Njëzet e pesë euro – kjo është gjoba që aktivisti opozitar dhe mësuesi pagoi, pasi “pa leje” e kishte mbuluar grafitin “Kur ushtria të kthehet në Kosovë” që ndodhet në oborrin e një shkolle fillore në juglindje të Serbisë, ku ai është i punësuar.

Partia në pushtet në Serbi, Partia Progresive Serbe (SNS), e dënoi këtë veprim dhe i cilësoi aktivistët e Frontit të Gjelbër të Majtë (ZLF) nga Nishi, të cilët morën pjesë në largimin e grafitit, si “auto-shovinistë”.

Slogani nacionalist “Kur ushtria të kthehet në Kosovë” është shkruar në mbarë Serbinë, ndërsa aktivistët e shoqërisë civile i kanë larguar këto slogane edhe në vitet paraprake, duke argumentuar se një mesazh i tillë përhap jotolerancë dhe nxit konflikte.

Ushtria dhe policia serbe u tërhoqën nga Kosova në verën e vitit 1999, pas ndërhyrjes së NATO-s, e cila u ndërmor për shkak të krimeve të luftës që forcat serbe kishin kryer ndaj civilëve shqiptarë gjatë luftës.

Kallëzim anonim

“Ky grafit bën thirrje për luftë dhe konflikte. Ky mesazh na kthen në vitet ’90, në një kohë kur Serbia po humbte jetë të reja dhe territore”, thotë për Radion Evropa e Lirë (REL) Dejan Petroviq, 54 vjeç, mësues në shkollën e Nishit “Uçitel Tasa”.

Petroviq shton se grafiti në fjalë është shkruar në oborrin e shkollës disa vite më parë dhe se ai, në disa raste, i ka sugjeruar drejtoreshës së shkollës se një mesazh i tillë nuk është i përshtatshëm dhe duhet të hiqet, por autoritetet përgjegjëse nuk kanë reaguar.

“Në një moment i thashë drejtoreshës se, nëse ajo nuk është në gjendje të gjejë një mënyrë për ta bërë këtë, unë do ta bëja vetë me shpenzimet e mia. Ajo nuk më ndaloi, por vetëm heshti. Unë e kuptova këtë si një shenjë miratimi”, thotë Petroviq.

Së bashku me kolegun e tij Rastisllav Diniq nga Fronti i Majtë i Gjelbër, të cilit i përket, Dejan Petroviq gjatë fundjavës që shkoi ai ngjyroi me ngjyrë të bardhë murin ku ishte shkruar grafiti.

Disa ditë më vonë, në shkollë erdhën punonjës komunalë të policisë dhe i thanë të shkonte në qendrën në Nishit të këtij shërbimi, ku do t’i dorëzohej një kallëzim penal.

“Mu thanë se personi që kishte dorëzuar kallëzimin ishte një qytetar anonim që kishte bërë denoncimin se unë kisha pikturuar pa miratimin e drejtoreshës”, shprehet ai.

Radio Evropa e Lirë ka tentuar të kontaktojë drejtoreshën e Shkollës Fillore “Uçitel Tasa”, Radmilla Kërstiq, por ajo nuk ishte e disponueshme për bisedë dhe nuk iu përgjigj as mesazheve SMS që iu dërguan.

Radio Evropa e Lirë i është drejtuar edhe policisë komunale të Nishit me pyetjen se sa kallëzime penale për të njëjtin veprim janë dorëzuar gjatë vitit 2025, si dhe nëse grafitet “Kur ushtria të kthehet në Kosovë” trajtohen si përhapje e urrejtjes, diskriminimi dhe thirrje për konflikte, por deri në publikimin e këtij teksti nga ky institucion nuk kanë kthyer përgjigje.

Për heqjen e grafiteve nga hapësirat publike përgjegjëse janë shërbimet komunale të pushtetit lokal në Serbi, ndërsa për fasadat e objekteve private përgjegjës janë pronarët e tyre.

Çfarë thonë nga partia në pushtet në Serbi?

Në Partinë Progresive Serbe kanë dënuar veprimin e aktivistëve nga Nishi, të Frontit të Majtë të Gjelbër.

Kreu i partisë në pushtet dhe ish-kryeministri Millosh Vuçeviq, tha se bëhet fjalë për një veprim “skandaloz” të njerëzve që “garojnë në auto-shovinizëm”.

“Urrejnë gjithçka që është serbe, urrejnë ushtrinë tonë dhe Kosovën dhe Metohinë”, tha Vuçeviq përmes një video-mesazhi të publikuar në X.

Policia serbe dhe ushtria jugosllave u tërhoqën nga Kosova në verën e vitit 1999 pas nënshkrimit të Marrëveshjes së Kumanovës, duke përfunduar kështu luftën dhe bombardimet e NATO-s mbi ish-Jugosllavinë.

Nëntë vjet më vonë, Kosova shpalli pavarësinë, të cilën Beogradi zyrtar nuk e njeh.

Para Gjykatës Ndërkombëtare në Hagë, për krime lufte ndaj shqiptarëve në Kosovë janë dënuar zyrtarë të lartë serbë.

A është shkelur Ligji për arsimin në Serbi?

Për rastin e heqjes së grafitit nga oborri i shkollës, është shprehur Komiteti i SNS-së në Nish që ka akuzuar Frontin e Majtë të Gjelbër se ka shkelur Ligjin mbi bazat e sistemit arsimor dhe edukativ, i cili ndalon veprimtarinë politike partiake në institucionet arsimore.

“I bëj thirrje organeve që të reagojnë ndaj këtij shkeljeje të ligjit, dhe po u bëj thirrje edhe organizatave të tyre punuese që të reagojnë, sepse është e papranueshme që mësuesit dhe punonjësit e arsimit të marrin pjesë në një veprim politik partiak”, ka theksuar kreu i grupit të këshilltarëve komunalë në Nish të SNS-së, Urosh Radulloviq.

Mësuesi Dejan Petroviq mohon se ka shkelur ligjin dhe thekson se SNS-ja po përpiqet të frikësojë të gjithë ata që mund të guxonin të bënin të njëjtën gjë.

“Ne ishim në oborrin e shkollës, por gjatë fundjavës, kur nuk kishte nxënës dhe nuk zhvillohej mësim. Bëmë diçka që është në dobi jo vetëm të fëmijëve, por të gjithë komunitetit shkollor”, thotë Petroviq.

“Projekti shtetëror”

Grafitet të titulluara “Kur ushtria të kthehet në Kosovë” shfaqën në mbarë Serbinë në fillim të vitit 2023. Mesazhin me simbole ushtarake, për disa ditë e shkruanin burra të panjohur në fasadat publike dhe private, si dhe në muret mbajtëse përgjatë autostradave.

Bëhet fjalë për një varg nga ripërpunimi i një kënge popullore serbe. Siç ka konstatuar antropologu Ivan Çoloviq, vargu “kur ushtria të kthehet në Kosovë” nuk ekziston në formën origjinale të këngës të cilës i referohen ata që e shkruajnë këtë slogan. Ai shfaqet për herë të parë në vitin 2011 në librin “Kosova është koka e Lazarit” të mitropolitit të Kishës Ortodokse Serbe, Amfilohij Radoviq.

Murale nuk janë të nënshkruara, por në një portal, i cili është paraqitur si portal jozyrtar informativ i tifozëve të Cervena Zvezdës, thuhet se ky varg është pikturuar në shumë vende në Beograd.

“Ky është një projekt shtetëror. Të tilla parulla mund të gjenden jo vetëm këtu në Nish, por edhe në qytete të tjera të Serbisë, në autostrada, në shumë vende publik”, vlerëson Dejan Petroviq.

Veprimet kundër aktivistëve

Për pikturimin e muraleve në ndërtesa banimi nevojitet miratimi i banorëve që jetojnë aty, dhe nëse objekti është i mbrojtur, kërkohet leja e Institutit për Mbrojtjen e Monumenteve Kulturore të Serbisë.

Aktivistë nga disa organizata të shoqërisë civile, përfshirë edhe shoqatën KROKODIL, në shkurt 2023 e mbuluan një nga këto murale në Sheshin Sllavia të Beogradit. Para se të përfundonin veprimin, në vendngjarje shkoi policia komunale, që shqiptoi gjoba për aktivistët.

Shumë shpejt, në të njëjtin vend u shfaq një mural me të njëjtin mesazh.

“Nëse guxoni të hiqni muralin ku shkruhet ‘Kur ushtria të kthehet në Kosovë’, i vendosur ilegalisht në një hapësirë publike, është e garantuar se do të ketë reagim nga autoritetet nëse ju kapin, dhe edhe nga një numër qytetarësh që reagojnë shumë agresivisht. Kur ai mural rikthehet, kjo ndodh në mes të ditës, para syve të policisë dhe kalimtarëve”, thotë Vlladimir Arsenijeviq nga shoqata KROKODIL për REL-in.

Gjykata për kundërvajtje në Beograd ka dhënë disa vendime lirimi për aktivistët kundër të cilëve policia komunale kishte nisur procedime për muralin në Sllavia. Në dy vendime të veçanta nga korriku dhe nëntori i vitit 2024, gjykata ka vlerësuar se nuk është provuar se të akuzuarit kanë kryer shkelje.

Vlladimir Arsenijeviq thotë se këto vendime duhet të shërbejnë si inkurajim jo vetëm për aktivistët, por për të gjithë qytetarët.

“Nëse një grafit i vendosur ilegalisht, me çdo përmbajtje, shfaqet në fasadën e një ndërtesë, qytetarët kanë jo vetëm të drejtën, por edhe detyrimin ta heqin. Kjo është ajo që përpiqemi t’ua transmetojmë qytetarëve – nuk ekziston ndonjë shërbim që do të vijë ta heqë. Këtë duhet ta bëjmë ne vetë”, thotë ai.

Përveç grafiteve që bëjnë thirrje për kthimin e ushtrisë në Kosovë, në hapësirën publike të Serbisë mund të shihen edhe murale që lartësojnë kriminelin e dënuar të luftës, Ratko Mlladiq.

Njëri nga më të njohurit u shfaq në rrugën Njegosheva në Beograd në fund të korrikut 2021, një muaj pas dënimit me burgim të përjetshëm të ish-komandantit të Ushtrisë së Republikës së Sërpska në Hagë për krime lufte gjatë luftës në Bosnje dhe Hercegovinë.

Mbrojtja e Rexhep Selimit ka përmbyllur deklaratat përmbyllëse në Gjykatën Speciale, ku avokati Geoffrey Roberts kërkoi pafajësinë e plotë të klientit të tij.

Gjatë fjalës së tij, Roberts argumentoi se Selimi nuk ka ushtruar asnjë përgjegjësi eprore apo autoritet komandues, duke hedhur poshtë pretendimet e Prokurorisë për kontroll efektiv mbi vartësit.

Sipas mbrojtjes, edhe pse Selimi ishte një anëtar i njohur i UÇK-së, ai nuk kishte strukturë komanduese nën vete dhe provat e paraqitura kundër tij janë kontradiktore, të pabesueshme dhe të pabazuara.

“Selimi nuk ka qenë komandant. Nuk ka ushtruar asnjë përgjegjësi eprore në asnjë mënyrë dhe asnjë formë. Këtu përfshihet edhe autoriteti i pretenduar se Selimi ka qenë anëtar i këtyre strukturave pavarësisht se ai që në fillim ka qenë një anëtar i njohur i UÇK-së”, tha Roberts.

Roberts theksoi se trupi gjykues do të vërtetojë pafajësinë e Selimit nëse i shikon provat në tërësi, veçanërisht sa i përket pretendimeve për pjesëmarrje në krime. Pas përfundimit të kësaj mbrojtjeje, gjykata ka shkuar në pushim për të vazhduar më pas me deklaratat përmbyllëse të mbrojtjes së Jakup Krasniqit.

Mbrojtja e Selimit kundërshton zinxhirin komandues të pretenduar

Ndërsa vazhdojnë fjalët përfundimtare të mbrojtjes së Selimit, Eric Tully ka kundërshtuar pretendimin e Prokurorisë për ekzistencën e një zinxhiri komandues të rregullt.

Ai insiston se provat dokumentare, si kartat apo autorizimet, janë thjesht letra që nuk dëshmojnë një marrëdhënie reale epror–vartës dhe as fuqi urdhëruese të Selimit mbi personat në terren.

Avokati vë në dukje si dështim të akuzës faktin që nuk është paraqitur asnjë dëshmitar i vetëm që të konfirmojë se ka marrë urdhra drejtpërdrejt nga Selimi apo t’i ketë raportuar atij, duke argumentuar se Prokuroria nuk ka arritur të krijojë një lidhje logjike mes këtyre dokumenteve dhe krimeve të pretenduara në aktakuzë.

“ZPS-ja flet në aktakuzë për autorizime dhe disa karta që janë pranuar si prova gjyqësore, por këto autorizime nuk janë as udhëzime e as urdhra për të vepruar. Ato nuk përcaktojnë marrëdhënie epror–vartës apo ndonjë marrëdhënie tjetër kontrolli nga Selimi apo persona të tjerë që i zotëronin këto dokumente. Trupi gjykues duhet të ketë parasysh se ZPS-ja nuk ka sjellë asnjë person të vetëm që dëshmon se e ka pasur këtë kartë, që do të shpjegonte funksionin dhe rëndësinë e saj, e jo më t’u përgjigjet pyetjeve të thjeshta si: ‘A keni marrë ndonjë urdhër nga z. Selimi?’ ose ‘A i keni raportuar atij?’. Gjithashtu, nga ZPS-ja nuk është vërtetuar lidhja mes këtyre kartave dhe krimeve të pretenduara”, tha avokati i Selimit.

Hagë: Mbrojtja e Rexhep Selimi vazhdon edhe sot me fjalët përfundimtare

Në Dhomat e Specializuara në Hagë, edhe sot po vazhdon paraqitjen e fjalëve përfundimtare për ish-deputetin e Kuvendit të Kosovës Rexhep Selimi.

Para trupit gjykues, avokati i tij, Eric Tully, ka nisur fjalën përmbyllëse duke kundërshtuar fuqishëm pretendimet e Zyrës së Prokurorit të Specializuar (ZPS).

“Dokumentet jokonsistente, kontradiktore, shpeshherë të palidhura të hedhura në poshtë shënime tregojnë dëshpërimin e ZPS-së. Ndihemi të detyruar të theksojmë që ZPS nuk ka bërë as minimumin e mundshëm për të vërtetuar organizimet komplekse që i ka përshkruar në aktakuzë, as nuk ka ofruar prova se organi gramat ishin të vërteta dhe as nuk ka bërë përpjekje të dëshmojë që Selimi ishte në krye të saj”, deklaroi Tully para gjykatës.

Mbrojtja pritet të vazhdojë edhe gjatë ditës me elaborimin e argumenteve të saj, në përpjekje për të rrëzuar akuzat që rëndojnë ndaj Selimit.

Kryeministri i Kosovës, Albin Kurti, ka udhëtuar drejt Gjermania për të marrë pjesë në edicionin e 62-të të Konferenca e Sigurisë në Mynih (MSC), që mbahet nga 13 deri më 15 shkurt në Mynih.

Sipas njoftimit të Zyrës së Kryeministrit, përveç pjesëmarrjes në aktivitetet e organizuara në kuadër të konferencës, Kurti do të zhvillojë edhe takime bilaterale në margjina të samitit.

Në këtë ngjarje pritet të marrë pjesë edhe shefi i Agjencisë Kosovare të Inteligjencës, Petrit Ajeti.

E ftuar në konferencë ka qenë edhe presidentja e Kosovës, Vjosa Osmani, por ajo e ka anuluar pjesëmarrjen për shkak të angazhimeve institucionale dhe prioriteteve që lidhen me zhvillimet brenda vendit.

Konferenca e 62-të e Sigurisë në Mynih pritet të mbledhë qindra liderë botërorë. Në fokus të diskutimeve do të jetë lufta e Rusisë në Ukrainë, e cila në fund të shkurtit hyn në vitin e pestë, si dhe tensionet që lidhen me Iranin.