Në kuadër të Grupit 1, vëmendja kryesore është te dueli mes Italisë dhe Francës, që zhvillohet në orën 20:45 në stadiumin “San Siro”. Ndërkohë, Belgjika përballet me Turqinë nga ora 18:00.

Franca kryeson grupin me 10 pikë, tri më shumë se Italia, ndërsa Belgjika renditet e treta me gjashtë pikë. Turqia mban pozitën e fundit pa pikë të grumbulluara.

Francezët mund ta sigurojnë vendin e parë në grup dhe kualifikimin në çerekfinale me një fitore ndaj Italisë. Megjithatë, Franca do të kualifikohej edhe në rast barazimi, ose nëse Belgjika nuk arrin ta mposhtë Turqinë. Edhe Italia ka ende mundësi për të avancuar, por për këtë i nevojitet fitorja ndaj Francës dhe humbja e Belgjikës.

Interesante pritet të jetë edhe gara në Grupin 3, ku Anglia pret Kroacinë në “Wembley”. Në përballjen e parë mes tyre, anglezët kishin triumfuar me rezultat të thellë 7:0.

Anglia renditet e dyta me nëntë pikë, gjashtë më shumë se Kroacia, që zë pozitën e tretë. Në krye të grupit është Spanja me 12 pikë, e cila në këtë xhiro luan në udhëtim ndaj Çekisë, skuadër që ende nuk ka arritur të marrë pikë.

Të dyja ndeshjet e Grupit 3 zhvillohen nga ora 20:45.

Spanja tashmë e ka siguruar kualifikimin në çerekfinale, ndërsa Anglisë i mjafton të shmangë humbjen ndaj Kroacisë për të siguruar gjithashtu një vend në mesin e tetë skuadrave më të mira të garës.

D.L

Pas humbjes në ndeshjen e kaluar në kuadër të FIBA Europe Cup, Trepça synon të rikthehet te rezultatet pozitive, këtë herë në një përballje të vështirë në transfertë ndaj Promitheas Patras.

Skuadra mitrovicase udhëton drejt Patrës së Greqisë me synimin për të reaguar në parket dhe për të kërkuar fitoren e radhës në garat evropiane.

Tashmë mbetet të shihet nëse Trepça do të arrijë të përmbysë situatën dhe të rikthehet me rezultat pozitiv nga Greqia!

D.L

Përfaqësuesja U19 e Kosovës në futboll e ka nisur me humbje raundin e dytë kualifikues për Kampionatin Evropian Euro 2027, pasi u mposht nga Belgjika me rezultat 2:0.

Në ndeshjen e zhvilluar në Skoci, pjesa e parë përfundoi pa gola, mirëpo belgët zgjidhën sfidën me dy goditje të shpejta me të filluar pjesa e dytë. Naim Amengai realizoi për 1:0 në minutën e 47-të, ndërsa Jessie Da Silva dyfishoi epërsinë dy minuta më vonë.

Sfida e radhës për futbollistët e rinj të Kosovës në kuadër të Grupit A2 do të jetë të shtunën kundër nikoqires së turneut, Skocisë.

Në anën tjetër, edhe Përfaqësuesja U17 e Kosovës ka pësuar humbje në sfidën ndaj Bjellorusisë, ndërsa ndeshjen e ardhshme do ta zhvillojë më 17 nëntor përballë Kazakistanit. Tri ekipet e para të secilit grup do të sigurojnë kalimin në raundin e tretë, me shortin që pritet të tërhiqet më 10 dhjetor. /E.A/

Kombëtarja e Kosovës në futboll është përballur me ndryshime të papritura në repartin defensiv në prag të ndeshjeve ndaj Izraelit dhe Irlandës.

Mbrojtësi Lumbardh Dellova është larguar nga grumbullimi i “Dardanëve”, ndërsa përzgjedhësi Franco Foda ka ftuar në vend të tij Betim Fazlijin. Kjo mungesë e ndërlikon edhe më shumë situatën në prapavijë, meqë jashtë fushave vazhdon të jetë edhe Albian Hajdari për shkak të një lëndimi afatgjatë.

Në skemën e tij të zakonshme 3-4-3, tekniku gjerman do të duhet të rindërtojë treshen e mbrojtjes. Lajm pozitiv për skuadrën është rikthimi i Kreshnik Hajrizit pas lëndimit, i cili pritet të jetë nga minutat e para pranë Ilir Krasniqit dhe Ron Raçit. Si opsione të reja në dispozicion janë edhe dy debutuesit nga Zvicra dhe Suedia, Lindrit Kamberi e Bleon Kurtulus, si dhe Betim Fazliji i cili mbulon disa pozicione në mbrojtje e mesfushë.

“Është e rëndësishme të kemi disa mundësi, jo vetëm për ndeshjet e radhës, por edhe për të ardhmen. Është e rëndësishme ta kemi parasysh të ardhmen e Kombëtares dhe ta ruajmë cilësinë, në mënyrë që të përgatitemi edhe për kualifikimet e Kampionatit Evropian”, u shpreh përzgjedhësi Foda lidhur me zgjedhjet e reja në mbrojtje. /E.A/