Sport

Boban: Kosova ka infrastrukturë më të mirë se Kroacia

Boban tha se është tejet i kënaqur me Kosovën se si është zhvilluar në aspektin e infrastrukturës së futbollit.

Published

4 years ago

October 5, 2022

Betim Gashi

Një tjetër fytyrë e rëndësishme e futbollit ka vizituar sot Kosovën, vetëm disa ditë pas vizitës së numrit një të FIFA-s, Gianni Infantino.

Bëhet fjalë për shefin e futbollit të UEFA-s, Zvonimir Boban, i cili pas vizitave të sotme iu adresua edhe mediave. Me këtë rast, Boban tha se është tejet i kënaqur me Kosovën se si është zhvilluar në aspektin e infrastrukturës së futbollit. Po ashtu, shefi i futbollit të UEFA-s nuk ngurroi që ta pranojë se Kosova ka infrastrukturë më të mirë se vendlindja e tij, Kroacia.

“Le të themi se nga pikëpamja e infrastrukturës unë besoj se ju jeni më mirë se Kroacia sepse ne nuk kemi akademinë tonë, nuk kemi stadiumet tona, por tani jemi duke punuar shumë në këtë aspekt. Nuk është gjithmonë e lehtë që të bësh krahasime, ndonjëherë është arrogante dhe e dhimbshme për dikë, por ajo se çfarë shoh këtu është që procesi është tejet i mirë, federata është duke bërë punë të mirë, e shoh edhe që qeveria dëshiron ta ndihmojë qytetin e Prishtinës”, tha Boban.

Ndërkaq, përkrah Boban në konferencë për media ishte edhe presidenti i Federatës së Futbollit të Kosovës (FFK), Agim Ademi, i cili edhe shpjegoi qëllimin e vizitës së legjendës kroate. Ademi tha se me Boban kanë diskutuar kryesisht për çështje të futbollit, respektivisht për infrastrukturën e futbollit kosovar.

“Ky ka ardhur për çështje të futbollit, fillimisht, sepse është shefi i futbollit të UEFA-s, dhe sigurisht që kemi folur për infrastrukturën që është baza e futbollit, për me pas mundësi që futbolli të ecë sa më para, dhe për të treguar talentin siç e tha se shquhemi si shtet me talentë të programuar tashmë në UEFA dhe FIFA, por gjithsesi ka ardhur për turneun që e kemi të UEFA-s sepse kur është shef i futbollit normalisht që është mbikëqyrës i të gjitha këtyre garave të cilat janë. Nuk është e rastësishme që është dhënë ky organizim i këtij kompeticioni apo i këtij grupi për faktin që duhet të jesh i vlerësuar edhe në UEFA për ta dhënë një kompeticion të tillë dhe për ta besuar një kompeticion të tillë. Sigurisht kemi folur gjithçka për futbollin, për edukimin e futbollit sepse që në mbikëqyrjen e tij nuk e ka vetëm futbollin por ka edhe referët, edhe të gjitha organet të cilat merren me futbollin, referë delegatë e gjitha të tjerat. Kemi folur rreth kyçjes së anëtarëve tonë atje në UEFA, domethënë si delegatë të UEFA-s”, tha Ademi.

Gajtë kësaj vizite, Boban u takua me Ministrin e Ministrisë së Kulturës, Rinisë dhe Sportit, Hajrull Çeku si dhe Kryetarin e Komunës së Prishtinës, Përparim Rama.

Sport

Dardanët rikthehen në stërvitje, fokus te sfida ndaj Andorrës

Published

3 hours ago

June 1, 2026

UBTNews

Kombëtarja e Kosovës ka rikthyer fokusin te sfida e radhës pas ndeshjes miqësore të zhvilluar të enjten në Pragë ndaj Çekisë. Dardanët kanë vazhduar përgatitjet për përballjen e ardhshme kundër Andorrës, me stafin teknik që po punon për ta mbajtur ekipin në formën optimale.

Seanca e sotme stërvitore u zhvillua në stadiumin Stadiumi Fadil Vokrri, ku morën pjesë 11 futbollistë. Ndërkohë, pjesa tjetër e skuadrës ndoqi një program rigjenerues në hotel, pas angazhimit në ndeshjen e fundit ndaj Çekisë.

Stërvitja u fokusua në aspektet taktike dhe fizike, ndërsa atmosfera në kampin e Kosovës mbetet pozitive para miqësores së dytë. Stafi teknik synon të shfrytëzojë këto ditë për të përgatitur sa më mirë ekipin dhe për t’u dhënë mundësi lojtarëve të ruajnë ritmin e garës.

Dardanët do të vazhdojnë me seancat stërvitore në ditët në vijim, me fokus maksimal te ndeshja kundër Andorrës, e cila do të shërbejë si një tjetër test i rëndësishëm për ekipin kombëtar.

Sport

Nga Drenica te Napoli, rrugëtimi i jashtëzakonshëm i Amir Rrahmanit

Published

3 hours ago

June 1, 2026

UBTNews

Kapiteni i Kosovës, Amir Rrahmani, vazhdon të shkëlqejë në futbollin italian, duke u konfirmuar si një nga mbrojtësit më të mirë në Serie A. Pas një sezoni të jashtëzakonshëm me SSC Napoli, ai është përfshirë në formacionin më të mirë të sezonit 2025/26 nga SofaScore, falë paraqitjeve të qëndrueshme dhe rolit të tij kyç në repartin defensiv të skuadrës napolitane.

Rrahmani, i lindur në Prishtinë më 24 shkurt 1994, karrierën e nisi në Kosovë me Ramiz Sadikun dhe Drenicën, për të vazhduar më pas te Partizani në Shqipëri. Më vonë ai u transferua në Kroaci, ku luajti për RNK Split dhe Dinamo Zagreb, duke fituar dy tituj kampionë dhe Kupën e Kroacisë. Pas aventurës së suksesshme te Hellas Verona, në vitin 2020 ai iu bashkua Napolit, ku u shndërrua në një nga lojtarët më të rëndësishëm të skuadrës.

Me Napolin, Rrahmani ka fituar dy tituj të Serie A dhe është bërë një nga liderët e ekipit. Deri më tani ai ka zhvilluar mbi 180 ndeshje me fanellën e klubit italian dhe ka realizuar më shumë se 10 gola, shifra mbresëlënëse për një mbrojtës qendror. Në sezonin e fundit ai u dallua veçanërisht në fitoren 3:0 ndaj Pisës, ku u shpall “Lojtari i Ndeshjes”. Mbrojtësi kosovar realizoi një gol me kokë pas asistimit të Eljif Elmasit dhe u vlerësua me notën 9.3 nga SofaScore, pasi përveç golit dominoi edhe në fazën mbrojtëse.

Përveç suksesit në nivel klubesh, Rrahmani mbetet një figurë kyçe për Përfaqësuesen e Kosovës. Si kapiten i ekipit kombëtar, ai ka zhvilluar dhjetëra ndeshje ndërkombëtare dhe ka kontribuar me disa gola, duke u shndërruar në një nga futbollistët më të rëndësishëm në historinë e futbollit kosovar.

Në një intervistë të fundit për Radio CRC, Rrahmani foli për lidhjen e tij të veçantë me Napolin, duke deklaruar se pas kaq shumë vitesh në qytetin italian, ai e konsideron Napolin si shtëpinë e tij të parë. Ai gjithashtu theksoi se synon të vazhdojë të kontribuojë për klubin dhe të arrijë sa më shumë paraqitje me fanellën e kaltër.

Falë profesionalizmit, paraqitjeve të qëndrueshme dhe rolit të liderit si te Napoli ashtu edhe te Kosova, Amir Rrahmani vazhdon të jetë një nga emrat më të respektuar të futbollit shqiptar në arenën ndërkombëtare.

Sport

Gresa Bakraqi fiton medaljen e argjendtë në Kampionatin Evropian në Monako

Published

3 hours ago

June 1, 2026

UBTNews

Atletja kosovare Gresa Bakraqi ka arritur një sukses të rëndësishëm ndërkombëtar, duke fituar medaljen e argjendtë në Kampionatin Evropian të shteteve në zhvillim, që u mbajt në Monako.

Bakraqi shkëlqeu në disiplinën e 1500 metrave, ku siguroi vendin e dytë dhe medaljen e argjendtë, duke u bërë e vetmja garuese nga Kosova që u ngjit në podium në këtë kampionat.

Atletja kosovare, e cila është bursiste e Komiteti Olimpik i Kosovës në kuadër të programit për përgatitjet drejt Lojërat Olimpike Los Angeles 2028, vazhdon të tregojë formë të lartë dhe potencial të madh në arenën ndërkombëtare.

Suksesi i Bakraqit përbën një tjetër arritje të rëndësishme për atletikën kosovare dhe një motiv shtesë për përfaqësimin e Kosovës në garat e ardhshme evropiane dhe botërore.

Me këtë rast, urime për medaljen e fituar iu drejtuan Gresës dhe Federata Atletike e Kosovës për paraqitjen e suksesshme në këtë kampionat.

Sport

Kastrioti rikthen titullin në Ferizaj pas 15 vjetësh

Published

8 hours ago

June 1, 2026

UBTNews

Kastrioti është shpallur kampion i Kosovës në hendboll në konkurrencën e meshkujve, duke rikthyer trofeun në Ferizaj pas një pritjeje prej 15 vjetësh. Skuadra ferizajase triumfoi në serinë finale të plejofit ndaj Rahovecit me rezultat të përgjithshëm 3:1.

Ndeshja vendimtare u zhvillua të dielën mbrëma në Rahovec dhe solli shumë emocione deri në sekondat e fundit. Kastrioti arriti të fitojë me rezultat 25:23 pas një përballjeje dramatike, duke siguruar kështu titullin e kampionit.

Hero i finales ishte portieri tunisian Wadi Chebbi, i cili shkëlqeu me pritje të shumta gjatë gjithë takimit. Ai realizoi edhe një pritje vendimtare në minutën e fundit, duke i hapur rrugë festës së madhe të ferizajasve.

Më efikasi te Kastrioti ishte Yassine Henahen me shtatë gola, ndërsa Felippe Teixeira kontribuoi me pesë. Nga tri gola realizuan Alban Haziri, Festim Mustafa dhe Albin Ahlin.

Edhe te Rahoveci pati paraqitje të mira individuale. Portieri Arti Luzha ishte në nivel të lartë me disa pritje të rëndësishme, ndërsa Egzon Gjuka dhe Guilherme Fernandes shënuan nga pesë gola. Katër gola i realizoi Mali Luzha.

Kastrioti ishte në epërsi gjatë pjesës më të madhe të takimit, duke krijuar avantazh deri në katër gola në pjesën e dytë (21:17). Megjithatë, vendasit nuk u dorëzuan dhe arritën të barazonin rezultatin në 22:22 në minutën e 57-të, falë dy golave radhazi të Mali Luzhës.

Në momentet vendimtare, Henahen realizoi dy gola të rëndësishëm për mysafirët, ndërsa pas pritjes vendimtare të Chebbit, Alban Haziri vulosi fitoren me golin për 25:23.

Për Kastriotin, ky është titulli i gjashtë kampion në histori me këtë emër të klubit. Skuadra nga Ferizaj i dha fund dominimit të Rahovecit, që kishte fituar dy titujt e fundit kampionalë.

Ferizajasit e mbyllin sezonin në mënyrë të shkëlqyer, pasi përveç titullit kampion kanë fituar edhe Kupën e Kosovës, duke kompletuar kështu një edicion të suksesshëm.

Pas ndeshjes, trofeun e kampionit kapitenit të Kastriotit, Beni Sula, ia dorëzoi presidenti i Federatës së Hendbollit të Kosovës, Edin Kolgeci.