Sport

FFK-ja e mbajti Kuvendin e Jashtëzakonshëm për ndryshimet e nevojshme statutare, miratohen të gjitha pikat

Published

on

Federata e Futbollit e Kosovës ka mbajtur sot Kuvendin e Jashtëzakonshëm, në të cilin delegatët votuan për një sërë ndryshimesh statutare, me qëllim që statuti i FFK-së të jetë në përputhje të plotë me statutet e UEFA-s dhe FIFA-s, si dhe me Ligjin e ri të Sportit të Republikës së Kosovës.

Në këtë kuvend morën pjesë 50 delegatë, ndërsa të gjitha pikat e rendit të ditës u miratuan unanimisht. Mes tyre u votua edhe për përfaqësuesin e futbollistëve, Samir Ujkani, si anëtar i Komitetit Ekzekutiv të FFK-së.

Presidenti Agim Ademi, në fjalën e tij para delegatëve, u shpreh mirënjohës për bashkëpunimin dhe unitetin e treguar:

“Delegatë të nderuar, ju falënderoj që ju keni përgjegjur ftesës për Kuvend. Nuk e di pse, por sa herë ka kuvend unë ndihem i lumtur. Ky kuvend ma zgjon një ndjenjë se FFK është shumë e fuqishme. Kur juve ju shoh këtu si delegatë nga sfera të ndryshme të jetës që jepni shumë dhe keni sukses, e shoh që futbolli është në duar të sigurta. Jam shumë falënderues që ma keni besuar këtë bagazh mua. Do të vazhdojmë sigurisht bashkë për sa kohë që këtu jemi në të mirë të futbollit. Ju falënderoj edhe ju Komitet Ekzekutiv që jeni gjithmonë të gatshëm të kontriboni për zhvillimin e futbollit dhe ndani këtë barrë të madhe së bashku me mua”, tha presidenti Ademi në fjalën e tij.

Ai pas votimit të ndryshimeve statutare falënderoi delegatët unitetin dhe kompaktësinë që kanë treguar në të gjitha kohërat. ”E thanë edhe përfaqësuesit e UEFA-s e FIFA-s se futbolli gjithkund në botë duhet të jetë unik për të shkuar përpara. Tashmë të gjitha klubet dhe ne si FFK jemi në harmoni me Ligjin e Sportit dhe me statutet e UEFA-s e FIFA-s”.

Punimet e kuvendit, në emër të presidentit të FIFA-s Gianni Infantino dhe Sekretarit të Përgjithshëm të FIFA-s, Mattias Grafström i përshëndeti Marco Ferri, koordinator rajonal i FIFA-s. Ai theksoi bashkëpunimin e frytshëm me FFK-në dhe vuri në pah sukseset e kombëtares së Kosovës:

“Jemi mbledhur këtu për një kuvend të jashtëzakonshëm për ndryshimet statutore dhe tema të ndryshme. Kemi pasur një bashkëpunim shumë konstruktiv me FFK-në për ndryshimet statutore. Ne në FIFA e kemi çmuar transparencën që ka treguar Federata juaj dhe jemi të kënaqur që propozimet tona për ndryshime janë marrë parasysh. Besoj se ky bashkëpunim paraqet një shembull të ri të një bashkëpunimi të shkëlqyeshëm mes FFK-së dhe FIFA-s gjatë viteve të fundit”, tha ai.

Ai tutje uroi Kosovën për rezultatet e shkëlqyera që ka arritur me një seri prej pesë ndeshjeve me fitore dhe avancimin në Ligën B të Ligës së Kombeve. “Është me rëndësi të mos harrojmë se kjo është një arritje e jashtëzakonshme për një federatë e cila është bërë anëtare e FIFA-s as 10 vite më parë. Tani lajmi i keq është se Kosova, si kundërshtar, me të vërtetë është një paralajmërim për të tjerët. Kualifikimet për Botërorin 2026 nuk do të jenë fare të lehta, posaçërisht duke marrë parasysh grupin konkurrues, por ekipi juaj ka treguar talent dhe potencial, andaj besoj se në të ardhmen e afërt do të shkruani faqe të arta në historinë e futbollit tuaj”, tha tutje Ferri.

Në emër të presidentit të UEFA-s, Aleksandër Çeferin, fjalën e mori Jozef Klemen, i cili vuri theksin te uniteti dhe zhvillimi i futbollit:

“E dini të gjithë se para pak kohësh u mbajt Kongresi i UEFA-s në Beograd, ku fjala kyçe aty ishte bashkimi, mospërçarja. E dini se ka palë të shumta që po synojnë të na përçajnë, por është shumë me rëndësi të mbetemi të bashkuar. Futbolli ndërton ura, ndërsa politikanët ndërtojnë mure”, tha Klemen.

Ai tha se Kosova si një nga anëtaret më të reja të UEFA-s po bën zhvillim të rëndësishëm të futbollit brenda strategjisë së saj, duke u fokusuar në projekte të mëdha infrastrukturore.

“Jam shumë i kënaqur që fondet e HatTrick-ut të UEFA-s po shfrytëzohen në mënyrën më të mirë për zhvillimin e futbollit në Kosovë. Ju uroj për suksesin e treguar me Kombëtaren, sidomos për fitoren në play-off kundër Islandës. Besoj se nga rezultati i treguar, Vedat Muriqi tashmë është heroi i vendit tuaj. Nëse vazhdoni kështu, Kosova do të jetë pjesë e kampionateve të mëdha”, shtoi ai.

Një fjalë përshëndetëse mbajti edhe ushtruesi i detyrës së Kryeshefit të Agjencionit për Sport në MKRS, Fidan Shatri, i cili theksoi rëndësinë e Ligjit të ri të Sportit dhe mbështetjen për organizatat sportive:

“Ligji i ri për Sport ka sjellë rregulla të qarta për të gjitha organizatat sportive. Si Komision i Licencimit gjithmonë kemi qenë të gatshëm të ofrojmë mbështetje për organizatat sportive, por njëherësh edhe të monitorojmë ligjshmërinë e tyre në koordinim me organizatat sportive ndërkombëtare”, tha ai.

Sport

Mourinho largohet nga konferenca për shtyp pas pyetjes për Cristiano Ronaldon

Published

on

By

Trajneri i Real Madridit, Jose Mourinho, ka lënë konferencën për shtyp para ndeshjes ndaj Celta Vigos, pasi u pyet për Cristiano Ronaldon dhe të ardhmen e Përfaqësueses së Portugalisë pa yllin portugez.

Gazetarët e pyetën Mourinhon se si e sheh kombëtaren portugeze në periudhën pas Ronaldos, por trajneri portugez nuk deshi të komentonte më shumë për këtë temë.

“Jo, jo, jo, jo, jo. Si portugez, e vetmja gjë që them është se Portugalia duhet të fitojë gjithmonë. Për të tjerat nuk flas dhe nuk them asgjë. Faleminderit”, u shpreh Mourinho.

Pas kësaj përgjigjeje, ai u ngrit nga karrigia dhe u largua nga salla, duke mos lënë hapësirë për pyetje të tjera rreth kësaj çështjeje.

Ndërkohë, pjesa më e madhe e konferencës ishte përqendruar te Vinicius Junior. Sulmuesi brazilian është rikthyer në skuadër pas një pezullimi prej katër ndeshjesh, ndërsa vjen pas një paraqitjeje mbresëlënëse me Përfaqësuesen e Brazilit, ku realizoi pesë gola në dy ndeshje miqësore ndaj Singaporit dhe Japonisë.

D.L

Continue Reading

Sport

Trepça – Bashkimi, derbi i madh i xhiros së dhjetë në Superligën e basketbollit

Published

on

By

Pas angazhimeve në garat evropiane, Trepça dhe Bashkimi rikthehen në parketin e Superligës së Kosovës në basketboll, ku këtë fundjavë i pret një përballje e drejtpërdrejtë për kreun e tabelës.

Kampioni dhe nënkampioni i Kosovës do të përballen të dielën, nga ora 17:00, në palestrën “Minatori” në Mitrovicë, në kuadër të xhiros së dhjetë të elitës së basketbollit kosovar.

Trepça vjen në këtë përballje pas fitores ndaj Splitit të Kroacisë në FIBA Europe Cup, në ndeshjen e zhvilluar të mërkurën në Mitrovicë.

Në anën tjetër, Bashkimi pësoi humbje në shtëpi nga Manchesteri i Anglisë, duke e mbyllur rrugëtimin në garën evropiane.

Megjithatë, prizrenasit kanë aktualisht pozitën e parë në kampionat me 16 pikë, aq sa kanë edhe Trepça në vendin e dytë dhe Bora në të tretin. Bashkimi kryeson falë koshdallimit më të mirë.

Në përballjen e parë të këtij edicioni, të zhvilluar në Prizren në kuadër të xhiros së tretë, Bashkimi kishte triumfuar me rezultat 84:76.

Xhiroja e dhjetë nis të shtunën me dy ndeshje. Nga ora 17:00, në palestrën “13 Qershori” në Suharekë, Golden Eagle Ylli e pret Sigal Prishtinën. Ylli renditet i katërti me 14 pikë, ndërsa Prishtina zë vendin e pestë me 12 pikë.

Nga ora 19:30, Rahoveci 029 përballet me Borën e Prishtinës. Rahovecianët ndodhen në fund të tabelës me 11 pikë, aq sa kanë edhe Peja në pozitën e gjashtë dhe Vëllaznimi në të shtatën.

Xhiroja përmbyllet të dielën me duelin Vëllaznimi – Peja, që zhvillohet nga ora 19:30 në Gjakovë.

Peja synon t’i japë fund serisë prej shtatë humbjesh radhazi në kampionat, ndërsa Vëllaznimi kërkon të shfrytëzojë përparësinë e terrenit vendas.

Ndërkohë, te skuadra pejane ka pasur edhe zhvillime në përbërjen e ekipit. Klubi ka suspenduar basketbollistin Daquan Bracey, ndërsa ka zyrtarizuar transferimin e Kyan Andersonit.

D.L

Continue Reading

Sport

Duka kërkon ndryshime në projektligjin për sponsorizimet: Fondi për sportin të arrijë në 10 miliardë lekë

Published

on

By

Presidenti i Federatës Shqiptare të Futbollit (FSHF), Armand Duka, ka kërkuar ndryshime të rëndësishme në projektligjin për donacionet dhe sponsorizimet, duke vlerësuar se nisma e qeverisë është një hap pozitiv për sportin, por ka nevojë për plotësime konkrete për të garantuar financim të qëndrueshëm.

Përmes një reagimi në faqen zyrtare të FSHF-së, Duka ka përshëndetur diskutimet institucionale për këtë çështje, duke rikujtuar se komuniteti i futbollit prej më shumë se një dekade kërkon lehtësira dhe mekanizma më të mirë për nxitjen e sponsorizimeve.

Sipas tij, vetëm FSHF-ja dhe anëtarët e saj kanë paguar 342 milionë e 400 mijë e 806 lekë në tatime dhe kontribute gjatë vitit 2025.

Duke iu referuar studimit të UEFA-s GROË SROI, Duka ka theksuar edhe ndikimin ekonomik, social dhe shëndetësor të futbollit. Sipas të dhënave të vitit 2020, përfitimet nga pjesëmarrja në këtë sport vlerësoheshin në rreth 46 milionë euro në vit, ndërsa me rritjen e numrit të futbollistëve të regjistruar nga 18.587 në 25 mijë, kjo vlerë tashmë llogaritet në rreth 70 milionë euro në vit.

Për këtë arsye, kreu i FSHF-së kërkon që një pjesë e këtij kontributi ekonomik të rikthehet në sport, përmes mbështetjes për fëmijët, akademitë, klubet dhe infrastrukturën sportive.

Ndër propozimet kryesore të Dukës është që sponsorizimi të njihet si pagesë alternative e tatimit mbi fitimin, brenda kufirit prej 30 për qind dhe kushteve të përcaktuara me ligj.

Ai kërkon gjithashtu që fondi i përgjithshëm vjetor për sponsorizimet të rritet në së paku 10 miliardë lekë, nga dy miliardë sa parashihet në projektligjin aktual për artin, kulturën dhe sportin. Sipas tij, ky fond duhet të rritet çdo vit në përputhje me zhvillimin ekonomik dhe të ardhurat tatimore.

Një tjetër kërkesë është përcaktimi i një kuote të garantuar për futbollin, me ndarje transparente të mjeteve për federatën, klubet e kategorive të ndryshme dhe akademitë, në mënyrë që përkrahja të mos përqendrohet vetëm te klubet e mëdha.

Duka ka kërkuar edhe heqjen e miratimeve paraprake për secilën kontratë sponsorizimi, duke propozuar që kriteret të përcaktohen qartë me ligj, ndërsa kontrolli të realizohet përmes dokumentimit dhe mbikëqyrjes financiare e ligjore.

Në fokus të propozimeve është edhe ndarja e një pjese të fondeve për ndërtimin dhe përmirësimin e fushave sportive dhe hapësirave stërvitore.

Sipas Dukës, vetëm përmes një fondi më të madh dhe rregullave të qarta mund të krijohen kushte më të mira për zhvillimin e sportit, rritjen e numrit të fëmijëve që merren me aktivitete sportive dhe qëndrueshmërinë financiare të klubeve në të gjithë Shqipërinë.

Në fund, FSHF-ja ka shprehur gatishmërinë për të vazhduar bashkëpunimin me qeverinë, Kuvendin dhe institucionet e tjera, me synimin që projektligji të sjellë përfitime konkrete për sportin shqiptar.

D.L

Continue Reading

Sport

Real Madridi rinovon me Thibaut Courtois deri në vitin 2028

Published

on

By

Real Madridi ka zyrtarizuar vazhdimin e bashkëpunimit me portierin belg Thibaut Courtois, i cili ka nënshkruar kontratë të re me klubin madrilen deri në vitin 2028.

Marrëveshja e mëparshme e 34-vjeçarit skadonte në fund të këtij sezoni, por palët kanë arritur dakordim për ta vazhduar bashkëpunimin edhe për dy vjet të tjera.

Courtois vazhdon të jetë një prej figurave kryesore të skuadrës së drejtuar nga Real Madridi, duke ruajtur statusin e portierit të parë dhe një rëndësi të veçantë në formacion.

Gardiani belg ka pasur paraqitje të mira edhe këtë sezon, duke qenë një prej lojtarëve kyç në serinë prej tetë fitoreve radhazi që madrilenët kanë regjistruar në të gjitha garat.

Që nga transferimi në “Santiago Bernabeu”, Courtois ka zhvilluar gjithsej 348 ndeshje me fanellën e Real Madridit dhe ka fituar 14 trofe.

Me këtë rinovim, gjiganti spanjoll siguron vazhdimësinë e një prej lojtarëve më të rëndësishëm të skuadrës, ndërsa synon të rikthehet te trofetë dhe të jetë protagonist në garat vendore dhe evropiane.

D.L

Continue Reading

Të kërkuara