vendeve është krucial për kombin shqiptar.

Kryekuvendarja shqiptare foli edhe për dialogun Kosovë-Serbi, për çka tha se i njëjti duhet të përfundojë me njohje reciproke.

“Dialogu Kosovë-Serbi duhet te ketë medoemos njohjen reciproke përmes arritjes së marrëveshjes përfundimtare”, tha ajo.

Ajo dënoi edhe sulmin terrorist në kanalin e Ibër-Lepencit veri të Kosovës.

Ndërkaq, tha se po ndjek me shqetësim edhe çështjen e gjuhës shqipe në Maqedoninë e Veriun.

Liderët e Kosovës dhe të Shqipërisë kanë zhvilluar takim para seancës së përbashkët të parlamenteve që po mbahet në Prishtinë.

Kryetari i Kuvendit, Glauk Konjufca, dhe kryeministri Albin Kurti kanë pritur në takim shefin ekzekutivit shqiptar, Edi Rama dhe kryetaren e Kuvendit të Shqipërisë, Elisa Spiropali.

E para që mbërriti në Kuvendin e Kosovës ishte Spiropali e cila fillimisht zhvilloi takim me Konjufcën.

Më vonë, ndaras mbërritën Kurti e Rama.

Të dy kuvendet janë mbledhur sot në Prishtinë ku në fokus të diskutimeve është e ardhmja evropiane e të dy vendeve.