Organizatorët raportuan se rreth 100,000 njerëz morën pjesë në demonstratë, duke e quajtur atë protestën më të madhe të Holandës në dy dekada, ndërsa Izraeli njoftoi fillimin e një ofensive të re ushtarake izraelite – në luftën kundër grupit terrorist Hamas, sipas “Euronews”.

Dhjetëra mijëra protestues të veshur me të kuqe marshuan dje nëpër kryeqytetin holandez – duke kërkuar që qeveria e tyre të bëjë më shumë – për të ndaluar fushatën e Izraelit në Gazë, në atë që organizatorët e quajtën demonstrata më e madhe e vendit në dy dekada.

Grupet e të drejtave të njeriut dhe agjencitë e ndihmës – duke përfshirë “Amnesty International”, “Save the Children” dhe Mjekët pa Kufij – vlerësuan turmën në më shumë se 100,000 njerëz.

Protesta erdhi ndërsa Izraeli nisi fazën e parë të një ofensive të re në Rripin e Gazës – që synon pushtimin e zonave strategjike të enklavës.

Zyrtarët e lidhur me Hamasin, të cilët nuk bëjnë dallim midis civilëve dhe luftëtarëve, kanë raportuar mbi 100 persona të vrarë gjatë 24 orëve të fundit.

Haga është vendi i Gjykatës Ndërkombëtare të Drejtësisë dhe Gjykatës Ndërkombëtare Penale – të cilat kanë shqyrtuar raste në të cilat Izraeli dhe udhëheqësit e tij akuzohen për shkelje të ligjit ndërkombëtar, duke përfshirë edhe vrasjen e qëllimshme të popullsisë së Gazës – gjatë ofensivës kundër Hamasit.

Izraeli i ka mohuar akuzat, duke treguar përpjekjet e tij për të shmangur viktimat civile dhe, për pjesën më të madhe të luftës, për të lehtësuar rrjedhën e ndihmës në enklavë./rtsh

Brazili, eksportuesi më i madh i shpendëve në botë dhe eksportuesi kryesor i mishit të shpendëve në Bashkimin Evropian, e ka të ndaluar nga tani të dërgojë produkte shpendësh dhe mishi në BE, për shkak të shpërthimit të gripit të shpendëve, tha të hënën Komisioni Evropian.

Të premten, Brazili konfirmoi shpërthimin e gripit të shpendëve në një fermë shpendësh.

“Kushtet e importit në BE kërkojnë që vendi eksportues [Brazili] të mos jetë i prekur nga Gripi i Shpendëve me Patogjenitet të Lartë (HPAI)”, tha një zëdhënës i Komisionit Evropian.

“Autoritetet braziliane nuk mund të nënshkruajnë më certifikata të shëndetit të kafshëve për eksport në BE dhe këto certifikata nuk mund të lëshohen më. Asnjë produkt mishi apo shpendësh nuk mund të eksportohet në BE nga asnjë pjesë e territorit brazilian“, tha zëdhënësi.

Ministri i Bujqësisë i Brazilit, Carlos Favaro, tha të premten se, sipas protokolleve ekzistuese, vende si Kina, Bashkimi Evropian dhe Koreja e Jugut do ta ndalojnë importin e shpendëve nga Brazili për 60 ditë.

Por, Komisioni nuk dha asnjë afat kohor.

Komisioni Evropian theksoi se, për shkak të shpërthimit të gripit të shpendëve – i cili u zbulua në një fermë në shtetin Rio Grande do Sul – i gjithë territori i Brazilit ka pezulluar statusin zyrtar të të qenit “i paprekur nga Gripi i Shpendëve me Patogjenitet të Lartë”.

Kushtet e importit në BE kërkojnë që vendi eksportues të mos jetë i prekur nga HPAI.

BE-ja është një treg i vogël për Brazilin, i cili mbizotërohet nga Kina, Emiratet e Bashkuara Arabe, Japonia, Arabia Saudite dhe Afrika e Jugut.

Në vitin 2024, Brazili eksportoi më shumë se 5 milionë tonë mish shpendësh. Nga këto, afërsisht 4.4% shkuan drejt BE-së, sipas grupit kombëtar të mishit të derrit dhe shpendëve ABPA.

Nga totali i importeve të mishit të shpendëve në BE, Brazili është burimi kryesor, me rreth 32% vitin e kaluar, sipas të dhënave zyrtare të BE-së.

Megjithatë, vëllimi mbeti mjaft i ulët pasi pjesa më e madhe e konsumit të BE-së mbulohet nga prodhimi vendas./REL/

Britania e Madhe dhe Bashkimi Evropian përshëndetën sot kapitullin e ri në marrëdhëniet e tyre – pas nënshkrimit të marrëveshjeve të reja të bashkëpunimit në sektorin e mbrojtjes dhe lehtësimin e flukseve tregtare – në samitin e tyre të parë zyrtar që nga dalja e vendit nga unioni, “Brexit”, sipas AP.

Kryeministri Keir Starmer, i cili u takua për bisedime me presidenten e Komisionit Evropian Ursula von der Leyen dhe zyrtarët e tjerë të lartë të BE-së , në Londër – tha se marrëveshjet do të reduktonin burokracinë, do të rrisnin ekonominë britanike dhe do të rivendosin marrëdhëniet me bllokun tregtar prej 27 vendesh – që kur Britania e Madhe u largua nga BE-ja në vitin 2020.

“Britania e Madhe është rikthyer në skenën botërore. Kjo marrëveshje është një fitore për të dyja palët”, tha Starmer.

Von der Leyen i quajti bisedimet një “moment historik” – në dobi të të dyja palëve.

Gjithashtu, ajo tha se marrëveshja dërgon mesazhin – në një kohë trazirash globale – se Britania e Madhe dhe BE-ja janë partnerë natyrorë që qëndrojnë krah për krah në skenën globale.

Sipas marrëveshjeve, një partneritet i ri i mbrojtjes dhe sigurisë midis Britanisë së Madhe dhe BE-së do t’i lejojë BM-së të hyjë në një program kredie mbrojtëse të BE-së me vlerë 150 miliardë euro (170 miliardë dollarë).

Marrëveshje të tjera përfshijnë heqjen e disa kontrolleve ndaj produkteve shtazore dhe bimore për të lehtësuar tregtinë ushqimore përtej kufijve, dhe një zgjatje 12-vjeçare të një marrëveshjeje që lejon anijet e peshkimit të BE-së në ujërat e Britanisë së Madhe.

Ndërsa BE-ja është partneri më i madh tregtar i BM-së, Britania e Madhe ka regjistruar një rënie prej 21% të eksporteve – që nga “Brexit” për shkak të kontrolleve më të rrepta kufitare, dokumentacionit të mundimshëm dhe barrierave të tjera jo-tarifore.

Kufizimet e vizave pas Brexit-it kanë penguar gjithashtu aktivitetet ndërkufitare të profesionistëve, si bankierëve apo avokatëve, si dhe shkëmbimet kulturore, duke përfshirë grupet turistike dhe udhëtimet shkollore./atsh

Kryeministri i Izraelit, Benjamin Netanyahu, ka thënë të hënën se vendimin për ta lejuar rifillimin e dërgimit të ndihmave humanitare në Rripin e Gazës – pas një bllokade disajavore – e mori vetëm pasi aleatët i kishin bërë trysni.

Ai tregoi se aleatët i kishin thënë se nuk do ta mbështesnin Izraelin nëse ka nevojë ta fitojë luftën, në qoftë se vazhdojnë të shohin “pamje të urisë” duke ardhur nga toka palestineze.

Izraeli është dënuar nga agjencitë humanitare të OKB-së dhe nga disa aleatë evropianë, pasi ka ndaluar futjen e mallrave në enklavën e rrënuar nga lufta, përfshirë ushqimin, karburantin dhe barnat.

Izraeli njoftoi të dielën do ta lejohej një sasi “themelore” ndihmash humanitare të hyjnë në Gazë për të parandaluar zhvillimin e “një krize urie”.

Ekspertët e ushqimit kanë paralajmëruar tashmë se bllokada po rrezikonte të shkaktonte uri në Gazë, një territor me rreth 2 milionë banorë.

Gjatë administratës Trump, Shtetet e Bashkuara – aleati kryesor i Izraelit – zakonisht i kanë shmangur kritikat e hapura ndaj Izraelit në luftën e tij kundër Hamasit dhe fajësojnë këtë grup militant për krizën humanitare.

Hamasi është i shpallur organizatë terroriste nga SHBA-ja dhe Bashkimi Evropian.

Megjithatë, SHB-ja e ka theksuar gjithnjë e më shumë krizën në Gazë. Presidenti amerikan, Donald Trump, gjatë një vizite të fundit në Lindjen e Mesme – vizitë që nuk përfshiu ndalesë në Izrael – shprehu shqetësim për situatën humanitare në Gazë.

Njëlloj veproi edhe sekretari amerikan i Shtetit, Marco Rubio, i cili gjatë një vizite në Turqi tha se ishte “i shqetësuar” për këtë situatë.

Vendimi për të lejuar ndihmat vjen në një kohë kur Izraeli po e përshkallëzon luftën e tij në Rripin e Gazës, duke thënë se po e bën këtë për të ushtruar trysni mbi Hamasin që ta pranojë një marrëveshje armëpushimi sipas kushteve të Izraelit.

Nën ofensivën e re nga ajri dhe toka, Izraeli planifikon t’i zhvendosë qindra mijëra palestinezë dhe të sigurojë shpërndarjen e ndihmave brenda territorit.

Netanyahu tha të hënën se plani do të përfshijë “marrjen nën kontroll të gjithë Gazës”, dhe një zëdhënës ushtarak urdhëroi evakuimin e qytetit të dytë më të madh të Gazës, Han Junis.

Ushtria izraelite e rifilloi ofensivën në mars, duke e prishur armëpushimin që kishte mundësuar lirimin e më shumë se 30 pengjeve.

Lufta në Gazë filloi kur militantë të udhëhequr nga Hamasi sulmuan Izraelin jugor, duke vrarë 1.200 njerëz dhe duke marrë rreth 250 pengje. Izraeli thotë se 59 pengje mbeten në Gaza, megjithëse besohet se rreth 35 prej tyre janë të vdekur.

Lufta e Izraelit i ka vrarë më shumë se 52.000 njerëz në Gazë, shumë prej tyre gra dhe fëmijë, sipas zyrtarëve shëndetësorë palestinezë./REL/