Lajmet

​Mes tensionesh e akuzash Hajdari raporton për investitorët strategjikë

Deputetët e pozitës dhe opozitës janë përplasur në lidhje me investitorët strategjikë në Kosovë.

Published

on

Me tensione, akuza dhe kundër akuza është zhvilluar raportimi i ministres së Industrisë, Ndërmarrësisë dhe Tregtisë, Rozeta Hajdari në Komisionin Parlamentar për Ekonomi. Deputetët e pozitës dhe opozitës janë përplasur në lidhje me investitorët strategjikë në Kosovë.

Kryetari i Komisionit për Ekonomi, Ferat Shala ndërsa ka kritikuar ministren e Ndërmarrësisë, Rozeta Hajdari për “vonimin dhe stërzgjatje 2-vjeçare të shqyrtimit të 44 aplikacioneve për statusin e investitorit strategjik”, deputeti nga VV-ja, Armend Muja ka pyetur Shalën se a ka interesa të ngushta familjare me kompaninë garuese “Moxikoluma”.

“Për mua një shqetësim ka qenë, që nga fillimi i këtij Komisioni, është pikërisht tek kompania ‘Moxikolumo’, kryetar ke pasur një fokus të veçantë tek kjo kompani. Pyetja ime, është a keni ju konflikt interesi ose interes drejtpërdrejt tek kjo kompani? Sepse në Shalën e Bajgores ku planifikohet, të gjithë mua më kanë raportuar, banorët, që ju keni interesa të drejtpërdrejta, që nga ish-asistenti i juaj që është drejtor, djali i vëllait tuaj që ka bërë studimin, dhëndri i Ferat Shalës që ka dhënë lejen e pëlqimit mjedisor. Pra, këto janë interesa për Shalën e Bajgores. A mund të na thoni që janë të vërteta”, theksoi Muja.

Fillimisht deputeti Shala ka refuzuar të përgjigjet dhe theksoi se kjo është shpifje dhe tentativë për të devijuar raportimin e ministres Hajdari.

“Po nuk të përgjigjem unë ty, këto janë krejt shpifje tujat. Edhe nuk të përgjigjem, mjafton kaq. Shpifje të juaja dhe insinuata. S’mund të devijoni debatin nga kjo, badihava, kot e ke. Për ‘Kosmonte’ po pyes. Mos u ngutuni, deri në fund unë jam i gatshëm për të biseduar. Nuk po ikim”, theksoi Shala.

Sërish pas dy ore, në fund të mbledhjes, pati përplasje midis këtyre dy deputetëve, ku u përfshi edhe deputetja Mimoza Kusari Lila.

Deputeti Muja ka insistuar të marrë përgjigje nga deputeti Shala për çka tha se këtë rast do ta dërgoi edhe në Agjencinë Kundër Korrupsion.

“Pyetje drejtpërdrejt për kryetarin a ka konflikt interesi në këtë projekt. Nëse ka është mirë të përgjigjeni para publikut. A keni konflikt interesi?”, pyeti sërish Muja deputetin Shala.

Në fund deputeti Shala nuk pranoi se ka konflikt interesi, por akuzoi deputetin Muja pa u bërë shumë e qartë kjo.

“S’ka hiç, dërgoje. Nuk kam, për ata po them futi edhe shumarët (rojet e pyjeve) të Shalës së Bajgores dhe shiko mos po del ti diku aty, madje edhe më rëndë se sa kaq. Është e drejt e imja të përgjigjem. Atë e dinë Armend Muja, nuk e din ti (deputetes Mimoza Kusari Lila). Nuk mund të na diktoni agjendën tash me lojëra të tilla. Nëse ai përmend emra të specialistëve, të profesorëve universitarë me tendencë, pa asnjë konflikt interesi. Unë kam të drejt të përmend emrin e shumarit që e ruan parkun, bjeshkën”, theksoi Shala.

Përplasje ndërmjet pozitës dhe opozitës edhe ndërmjet deputetit Pal Lekaj të AAK-së dhe deputetit të VV-së, Driton Hyseni. Lekaj akuzoi VV-në se në opozitë kanë ulëritur për mungesë të investimeve.

“Për mua shqetësuese kam qenë në disa vizita jashtë vendit, ende mendojnë që këtu në Kosovë duhet investitorët të vijnë me pancir, se ende ekziston luftë. Po ju tregoj, që para tre ditësh. Më falni unë po them që ju s’jeni askund me informim. Edhe s’jam duke folur me juve (deputet Hyseni). Nëse dëshironi me u fut në polemikë, hyjmë edhe për luftë, edhe për paqe, investime, edhe të për të gjitha. Por, po e them, që na keni lodhur… për mua të vijë një ministre pas 18 muajve që keni ulëritur, dhe keni thënë që për 20 vjet s’ka pasur aplikacione për investime strategjike dhe tani prapë refrenin e njëjtë, është e pakuptimtë dhe nëse vazhdoni kështu unë nuk shoh dritë sa i përket investimeve strategjike në Kosovë”, theksoi Lekaj.

Ndaj kësaj deklarate ka reaguar deputeti nga VV, Driton Hyseni, i cili tha se Lekaj është kontradiktor.

“Në të njëjtën kohë po thoni që duhet të vini me pancirë. Kështu je në kontradiktë totale”, theksoi Hyseni.

Ministrja e Industrisë, Ndërmarrësisë dhe Tregtisë, Rozeta Hajdari, gjatë këtij raportimi tha se 44 kompani kanë aplikuar për statusin e investitorit strategjik. Ajo duke iu përgjigjur deputetëve të opozitës këto aplikacione, tha se nuk mund të shkojë në burg për një aplikacion që është i jashtëligjshëm.

“Unë nuk mund të shkoj në burg për një aplikacion që është jashtëligjshëm në sektorë që nuk i përket investimeve strategjike. Unë po ofrojë mundësinë që të plotësojnë kriteret dhe të vijnë në Komision. Kjo është detyrë e atij Komisioni që t’i trajtojë me kujdes, me maturi, dhe jo me një katrahurë si e kemi trashëguar”, theksoi Hajdari.

Po ashtu kryetari i Komisionit, Ferat Shala, është shprehur i befasuar se si ministrja Hajdari komunikon me investitorët potencialë në Whatsapp.

“Keni komunikim të vazhdueshëm, i kam përcjellë edhe prononcimet e juaja mediale që komunikoni edhe në Whatsapp. Ka qenë për mua befasi, si ka mundësi në nivel të ministres komunikon me investitorët në Whatsapp dhe kush ju këshillon që investitorët strategjikë të komunikoni me rrjete sociale”, ka pyetur Shala ministren Hajdari.

Ministrja e Tregtisë, Ndërmarrësisë dhe Industrisë, e ka pranuar se komunikon me investitorët potencialë strategjikë në Whatsapp. Por ajo ka shtuar se konfirmimet janë të shkruara përmes emailit.

Lajmet

Zgjatet afati për regjistrimin e institucioneve në Programin e Kuponëve

Published

on

By

Ministria e Arsimit, Shkencës, Teknologjisë dhe Inovacionit (MAShTI) ka njoftuar zgjatjen e afatit për regjistrimin e Institucioneve të Edukimit në Fëmijërinë e Hershme (IEFH) në Programin e Kuponëve deri më 23 shtator 2025.

Programi synon të përmirësojë qasjen në edukim për fëmijët 3–5 vjeç nga familjet përfituese të Skemës së Asistencës Sociale. Institucionet përfituese do të rimbursohen për shërbime arsimore dhe transport deri në 150 euro në muaj për fëmijë.

Të drejtë aplikimi kanë institucionet private, ato në partneritet publiko-privat dhe format komunitare, për sa kohë janë të licencuara nga MAShTI dhe kanë vende të lira. Aplikimi bëhet vetëm online përmes platformës e-Kosova/D.B/EO

Continue Reading

Lajmet

Kosova pranon dronë të blerë nga Shtetet e Bashkuara

Published

on

By

Kosova ka pranuar fluturake pa pilot AeroVironment RQ-20 Puma të blera nga Shtetet e Bashkuara të Amerikës, bëri të ditur ministri në detyrë i Mbrojtjes, Ejup Maqedonci.

Maqedonci njoftoi në Facebook se pranimi është bërë javën e kaluar ndërkaq, blerja është bërë përmes programit shtet më shtet.

Ministria e Mbrojtjes prokurimin e Fluturakeve pa Pilot “Puma” nga ShBA e ka realizuar përmes programit shtet më shtet të njohur si Foreign Military Sale (FMS). Pagesa për këtë sistem është realizuar në vitin 2021. Flututuraket Puma krahas fluturakeve tjera janë një kapacitet tjetër i nevojshëm për rritjen e aftësive të FSK në fushën e sistemeve ajrore pa pilot”, shkroi Maqedonci të hënën, më 8 shtator.

Ai tha se bashkëpunimi me SHBA-në në fushën e mbrojtjes po thellohet dhe “zgjerohet vazhdimisht duke kontribuar në zhvillimin e ushtrisë tonë si dhe në arritjen e interesave të përbashkëta të dy vendeve tona”.

Forca e Sigurisë së Kosovës është në procesin e transformimit i cili ka nisur në vitin 2018. Faza e tranzicionit është paraparë të zgjasë dhjetë vjet./D.B/KP

Continue Reading

Aktualitet

Anglia merr masa për përballjen e tensionuar me Serbinë

Published

on

Federata Angleze e Futbollit ka dërguar stjuardë në Beograd për ndeshjen e Anglisë me Serbinë e cila zhvillohet nesër në mbrëmje, dhe e cila po ashtu mund të shndërrohet në një përballje të ashpër.

Seksione të stadiumit do të jenë të mbyllura për shkak të sjelljeve raciste në një ndeshje të mëparshme, ndërsa telashet shpërthyen para përplasjes mes dy vendeve në Kampionatin Evropianin verën e kaluar në Gelsenkirchen.

Nga ajo ndeshje dhe përplasjes, shtatë serbë u arrestuan.

Anglia ka shitur të gjitha 2,500 biletat e saj dhe priten edhe qindra tifozë të tjerë pa bileta./S.K/EO/

Continue Reading

Lajmet

Aksident i rëndë në Vragoli, tre të lënduar dy në gjendje të rëndë

Published

on

By

Sot rreth orës 14:35, në rrugën nacionale Prishtinë–Pejë, në Vragoli ka ndodhur një aksident i rëndë trafiku, ku një kamion dyshohet se ka humbur kontrollin dhe ka goditur katër automjete tjera.

Sipas njoftimit të policisë, tre persona kanë mbetur të lënduar, dy prej tyre në gjendje të rëndë dhe janë dërguar në QKUK për trajtim mjekësor.

”Sot, rreth orës 14:35, në rrugën nacionale Prishtinë-Pejë, ka ndodhur një aksident i rëndë trafiku, ku dyshohet se drejtuesi i një automjeti transportues (kamion) me targa vendore ka humbur drejtimin e mjetit, ka kaluar në anën e kundërt të rrugës dhe ka goditur katër automjete të tjera.

Si pasojë e këtij aksidenti, deri në këto momente raportohet se dy persona kanë pësuar lëndime të rënda dhe një tjetër ka marrë lëndime të lehta, të cilët janë dërguar në QKUK për trajtimin e nevojshëm mjekësor. Njësitet përkatëse të Policisë së Kosovës kanë dalë menjëherë në vendngjarje dhe po ndërmarrin veprimet e nevojshme hetimore për zbardhjen e plotë të shkaqeve të aksidentit”./D.B/EO

Continue Reading

Të kërkuara