Inteligjenca artificiale është përdorur për të identifikuar një antibiotik të ri që është i aftë për të vrarë një lloj bakteri përgjegjës për shumë infeksione rezistente ndaj ilaçeve.

Antibiotiku i ri u identifikua nga studiuesit në Institutin e Teknologjisë në Masaçusets dhe Universitetin McMaster nga një bibliotekë me gati 7 mijë përbërës të mundshëm të drogës.

Studiuesit përdorën një model të të mësuarit me makinë që kishin trajnuar për të vlerësuar nëse një përbërës kimik do të pengojë rritjen e acinetobacter baumannii.

Acinetobacter baumannii shpesh gjendet në spitale dhe mund të sjellë pneumoni, meningjit dhe sëmundje të tjera të rënda./UBTNews/

Shell do të përdorë teknologjinë e bazuar në Inteligjencë Artificiale nga firma analitike me të dhëna të mëdha SparkCognition në kërkimin dhe prodhimin e saj në thellësi të detit për të rritur prodhimin e naftës në det të hapur, njoftuan kompanitë të mërkurën.

Algoritmet e Inteligjencës Artificiale të SparkCognition do të përpunojnë dhe analizojnë sasi të mëdha të dhënash sizmike në kërkimin e rezervuarëve të rinj të naftës nga Shell, prodhuesi më i madh i naftës në Gjirin e Meksikës në Shtetet e Bashkuara të Amerikës.

“Ne jemi të përkushtuar të gjejmë mënyra të reja dhe inovative për të rikrijuar mënyrat tona të eksplorimit të punës”, tha në një deklaratë Gabriel Guerra, zëvendëspresident për inovacionin dhe performancën e Shell.

Qëllimi është të përmirësohet efikasiteti dhe shpejtësia operacionale, dhe të rritet prodhimi dhe suksesi në eksplorim. Procesi i ri mund të shkurtojë kërkimet në më pak se nëntë ditë nga nëntë muaj, thanë kompanitë./UBTNews/

Google po shtyn përpara planet për të sjellë veçoritë e Inteligjencës Artificiale në motorin e tij kryesor të kërkimit, pasiqë po punon për të mbajtur ritmin me një valë të mjeteve të reja të Inteligjencës Artificiale që mund të kërcënojnë dominimin e kompanisë në internet për herë të parë pas disa dekadash.

Kompania njoftoi javën e kaluar se do të prezantojë ndryshimet e reja të Google Search, i cili do të përdorë një chatbot të fuqizuar nga Inteligjenca Artificiale për t’iu përgjigjur pyetjeve që “nuk e kishit menduar kurrë se Search mund t’u përgjigjej” dhe për t’i ndihmuar përdoruesit t’i marrin informacionet që duan më shpejt se kurrë.

Falë këtij përditësimi, pamja dhe ndjesia e rezultateve të kërkimit në Google do të jenë dukshëm më ndryshme. Kur përdoruesit shkruajnë një pyetje në shiritin kryesor të kërkimit, atyre automatikisht do të ju shfaqet një dritare me përgjigjen e krijuar nga Inteligjenca Artificiale, krahas shfaqjes së rezultateve tradicionale.

Përditësimet u zbuluan në I/O, eventin vjetor të zhvilluesve të kompanisë, i cili u fokusua në një përzierje të Inteligjencës Artificiale dhe produkteve harduerike./UBTNews/

Derisa shqetësimet mbi rreziqet e mundshme që mund të vijnë nga inteligjenca artificiale (AI) po vazhdojnë të rriten, një artist i shquar ka ofruar një perspektivë të re duke thënë se makinat “nuk do të zëvendësojnë krijimtarinë njerëzore”.

“Si koncept, na lë shumë për të menduar për sa i përket mënyrës se si e përkufizojmë kreativitetin dhe matim kohën ose përpjekjen krijuese në epokën e AI”, tha Refik Anadol, një artist i mediave digjitale me origjinë turke, për Anadolu.

“Si mjet, edhe pse mund të ketë aplikime të dobishme profesionale, Inteligjenca Artificiale nuk do të zëvendësojë krijimtarinë njerëzore sepse, për mendimin tim, krijimtaria njerëzore ka një lidhje të fuqishme midis kujtesës dhe emocionit – diçka që AI-së do t’i mungojë gjithmonë”, shpjegoi ai.

“Unë mendoj se përparimet e fundit në teknologjitë e Inteligjencës Artificiale fillimisht mund të shihen si kërcënime serioze në botën e artit, por nuk mendoj se AI paraqet në mënyrë specifike rreziqe për të ardhmen e krijimtarisë”, shtoi ai.

Anadol përdor teknologjitë e fundit për të prodhuar instalime dhe skulptura. Këto teknologji përfshijnë inteligjencën artificiale, mësimin e makinerive dhe llogaritjen kuantike.

Më 5 maj, Anadol rikrijoi performancën e tij audio/vizuale “Living Architecture: Casa Batllo” në Barcelonë të Spanjës për të nderuar Antoni Gaudi, arkitektin katalanas që vdiq në vitin 1926.

Më shumë se 65 mijë njerëz përjetuan performancën në Barcelonë, ku ndodhet Caso Batllo.

AI ‘mundësi për të gjetur mënyra të reja për të bashkëpunuar me makinat’

Kur u pyet lidhur me letrën e hapur që u nënshkrua nga emra të njohur të teknologjisë, të cilët bënë thirrje për një pauzë gjashtëmujore të AI-së, duke përmendur “rreziqet e thella të teknologjisë së re për shoqërinë dhe njerëzimin”, Anadol pranoi se ekzistojnë rreziqe.

“Jam dakord me mendimin e shprehur në letër se ritmi i politikëbërjes në lidhje me AI duhet të përputhet me shpejtësinë e inovacionit në këtë fushë, por jam i mendimit se në vend që të ndalojmë Inteligjencës Artificiale, ndoshta mund të punojmë në forcimin e politikave, rregulloreve, dhe etikës rreth saj njëkohësisht”, tha ai./UBTNews/