Kryetari i Prishtinës, Përparim Rama tha të mërkurën se kryeqyteti e ka caktuar lokacionin për monumentin e komandantit legjendar, Adem Jashari. Sipas komunës, shtatorja do të vendoset në rrugën “Agim Ramadani”, në një hapësirë e cila do të shndërrohet në shesh dhe do të emërtohet “Adem Jashari”.

Rama shkroi në Facebook se familja Jashari e ka dhënë pëlqimin për lokacionin.

“Ky monument do të qëndrojë si dëshmi e përjetshme e lavdisë dhe heroizmit të tij”, shkroi Rama.

Komuna e Prishtinës të mërkurën përmes seancës solemne, kujtoi dhe nderoi sakrificën e familjes Jashari.

Aty, Rama ndau mirënjohje për familjen Jashari si simbol të sakrificës.

“Mirënjohja e dorëzuar familjes Jashari nuk është thjesht një simbol, por një zotim i Kryeqytetit se sakrifica e tyre do të mbetet përherë në themelin e shtetit tonë, në ndërgjegjen kombëtare dhe, mbi të gjitha, në zemrat tona”, tha Rama.

Në Kosovë ka nisur sot Epopeja e lavdishme e Ushtrisë Çlirimtare të Kosovës, e cila kulmon më 7 mars në atë që njihet si “Nata e Zjarreve”.

Kërkesa e Kosovës për të qenë mysafire speciale në Komitetin për Çështje Politike dhe Demokraci të Asamblesë Parlamentare të Këshillit të Evropës u hoq nga rendi i ditës të mërkurën, konfirmoi delegacioni i Kosovës pranë KiE-së.

Kjo kërkesë ishte në rendin e ditës së takimit të Komitetit, i cili po mbahet në Francë, përkatësisht në Paris.

Ariana Musliu Shoshi – pjesë e delegacionit të Kosovës ka shkruar se me kërkesë të kryetarit të Grupit të Partisë Popullore Evropiane, Pablo Hispan, u votua për shtyrjen e kësaj pike nga rendi i ditës.

Këtë shtyrje, Musliu Shoshi Musliu e cilësoi si “një zhvillim të papritur”.

“Në fillim të takimit, me kërkesë të kryetarit të Grupit të EPP, Pablo Hispán, u votua për shtyrjen e kësaj pike nga rendi i ditës, një zhvillim i papritur që nuk ishte paraparë as në grupet politike dhe as si mundësi. Kjo situatë tregon nevojën për mobilizim si shtet, në bashkëpunim me aleatët tanë, për të krijuar një strategji të qartë që do të sigurojë realizimin e prioriteteve dhe agjendave tona në arenën ndërkombëtare”, shkruan Shoshi Musliu në Facebook.

Më herët, për një gjë të tillë raportoi edhe kryetarja e Kuvendit të Serbisë, Ana Bërnabiq.

Gjatë seancës së Kuvendit të Serbisë, ajo tha se është njoftuar nga shefja e delegacionit serb në Asamblenë Parlamentare të Këshillit të Evropës, Bilana Pantiq, shkruan rel.

Këshilli i Evropës është organizatë lidere në mbrojtjen e të drejtave të njeriut. Anëtarësimi eventual do t’i ndihmonte Kosovës, mes tjerash, në fushën e sundimit të ligjit, dhe luftimin e korrupsionit.

Misioni i Kombeve të Bashkuara në Kosovë (UNMIK) organizoi aktivitete për të shënuar 25 vjetorin e Ditës Ndërkombëtare të Gruas. Duke ndjekur temën globale të këtij viti, “Për të gjitha gratë dhe vajzat: të drejta, barazi, fuqizim”, u zhvilluan aktivitete të ndryshme duke filluar me lojën Ragbi, ku morën pjesë shumë ekipe, për të vazhduar pastaj me mbjelljen e pemëve.

Aty morën pjesë shefja e misionit të UNMIK-ut, Caroline Ziadeh dhe ish-presidentja e Kosovës Atifete Jahjaga.

Aktivitetet u fokusuan në nxitjen e iniciativave që u japin grave dhe vajzave mundësi të barabarta dhe të drejtën për të qenë pjesë aktive e ndryshimeve shoqërore.

Shefja e misionit të UNMIK-ut, Caroline Ziadeh, tha se është një ditë shumë e veçantë sepse ky vit sipas saj lidhet me përvjetorin e 25-të të adoptimit të thirrjes së vendimit të Këshillit së Sigurisë. Ziadeh theksoi rëndësinë e këtij vendimi që është i bazuar në mbrojtjen e grave dhe vajzave që të sigurohet pjesëmarrja e barabartë dhe kuptimplotë në të gjitha hapësirat publike. 

“Ne po festojmë sot një ditë të grave shumë të veçantë, sepse ky vit lidhet me përvjetorin e 25-të të adoptimit e thirrjes së vendimit të Këshillit së Sigurisë, 1325. Thirrja e këtij vendimi është i bazuar në mbrojtjen e grave dhe vajzave që të sigurohet pjesëmarrja e barabartë dhe kuptimplotë në hapësira publike dhe jam shumë e nderuar që të kem këtu figurën udhëheqëse, Atifete Jahjaga, ish presidentja. Jashtë kemi dëgjuar se është një shembull frymëzues për të gjithë, ajo është një shembull frymëzues për dedikimin e saj për përparimin e agjendës të grave në paqe dhe sigurinë dhe fuqizimin ekonomik dhe ajo është çfarë ne bëjmë në KB”, tha ajo.

Pjesëmarrëse në këtë aktivitet ishte edhe ish presidentja e Kosovës Atifete Jahjaga, e cila tha se megjithëse kanë avancuar sa i përket të drejtave të vajzave dhe grave prapë ka shumë hapësirë pwr pwrmirwsime.

“Kosova dhe vendet e rajonit jemi një shoqëri patriarkale, kemi ecur përpara por ka shumë hapësirë që të përmirësohemi sidomos në fuqizimin e rolit të vajzave dhe grave në shoqërinë tonë, kemi ligje të avancuara por nuk jemi aq mirë në implementimin e tyre. Kemi përfaqësim të konsiderueshëm edhe në nivelin e institucioneve qendrore të institucioneve lokale. Këtë kuotën që e kemi parashikuar me ligj ne duhet ta bëjmë si një normë të përditshme në shoqërinë kosovare”, potencoi Jahjaga.

Ndërsa Visare Berisha, partnerja implementuese e UNMIK-ut në Kosovë tha se këto aktivitete planifikojnë që ti bëjnë edhe vitet e ardhshme. Berisha tha se i kemi kampionët gjinorë, që gjatë vitit të kaluar kanë demonstruar mbështetje të madhe në arritjet e barazisë gjinore.

“Ky është viti i dytë që e shënojmë ditën ndërkombëtare të grave në këtë mënyrë dhe planifikojmë të vazhdojmë edhe në vitet tjera. I kemi genders champions apo kampionët gjinorë, gjatë vitit që e lamë pas kanë demonstruar mbështetje të madhe në arritjen e barazisë gjinore, kontribut në zhvillimin e barazisë”, tha ajo.

Përmes këtij organizimi, UNMIK ripërsëriti përkushtimin e tij për të mbështetur fuqizimin e grave dhe vajzave në Kosovë, duke inkurajuar për një të ardhme ku të drejtat dhe mundësitë janë të barabarta për të gjithë.

Seanca gjyqësore ndaj të pandehurve Bedri Shabani dhe Muharrem Qerimit të dyshuar për spiunazh për Agjencinë Serbe të Sigurisë dhe Informacionit (BIA) është ndërprerë të mërkurën duke u shtyrë për 17 mars në ora 09:00.

Avokati i Bedri Shabanit, Besnik Berisha ka thënë se klienti i tij nuk mund të deklarohet në seancën e sotme, kjo për shkak siç tha ai nevojitet kohë të lexojë aktakuzën.

“Nuk jemi kundër të lexohet, por deklarimi i të akuzuarit është i pamundur për shkak se siç e konstatoi gjykata pak minuta para se ju të hyni në sallë atij i është dorëzuar një kopje e aktakuzës e cila përveç se është voluminoze kërkon analizë e sqarime edhe nga mbrojtja prej tij dhe anasjelltas. Kështu marrë parasysh të drejtën e tij para se të deklarohet të njofton për akuzat që rëndojnë dhe ta kuptojë secilën pretendent të ngritur ndaj tij. Kam frikë se sot nuk kemi kushte për të vijuar më tutje, sepse është e pamundur që brenda këtij afati të shkurtër akuza të lexohet e studiohet. Kisha një takim blic para se të hyjë këtu dhe ma konfirmoj që ka nevojë të marrë aktakuzën me vete, të lexojë dhe të takohet bashkë pasi ku të ketë mundësinë të lexojë, tek pastaj t’i jepet mundësia të deklarojë lidhur me fajësinë apo pafajësinë”, tha Berisha.

Me ç’rast kryetari i trupit gjykues, Rrahman Beqiri tha se duke qenë se i akuzuari ka të drejtë të njihet me aktakuzë, Gjykata nxjerr vendim me të cilin ndërpritet seanca e shqyrtimit fillestar dhe e radhës caktohet për 17 mars në ora 09:00.

“Duke qenë se i akuzuari ka te drejtë që të njihet me aktakuzën marrë parasysh propozimin e tij se nevojitet kohë të lexojë aktakuzën, gjykata nxjerr vendim se ndërpritet seanca e shqyrtimit fillestar, caktohet seanca e radhës për 17 mars ora 9:00 në këtë Gjykatë”, tha ai.

Derisa i akzuzuari tjetër, Muharrem Qerimi deklaroi se e ka kuptuar aktakuzën.

“E kam kuptuar aktakuzën plotësisht dhe s’kam asgjë të paqartë”, tha Qerimi.

Ndërkaq, prokurori, Bekim Kodraliu ka thënë se aktakuza është vuluminoze dhe kanë shumë prova, derisa konsideroi se ka qenë kohë e mjaftueshme për lexim të aktakuzës, që të akuzuarit të deklarohen rreth fajësisë sot.

Megjithatë, u pajtua se mund t’i jepet të akuzuarve kohë që të lexojnë aktakuzën dhe më pas të deklarohen.

Kujtojmë se, Prokuroria Speciale e Republikës së Kosovës (PSRK) më 19 shkurt 2025 ka ngritur aktakuzë ndaj Bedri Shabanit dhe Muharrem Qerimit, për vepren penale “Spiunazh”.

Të njëjtit dyshohen se i kanë dhënë informacione Shërbimit Sekret Serb (BIA), mbi Ushtrinë Çlirimtare të Kosovës (UÇK), masakrat në Kosovë, Agjencinë Kosovare të Inteligjencës, Policinë e Kosovës e Inspektoratin Policor të Kosovës.

Në viti 2024 janë arrestuar dy persona, Bedri Shabani dhe Muharrem Qerimi, të cilët dyshohet se kanë bashkëpunuar me BIA-n serbe. Arrestimi i tyre ishte bërë i mundur pas zbulimit nga Agjencia Kosovare e Inteligjencës (AKI).