

Lajmet
DnV me raport përfundimtar: Zgjedhjet e 14 shkurtit në përputhje me standardet demokratike
Published
4 years agoon
By
Betim GashiMisioni vendor për vëzhgimin e zgjedhjeve “Demokracia në Veprim”, vlerëson se zgjedhjet e mbajtura më 14 shkurt janë zhvilluar në përputhje me standardet demokratike për zgjedhje të lira dhe të drejta, megjithatë përjashtim në këtë kualifikim përbëjnë komunat me shumicë serbe ku është evidentuar dhe konfirmuar votimi i orkestruar për dy subjekte politike nga radhët e komuniteteve.
DnV sot ka publikuar raportin përfundimtar të zgjedhjeve, që përfshin raportin për vëzhgimin e zgjedhjeve, raportin për monitorimin e fushatës zgjedhore dhe raportin për monitorimit e mediave.
Eugen Cakolli nga DnV, tha se dita e zgjedhjeve është organizuar e qetë dhe pa ndonjë incident serioz që do të mund të ndikonte në integritetin e procesit zgjedhor. Ai tha se edhe në këto zgjedhje janë vërejtur problematika të ngjashme sikurse në zgjedhjet e mëparshme, votimi me asistencë i cili është evidentuar në shkallë mjaftë të lartë, vështirësi të votuesve për të gjetur emrin nëpër listat e votuesve, si dhe disa lloje të votimit të parregullt.
Sa i përket respektimit të masave kundër përhapjes së pandemisë, Cakolli tha se dita e zgjedhjeve është shoqëruar me një respektim jo të kënaqshëm të këtyre masave si nga ana e komisionerëve ashtu edhe qytetarët.
“DnV vlerëson që zgjedhjet e mbajtura me 14 shkurt janë zgjedhje që janë zhvilluar në përputhje me standardet demokratike për zgjedhje të lira dhe të drejta. Sidoqoftë përjashtim në këtë kualifikim përbëjnë komunat me shumicë serbe ku është evidentuar dhe konfirmuar votim i orkestruar për dy subjekte politike nga radhët e komuniteteve, si dhe një dalje të pazakontë të votuesve e cila ka arritur deri në 85 përqind që është dyfishi i mesatares në nivel vendi. Sa i përket pjesëmarrjes qytetare vlen të përmendet që me 48.78 përqind dalja në zgjedhje e votuesve në këto zgjedhje është më e larta në historinë e Kosovës pas shpalljes së pavarësisë, ndërsa vlerë të shtuar procesit i kanë dhënë edhe vet subjektet politike me pranimin e rezultateve të cilat janë shpallur”, tha ai.
Cakolli u shpreh se procesi i numërimit të votave, e në veçanti atyre të kandidatëve të subjekteve politike vijon të mbetet një prej problematikave kryesore të proceseve zgjedhore në Kosovë. Ai tha se implikimi i personave të dyshuar në vepra penale të falsifikimit dhe të manipulimit të rezultateve zgjedhore që është dëshmuar edhe përmes publikimit të një audio dhe video incizimi, e ka zbehur ndjeshëm kredibilitetin e këtij procesi.
Puna në QNR, ai tha se ka qenë përgjithësisht e rregullt, e hapur dhe transparente për publikun, por që rinumërimi i 700 kutive që përbën rreth 30 përqind të numrit të përgjithshëm, sipas tij, shpërfaq edhe një herë politizimin e thellë dhe mungesën e integritetit në mesin e disa komisionerëve dhe stafit të QNR-së.
Punën e Komisionit Qendror të Zgjedhjeve, DnV e ka vlerësuar si transparente, por që puna e këtij institucioni është karakterizuar me ndërhyrje nga akterë të jashtëm.
“Puna e KQZ ka qenë transparente, por ajo çfarë është atipike për këtë proces zgjedhor është polarizimi dhe përplasjet e skajshme që kanë karakterizuar në vazhdimësi punën e KQZ-së, në veçanti në mes anëtarëve të KQZ-së nga radhët e LVV-së dhe kryetares së KQZ-së. Po ashtu, puna dhe pavarësia e KQZ-së në këto zgjedhje janë karakterizuar nga ndërhyrje të cilat kanë ardhur nga akterë të jashtëm, në veçanti nga ushtruesja e detyrës asokohe të presidentit znj.Vjosa Osmani, e cila përmes deklarimeve të saj publike ka cenuar në një formë integritetin dhe pavarësinë e punës së KQZ-së”, deklaroi Cakolli.
Ai tha se kryetarja e KQZ-së si asnjëherë më parë ka qenë target i sulmeve të shumta si nga radhët e subjekteve politike ashtu edhe nga qytetarët.
Përkundër kohës së shkurtër, sipas Cakollit KQZ ka arritur të përmbyllë të gjitha operacionet zgjedhore, por që theksohet se votimi jashtë vendi mbetet një prej hallkave më të ndjeshme të procesit zgjedhor.
Në raport flitet edhe për punën e PZAP dhe të Gjykatës Supreme gjatë këtyre zgjedhjeve, ku Cakolli tha se të njëjtat kanë vepruar me profesionalizëm dhe në mënyrë të paanshme kanë trajtuar lëndët të cilat u janë adresuar atyre.
PZAP dhe Gjykata Supreme tha se kanë anuluar votat e subjekteve politike të komuniteteve të fituara në zonat me shumicë serbe, ku nuk ka pasur përqendrim demografik të komuniteteve në fjalë. Me këtë veprim, ai tha se është garantuar përfaqësimi i drejtë i vullnetit të komuniteteve duke u bazuar si në normat kushtetuese vendore ashtu edhe në praktikat e mira ndërkombëtare.
Visar Xhambazi, nga DnV ka prezantuar raportin e monitorimit të fushatës, ku ai tha se kanë monitoruar 179 aktivitete të subjekteve politike. Ai tha se subjektet politike kanë pasur më së shumti aktivitete të organizuara në Komunën e Pejës dhe të Prizrenit. Sipas tij, Lëvizja Vetëvendosje ka organizuar më së shumti aktivitete zgjedhore apo 58, LDK me 44 aktivitete dhe PDK me 35, AAK me 18 aktivitete, ndërsa partitë tjera kanë më pak se 18 aktivitete të organizuara.
Pjesë e monitorimit ka qenë edhe respektimi i masave anti-COVID, për çka tha se ato nuk janë respektuar fare.
Xhambazi, u shpreh se pjesëmarrja e grave në fushatë zgjedhore vazhdon të mbetet e ulët, ai tha se sa i përket pjesëmarrjes së përgjithshme të grave ka vetëm 22 përqind të grave në raport me burrat, ndërsa sa i përket folësve gratë kanë qenë folëse vetëm në 27 përqind të rasteve në raport me burrat.
Temat më të përmendura në fushatë zgjedhore, ai tha se kanë qenë zhvillimi ekonomik, bujqësia, punësimi dhe arsimi. Ndërsa, tha se gjatë fushatës zgjedhore në 23 përqind të rasteve ka pasur gjuhë të urrejtjes, ku rivalët politik janë quajtur zhvatës dhe tradhtar.
Ndërsa, raportin e monitorimit të mediave e ka prezantuar Mexhide Demolli-Nimani nga DnV, e cila tha se gjatë monitorimit tek televizionet kanë dominuar subjektet e mëdha politike që kanë pasur më shumë hapësirë qoftë në kronikat zgjedhore apo edhe në debatet televizive.
“Nga monitorimi tregon se më së shumti mbulueshmëri tek televizionet në kronika zgjedhore ka pasur LDK me 238 minuta, e ndjekur nga AAK me 228 minuta, LVV 223 minuta, Nisma me 211 minuta, PDK me 209 minuta, Lista Serbe me 57 minuta dhe subjektet e tjera të minoriteteve po edhe partive të vogla shqiptare janë prezantuar në kronika zgjedhore me 49 minuta…Livestream nga portalet kemi monitoruar se sa janë shfrytëzuar faqet e facebook-ut të portaleve të cilat kanë një numër të madh të ndjekësve të tyre nga partitë politike në këtë rast që janë shfrytëzuar edhe këto faqe përveç faqeve të tyre zyrtare për t’i transmetuar, nga monitorimi direkt përmes facebbok-ut prin AAK me 1 mijë e 491 minuta nga 5 portale, duke u pasuar nga LDK me 1 mijë e 393 minuta në 6 portale, Nisma me 1 mijë e 141 në 6 portale, PDK me 1 mijë e 134 minuta në 6 portale, ndërkaq LVV ka vetëm 433 minuta në vetëm 4 portale”, tha ajo.
Eugen Cakolli ka prezantuar rekomandimet nga ky raport, e që sipas tij kanë si qëllim parësor inicimin e një procesi të reformës zgjedhore.
“DnV vlerëson që reforma zgjedhore si proces duhet të jetë një prej prioriteteve kyçe të spektrit politik në vend, mirëpo që i njëjti duhet të shoqërohet nga parimi i gjithëpërfshirjes dhe i transparencës duke evituar çfarëdo iniciative apo mundësie që do të cenonte këto dy parime, meqenëse do të përkthehej në një ndryshim të sistemit zgjedhor apo elementeve të tij pa pasur një pajtueshmëri më të gjerë lidhur me këtë proces. DnV vlerëson se ndër elementet kryesore të sistemit zgjedhor që duhet të jenë subjekt i reformimit zgjedhor janë votimi preferencial deri në 5 kandidatë i cili duhet të reduktohet, pragu zgjedhor përkatësisht aplikimi i tij për kategori të ndryshme në këtë rast për koalicione, subjektet politike dhe kandidatët e pavarur i cili duhet të rikategorizohet. Po ashtu, duhet të rishqyrtohet edhe mënyra e zgjedhjes së presidentit të vendit me qëllim të evitimit të krizave të ndryshme politike”, tha ai.
Në kuadër të elementeve kryesore të sistemit zgjedhor, Cakolli tha se duhet të konsiderohet ndarja e Kosovës në zona zgjedhore në mënyrë që të garantohet një përfaqësim më i drejtë i qytetarëve.
Aktualitet
Kosova mësoi rivalët e parakualifikimeve për FIBA EuroBasket 2029
Published
8 minutes agoon
September 8, 2025By
UBT News
Për FIBA EuroBasket 2029 që mbahet në kryeqytetin letonez, Riga, sot nga ora 10:30 është zhvilluar shorti i Raundit të Parë të Parakualifikimeve. në kryeqytetin letonez, Riga.
Ceremonia do të transmetohet drejtpërdrejt në kanalin zyrtar të FIBA-s në YouTube.
10 kombëtare janë të ndara në katër vazo nga FIBA sipas renditjes botërore dhe një grup do të përbëhet nga katër shtete dhe dy grupet e tjera do të përbëhen nga tre shtete.
Kosova është në vazon e dytë dhe sot do të mësojë kundërshtarët.
Raundi i Parë i Parakualifikimeve do të luhet në tre dritare: nëntor 2025, shkurt 2026 dhe qershor-korrik 2026.
Katër kombëtare – tre fitueset e grupeve dhe vendi i dytë më i mirë do të kualifikohen në Raundin e Dytë.
Vazo 2: Kosova, Norvegjia, Irlanda./S.K/KP/
Lajmet
Punimet ndërtimore për projektin Solar4Kosovo I – Centrali Fotovoltaik, KEK jep sqarime
Published
20 minutes agoon
September 8, 2025By
UBTnews
Korporata Energjetike e Kosovës (KEK) njofton për procesin e fillimit të punimeve ndërtimore të projektit Solar4Kosovo I – Centrali Fotovoltaik, i cili financohet nga Bashkimi Evropian / Korniza e Investimeve për Ballkanin Perëndimor (ËBIF), Qeveria Gjermane përmes KfË si institucioni kryesor financiar ndërkombëtar, Banka Evropiane për Investime (BEI) dhe Korporata Energjetike e Kosovës.
“Ky projekt përfaqëson një hap të rëndësishëm në tranzicionin energjetik të Kosovës, duke kontribuar në rritjen e prodhimit nga burime të qëndrueshme dhe të ripërtëritshme të energjisë”, thuhet në njoftim.
Sipas njoftimit, punimet ndërtimore do të zhvillohen në zonën afër Termocentralit Kosova A, që shtrihet në komunën e Obiliqit dhe Fushë Kosovës. Këto punime kryesisht lidhen me banorët e Kryshevcit (Dardhishtë) dhe lagjes Mërlak në fshatin Kryshevc, komuna e Obiliqit.
“KEK sqaron se deri më tani nuk ka ndërmarrë masa ndaj përdorimit të paautorizuar të tokës, pasi nuk ka ekzistuar një plan konkret zhvillimor për atë zonë. Për më tepër, në përputhje me përgjegjësitë e saj si kompani publike dhe në kuadër të politikave të Përgjegjësisë Shoqërore Korporative (CSR), KEK ka treguar mirëkuptim dhe ka toleruar këtë shfrytëzim të përkohshëm nga komuniteti lokal”, thuhet në komunikatë.
“Prandaj, është e rëndësishme të informohen të gjithë përdoruesit e paautorizuar të tokës se: Toka në fjalë është pronë e KEK-ut; KEK është në përgatitje për punimet e ardhshme ndërtimore të projektit solar; Sezoni bujqësor i vitit 2025 (gusht 2025) paraqet sezonin e fundit kur janë zhvilluar aktivitete bujqësore në këto toka; Pas kësaj periudhe, nuk do të lejohet më asnjë përdorim i tokës nga persona të paautorizuar”, thuhet në njoftim.
Më tej thuhet se ky njoftim bëhet për të siguruar transparencë dhe informim të drejtë për të gjithë përdoruesit e pa autorizuar të tokës, përveç njoftimeve zyrtare dhe tabelave paralajmëruese që do të vendosen në perimetrin e zonës së projektit, e cila do të jetë e rrethuar me gardh sigurie.
KEK fton të gjithë përdoruesit e tokës dhe personat e prekur nga ky vendim që, për çdo sqarim ose informacion shtesë, të kontaktojnë përfaqësuesit e kësaj kompanie. /D.B/KP
Lajmet
KQZ: Do të shtypen mbi 3.6 milionë fletëvotime për zgjedhjet lokale
Published
23 minutes agoon
September 8, 2025By
UBTnews
Komisioni Qendror i Zgjedhjeve mbajti mbledhjen e 56-të në këtë vit, të kryesuar nga kryesuesi, Kreshnik Radoniqi. Vendimet u morën me procedurë qarkulluese.
Në këtë mbledhje, KQZ mori vendim për numrin e fletëvotimeve, broshurave të kandiatëve dhe listave votuese që do të shtypen për Zgjedhjet Lokale 2025.
Sipas vendimit të KQZ-së, për raundin e parë të zgjedhjeve për Kryetar të Komunave do të shtypen 1,800,410 fletëvotime dhe po aq, 1,800,410, edhe për zgjedhjet për Kuvende Komunale. Në këtë numër përfshihen fletëvotimet për vendvotimet e rregullta, votimin me kusht, Votimin e Personave e Nevoja të Veçanta, fletëvotimet rezervë dhe për votimin me postë.
Në këtë proces zgjedhor, do të shtypen 13% apo 268,688 fletëvotime më pak se numri i përgjithshëm i qytetarëve me të drejtë vote, që sipas Listës Votuese të certifikuar nga KQZ është: 2,069,098.
Sipas të dhënave nga Lista Votuese, numri i qytetarëve me të drejtë vote në vendvotime, në Republikën e Kosovës është 2,025,105 votues, ndërkaq numri i qytetarëve që janë regjistruar për të votuar me postë nga jashtë Kosovës është 43,993 votues.
Procesi zgjedhor në Republikën e Kosovës, do të organizohet në 938 Qendra të Votimit me gjithsej 2,625 vendvotime, prej të cilave 910 Qendra të Votimit për votimin e rregullt me 2,571 vendvotime dhe 38 Qendra të Votimit për votimin me kusht me gjithsej 54 vendvotime./D.B/EO
Bota
Konflikti Rusi-Ukrainë, rriten çmimet e naftës
Published
24 minutes agoon
September 8, 2025By
UBTnews
Çmimet e naftës u rritën të hënën, ndërsa përshkallëzimi i konflikteve Rusi-Ukrainë nxiti shqetësime për furnizimin dhe OPEC+ dha një rritje më të vogël se sa pritej të prodhimit.
Nafta e papërpunuar Brent u tregtua me 66.34 dollarë për fuçi në orën 10:43 të mëngjesit sipas kohës lokale (07:43 GMT), 1.3% më shumë nga mbyllja e mëparshme prej 65.45 dollarësh.
Çmimet e naftës në SHBA u rritën me 1.4% në 62.60 dollarë nga 61.70 dollarë në seancën e mëparshme, transmeton AA.
Çmimet e naftës u rritën ndërsa Rusia nisi sulmin e saj më të madh ajror në Ukrainë që nga fillimi i luftës, duke nxitur frikën e sanksioneve më të ashpra dhe rreziqeve të ripërtërira të furnizimit.
Presidenti ukrainas Volodymyr Zelenskyy tha në X se forcat ruse vendosën më shumë se 800 dronë, katër raketa balistike dhe nëntë raketa lundrimi në një sulm ndaj Kievit.
Forcat Ajrore të vendit raportuan se ndërsa shumica e dronëve u kapën, 54 UAV dhe nëntë raketa goditën objektiva në kryeqytet, përfshirë një ndërtesë qeveritare që u godit për herë të parë.
Duke folur me gazetarët përpara se të largohej nga Shtëpia e Bardhë për në Nju Jork, Presidenti i SHBA-së Donald Trump tha se ishte i përgatitur të kalonte në një fazë të dytë të sanksioneve ndaj Rusisë.
Presidenti i Këshillit Evropian Antonio Costa tha të premten se blloku po përshpejtonte punën për masat e reja dhe do të dërgonte një delegacion në Uashington.
Pritjet për një konflikt të zgjatur kanë rritur shqetësimet për furnizimin duke mbështetur lëvizjet në rritje të çmimeve, ndërsa kërcënimet e sanksioneve të Trump kundër Rusisë kufizuan fitimet duke nxitur frikën e një rritjeje më të dobët ekonomike dhe një kërkese më të dobët për energji në afat të shkurtër.
Ndërkohë, rritja më e vogël se sa pritej e prodhimit të OPEC+ gjithashtu mbështeti çmimet duke nxitur shqetësimet për furnizimin.
OPEC dhe aleatët e saj ranë dakord të rrisin prodhimin e naftës me 137,000 fuçi në ditë (bpd) në tetor.
Rritja, e udhëhequr nga Arabia Saudite, Rusia, Iraku, Emiratet e Bashkuara Arabe, Kuvajti, Kazakistani, Algjeria dhe Omani, nuk i përmbushi pritjet e tregut.
Megjithatë, çmimet gjetën mbështetje ndërsa tregtarët mirëpritën qartësinë mbi planin e furnizimit të kufizuar të grupit.
OPEC+ kishte rritur më parë prodhimin me 547,000 fuçi në ditë në shtator dhe 548,000 në gusht./D.B/KP

Kosova mësoi rivalët e parakualifikimeve për FIBA EuroBasket 2029

Punimet ndërtimore për projektin Solar4Kosovo I – Centrali Fotovoltaik, KEK jep sqarime

KQZ: Do të shtypen mbi 3.6 milionë fletëvotime për zgjedhjet lokale

Konflikti Rusi-Ukrainë, rriten çmimet e naftës

Si të riktheni dëshirën për palestër pas një pushimi të gjatë?

17 vjeçari nga Kosova që theri mësuesën në Gjermani, jashtë rrezikut për jetë

UBT sjell modelin e suksesshëm austriak të arsimit në turizëm: Dy diploma për studentët e Kosovës dhe rajonit

Rama kritika ambasadorëve: Rezultati lë për të dëshiruar

34 vite nga pavarsia e Maqedonisë së Veriut
Të kërkuara
-
Lajmet nga UBT3 months ago
UBT organizon debat rreth zgjerimit të BE-së dhe ruajtjes së vlerave evropiane
-
Aktualitet2 weeks ago
Profesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis
-
Kërkime2 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA
-
Aktualitet2 months ago
BSc në Shëndet Publik dhe Shkenca Mjekësore në UBT – Investim për të ardhmen e shëndetit të popullatës