Me 66 vota për, 32 kundër dhe 5 abstenime, Kuvendi i Kosovës ka miratuar në parim projektligjin mbi ndarjet buxhetore për Buxhetin e Republikës së Kosovës për vitin 2026.

Pas votimit në lexim të parë, shefja e Grupit Parlamentar të Lëvizja Vetëvendosje, Arbërie Nagavci, propozoi që shqyrtimi i projektligjit në lexim të dytë të bëhet me shmangie nga afatet e rregullta procedurale.

Sipas propozimit të saj, amendamentet në projektligj duhet t’i dorëzohen Komisionit për Buxhet deri më 18 shkurt në ora 16:00, ndërsa komisionet parlamentare deri më 19 shkurt në ora 12:00 duhet ta shqyrtojnë projektligjin dhe raportet me rekomandime t’ia paraqesin Komisionit funksional për Buxhet.

Tutje, Komisioni për Buxhet deri më 19 shkurt në ora 24:00 pritet të paraqesë raportin me rekomandime për shqyrtim të dytë në seancën plenare, ndërsa shqyrtimi i dytë i projektligjit është paraparë të mbahet më 20 shkurt në ora 11:00.

Zyra për Komunikim e Kryeministrit ka bërë të ditur Programin e manifestimeve shtetërore për shënimin e 18-vjetorit të Pavarësisë së Republikës së Kosovës. Aktivitetet do të zhvillohen gjatë gjithë ditës, me ceremoni shtetërore, homazhe dhe aktivitete kulturore në nderim të historisë dhe sakrificës për liri.

Manifestimet nisin në orën 7:00 me ngritjen solemne të Flamurit të Republikës së Kosovës në oborrin e Qeverisë. Më pas, në orën 7:20, mbahet mbledhja solemne e Qeverisë së Republikës së Kosovës.

Në vazhdim të agjendës, do të zhvillohen homazhe dhe nderime në disa prej pikave më të rëndësishme përkujtimore në kryeqytet dhe jashtë tij. Në orën 7:30 do të bëhen nderime te Monumenti i të Pagjeturve në Sheshin “Ibrahim Rugova”, ndërsa në 7:35 homazhe te Pllaka Përkujtimore e Fëmijëve të Vrarë në oborrin e Presidencës.

Në orën 8:00 dhe 8:10 do të bëhen homazhe te varri i ish-Presidentit Ibrahim Rugova dhe te varri i veprimtarit Adem Demaçi, në Varrezat e Velanisë.

Në orën 9:00 do të zhvillohen homazhe në Kompleksin Memorial Kompleksi Memorial Adem Jashari në Prekaz, në nderim të familjes Jashari dhe të rënëve për liri.

Seanca solemne e Kuvendi i Kosovës do të mbahet në orën 10:30, ndërsa në 11:25 do të bëhen nderime te Monumenti “Heroinat” në rrugën “Luan Haradinaj”. Në orën 11:30 do të mbahet parakalimi i trupave të Forca e Sigurisë së Kosovës dhe të Policia e Kosovës.

Dita përmbyllet me pritjen shtetërore në orën 17:30, të organizuar nga Presidentja, Kryetari i Kuvendit dhe Kryeministri i Republikës së Kosovës, si dhe me koncertin solemn të Filharmonia e Kosovës në orën 20:00, në Sallën e Kuqe të Pallatit të Rinisë.

Kosova shpalli pavarësinë më 17 shkurt 2008, pas një periudhe të gjatë administrimi ndërkombëtar dhe përpjekjesh politike për zgjidhjen e statusit të saj. Shpallja e pavarësisë u bë nga përfaqësuesit e popullit në Kuvendin e Kosovës, duke e shpallur Kosovën shtet të pavarur dhe sovran.

Deri më sot, Republikën e Kosovës e kanë njohur mbi 100 shtete.

Presidentja e Republikës së Kosovës, Vjosa Osmani, priti sot në takim Kryeministrin e Republikës së Shqipërisë, Edi Rama, ku u fokusuan mbi zhvillimet rajonale dhe forcimin e marrëdhënieve ndërmjet dy vendeve.

Sipas Presidentes Osmani, një nga temat kryesore të diskutimit ishte “koordinimi i ngushtë politik dhe institucional, si dhe përkushtimi i ndërsjellë për intensifikimin e bashkëpunimit në politikën e jashtme, në funksion të avancimit të interesave të përbashkëta strategjike”.

Liderët nënvizuan rëndësinë e bashkëpunimit të vazhdueshëm Kosovë–Shqipëri si një faktor stabiliteti dhe paqeje në rajon, si dhe rolin konstruktiv të dy shteteve në iniciativa ndërkombëtare që promovojnë paqen dhe dialogun.

Diskutimet përfshinë gjithashtu bashkëpunimin në kuadër të Bordit të Paqes dhe angazhimin e përbashkët në iniciativa globale që mbështesin sigurinë dhe vlerat demokratike.

Në takim u riafirmua gjithashtu vullneti për thellimin e partneritetit ekonomik dhe realizimin e projekteve të përbashkëta që sjellin përfitime direkte për qytetarët e të dy vendeve. Presidentja Osmani përgëzoi Kryeministrin Rama për progresin e Shqipërisë në rrugën drejt Bashkimit Evropian, duke e konsideruar këtë një përparim që forcon perspektivën evropiane të gjithë rajonit.

Në përmbyllje, Kryeministri Rama e uroi Presidenten Osmani dhe popullin e Kosovës për 18-vjetorin e Pavarësisë, duke rikonfirmuar mbështetjen e palëkundur të Shqipërisë për shtetin e Kosovës dhe të ardhmen e saj euroatlantike.

Sipas programit zyrtar, në ora 15:00, Kryeministri Rama do të zhvillojë edhe një takim me Kryeministrin e Kosovës, Albin Kurti.

Në një ceremoni solemne të mbajtur në Parkun Edukativ, Shkencor, Inovativ dhe Teknologjik, shpalli ndarjen e “Dekoratës Jetësore të Nderit” për Familjen Jashari, në shenjë mirënjohjeje për guximin, rezistencën heroike dhe sakrificën e tyre në luftën për liri, drejtësi dhe pavarësi. Dekorata iu dorëzua Rifat Jashari, si përfaqësues i familjes, duke bërë këtë një akt institucional nderimi dhe respekti moral para historisë.

Presidenti i UBT-së, Edmond Hajrizi, gjatë fjalës së tij me rastin e 18-vjetorit të Pavarësisë së Kosovës dhe 25-vjetorit të themelimit të UBT-së, theksoi se Familja Jashari simbolizon sakrificën sublime për lirinë dhe pavarësinë e vendit. Ai citoi ish-administratorin ndërkombëtar Bernard Kouchner:

“Sikur të kishte Çmim Nobel të Lirisë, ai do t’i takonte Familjes Jashari”.

Tutje, Hajrizi shtoi: “Me flijimin e familjes Jashari, në krye me Komandantin Legjendar Adem Jashari, kjo familje i dha Kosovës lirinë dhe vendosi standardin moral; se liria nuk fitohet pa gjak, se dinjiteti nuk mbrohet pa sakrificë dhe se e ardhmja duhet të ndërtohet mbi kujtesën tonë kombëtare e historike.”

Në fjalën e tij, Hajrizi theksoi edhe rrugëtimin 25-vjeçar të UBT-së, duke e konsideruar universitetin një akt besimi në të ardhmen e vendit dhe një përgjigje ndaj nevojës për arsim cilësor me standarde ndërkombëtare. Ai vuri në pah rangimet dhe sukseset ndërkombëtare të UBT-së, duke theksuar se liria merr kuptim të plotë vetëm kur shndërrohet në dije, punë dhe vizion.

UBT, gjatë 25 viteve të saj, ka edukuar mijëra të rinj në Kosovë, ka dhënë kontribut shkencor dhe inovativ në nivel global, dhe ka marrë pjesë aktive në ndërtimin e institucioneve dhe organizatave të vendit. Bazuar në këto rezultate, UBT është përzgjedhur si universiteti më i mirë në botë për angazhimin dhe impaktin në shoqëri nga Organizata Botërore për Rankimin e Universiteteve, duke lënë pas universitete shumë prestigjioze ndërkombëtare.

Institucione të njohura ndërkombëtare që e kanë vlerësuar UBT-në për performancën dhe inovacionin përfshijnë: SCImago Institutions Rankings, World University Rankings for Innovation (WURI), Association of Chartered Certified Universities (ACCU), Times Higher Education.

Hajrizi përfundoi ceremoninë duke rikujtuar rëndësinë e trashëgimisë historike dhe duke theksuar përgjegjësinë e UBT-së për të vazhduar misionin e edukimit të brezave të rinj.