Lajmet

​Kodi i ri i Procedurës Penale përcakton suspendimin e zyrtarëve me aktakuza

Published

5 years ago

on

Ministri në detyrë i Drejtësisë, Selim Selimi ka prezantuar sot finalizimin dhe ndryshimet e draft-kodit të ri të procedurës penale, e të cilat pritet ta forcojë luftimin e korrupsionit dhe të lehtësojnë gjykimin në mungesë.

Selimi tha se sipas Kodit të ri të Procedurës Penale, çdo zyrtar i cili keqpërdorë detyrën zyrtare dhe ndaj të cilit ngritet aktakuzë, ai do të suspendohet menjëherë. Ai gjithashtu tha se harmonizimi i disa dispozitave ligjore do të krijojnë lehtësi në intervenimin e institucioneve për konfiskimin e pasurive të fituara me vepra penale.

“Çështja e parë ka të bëjë me luftën e korrupsionit, i kemi bërë dy intervenime shumë të rëndësishme. Për herë të parë kanë hyrë nenet që kanë të bëjnë me suspendimet e zyrtarëve të lartë që ndiqen për korrupsion dhe keqpërdorim të detyrës zyrtare. Me Kodin e Ri të Procedurës Penale, zyrtarët në kohën kur t’i ngritet aktakuza do të suspendohen menjëherë. Ky intervenim është i rëndësishëm pasi çdo herë kur dyshojmë se dikush është duke e vjedhur shtetin dhe po e keqpërdorë detyrën zyrtare për përfitime dhe favore. Një intervenim tjetër që ka të bëjë me këtë fushë është edhe çështja e konfiskimit të pasurisë së fituar me vepër penale. Pra, ne e kemi harmonizuar dispozitat e procedurës penale me ligjin e ri për kompetencat e zgjeruara për konfiskim të pasurës dhe tash e kemi më të fortë pjesën e intervenimit të institucioneve në konfiskimin e çdo pasurie që është marr me hajni, me korrupsion dhe vepër penale”, tha ai.

Sa i përket hetimeve dhe gjykimit në mungesë, Selimi tha se tashmë janë eliminuar pengesat për t’u gjykuar edhe në mungesa kriminelët që kanë kryer krime gjatë luftës në Kosovë.

“Kemi bërë edhe zhvillimin e këtyre dispozitave të cilat kanë të bëjnë me të gjithë ata kriminelë, të cilët ecin të lirë në Serbi dhe të cilët i dimë ne që kanë kryer krime të luftës, se tash do të ndiqen dhe do të gjykohen në mungesë. Këto dispozita kanë të bëjnë edhe me vepra tjera penale për persona që kanë kryer vepra penale. Por nga aspekti politik ka qenë e rëndësishme që të rregullohet dhe të forcohen përpjekjet tona për të gjykuar krimet e luftës. Ne kemi ende të bëjmë punë me shtim të kapaciteteve të Prokurorisë që merret me krimet e luftës dhe departamenti special, por këto nene do t’i hapin rrugë dhe do t’i largojnë pengesat që ka pasur deri më tash”, theksoi Selimi.

Selimi beson që përmes vettingut të kombinuar sistemi do të ishte më i qëndrueshëm dhe nuk do të mund të përdorej politikisht.

“Qëndrimi im është që të zgjidhet ajo e kombinuara, sepse mendoj që e kombinuara mund të na mundësojë që të kemi një sistem të qëndrueshëm të vettingut, të përhershëm dhe të qëndrueshëm. Ky është pozicioni im, vendimi merret pas konsultimeve, sepse nëse nuk konsultohemi, as nuk mund ta implementojmë”, tha ai.

E për kërkesat e të akuzuarve nga Specialja për ndihmë financiare ministri në detyrë i Drejtësisë, Selim Selimi tha se këto kërkesa janë të përfundim e sipër të shqyrtimit dhe aprovimit, dhe gjatë kësaj jave pritet të dalin informacione. Ai tha se nuk sheh ndonjë pengesë për aprovimin e këtyre kërkesave, pasi që ato janë bërë sipas ligjit dhe rregulloreve në fuqi.

“Jemi në përfundim të kërkesave të shqyrtimit dhe aprovimit të kërkesave. Mendoj që gjatë kësaj jave do të keni një informatë, por nuk e kemi hasur ndonjë pengesë në këtë aprovim. Pra, mendojmë që kërkesat kanë qenë të dorëzuara në bazë të ligjit dhe rregulloreve i plotësojnë kushtet e parapara me ligj dhe rregullore. Komisioni është mbledhur dhe i ka shqyrtuar, tash pres rekomandimin e komisionit dhe nuk shoh pengesa për aprovimin e tyre”, tha ai.

Në Kodin e ri të Procedurës Penale është punuar nga muaji korrik i vitit të kaluar. 

Related Topics:
Continue Reading

Aktualitet

UBT ofron 30 për qind bursë për të gjithë alumnit në programet master

Published

2 hours ago

on

August 12, 2025

By

UBT ka nisur një nismë të re për të mbështetur zhvillimin profesional të alumnëve të tij. Të gjithë të diplomuarit e UBT-së, tashmë mund të përfitojnë 30 për qind bursë për çdo program master që ofrohet në institucion.

Pse kjo është një mundësi e veçantë?

  • Thellim i njohurive në fusha të ndryshme profesionale
  • Përmirësim i aftësive për tregun e punës
  • Diplomë nga një institucion me standarde të larta dhe praktika bashkëkohore mësimdhënieje

Programet master në UBT janë të njohura për:

  • Cilësinë akademike
  • Fokusin në praktikë dhe aplikime reale
  • Përputhjen me kërkesat e tregut të punës
  • Mentorim nga profesorë dhe ekspertë me përvojë ndërkombëtare

Si të përfitoni?

Alumnit e interesuar mund të kontaktojnë Zyrën e Regjistrimit në UBT. Procesi i aplikimit është i thjeshtë, transparent dhe i shpejtë.

UBT vazhdon të qëndrojë pranë alumnëve të tij, duke investuar në suksesin e tyre afatgjatë. Bursa prej 30 për qind është një mundësi konkrete për t’i ndihmuar ata të zhvillojnë karrierën dhe të bëhen liderë në fushat e tyre./UBTNews

Continue Reading

Lajmet

​Kërcënoi një person duke i kërkuar 21 mijë euro, arrestohet për organizim të lojërave të fati

Published

2 hours ago

on

August 12, 2025

By

Drejtoria për Hetimin e Krimeve Ekonomike dhe Korrupsionit (DHKEK), përmes Njësisë Rajonale në Prizren, ka arrestuar një person nën dyshimin për përfshirje në veprat penale ‘organizimi i skemave piramidale dhe bixhozit të paligjshëm’ dhe ‘detyrimi’.

Rasti ka nisur më 11 gusht, pasi një ankues nga një fshat i Suharekës ka raportuar se po kërcënohet dhe detyrohet nga i dyshuari, gjithashtu nga një fshat i Suharekës.

Ankuesi ka deklaruar se para tri vitesh ka luajtur lojëra bixhozi në shumën rreth 9,000 euro, ndërsa tani i dyshuari i kërkon rreth 21,000 euro, duke ushtruar presion dhe kanosje të vazhdueshme për kthimin e borxhit.

Hetuesit dyshojnë se i dyshuari ka menaxhuar lojërat e fatit përmes adresave elektronike që operonin nga Zvicra dhe Kosova. Në kuadër të hetimeve, Policia ka sekuestruar një telefon për ekzaminim të mëtejshëm.

I dyshuari, identifikuar me inicialet A.L., lindur në vitin 1990 dhe shtetas kosovar, është intervistuar në prezencë të mbrojtësit dhe ndaj tij është iniciuar rasti penale me dyshimin për veprat ‘organizimi i skemave piramidale dhe bixhozit të paligjshëm’ dhe ‘detyrimi’.

Me aktvendim të prokurorit, i dyshuari është ndaluar për 48 orë.

Continue Reading

Lajmet

OSBE mirëpret rregulloren e re për ankesat zgjedhore: E forcon transparencën, buron nga rekomandimet e misionit të BE-së

Published

2 hours ago

on

August 12, 2025

By

Misioni i OSBE-së në Kosovë, përmes një postimi në rrjetet sociale, ka bërë të ditur se ka mirëpritur miratimin e rregullores së re për procedurat e paraqitjes dhe vendimmarrjes mbi ankesat nga Paneli Zgjedhor për Ankesa dhe Parashtresa (PZAP).

Nga OSBE është deklaruar se kur të zbatohet plotësisht rregullorja në fjalë, e njëjta do të forcojë transparencën dhe efektivitetin e të gjithë procesit zgjedhor.

‘‘Ky zhvillim buron nga rekomandimet e Misionit të Vëzhgimit të Zgjedhjeve të Bashkimit Evropian dhe ofron qartësi dhe koherencë të rëndësishme për aktorët kyç zgjedhorë’’, thuhet mes tjerash në postim.

Postimi:

Misioni i OSBE-së në Kosovë mirëpret miratimin e rregullores së re për procedurat e paraqitjes dhe vendimmarrjes mbi ankesat nga Paneli Zgjedhor për Ankesa dhe Parashtresa (PZAP).

Kjo rregullore e re, kur të zbatohet plotësisht, do të forcojë transparencën dhe efektivitetin e të gjithë procesit zgjedhor.

Ky zhvillim buron nga rekomandimet e Misionit të Vëzhgimit të Zgjedhjeve të Bashkimit Evropian dhe ofron qartësi dhe koherencë të rëndësishme për aktorët kyç zgjedhorë, përfshirë Komisionin Qendror të Zgjedhjeve, partitë politike, Komisionin e Pavarur për Media, Këshillin e Mediave të Shkruara dhe të tjerë.

Continue Reading

Lajmet

OEK do të vazhdojë betejën ligjore pas vendimit të Dhomës së Shkallës së Dytë të Gjykatës Komerciale

Published

3 hours ago

on

August 12, 2025

By

Oda Ekonomike e Kosovës ka pranuar me shqetësim që Dhoma e Shkallës së Dytë e Gjykatës Komerciale ka ndryshuar masën e sigurisë për shtyrjen e ekzekutimit të vendimit nr. 275/24, të datës 05.04.2024, dhe njoftimit të datës 12.03.2025 të nxjerrë nga ZRrE.

OEK, duke qenë institucion publik, nuk e komenton vendimin e Dhomës së Shkallës së Dytë të Gjykatës Komerciale, por njofton se do të vazhdojë betejën ligjore nëpërmjet mjeteve të tjera ligjore në dispozicion, brenda afateve të përcaktuara, dhe për këtë do të njoftojë me kohë të gjithë anëtarët e Odës Ekonomike të Kosovës.

Përkundër këtij vendimi, OEK kërkon nga Zyra e Rregullatorit për Energji që të mos marrë veprime të tjera që do t’i dëmtonin bizneset, të cilat tashmë janë dëmtuar nga vendimet e ZRrE-së që kanë shkuar në dëm të ekonomisë së vendit dhe kanë ndikuar në shtrenjtimin e jetesës së qytetarëve të Republikës së Kosovës.

Në ditët në vijim, ne do të konsultohemi me bizneset dhe do të shqyrtojmë hapat e tjerë që do të ndërmerren. Për këtë, do të njoftoheni me kohë.

Continue Reading

Të kërkuara