Një studim i fundit ka treguar se njerëzit në Jugun Global janë më të kënaqur me balancën punë-jetë sesa ata në Bashkimin Evropian. Studimi, i realizuar nga Amrop, një lider global në konsulencë dhe kërkimin ekzekutiv, anketoi 8,000 individë në shtete si Gjermani, Francë, Poloni, Mbretëria e Bashkuar, SHBA, Kinë, Indi dhe Brazil. Përgjigjet e dhëna zbuluan dallime të dukshme mes vendeve të zhvilluara dhe atyre në zhvillim.

Rezultatet e studimit treguan se pjesëmarrësit nga vendet e Evropës Perëndimore, si Gjermania, Franca dhe Polonia, raportuan nivele kënaqësie më të ulëta për balancën punë-jetë, duke qenë nën 50%. Ndërkohë, ata nga India, një vend në Jugun Global, raportuan një kënaqësi shumë më të lartë prej 73.3%, ndërsa SHBA ishin me 59.9%.

Annika Farin, kryetarja globale e Amrop, shpjegoi për Euronews se ajo u befasua nga “mosgatishmëria e Evropës për të marrë më shumë role të rëndësishme, qoftë në biznes apo politikë”, duke shtuar se kjo duhet të jetë një thirrje për liderët evropianë. Ajo sugjeroi se shoqëritë evropiane do të duhet të përqafojnë ndryshimet që vijnë, siç është ndikimi i inteligjencës artificiale dhe ndryshimet demografike, si dalja në pension e brezit të Baby Boomers dhe hyrja e Gjeneratës Z në tregun e punës.

Në krahasim, 76% e të anketuarve nga India dhe 66% nga Brazili shprehin interes për role lidershipi, ndërsa në Gjermani dhe Francë ky numër është shumë më i ulët, përkatësisht 36% dhe 37%. Farin theksoi gjithashtu se kjo duhet parë si një mundësi për të rritur diversitetin dhe për të sjellë më shumë risi në lidhje me migracionin, pasi shumë vende evropiane do të përballen me nevojën për të pranuar individë nga vende të tjera.

Për më tepër, studimi tregon se për punëtorët globalë, një pagë e mirë dhe mundësitë për karrierë janë kryesore. Në këtë kuadër, SHBA është vlerësuar si destinacioni kryesor për mundësitë e punës, me 33% të preferencës globale, pasuar nga Gjermania dhe Kanada, me nga 22% secila.

Studimi gjithashtu thekson se pensionet janë një temë e nxehtë në Evropë, ku ka pasur protesta të mëdha, sidomos në Francë, ndërsa në Gjermani po diskutohen reformat për të zgjatur periudhën e punës për të moshuarit. Farin sugjeron se mund të krijohen inisiativa për të mbështetur ata që punojnë më gjatë, duke përfshirë uljen e taksave për pensionistët që qëndrojnë në punë dhe përmirësimin e marrëdhënieve ndërmjet brezave./UBTNews/

Ministria e Bujqësisë dhe Zhvillimit Rural së Shqipërisë, ka reaguar lidhur me debatin mediatik për situatën e cilësisë dhe sigurisë së mandarinave shqiptare duke theksuar se “për vitin 2024 janë eksportuar nga kultivimi dhe të vjelat e mandarinës shqiptare 924 kamionë në tregun europian e mbarë botëror, nga të cilët vetëm 3 ngarkesa prej totalit janë konstatuar me parregullsi për mbetje dhe janë asgjësuar”.

Reagimi i plotë zyrtar i Ministrisë së Bujqësisë dhe Zhvillimit Rural:

Ministria e Bujqësisë dhe Zhvillimit Rural nxit konsumin e produkteve shqiptare për festat e fundvitit dhe në vazhdim. Për vitin 2024 mbi 85% e prodhimit të mandarinave shqiptare është vjelë dhe është shitur në tregun e brendshëm dhe atë ndërkombëtar dhe në asnjë rast nga të gjitha kontrollet dhe analizat e kryera nuk kanë rezultuar me mbetje të pesticideve. Sot, kultivimi i mandarinave shtrihet në mbi 1,000 ha nga fermerë tregu dhe prodhues më të vegjël.

Në lidhje me debatin mediatik për situatën e cilësisë dhe sigurisë së mandarinave shqiptare në vijim të komunikimeve të mëparshme në deklaratat zyrtare të Ministrisë së Bujqësisë dhe Zhvillimit Rural, sqarojmë publikun se:

Për vitin 2024 janë eksportuar nga kultivimi dhe të vjelat e mandarinës shqiptare 924 kamionë në tregun europian e mbarë botëror, nga të cilët vetëm 3 ngarkesa prej totalit janë konstatuar me parregullsi për mbetje dhe janë asgjësuar. Ky raport nuk duhet të dëmtojë mundin dhe djersën e një viti prodhimi të fermerëve shqiptarë dhe në të njëjtën kohë të krijojë shqetësim dhe panik tek konsumatori.

Sipas njoftimit të Sistemit të Njoftimit të Shpejtë për Ushqim dhe Ushqim për Kafshë – RASFF për mbetje të pesticideve në mandarina të eksportuara nga Republika e Shqipërisë, AKU ka marrë masa të menjëhershme për gjurmueshmërinë dhe veprimet proceduriale mbi subjektet eksportues duke marrë masa dhe veprime konkrete për të asgjësuar 20.482 kg Mandarine clementine, në datën 19.12.2024, në Qarkun e Fierit, ngarkesë e cila është kthyer mbrapsht nga shteti i Kroacisë. Procedura e asgjësimit është kryer së bashku me praninë e Autoritetit Kombëtar të Mjedisit, Drejtorinë e Tatimeve, si dhe me praninë e disa mediave të ndryshme.

Në bashkëpunim me Autoritetin Kombëtar të Veterinarisë dhe Mbrojtjes së Bimëve, në datën 19.12.2024, u kryen inspektime dhe evidentime të përbashkëta në Fshatin Mursi të Bashkisë së Konispolit, ku ushtron aktivitet kultivues një nga fermerët, i cili kishte asgjësuar produktin mandarinë. Për subjektet grumbulluese të rezultuara në shkelje të dispozitave ligjore, përveç se është kryer kallëzim penal, sipas shkeljeve, janë marrë edhe masa administrative gjobë, si dhe bllokim aktiviteti. Për ndjekjen e situatës në vijim, çdo ditë janë kryer inspektime të përbashkëta në qarkun Berat, Bashkia Dimal.

Informojmë konsumatorin lidhur me dy ngarkesat e tjera, të raportuara nga shteti i Kroacisë për mbetje të pesticideve sipas njoftimit të sistemit RASFF, se njëra është asgjësuar në shtetin Kroat, ndërsa tjetra nuk është kthyer ende në vendin e origjinës. Janë njoftuar të gjitha PIK që në rast kthimi të produktit, të bëhet bllokimi i menjëhershëm i tij me destinacion asgjësimin.

Autoriteti Kombëtar i Ushqimit vijon kontrollet në subjektet që tregtojnë Produkte të Mbrojtjes së Bimëve dhe Produkte Plehëruese, ku vetëm për këtë javë janë kontrolluar dhe verifikuar 46 subjekte tregtuese të PMB-ve, në të cilat nuk u konstatuan shkelje të dispozitave ligjore. Vazhdojnë pa ndërprerje kontrollet në pikat e tregtimit, pikat e grumbullimit dhe magazinimit të fruta perimeve, ku përveç 18 mostrave të përcaktuara në planin e monitorimit të pesticideve për muajin Dhjetor, për produktin mandarinë, me qellim mbajtjen e situatës në kontroll, janë marrë edhe 7 mostra të tjera jashtë planit, për analizim në Laboratorin e Referencës – ISUV.

Inspektimi vjetor në territor nga AKU deri ditën e sotme kap shifrat 806 inspektime për tregtimin e pesticideve dhe 862 inspektime për produktet plehëruese. Për vitin 2024 janë analizuar 188 mostra gjithsej, nga këto për pesticide 28, nga të cilat 27 kanë rezultuar konform, kurse 1 është në proces analizimi. Për produkte plehëruese janë analizuar 160 mostra, nga të cilat 24 janë në proces analizimi, 134 kanë rezultuar konform dhe 2 mostra jo konform, për të cilat është ndjekur gjurmueshmëria dhe janë marrë të gjitha masat sipas legjislacionit në fuqi.

Ministria e Bujqësisë dhe Zhvillimit Rural ka të miratuar dhe në zbatim Planin e Veprimit për Përdorimin e Qëndrueshëm të Pesticideve, i cili përfshin të gjithë zinxhirin e veprimit me strukturat qëndrore dhe institucionet e vartësisë, pa përjashtuar mbështetjen e Universitetit Bujqësor të Tiranës, si dhe prodhuesve shqiptarë. Qëllimi i këtij Planit i Veprimit, është përdorimi i duhur dhe i sigurt i PMB-ve, për mbrojtjen e shëndetit të bimëve për të garantuar prodhim me cilësi dhe të sigurt për konsumatorin, si dhe mbrojtjen e mjedisit ku përdoren.

Falë punës së strukturave të Ministrisë së Bujqësisë dhe Zhvillimit Rural këtë vit territori i Republikës së Shqipërisë u mbrojt e u mbajt i pastër nga Sëmundja e Murtajës së Ruminantëve të Vegjël, edhe pse vendet kufitare patën shpërthime dhe dëme kolosale. Janë menaxhuar menjëherë në mënyrë efikase dhe pa e dëmtuar situatën epizootike në vend, rastet e shfaqjes së Influencës Aviare dhe Murtajës Afrikane të Derrave.

Ndërkohë që ka vijuar puna e vazhdueshme për ndërgjegjësim për prodhimin e produkteve biologjikisht të pastra me anë të luftës biologjike, e cila vjen edhe me një nxitje fiskale lehtësuese. Përdorimi strikt i protokolleve dhe ndalimi i përdorimit të pesticiteve të ndaluara edhe në vendet e Bashkimit Europian është fakt. Kërkohet që edhe ata pak fermerë që tentojnë në mënyrë të paligjshme përdorimin e tyre të kuptojnë se kjo mënyrë ka vetëm një mundësi: zbulimin dhe vënien përpara ligjit pasi kontrollet dhe gjurmueshmeria është shumë e lartë. Fermerët shqiptarë, prodhuesit, grumbulluesit dhe eksportuesit duhet të bashkëpunojnë për të zbatuar praktikat më të mira bujqësore në të gjithë zinxhirin e prodhimit, deri tek konsumatori.

Ministria e Bujqësisë dhe Zhvillimit Rural është transparente dhe ka të publikuar në faqen e saj zyrtare, listën e PMB-ve dhe etiketave të përdorimit, si dhe listën e produkteve plehëruese, të cilat përditësohen vazhdimisht duke i bërë të qartë fermerëve të mos përdorin produkte kontrabandë që janë të ndaluara në vendet e BE-së dhe në vendin tonë. Fermerët, çdo përdorues apo konsumator ka aksesin e mundëshëm për të marrë informacionin e plotë jo vetëm për përdorimin, por dhe pasojat nga keqpërorimi i tyre.

Iu bëjmë thirrje që për çdo rast paligjshmërie, parregullsie apo abuzimi që konstatojnë të njoftojnë në numrat e publikuar në faqet zyrtare të MBZHR apo institucioneve të varësisë, për tu bërë pjesë e përgjegjësisë së përbashkët në garantimin dhe ruajtje e sigurisë ushqimore në vend.

Mijëra studentë protestuan dje në qendër të Beogradit, duke kërkuar përgjegjësi për shembjen tragjike të strehës në stacionin e trenit të Novi Sadit, ku humbën jetën 15 persona dhe dy të tjerë mbetën të plagosur rëndë. Rrugët përreth sheshit ”Slavija” u bllokuan për orë të tëra, ndërsa turma e demonstruesve mbushi hapësirat publike, duke shprehur solidaritet me viktimat dhe duke kërkuar drejtësi për familjet e tyre. Protesta filloi me 15 minuta heshtje në nder të jetëve të humbura në këtë incident tragjik.

Pjesëmarrësit ndezën dritat e telefonave dhe i mbajtën lart, duke krijuar një atmosferë të fortë emocionale në mes të turmës. Studentëve iu bashkuan edhe grupe të tjera, përfshirë fermerë, aktorë dhe mësimdhënës, duke e kthyer protestën në një shfaqje të gjerë solidariteti shoqëror. Organizatorët e protestës kanë paraqitur disa kërkesa kryesore ndaj autoriteteve serbe: Identifikimi dhe ndjekja penale e përgjegjësve për dhunën ndaj demonstruesve gjatë protestave të mëparshme, lirimi i aktivistëve të ndaluar dhe anulimi i procedurave ligjore kundër tyre, dhe llogaridhënie nga zyrtarët përgjegjës për shembjen e strehës në stacionin e trenit.

Shembja e strehës ka shkaktuar një krizë politike në Serbi, duke rënduar pozitën e presidentit Aleksandar Vuçiq. Protestat kanë përfshirë më shumë se 50 fakultete akademike dhe katër universitete shtetërore, ndërsa studentët kanë bllokuar edhe shkolla të mesme në të gjithë vendin. Rinovimi i stacionit të trenit në Novi Sad, i cili u krye nga një konsorcium i katër kompanive kineze, ka ngritur pikëpyetje mbi sigurinë dhe cilësinë e punimeve.

Ndërsa Hekurudha e Serbisë mohon përgjegjësinë për strehen prej betoni, disa ekspertë teknikë e kundërshtojnë këtë pretendim. Prokuroria e Lartë Publike në Novi Sad ka arrestuar 11 persona, përfshirë ish-ministrin e Ndërtimit, Transportit dhe Infrastrukturës, Goran Vesiç, dhe ish-drejtoreshën e Infrastrukturës Hekurudhore, Jelena Tanaskoviç. Ata përballen me akuza për rrezikim të sigurisë publike dhe ndërtim të paligjshëm, që mund të çojnë deri në 12 vjet burgim.

Demonstratat në Beograd dhe qytete të tjera të Serbisë pritet të vazhdojnë, ndërsa studentët dhe qytetarët kërkojnë drejtësi për viktimat dhe një përgjigje të qartë nga qeveria për sigurinë publike. Kjo ngjarje është shndërruar në një simbol të protestës kundër përgjegjësisë së munguar institucionale dhe nevojës për transparencë në menaxhimin e projekteve publike./UBTNews/