Lajmet

​Fillon vendosja e stikersave në automjetet e regjistruara

Thuhet se kjo marrëveshje do të ndikojë edhe në rritjen e sigurisë në trafik.

Published

on

Prej sot ka filluar vendosja e stikersave në automjetet e regjistruara. Krejt kjo me synim që të ulet numri i automjeteve të paregjistruara.

Guvernatori i Bankës Qendrore (BQK), Fehmi Mehemti, zëvendësministri i Mjedisit, Planifikimit Hapësinor dhe Infrastrukturës, Hysen Durmishi si dhe Drejtori i Byrosë Kosovare të Sigurimit e kanë vlerësuar tejet të rëndësishme këtë marrëveshje, e cila sipas tyre do të ndikojë edhe në rritjen e sigurisë në trafik.

Zëvendësministri i MMPHI-së, Hysen Durmish tha kriteri kryesor është që të ulet kriteri i automjeteve të paregjistruara nën pragun prej 5%.

“Që nga sot fillon implementimi i projektit të vendosjes së stikersave nëpër të gjitha veturat, të cilat regjistrohen në Kosovë. Ky është një hap shumë i rëndësishëm, një hap shumë i madh me qëllimin e vetëm që përmes këtij projekti të ulim numrin e automjeteve të pa regjistruara në Kosovë, që është një pengesë jashtëzakonisht e madhe që ne më pastaj të anëtarësohemi në kartonin e gjelbërit dhe benifitet shumë të mëdha janë që i kemi prej saj në të ardhmën.. Ky stikers që nga sot, secili që e regjistron veturën e ta vendosë në makinën e tij është me kosto zero për të gjithë qytetarët. Kriteri kryesor është që të ulet kriteri i automjeteve të pa regjistruara nën pragun prej 5%, dhe ne mendojmë se me këtë projekt dhe me disa projekte tjera që i kemi, përmes disa pajisjeve digjitale që do te furnizohen policia e Kosovës, në mënyrë që t’i dediktojnë nga distanca automjetet e paregjistruara, do të mundësojmë që për një periudhë relativisht të shkurtër kohore ta ulim këtë numër të automjeteve të pa regjistruara nën pragun prej 5%”, tha ai.

Guvernatori i Bankës Qendrore i Republikës së Kosovës, Fehmi Mehmeti, tha se përves uljes së numrit të automjeteve ta paregjistruara, vendosja e stikersave do të ulë edhe aksidentet me fatalitet.

“Paraqet një hap në drejtim të asaj që të ulet % e automjeteve të pasiguruara në Kosovë[…]që në rend të parë na hapë rrugë që të fillojmë me negociata për anëtarësimin e Kosovës dhe Këshillin e Byrove dhe që më pastaj do te ketë edhe benifite të tjera, do të rritet buxheti dhe mbi të gjitha është në interes që të ulen aksidentet me fatalitet të cilat janë shkaktuar kryesisht prej automjeteve të pasiguruara”, tha ai.

Drejtori i BKS-së, Sami Mazreku, tha që vendosja e stikersave rrit edhe sigurinë në trafik, ndërsa kartoni i gjelbër e sheh si problem politik.

“Vendosja e stikersave sot e rrit sigurinë në trafik, e ndihmon Policinë e Kosovës që në mënyrë shumë të lehtë t’i identifikojë veturat të cilat janë pa regjistrim dhe pa sigurim[…]Anëtarësimi në kartonin e gjelbër është problem politik e që ka të bëjë me OKB-në, mirëpo si byro nuk jemi ndal të ajo, jemi duke bërë forma alternative që përmes kanaleve tjera, përmes një shteti mik të bëjmë zgjidhje sa i përket kartonit të gjelbër, mirëpo nuk kemi mundur më herët për arsye sepse nuk kemi bërë asnjë veprim konkret, se si t’i ulim këto vetura pa regjistrim dhe sigurim”, tha ai.

Lajmet

QKUK përfundon verifikimin e pronësisë, paralajmëron rrënimin e objekteve pa leje në oborr

Published

on

By

Qendra Klinike Universitare e Kosovës (QKUK) ka përfunduar verifikimin e pronësisë së oborrit të saj dhe ka paralajmëruar se së shpejti do të nisë lirimin e hapësirave të uzurpuara prej shumë vitesh, duke rrënuar objektet e ndërtuara pa leje.

Ky hap vjen pas punës së një komisioni të posaçëm të formuar në mars të këtij viti, i cili në bashkëpunim me Drejtorinë e Kadastrit të Komunës së Prishtinës, përmes ortofotove dhe planeve kadastrale, ka vërtetuar gjendjen pronësore. “Sipas të dhënave kadastrale, brenda oborrit të QKUK-së nuk figuron asnjë pronë private”, thuhet në njoftimin zyrtar të këtij institucioni.

Para marrjes së vendimit për ndërhyrje, institucioni u ka dërguar dy njoftime zyrtare shfrytëzuesve të lokaleve afariste dhe kioskave që veprojnë brenda këtij perimetri, duke kërkuar dëshmi mbi bazën ligjore të shfrytëzimit të hapësirave.

Megjithatë, nga QKUK-ja bëhet e ditur se asnjëri prej shfrytëzuesve nuk ka paraqitur certifikatë pronësie apo dëshmi se objekti është në proces legalizimi, ndërsa dokumentet e dorëzuara kanë rezultuar të jenë kontrata të skaduara dhe aktvendime të paregjistruara në kadastër.

Procesi i lirimit të këtyre hapësirave ka marrë mbështetje edhe në terren nga Inspektorati i Ministrisë së Mjedisit, Planifikimit Hapësinor dhe Infrastrukturës (MMPHI), i cili gjatë inspektimeve të ditëve të fundit i ka vërtetuar të njëjtat gjetje.

“Me konfirmimet kadastrale dhe rekomandimet zyrtare si nga Inspektorati Komunal, ashtu edhe nga ai i MMPHI-së, menaxhmenti i QKUK-së tashmë ka në dorë të gjitha instrumentet ligjore dhe do t’i përdorë për t’ua kthyer pacientëve e qytetarëve pronën publike”, ka theksuar ky institucion. /E.A/

Continue Reading

Lajmet

KEDS: Rikthehet energjia elektrike për rreth 80 për qind të konsumatorëve të prekur nga erërat e forta

Published

on

By

Kompania Kosovare për Distribuim me Energji Elektrike (KEDS) ka njoftuar se, përkundër erërave të fuqishme që shkaktuan dëmtime në rrjetin shpërndarës, furnizimi me energji elektrike është normalizuar për rreth 80 për qind të konsumatorëve të prekur brenda tri orëve të para pas qetësimit të motit.

Ndër zonat më të prekura nga moti i ligë kanë qenë Prishtina, Gjakova, Dragashi, Prizreni, Suhareka, Kamenica, Gjilani, Kaçaniku, Lipjani, Shtimja, Drenasi, Obiliqi, Fushë Kosova, Podujeva dhe Ferizaj.

Sipas KEDS-it, paralelisht me rikthimin e energjisë për shumicën e konsumatorëve, janë lokalizuar defektet në shtylla dhe përçues në pothuajse të gjitha pikat e rrjetit ku janë evidentuar dëmtime.

Ekipet në terren po vazhdojnë punën intensive për sanimin e plotë të problemeve dhe rikthimin e rregullt të furnizimit për të gjithë konsumatorët./E.A/

Continue Reading

Lajmet

Nga 18 vjet burgim për Ilir dhe Rrahim Abdullahun për vrasjen e policit Triumf Riza

Published

on

By

Gjykata Themelore në Prishtinë ka shpallur të premten aktgjykimin dënues ndaj Ilir dhe Rrahim Abdullahut, duke i dënuar me nga 18 vjet burgim secilin për vrasjen e zyrtarit policor, Triumf Riza. Kryetari i trupit gjykues, Avni Syla, bëri të ditur se gjykata i shpalli të akuzuarit fajtorë për kryerjen në bashkëkryerje të veprës penale “Vrasje e rëndë”, bazuar në aktakuzën e Prokurorisë Speciale.

Sipas vendimit të gjykatës, Ilir Abdullahut i është vazhduar masa e paraburgimit deri në plotfuqishmërinë e aktgjykimit, ndërsa e njëjta masë e paraburgimit i është caktuar edhe Rrahim Abdullahut. Gjatë seancës së shpalljes së vendimit, në sallë ishte i pranishëm vetëm i akuzuari Ilir Abdullahu i shoqëruar nga avokati i tij, Ramë Dreshaj, ndërsa Rrahim Abdullahu mungoi dhe u përfaqësua nga avokatja Agnesa Salihu. Në seancë mungoi po ashtu edhe prokurorja e rastit, Arbëresha Shala.

Zyrtari policor Triumf Riza u vra më 30 gusht të vitit 2007 në lagjen “Dardania” në Prishtinë. /Ekonomia Online/

Continue Reading

Lajmet

AKB: Nga 7.16 miliardë euro remitanca në pesë vjet e gjysmë

Published

on

By

Aleanca Kosovare e Bizneseve (AKB) ka shprehur shqetësimin për mënyrën se si po shfrytëzohet kapitali i diasporës në vend, duke vlerësuar se dërgesat e mërgimtarëve po mbeten kryesisht të orientuara drejt shpenzimeve të përditshme dhe sektorit të ndërtimit, në vend se të kanalizohen në zhvillimin e industrisë dhe prodhimit vendor.

Sipas një vlerësimi të kësaj organizate, gjatë periudhës nga viti 2021 deri në qershor të vitit 2026, Kosova ka pranuar gjithsej rreth 7.16 miliardë euro remitanca, prej të cilave rreth 80 për qind ose afro 5.73 miliardë euro janë shpenzuar në konsum, patundshmëri dhe ndërtim. Ndërkohë, vetëm 2 për qind e këtij kapitali, që përkthehet në rreth 143 milionë euro, është investuar në biznes, industri dhe prodhim, kurse 18 për qind e mbetur ka shkuar në destinime të tjera.

Të dhënat e prezantuara nga AKB-ja tregojnë një trend të vazhdueshëm të rritjes së dërgesave të diasporës ndër vite, duke filluar nga 1.15 miliardë euro në vitin 2021, 1.22 miliardë euro në vitin 2022, 1.33 miliardë euro në vitin 2023 dhe 1.35 miliardë euro në vitin 2024.

Kjo rritje ka vazhduar edhe në vitin 2025, kur remitancat arritën në 1.4 miliardë euro, ndërsa vetëm në gjashtëmujorin e parë të vitit 2026 në vend kanë hyrë rreth 690.7 milionë euro. Pavarësisht këtij potenciali të lartë financiar, AKB-ja vlerëson se këto mjete nuk po arrijnë të shndërrohen në motor të zhvillimit ekonomik përmes hapjes së fabrikave të reja apo rritjes së eksporteve.

Për ta ndryshuar këtë gjendje, AKB-ja i ka bërë thirrje Qeverisë së Kosovës që të hartojë një strategji të posaçme për orientimin e kapitalit të mërgatës drejt sektorëve prodhues, teknologjisë dhe eksportit.

Kryetari i kësaj organizate, Agim Shahini, ka kërkuar nga institucionet që të krijojnë një klimë më të favorshme investuese përmes garantimit të sigurisë juridike, ofrimit të lehtësirave fiskale dhe zbatimit të politikave konkrete mbështetëse, duke theksuar se vendi ka nevojë për investime që gjenerojnë fabrika dhe vende të reja pune, e jo vetëm mjete për konsum. /E.A/

 

 

 

Continue Reading

Të kërkuara