Futbollisti i Përfaqësueses së Irlandës, Dara O’Shea, ka thënë se skuadra e tij është e fokusuar plotësisht te ndeshja ndaj Kosovës, ndërsa çështjen e përballjes me Izraelin do ta diskutojnë pas sfidës në Prishtinë.

O’Shea ka theksuar se Irlanda e pret një ndeshje e rëndësishme ndaj Kosovës dhe se lojtarët janë përpjekur të qëndrojnë të përqendruar, duke shmangur sa më shumë zhurmën jashtë fushës.

“Padyshim që ka pasur shumë zhurmë këtë javë. Gjëja e mirë që kemi si lojtarë është se jemi menjëherë në një flluskë. Jemi përpjekur të qëndrojmë larg rrjeteve sociale sa më shumë që të jetë e mundur dhe të qëndrojmë të bashkuar. Kemi një ndeshje të madhe nesër dhe ky ka qenë fokusi ynë. Kosova ka qenë një skuadër e shkëlqyer dhe jemi të përgatitur për këtë”, ka deklaruar O’Shea.

Sa i përket ndeshjes ndaj Izraelit, ai ka bërë të ditur se futbollistët irlandezë do ta diskutojnë atë si grup pas përfundimit të duelit me Kosovën.

“Ne folëm që në fillim të javës se do të mblidhemi të premten dhe do ta diskutojmë këtë si grup. Nesër kemi një ndeshje për të cilën duhet të përqendrohemi. Sapo të mbarojë ndeshja dhe të vijë e premtja, të gjithë do të mblidhemi si një i vetëm dhe do ta diskutojmë”, u shpreh mbrojtësi irlandez.

D.L

Trajneri i Irlandës, në konferencën për media në Prishtinë, ka folur me respekt për sulmuesin e Kosovës, Vedat Muriqin.

Ai e ka cilësuar Muriqin si një lojtar shumë të fortë, duke theksuar përvojën e tij në nivele të larta të futbollit evropian.

“Muriqi është një lojtar shumë i fortë. Duhet të kemi shumë kujdes me të. Ai ka luajtur në ekipe shumë të forta dhe vazhdon të luajë në nivele të larta”, është shprehur trajneri irlandez.

Muriqi është një nga lojtarët kryesorë të Kosovës dhe ka lënë gjurmë edhe në La Liga, ku ka qenë ndër golashënuesit më të spikatur gjatë periudhës së tij në kampionatin spanjoll.

Trajneri i Irlandës foli gjithashtu me vlerësim për Përfaqësuesen e Kosovës, duke theksuar rritjen e shpejtë të saj në vitet e fundit.

“Kosova është një ekip shumë i mirë. Ka arritur të ngrihet shumë shpejt”, ka deklaruar ai.

D.L

Irlanda pritet të ketë mbështetjen e një numri të konsiderueshëm tifozësh në ndeshjen ndaj Kosovës, e cila zhvillohet nesër nga ora 20:45 në stadiumin “Fadil Vokrri” në Prishtinë.

Federata e Futbollit të Irlandës ka publikuar udhëzimet dhe informacionet e nevojshme për tifozët që do të udhëtojnë drejt Kosovës, duke përfshirë edhe disa këshilla për qëndrimin e tyre në Prishtinë.

Në njoftimin e saj, federata irlandeze e përshkruan Prishtinën si qytet përgjithësisht të sigurt dhe mikpritës për tifozët mysafirë, ndërsa u ka bërë thirrje atyre që të jenë të kujdesshëm me gjërat personale në zonat me shumë njerëz.

Vëmendje e veçantë u është kushtuar edhe flamujve.

“Flamuri i Kosovës dhe ai i vendit simotër, Shqipërisë, janë shumë të dukshëm në Prishtinë. Këshillohet të mos shfaqen flamuj të tjerë të rajonit, aktual apo nga e kaluara”, thuhet në udhëzimin e Federatës së Futbollit të Irlandës.

Ndeshja Kosovë–Irlandë pritet të zhvillohet para tribunave të mbushura, me stadiumin “Fadil Vokrri” që pritet të jetë në kapacitet të plotë për duelin e së enjtes mbrëma.

D.L

Donjeta Sadiku do të ngjitet sot në ring në Kampionatin Evropian të Boksit “Sofia 2026”, në një përballje vendimtare për sigurimin e medaljes.

Kampionia mesdhetare e Kosovës do të garojë në kategorinë deri në 60 kilogramë, ndërsa në çerekfinale do të përballet me boksieren holandeze Maund van der Toorn.

Dueli do të zhvillohet nga ora 13:30, në ringun “B”, në Sofje të Bullgarisë.

Një fitore ndaj holandezes do t’i siguronte Sadikut kualifikimin në gjysmëfinale dhe, njëkohësisht, medaljen në këtë Kampionat Evropian.

Selektorja e Kosovës, Marjola Sallauka, shpreson që Sadiku ta kalojë me sukses edhe këtë sfidë dhe të vazhdojë rrugëtimin drejt podiumit.

Kampionati Evropian i Boksit “Sofia 2026” po zhvillohet nga 15 deri më 26 shtator në Bullgari.

D.L