Lajmet

Kosova dhe Japonia mbajnë konsultime politike

Aty janë diskutuar mundësitë e thellimit të bashkëpunimit në fushën e ekonomisë, kulturës, arsimit dhe sigurisë.

Published

3 years ago

July 25, 2023

UBT news

Zëvendësministri i Punëve të Jashtme dhe Diasporës i Republikës së Kosovës, Kreshnik Ahmeti, dhe Ambasadori Nakamura Kimitake, i Ngarkuar për Çështje të Ballkanin Perëndimor dhe Zëvendës Ndihmës Ministër, këtë të martë kanë udhëhequr konsultimet politike që u mbajtën në Tokio, midis delegacioneve të Ministrive të Punëve të Jashtme të të dyja vendeve.

Duke vlerësuar lartë bashkëpunimin në mes të dy shteteve, zëvendësministri Ahmeti ka falënderuar Japoninë për përkrahjen dhe kontributin e vazhdueshëm për Republikën e Kosovës.

Sipas një komunikate të ministrisë, në këto konsultime politike janë diskutuar mundësitë e thellimit të bashkëpunimit në fushën e ekonomisë, kulturës, arsimit dhe sigurisë. Gjithashtu, u prezantuan edhe mundësitë dhe kushtet e favorshme që ofron Kosova për të tërhequr investimet japoneze në vendin tonë.

“Temë e veçantë e diskutimit ishte edhe agresioni i paprovokuar i Federatës ruse mbi shtetin e Ukrainës dhe rëndësinë e vendosjes së sanksioneve kundër saj. Këtu u vlerësua lartë se të dyja shtetet ndajnë qëndrime të njëjta në dënimin dhe sanksionimin e këtij agresioni. Tutje, të dyja palët vlerësuan se Kosova dhe Japonia ndajnë të njëjtat vlera të përbashkëta të respektimit të demokracisë, sundimit të ligjit dhe respektimit të të drejtave dhe lirive të njeriut”, thuhet në komunikatë.

Në rrafshin e bashkëpunimit multilateral, zëvendësministri Ahmeti njoftoi palën japoneze për planet e Republikës së Kosovës për anëtarësim në organizata ndërkombëtare dhe nevojën për përkrahje nga Japonia që ka Kosova në këto procese.

Ambasadori Nakamura, duke falënderuar zëvendësministrin Ahmeti për vizitën e tij, u shpreh se beson që bashkëpunimi i afër dhe thellimi i këmbimeve në mes të dy shteteve vetëm sa do të rritet.

Gjatë kësaj vizite pune në Tokio, zëvendësministri Ahmeti, në takime të ndara do të takohet edhe me homologen e tij, zëvendësministren për punë të jashtme të Japonisë, Yoshikawa Yummi dhe zëvendësministrin e mjedisit, Kunisada Isato, i cili ka qenë edhe kryetar i qytetit të Sanjos.

Në agjendën e takimeve të zëvendësministrit Ahmeti janë paraparë edhe takime të ndara me presidentin e grupit të miqësisë parlamentare Kosovë – Japoni, deputetin Ryu Shionoya, zëvendës presidentin e JICA-së, Naoki Ando dhe një takim me bashkatdhetarët tanë që jetojnë dhe veprojnë në Japoni.

Lajmet

Dy persona dyshohet se sulmuan me thikë një burrë në Skenderaj

Published

53 minutes ago

September 21, 2026

UBT News

Në Skenderaj, më 20 shtator 2026, rreth orës 22:20, është raportuar një rast i cilësuar si vrasje në tentativë.

Sipas Policisë, një burrë kosovar është sulmuar fizikisht dhe me thikë nga dy të dyshuar, meshkuj kosovarë.

Viktima ka pranuar tretman mjekësor.

Për rastin është njoftuar prokurori, ndërsa hetimet janë duke vazhduar./A.K/

Lajmet

FSK e dyta në garën ushtarake në ShBA, shkëlqen ushtaraku Ismail Ahmeti

Published

1 hour ago

September 21, 2026

UBTNews

Tre pjesëtarë të Forcës së Sigurisë së Kosovës (FSK) kanë përfaqësuar me sukses Kosovën në “Garën për Luftëtarin më të mirë” e cila u mbajt në Ajova të Shteteve të Bashkuara të Amerikës, me ftesë të Gardës Kombëtare të Ajovës.

Gjatë katër ditëve sa zgjati ky aktivitet, ushtarakët iu nënshtruan sfidave të ndryshme me karakter ushtarak, të cilat vunë në provë të fortë përgatitjen e tyre fizike e mendore, aftësitë taktike si dhe qëndrueshmërinë.

Sukses të veçantë në këtë garë shënoi pjesëtari i FSK-së, OR3 Ismail Ahmeti, i cili arriti të renditet në mesin e finalistëve dhe të sigurojë vendin e dytë, duke dëshmuar nivel të lartë profesionalizmi.

Pjesëmarrja e pjesëtarëve të FSK-së në këtë garë vendimtare shërben si një mundësi e rëndësishme për shkëmbimin e përvojave, testimin e kapaciteteve profesionale, si dhe për forcimin e mëtejshëm të partneritetit strategjik ndërmjet FSK-së dhe Gardës Kombëtare të Ajovës. /E.A/

Lajmet

Kurti nderon në New York vëllezërit Bytyqi: “Koha nuk e zbeh krimin”

Published

1 hour ago

September 21, 2026

UBT News

Kryeministri i Kosovës, Albin Kurti, ka bërë homazhe në New York në kujtim të vëllezërve Ylli, Agron dhe Mehmet Bytyqi, të cilët i ka përshkruar si luftëtarë të lirisë nga Batalioni Atlantiku, qytetarë amerikanë dhe dëshmorë të kombit shqiptar.

Kurti ka bërë të ditur se në homazhe ishte së bashku me familjen Bytyqi, kryebashkiaken e Fairview City, Violetta Berisha, përfaqësues të Ligës Qytetare Shqiptaro-Amerikane, si dhe kolegë e bashkëpunëtorë.

“Vëllezërit Bytyqi, me veprat e tyre fisnike, përfaqësojnë vlerat më të larta të Ushtrisë Çlirimtare të Kosovës dhe të popullit tonë”, ka shkruar Kurti.

Ai ka theksuar se sakrifica e tyre, sipas tij, nderon edhe mërgatën shqiptare në Shtetet e Bashkuara, e cila i qëndroi pranë Kosovës gjatë periudhave më të vështira.

Kurti ka treguar se gjatë takimit, Ilir Bytyqi ka rrëfyer për burgosjen e tre vëllezërve të tij, transferimin, torturimin dhe vrasjen e tyre.

Sipas Kurtit, trupat e vëllezërve Bytyqi u gjetën më vonë në një varr masiv, ndërsa rasti mbetet një nga çështjet për të cilat, sipas tij, ende nuk është vendosur drejtësi.

“Kalimi i kohës nuk e zbeh krimin dhe as nuk e shuan detyrimin për përgjegjësi”, ka theksuar Kurti.

Ai ka thënë se Kosova do të vazhdojë, së bashku me Shtetet e Bashkuara, të kërkojë të vërtetën dhe drejtësinë për Yllin, Agronin dhe Mehmet Bytyqin.

Në fund, Kurti ka shprehur mirënjohje për Shtetet e Bashkuara dhe mërgatën shqiptare për mbështetjen e vazhdueshme ndaj Kosovës./A.K/