Arbitri nga Somalia, Omar Artan, i konsideruar si një nga gjyqtarët më të mirë në Afrikë, nuk është lejuar të hyjë në Shtetet e Bashkuara të Amerikës, duke humbur kështu mundësinë për të marrë pjesë në Kupën e Botës në futboll.

34-vjeçari kishte udhëtuar drejt Miamit me synimin për t’u bërë arbitri i parë nga Somalia që do të drejtonte ndeshje në një Botëror. Megjithatë, sipas raportimeve, autoritetet kufitare amerikane e ndaluan atë sapo mbërriti në aeroport.

Artan ka bërë të ditur se u mbajt për 11 orë në një dhomë të posaçme dhe më pas u kthye në Stamboll, nga ku kishte nisur udhëtimin drejt SHBA-së.

“Jam shumë, shumë i dëshpëruar. Kam pasur të gjitha dokumentet dhe vizën e nevojshme. Jam vetëm një gjyqtar futbolli që po përpiqet të realizojë ëndrrën e jetës së tij, të marrë pjesë në Kupën e Botës”, ka deklaruar ai për The New York Times.

Sipas Artanit, autoritetet amerikane nuk i dhanë ndonjë arsye të qartë për refuzimin e hyrjes në vend.

“Mendoj se kanë probleme me vendin tim”, është shprehur ai.

Ndërkohë, një zëdhënës i Department of Homeland Security ka konfirmuar se arbitri somalez u konsiderua “i papranueshëm për shkak të shqetësimeve në procesin e verifikimit” dhe për këtë arsye iu mohua hyrja në SHBA.

Edhe pse FIFA kishte garantuar se pjesëmarrësit e Botërorit do të mund të hynin në SHBA, organizata ka pranuar se nuk ka kompetenca për të ndërhyrë në vendimet e autoriteteve kufitare amerikane.

Sipas raportimeve të The Athletic, rasti i Artanit ka shkaktuar shqetësim dhe keqardhje te shumë prej kolegëve të tij arbitra. Shumë prej tyre kanë shprehur solidaritet me somalezin, i cili mund të mos ketë më një mundësi të tillë në karrierën e tij.

“The Athletic” vlerëson se gjasat janë të mëdha që ëndrra e Artanit për të gjykuar në një Kupë Bote të mbetet e parealizuar, duke e bërë këtë një nga historitë më të dhimbshme të futbollit ndërkombëtar në prag të turneut më të madh të sportit.

Përfaqësuesja e Kosovës në konkurrencën e femrave ka arritur një sukses historik, duke siguruar kualifikimin në “play-off”-in e Kupës së Botës 2027 dhe avancimin në Ligën B të UEFA-s.

“Dardanet” e përmbyllën në mënyrë të shkëlqyer fushatën në Grupin 2 të Ligës C, pasi mposhtën Gjibraltarin në transfertë me rezultat të thellë 8:0. Falë kësaj fitoreje bindëse, Kosova e mbylli grupin në vendin e parë, me pikë të barabarta me Kroacinë, por me goldallim më të mirë.

Ky rezultat i siguroi Kosovës ngjitjen në Ligën B për ciklin e ardhshëm kualifikues, si dhe një vend në “play-off”-in e kualifikimeve për Kupën e Botës 2027.

Arritja konsiderohet historike për futbollin e femrave në vend, pasi vjen si rezultat i punës, përkushtimit dhe paraqitjeve të shkëlqyera të ekipit gjatë gjithë ciklit kualifikues. Futbollistet kosovare dëshmuan karakter, disiplinë dhe shpirt gare, duke besuar deri në fund te objektivi i tyre.

Ky sukses përbën një tjetër dëshmi të progresit të vazhdueshëm të futbollit të femrave në Kosovë dhe një hap të rëndësishëm drejt ngritjes së mëtejme në arenën ndërkombëtare.

Merita të mëdha për këtë arritje kanë futbollistet dhe stafi teknik, i udhëhequr nga përzgjedhësi Sami Sermaxhaj, të cilët arritën ta udhëheqin ekipin drejt një kapitulli të ri në historinë e futbollit kosovar.

Kosova tani do të synojë të vazhdojë rrugëtimin e saj të suksesshëm në fazën “play-off”, me ëndrrën për të siguruar një vend në Kupën e Botës 2027.

D.L

Skuadra e Drenicës ka siguruar zyrtarisht titullin kampion të Superligës së Kosovës në futsal për sezonin 2025/26, duke kurorëzuar një sezon të jashtëzakonshëm me paraqitje të shkëlqyera dhe rezultate mbresëlënëse.

Titulli u vulos pas një fitoreje të madhe në kryeqytet, sukses që bëri që trofeu i kampionit të rikthehet në Skenderaj. Ky triumf përfaqëson shpërblimin e një pune të palodhshme dhe të një rrugëtimi të suksesshëm të skuadrës kuqezi gjatë gjithë sezonit.

Merita të veçanta në këtë arritje i takojnë presidentit të klubit, Haxhi Rreci, i cili me përkushtim, vizion dhe investime të vazhdueshme ka ndërtuar një ekip konkurrues dhe fitues. Nën drejtimin e tij, Drenica ka shfaqur organizim të lartë dhe stabilitet, duke u shndërruar në një nga skuadrat më të forta të futsalit kosovar.

Me këtë sukses, “Shqiponjat e Zeza” shkruajnë një kapitull të ri në historinë e klubit, duke dëshmuar forcën, ambicien dhe cilësinë e tyre në parket. Titulli i kampionit konfirmon Drenicën si skuadrën më të mirë të futsalit në Kosovë për sezonin 2025/26 dhe një prej projekteve më të suksesshme sportive të viteve të fundit.

D.L

Sulmuesi i Kosovës, Vedat Muriqi, është shumë pranë rikthimit te Fenerbahçe, pasi marrëveshja mes klubit turk dhe RCD Mallorca konsiderohet e përfunduar.

Lajmin e ka bërë të ditur gazetari i njohur i merkatos, Fabrizio Romano, i cili ka njoftuar se Fenerbahçe ka arritur marrëveshje me Mallorcan për transferimin e sulmuesit kosovar për shumën prej 15 milionë eurosh.

“Marrëveshja është arritur për 15 milionë euro me Mallorcan, pasi Muriqi ishte një nga objektivat kryesorë të presidentit të ri të klubit. Lojtari ka pranuar kushtet personale me Fenerbahçen dhe është gati t’i bashkohet skuadrës. Kanë mbetur vetëm disa procedura formale. Marrëveshja është e kryer”, ka shkruar Romano.

Për 32-vjeçarin, ky transferim shënon një rikthim në Stamboll, pasi ai kishte veshur fanellën e Fenerbahçes gjatë sezonit 2019/20, para se të transferohej te Lazio.

Muriqi vjen pas një sezoni të shkëlqyer në elitën e futbollit spanjoll. Në edicionin e kaluar të La Ligës ai realizoi 23 gola, duke u renditur si golashënuesi i dytë më i mirë i kampionatit, pas Kylian Mbappé, i cili shënoi 50 gola.

Megjithatë, pavarësisht paraqitjeve të tij mbresëlënëse, Mallorca nuk arriti të siguronte mbijetesën në La Liga dhe ra në kategorinë e dytë të futbollit spanjoll.

Rikthimi i Muriqit te Fenerbahçe pritet të zyrtarizohet së shpejti, pasi të përfundohen detajet e fundit administrative të transferimit.

D.L