Në kuadër të Global UBT Fest 2026, Fakulteti i Stomatologjisë në UBT zhvilloi aktivitetet e radhës të Akademisë Verore, duke mbledhur profesorë, profesionistë dhe studentë në një program të pasur me ligjërata shkencore, prezantime profesionale dhe diskutime mbi zhvillimet më të reja në fushën e stomatologjisë.

Programi u organizua në tri sesione shkencore, të moderuara nga stafi akademik i Fakultetit të Stomatologjisë, ku u trajtuan tema që pasqyrojnë risitë më të fundit në diagnostikim, trajtim dhe kujdesin oral. Ligjëratat u mbajtën nga profesorë dhe ekspertë të fushës, të cilët ndanë përvojat dhe njohuritë e tyre me pjesëmarrësit.

Ndër temat e trajtuara ishin strategjitë rigjeneruese në kirurgjinë moderne periodontale, ndikimi i sëmundjeve periodontale në shëndetin e përgjithshëm, materialet bashkëkohore në protetikë, përdorimi i realitetit virtual në uljen e frikës nga trajtimet dentare, menaxhimi kirurgjikal i cisteve radikulare, roli i teknologjive diagnostikuese si CBCT dhe MRI në diagnostikimin e tumoreve orale, trajtimi i odontomave dhe palatoshizave, si dhe përdorimi i materialeve moderne në endodonci dhe rëndësia e ushqimit në parandalimin e kariesit te fëmijët.

Një pjesë e rëndësishme e programit iu kushtua edhe prezantimeve të studentëve të programeve Stomatologji dhe Teknik Dentar, të cilët prezantuan punime shkencore dhe studime të përgatitura në bashkëpunim me mentorët e tyre, duke dëshmuar nivel të lartë profesional, hulumtues dhe prezantues.

Në përmbyllje të aktivitetit u organizua ceremonia e ndarjes së çmimeve për prezantimet më të mira studentore.

Çmimi i Parë iu nda:

• Asja Salihu;
• Shpresa Mustafa dhe Gjeraqina Jusaj;
• Erleta Bytyqi dhe Luan Maliqi.

Çmimi i Dytë iu nda:

• Diar Kolshi dhe Luan Maliqi;
• Erblina Shabani;
• Ornela Lezi.

Çmimi i Tretë iu nda:

• Artiola Fazliu, Valëza Rukovci dhe Besmira Fazlija;
• Lis Ameti.

Akademia Verore e Fakultetit të Stomatologjisë në UBT vazhdon të shërbejë si një platformë e rëndësishme për shkëmbimin e njohurive, prezantimin e praktikave bashkëkohore dhe nxitjen e hulumtimit shkencor, duke kontribuar në përgatitjen e profesionistëve të ardhshëm të stomatologjisë sipas standardeve më të larta akademike dhe profesionale.

Një ditë pasi Komisioni Qendror i Zgjedhjeve (KQZ) bëri certifikimin e rezultateve përfundimtare të zgjedhjeve parlamentare të 7 qershorit, këtë të enjte ka filluar të rrjedhë zyrtarisht afati kushtetues për konstituimin e përbërjes së re të Kuvendit të Kosovës.

Sipas rregullave të përcaktuara me Kushtetutë, legjislatura e re e dalë nga votat e qytetarëve duhet të konstituohet brenda një afati prej 30 ditësh, që nënkupton se afati i fundit është data 9 gusht.

Me nisjen zyrtare të këtij procesi, kryeministri në detyrë, Albin Kurti, ka lëvizur menjëherë duke u dërguar ftesa zyrtare për takim krerëve të tri partive kryesore opozitare në vend: Partisë Demokratike të Kosovës (PDK), Lidhjes Demokratike të Kosovës (LDK) dhe Aleancës për Ardhmërinë e Kosovës (AAK).

Lajmi rreth këtyre ftesave është konfirmuar ekskluzivisht për RTV Dukagjini nga zëdhënësi i Qeverisë në detyrë, Arlind Manxhuka.

“Po, sot në mëngjes kryeministri Kurti ka dërguar letër për takim kryetarëve të Partisë Demokratike të Kosovës, Lidhjes Demokratike të Kosovës dhe Aleancës”, ka thënë Manxhuka për Dukagjinin.

Ky hap shënon fillimin e konsultimeve politike, pasi menjëherë pas konstituimit të Kuvendit, pritet të nisin procedurat e rregullta kushtetuese për formimin e Qeverisë së re, e pasuar më tej edhe nga procesi i zgjedhjes së Presidentit të ri të Republikës së Kosovës. /Dukagjini/ /E.A/

Dita e tretë e Akademisë Verore të Fakultetit Media dhe Komunikim u zhvillua në bashkëpunim me Universitetin “Aleksandër Xhuvani” të Elbasanit, duke mbledhur online rreth 100 mësues nga diaspora. Profesorët e UBT-së trajtuan tema bashkëkohore mbi podkastet edukative, videon edukative, storytelling-un digjital dhe digjitalizimin e tregimeve popullore.

Në kuadër të bashkëpunimit me Universitetin “Aleksandër Xhuvani” të Elbasanit, dita e tretë e Akademisë Verore të Fakultetit Media dhe Komunikim në UBT u zhvillua me pjesëmarrjen online rreth 100 mësuesve nga diaspora.

Në kuadër të programit, Prof. Dr. Safet Zejnullahu dhe Prof. Ass. Driton Hyseni prezantuan temën “Krijimi i podkasteve edukative”, duke trajtuar rëndësinë e podkasteve si një mjet inovativ në mësimdhënie dhe komunikim. Gjithashtu, Prof. Ass. Driton Hyseni realizoi një demonstrim praktik mbi procesin e krijimit të një podkasti, nga planifikimi deri te realizimi teknik.

Prof. Ass. Edona Sulejmani prezantoi ligjëratën “Video edukative dhe storytelling digjital”, ku shpalosi mënyrat se si videot edukative dhe rrëfimi digjital mund të përdoren për të krijuar përmbajtje më interaktive dhe efektive në procesin mësimor.

Në pjesën e tretë të aktiviteteve, Prof. Dr. Xhevahire Millaku prezantoi temën “Digjitalizimi i tregimeve popullore”, duke theksuar rëndësinë e ruajtjes dhe promovimit të trashëgimisë kulturore përmes teknologjisë dhe transformimit të saj në përmbajtje digjitale.

Pjesëmarrësit nga diaspora ndoqën me interes ligjëratat dhe u angazhuan në diskutime me profesorët, duke shkëmbyer përvoja dhe ide mbi përdorimin e mjeteve digjitale në edukim.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Tetova

9 korrik 1993

Në Prishtinë policia serbe pengoi mbajtjen e provimeve pranuese në Fakultetin Filologjik

Sot paradite, policia serbe ndaloi mbajtjen e provimeve pranuese në Fakultetin Filologjik të Prishtinës. Policia ishte kërcënuar se nuk do të lejonte mbajtjen e provimeve në lokalet e shkollës fillore “Nazim Gafurri” në Prishtinë.

Mbi 650 kandidatë që duhej të hynin në provim u njoftuan nga përgjegjësit e Fakultetit Filologjik se provimet shtyhen për muajin shtator.

Policia serbe arrestoi të dy prodekanët e Fakultetit Folologjik, dr. Murat Blakun dhe mr.Sedat Kuçin. Ata policia i mori në pyetje rreth mbajtjes së provimeve pranuese dhe i liroi pas dy orësh.

Policia arrestoi edhe Ibrahim Rukovcin, shërbëtor i shkollës fillore “Nazim Gafurri”.

Gjithashtu sot paradite rreth orës 10, në një punkt të Fakultetit të Mjekësisë në lagjen “Kodra e Trimave” në Prishtinë, policia serbe pengoi mbajtjen e ushtrimeve të studentëve të këtij fakulteti. Policia të gjithë studentët dhe profesorët i largoi me dhunë nga ky punkt.

9 korrik 1994

 Në Jetimoren e Mitrovicës u plaçkitën ndihmat e UNICEF-it

Udhëheqësit e dhunshëm serbë të Jetimores në Mitrovicë, po plaçkisin ndihmat që vijnë për fëmijët e kësaj jetimoreje, shkruan gazeta “Bujku” dhe shton se këto ditë në këtë jetimore u plaçkitën mëse 230 pako me shenjën e Kryqit të Kuq dhe të Gjysmëhënës. Këto ndihma, që u sollën nga UNICEF-i, u vodhën dhe u shitën. Bëhet me dije se në këtë jetimore u shitën edhe 500 palë pelena, 2 ton qumësht dhe 2 ton detergjente, shkruan “Bujku”.

Nga jetimorja në Mitrovicë, siç dihet, fëmijët shqiptarë u dëbuan me kërcënim se ata do të dërgohen nëpër jetimore të Serbisë. Pjesa më e madhe e këtyre fëmijëve, u morën në përkujdesje nga familjet shqiptare në Kosovë.

9 korrik 1997

Policia maqedonase hoqi flamurin shqiptar në Tetovë dhe në Gostivar

Sot në mëngjes njësitë e policisë së Maqedonisë hoqën flamurin shqiptar para kuvendit komunal në Tetovë dhe në Gostivar. Këtë lajm e dha Ministria e Punëve të Brendshme të Maqedonisë, duke e cilësuar flamurin shqiptar si “flamur të vendit të huaj”. Në njoftim thuhet se këtë akt policia e mori duke u bazuar në vendimin e Gjykatës Kushtetuese të Maqedonisë.

Korrespondentët e Televizionit të Maqedonisë (TVM) nga Gostivari dhe Tetova njoftojnë se në Gostivar sot në orën 3,10 minuta të mëngjesit njësitë speciale të policisë maqedonase hoqën nga shtyllat flamurin shqiptar dhe turk të vendosur para Kuvendit të Komunës së Gostivarit. Njoftohet se në orën pesë të mëngjesit u morën në të ashtuquajtura biseda informative kryetari i Kuvendit të Komunës së Gostivarit, Rufi Osmani dhe kryetari i Këshillit të kësaj komune.

Të revoltuar për këtë akt të shëmtuar, rreth orës 7 të mëngjesit u tubuan për të protestuar shumë qytetarë shqiptarë para Kuvendit, mirëpo kundër tyre intervenoi policia. Reporteri i TVM-së nga vendi i ngjarjes nuk njofton nëse pati të lënduar në mesin e qytetarëve, megjithatë ai konfirmoi se në përleshjet midis policisë dhe qytetarëve janë lënduar tre policë.

Poashtu reporteri i TVM-së nga Tetova njofton se sot në orët e hershme të mëngjesit njësitë speciale të policisë kanë hequr me dhunë nga shtyllat flamurin shqiptar, me pretekst se ai qenka flamur i një shteti të huaj, përkatësisht i Republikës së Shqipërisë. Flamuri kombëtar shqiptar ishte vendosur para këtij kuvendi para dy muajve.

Njëjti burim bën të ditur se të gjitha hyrje-daljet në Tetovë kontrollohen rreptësisht nga policia maqedonase. Tash për tash Kuvendit të Komunës nuk mund t’i afrohet asnjë qytetar, sepse ai edhe më tej kontrollohet nga policia.

Burime të QIK-ut nga Tetova njoftojnë se sot në bisedë informative është marrë zëdhënësi i Partisë Demokratike Shqiptare (PDSH) dhe disa veprimtarë të tjerë të kësaj partie. Rrugët e Tetovës edhe më tej i kontrollojnë njësitë e policisë. Nga Tetova bëhet me dije se udhëheqja PDSH-së ka konvokuar për sot një konferencë me gazetarë.

Thuhet se janë demoluar dyert dhe dritaret e Kuvendit të Komunës së Tetovës dhe se në këtë objekt është hedhur një koktej “mollotovi”. Mirëpo ende nuk ka konfirmim të këtyre pohimeve as hollësi të tjera lidhur me të.

 9 korrik 1998

Gjakovë: U varrosën pesë të vrarë të paidentifikuar

Sot, paradite, me urdhërin e pushtetit të instaluar serb, në varrezat e Gjakovës u varrosën trupat e pajetë të pesë shqiptarëve, të cilët dje policia i solli në morgun e spitalit të këtij qyteti.

Identiteti i të vrarëve nuk është bërë i ditur, por vetëm dieht se ata janë sjellë nga fshatrat e Rekës së Keqe.

Vdiq një qytetar i plagosur para një muaji nga forcat serbe

Brahim Zeka nga Skivjani i Gjakovës, i cili u plagos para një muaji nga forcat serbe, vdiq në spitalin e Prishtinës, njofton KI i Degës së LDK-së në Gjakovë.