Kulturë

​Dhimbja e familjarëve të të pagjeturve përmes fotografive

Published

on

Për 23 vjet radhazi, sytë e saj rrallë janë tharë nga lotët. E lodhur nga mosha e mërzia, ajo mezi ec e qëndron në këmbë. Hasime Doqi nga Klina, çdo ditë pret një lajm për djalin e saj dhe kujton amanetin që ia ka lënë ditën e 6 majit. “Para çdo feste po mërzitem shumë, shpirti po më dhemb se nuk e di ku e kam djalin”, është fjalia që shoqëron fotografinë bardh e zi.

Nënë Hasimja është pjesë e 35 fotografive të familjarëve të personave të zhdukur që janë ekspozuar në “Sheshin Skënderbeu” në Prishtinë me rastin e Ditës Ndërkombëtare të të Zhdukurve me organizim të Kryqit të Kuq.

Mes lotëve, ajo rrëfen për ditën kur pa e dëgjoi fjalët e fundit të djalit të saj, i cili e la siç thotë ajo me pasoja të mëdha.

“Djalit, eshtrat nuk po ia gjejmë askund. Djali i djalit 14 muajsh edhe ai, vdiq vëllai 47 vjet… Rrafsh që 1 muaj ditë, sytë e mi nuk janë ter asnjëherë vetëm duke qarë… Kur po vijnë këto ditë nuk po mundem të qëndrojë. Me 6 maj që ma kanë marrë në Dobërdol, edhe fjalën e fundit ma ka thënë ‘nëna jem këtë çikë amanet po ta lë’. I thash ani djali jem se kurban i çikës bëhem, por dashtë Zoti nuk ju gjen asgjë. Por, i kam dëgjuar krismat, kam qenë ulur dhe thash djemtë na i vranë. Po tash po rroj me pasoja të mëdha”, tregon e moshuara mes lotëve.

Përveç dhimbjes, ajo flet me indinjatë edhe për atë që kanë bërë institucionet për të dhe shumë familjarë të tjerë nga Kosova.

“Jo, nuk kanë punuar si duhet. Asnjë absolut, kanë punuar për karriget e veta, për neve nuk kanë punuar asgjë. Nëse kishin punuar në fillim, kështu nuk do të zgjatej. Por, nuk kanë punuar dhe na kanë hedhur kështu si ‘mishin e domit’. S’po i intereson askujt për neve edhe po duhet me u përmbajt siç mundemi”, shton ajo.

Të pakënaqur po shprehen edhe familjarë të tjerë, ku Bajram Çerkinaj nga Qendra Burimore për Personat e Zhdukur thekson se kjo çështje ka stagnuar tërësisht.

“Kemi pritur 30 gushtin që të mos jetë kaq punë e stagnuar apo të thuhet bash e ndalur, sikur edhe vitet e tjera ku kemi pasur një numër të madh të pagjeturve dhe sot ku kemi 1617 të pagjetur. Çka ka ndodhë brenda këtij 30 gushtit, unë të them se ky 30 gusht, unë mendoj se nuk është ka e lëshon politika duke e lëshuar të shkojë përpara për zbardhjen e fatit të të pagjeturve. Ne nuk kemi tjetër kërkesë, për zbardhjen e fatit të të pagjeturve duhet të kyçen të gjithë ata njerëz që janë humanë. Edhe politika është pak më e gjerë dhe të kryejë të tjera punë. Kemi pasur shumë takime, mendimi i familjarëve është që politika të qëndrojë larg kësaj çështje që është një ankth plot 23 vjet”, deklaron ai.

Derisa sheh fotografitë e ekspozuara të familjarëve të personave të zhdukur, ai thekson se të gjitha këto tregojnë dhimbjen. Ai kërkon nga institucionet që të punohet në zbardhjen e fatit të të pagjeturve dhe politika të qëndrojë larg.

“Mjerisht politika e Brukselit i përfshin të gjithë këta, edhe serbët edhe shqiptarët. Edhe Beogradi edhe Prishtina. Nuk bën grupi punues të jetë i stagnuar plot që 15 muaj nuk ka pasur takim. Pse? Se politika nuk po i len të punojë në pjesën humane, por i ka shti në ombrellën politike dhe nuk i lëshon të punojë dhe të paktën t’i kthehet një asht familjarëve”, shton ai.

Koordinatorja e programit të personave të pagjetur në kuadër të Kryqit të Kuq, Adelinë Syla shprehet se është e dhimbshme se akoma mbi 1 mijë e 600 persona figurojnë të zhdukur. Sipas saj, familjarët janë gjithmonë në pritje e ankth.

“Qëllimi kryesor i kësaj ekspozite është sensibilizimi me familjarët e personave të zhdukur, përmes fotografive që i kemi realizuar. Siç e shihni fotografitë janë bardh e zi dhe anash fotografive janë thëniet, të cilat i kanë thënë familjarët e personave të zhdukur, gjatë vizitave që i kemi bërë ne si Kryq i Kuq i Kosovës… Jemi munduar që të përfshijmë të gjitha komunat me familjarët që kanë pranuar të jenë pjesë e ekspozitës. Janë gjithsejtë 35 fotografi, normalisht nuk kemi pasur mundësi t’i përfshijmë të gjithë, për shkak se edhe numri është i madh. Jemi munduar të prekim të gjitha komunat që kanë persona të zhdukur”, përfundon Syla.

Ekspozita me familjarët e personave të zhdukur do të qëndrojë e hapur deri në orën 18:00. Kujtojmë që Kosova kërkon zbardhjen e fatit edhe të mbi 1 mijë e 600 personave, në mesin e tyre edhe mbi 100 fëmijë. 

Magazinë

Katy Perry thyen parashikimet: turneu “The Lifetimes” sjell fitime marramendëse

Published

on

Katy Perry ka mbyllur gojët e skeptikëve duke publikuar shifrat e para të fitimeve nga turneu botëror The Lifetimes Tour.

Sipas Billboard, këngëtarja ka shitur mbi 1.1 milion bileta, duke gjeneruar më shumë se 80 milionë dollarë (rreth 73.6 milionë euro) vetëm nga shfaqjet në SHBA, Kanada dhe Australi — ndërsa pjesa më e madhe e turneut ende nuk ka nisur.

Superylli i popit e nisi etapën në Amerikën e Veriut më 7 maj në Hjuston, duke vizituar mbi 20 qytete, përpara se të vazhdonte në Kanada dhe Australi, ku 13 koncertet e saj u shitën plotësisht, shkruan DailyMail.

Turneu, i konceptuar si një spektakël teatror rreth figurës së Perry-t si “shpëtimtare e botës” mes një kaleidoskopi fluturash, pritet të përfshijë 91 shfaqje në pesë kontinente. Kërkesa për biletat ka qenë e madhe, sidomos në Azi.

Në Kinë, ku janë planifikuar gjashtë shfaqje, biletat u shitën për vetëm një minutë. Për të përballuar interesin, Perry ka shtuar data shtesë në Paris, Australi dhe Kinë. Turneu do të ndalet në Evropë, me shfaqje në qytete si Londra, Mançesteri, Parisi, Berlini, Roma dhe Barcelona.

Ky sukses i madh vjen vetëm disa muaj pasi mediat britanike raportuan se Perry po përballej me shitje të dobëta në disa qytete.

Të dhënat e reja, tregojnë të kundërtën, duke e pozicionuar The Lifetimes Tour si një nga turnetë më fitimprurëse dhe më të shtrira të karrierës së saj.

Continue Reading

Magazinë

“Më falni, më duhet të shërohem”, Jessie J shtyn turneun botëror pas operacionit të dytë për kancerin e gjirit

Published

on

Këngëtarja britanike Jessie J ka njoftuar se do të shtyjë turneun e saj të ardhshëm për shkak të një ndërhyrjeje të dytë kirurgjikale që duhet të kryejë, pas diagnostikimit me kancer të gjirit.

Në një video të publikuar në Instagram, 37-vjeçarja, emri i vërtetë i së cilës është Jessica Ellen Cornish, tha se operacioni nuk është serioz, por duhet të kryhet brenda këtij viti, pikërisht në mes të datave të turneut.

“Fatkeqësisht, më duhet të bëj operacion të dytë. Nuk është ndonjë gjë erioze, por duhet ta kryej para fundit të vitit e për fat të keq, kjo bie në mes të një turneu që e kisha planifikuar,” tha ajo e cila bëri të ditur në qershor se ishte diagnostikuar me kancer në fazë të hershme, ndërsa operacionin e parë e kreu në fund të atij muaji. Në korrik, tregoi se nuk kishte përhapje të sëmundjes dhe se ndjehej mirë.

Ndërhyrja e dytë është e domosdoshme. Edhe pse nuk dha shumë detaje, kishte shpjeguar se synon një rikuperim estetik pas mastektomisë, për të rregulluar pamjen e gjoksit.

“Po jetoj momentin, po e përqafoj këtë rrugëtim dhe po shkoj me rrjedhën… më vjen keq. Jam e trishtuar… por duhet të shërohem, duhet të jem më mirë – dhe e di që kjo është zgjedhja e duhur,” shtoi ajo në mesazhin e saj.

Jessie J konfirmoi se pjesa evropiane e turneut, e planifikuar për tetor 2025, është shtyrë për prill 2026. Ndërsa turneu në SHBA, i planifikuar për nëntor, është anuluar, për shkak të pamundësisë për të gjetur një periudhë të përshtatshme me sallat koncertale.

“Ju lutem kini durim me ne për pjesën amerikane të turneut. Dua ta realizoj, por vetëm kur të jetë koha e duhur. Mund të ndodhë më vonë këtë vit… ose më herët, nuk e di ende,” u shpreh ajo.

Këngëtarja theksoi se po përpiqet të balancojë të gjitha sfidat që po përjeton, por se shëndeti është përparësia e saj absolute.

“Po mundohem të bëj më të mirën. Po përpiqem të menaxhoj të gjitha gjërat që po ndodhin në jetën time dhe energjinë që duhet të ndaj. Më duhet të shërohem. më falni, më vjen keq…” përfundoi ajo.

Continue Reading

Lifestyle

Pse shtatori është muaji i përsosur për pushime?

Published

on

Nëse po i merr në shtator pushimet, në fakt po bën një super zgjedhje. Shtatori është muaji perfekt për të udhëtuar dhe këto arsye e provojnë:

Çmime më të lira

Vera është piku i çmimeve të larta dhe kur mbaron, çmimet pësojnë zbritje. Pikërisht, ky është momenti yt për të marrë bileta apo për të rezervuar apartamente apo dhoma hoteli.

Më pak turma

Ke dashur të vizitosh një monument kulture, apo të darkosh në restorant të njohur, por shumë njerëz kanë ndarë të njëjtin mendim me ty? Shtatori njihet si muaji i rikthimit në punë, fundi i pushimeve, për ty mund të jetë muaji kur përjeton aventurat e viziton vendet që dëshiron.

Moti

Të gjithë i duan mbrëmjet buzë detit në verë, por e ke parasysh që ndonjëherë është aq vapë sa nuk do të kesh kontakt fare as me rrobat? Epo, shtatori të ofron gjithë freskinë që ti kërkon.

Temperatura e ujit

Në shtator, deti vijon të jetë i ngrohtë dhe mikpritës, ndaj mund ta shijosh të gjithin për vete (ose me shumë pak njerëz përreth).

Mënyra më e mirë për t’u përshëndetur me verën

Të gjithë nëpër zyra dhe ti në plazh…Kur bën pushimet në shtator, e mbyll verën siç duhet!

Continue Reading

Magazinë

Zoë Kravitz kritikon serialin “Friends”: Disa shaka duhet të mbeten në vitet e 90-ta

Published

on

Zoë Kravitz ka kritikuar sitcom-in klasik “Friends”, duke thënë se disa nga shakatë e tij nuk kanë përballuar mirë kohën dhe do të duhej të mbeteshin në vitet e 90-ta.

Aktorja ndau mendimin për serialin, ku luanin Jennifer Aniston, Courteney Cox dhe i ndjeri Matthew Perry, gjatë një interviste për People.

Kravitz theksoi se shakatë homofobike dhe disa referenca të tjera janë problematike për standardet e sotme: “Nëse shikoni Friends tani, do të thoni, ‘Uau, kjo është…’”– tha ajo, duke shtuar se është nostalgjike për modën, qytetin e New Yorkut dhe kulturën e viteve të 90-ta, por disa elemente duhet të mbahen thjesht si kujtime të kohës, shkruan DailyMail.

Zoe Kravitz në premierën e sezonit të dytë të “Big Little Lies” në New York City, 29 maj 2019. Komentet erdhën gjatë promovimit të filmit të saj të ri “Caught Stealing”, ku bashkëpunon me Austin Butler. Butler u pajtua me Kravitz, duke thënë: “Po, mbajeni këtë në vitet e 90-ta”.

Kritikat e Kravitz përputhen me reflektime të mëparshme të krijuesve të serialit, të cilët kanë pranuar se disa histori dhe shaka nuk ishin të përshtatshme dhe do të donin t’i kishin ndryshuar.

Nga ana tjetër, David Schwimmer, i njohur për rolin e Ross, ka mbrojtur serialin duke theksuar se për kohën e tij, Friends ishte inovativ në trajtimin e marrëdhënieve dhe çështjeve të seksualitetit.

Continue Reading

Të kërkuara