Ministria e Industrisë, Ndërmarrësisë dhe Tregtisë ka publikuar çmimet tavan për shitjen e derivateve të naftës për ditën e sotme. Sipas njoftimit zyrtar, çmimi maksimal i lejuar për një litër naftë është 1.78 euro.

Për produktet e tjera, Ministria ka përcaktuar se çmimi i benzinës nuk mund të jetë më i lartë se 1.44 euro për litër, ndërsa çmimi maksimal i lejuar për gas është 0.89 euro për litër. Këto çmime hyjnë në fuqi nga ora 10:00 dhe janë të vlefshme për 24 orët e ardhshme, me qëllim mbrojtjen e konsumatorëve nga luhatjet e çmimeve në treg.

Ky njoftim vjen në një kohë kur tregjet globale të energjisë po përballen me pasiguri të madhe gjeopolitike.

Situata është tensionuar ndjeshëm në Ngushticën e Hormuzit, pas vendimit të SHBA-së për të bllokuar anijet që hyjnë dhe dalin nga portet iraniane. Edhe pse Komanda Qendrore e SHBA-së ka deklaruar se lundrimi për vendet e tjera mbetet i lirë, OKB-ja ka paralajmëruar se bllokimi i një rruge kyçe tranziti nuk ka bazë ligjore ndërkombëtare dhe rrezikon ekonominë botërore.

Përkundër nisjes së bllokadës, trafiku detar nuk është ndalur tërësisht, por tensionet në Gjirin Persik pritet të kenë impakt të drejtpërdrejtë në furnizimet dhe stabilitetin e çmimeve të naftës edhe në tregun tonë.

Në lagjen “Marigona Residence” në Graçanicë është raportuar një vjedhje e rëndë, ku persona të panjohur kanë depërtuar brenda shtëpisë së një shtetasi të Turqisë.

Sipas raportimit të viktimës, personat e dyshuar kanë arritur të marrin një kasafortë në të cilën gjendeshin para të gatshme, disa orë dore dhe stoli ari.

Në vendin e ngjarjes kanë dalë njësitet përkatëse policore për të kryer ekzaminimet e nevojshme, ndërsa lidhur me rastin është njoftuar edhe prokurori.

Policia ka nisur hetimet për identifikimin e kryerësve dhe zbardhjen e rrethanave të ngjarjes.

Gjatë 24 orëve të fundit janë raportuar dy raste të vjedhjeve të rënda në rajonin e Prizrenit.

Në Landovicë, pronari i një restoranti ka njoftuar policinë se në orët e hershme të mëngjesit, tre persona të dyshuar kanë depërtuar me forcë në objektin e tij, me ç’rast kanë vjedhur një sasi të parave të gatshme. Lidhur me këtë incident është njoftuar prokurori dhe hetimet janë në vijim.

Ndërkohë, në Suharekë, një person ka raportuar se persona të panjohur kanë hyrë me forcë në shtëpinë e tij, ku kanë vjedhur një armë zjarri (pushkë gjuetie), për të cilën ankuesi posedonte leje të skaduar.

Policia njofton se po punon për identifikimin e personave të përfshirë dhe zbardhjen e të dyja rasteve.

Vetëm disa orë pasi rezultatet e zgjedhjeve në Hungari treguan se lideri i opozitës, Peter Magyar, kishte shënuar fitore të thellë, duke i dhënë fund sundimit të Viktor Orbanit dhe partisë së tij të djathtë, Fidesz, njeriu që pritet të bëhet kryeministër i ardhshëm i Hungarisë, tha se “nuk ka kohë për të humbur” për formimin e Qeverie së re.

Për Brukselin, këto fjalë nuk mund të kishin ardhur më shpejt.

Pas 16 vjetësh të Qeverisë së Orbanit, e cila përplasej me BE-në për çështje të ndryshme – nga lufta në Ukrainë deri te sanksionet ndaj Rusisë – Brukseli tani shpreson që Budapesti të jetë më bashkëpunues.

“Vendi ynë nuk ka kohë për të humbur. Hungaria është në telashe në çdo aspekt. Ajo është plaçkitur, grabitur, tradhtuar, është futur në borxhe dhe është shkatërruar”, tha Magyar në një konferencë për media më 13 prill, një ditë pasi partia e tij e qendrës së djathtë, Tisza, fitoi shumicën prej dy të tretash në Parlamentin me 199 vende.

Ai shtoi se Hungaria – ku është arratisur edhe ish-kryeministri i Maqedonisë së Veriut, Nikolla Gruevski, i akuzuar për korrupsion – nuk do të strehojë kriminelë të kërkuar ndërkombëtarisht.

Me ligj, presidenti i Hungarisë duhet ta mbledhë Parlamentin e ri brenda 30 ditëve nga zgjedhjet. Më pas, deputetët zgjedhin kryeministrin e ri, i cili propozon kabinetin qeveritar.

Shumë shpresojnë se pengesat që kishte vendosur Orban, do të hiqen, megjithëse ekziston edhe shqetësimi se Magyar – i cili dikur ishte një besnik i afërt i kryeministrit të mposhtur, ndërsa më vonë u nda prej tij, për shkak të çështjeve të korrupsionit – mund të mos bashkëpunojë gjithmonë në mënyrë të lehtë.

Çështja kryesore me të cilën Magyar pritet të merret në Bruksel, nuk është politika e jashtme, por zhbllokimi i rreth 18 miliardë eurove fonde të BE-së, të ngrira në vitet e fundit, për shkak të “hapave prapa” në demokraci gjatë qeverisjes së Orbanit.

Rindërtimi i sistemit gjyqësor hungarez pritet të jetë një nga prioritetet kryesore, dhe Magyar synon të ndjekë shembullin e Polonisë.

Në përpjekje për të zhbllokuar fondet e BE-së pas rikthimit në pushtet në fund të vitit 2023, Qeveria e qendrës e Varshavës ka punuar për të përmbysur ndryshimet e diskutueshme në gjyqësor dhe administratë publike, të bëra nga paraardhësit populistë.

“Ne do të fillojmë të punojmë me Qeverinë [e re hungareze] sa më shpejt që të jetë e mundur”, tha presidentja e Komisionit Evropian, Ursula von der Leyen, “për të bërë përparim të shpejtë, në dobi të qytetarëve hungarezë”.

“Ka shumë punë për të bërë, pasi Hungaria po rikthehet në rrugën evropiane”, shtoi ajo. /REL/