Kryeministri i Shqipërisë Edi Rama mikpriti një ditë më parë në Tiranë, Presidentin e Emirateve të Bashkuara Arabe Mohamed bin Zayed Al Nahyan, i cili vizitoi për herë të parë Shqipërinë si President i EBA, në krye të një delegacioni të nivelit të lartë.

Rama ka publikuar në rrjetet sociale momente nga ceremoni mirëseardhjes në Pallatin e Brigadave, nga takimi kokë më kokë si dhe nga marrëveshjet e nënshkruara mes dy vendeve.

Kryeministri e cilëson një vizitë historike, ardhjen për herë të parë në Shqipëri të Presidentit të Emirateve të Bashkuara, Sheikh Mohamed Bin Zayed Al Nayan.

Ai thekson se gjatë këtij takimi vendosën piketa të reja bashkëpunimi në një rrugë miqësie vëllazërore.

Në praninë e Kryeministrit Rama dhe Presidentit të EBA Mohamed bin Zayed Al Nahyan, u shkëmbyen marrëveshjet e nënshkruara të bashkëpunimit mes palëve, shkruan ATSH.

Në një ceremoni të posaçme u shkëmbye marrëveshja Kuadër për Veprim mes Masdar, TAQA, KESH dhe OST mes Zëvendëskryeministres dhe ministres së Infrastrukturës dhe Energjisë, Belinda Balluku, si dhe kryetarit të MASDAR, Sulltan Al Jaber.

Gjithashtu, u shkëmbye Letër Angazhimi për Projektin Albania Smart City ndërmjet “Presight AI Ltd” dhe Ministrisë së Brendshme e Republikës së Shqipërisë, mes ministrit të Brendshëm, Ervin Hoxha dhe Kryetarit të “Presight AI Ltd”, Sulltan Al Jaber.

Komisioni Evropian ka paralajmëruar Malin e Zi se mund të humbasë fonde nga Plani i Rritjes nëse nuk tërheq vendimet për ndryshimet në regjimin e vizave për vendet e treta deri në fund të shkurtit 2025. Ky paralajmërim erdhi pas faktit që Mali i Zi shtoi Bahrein në regjimin pa viza dhe ndryshoi statusin e Arabisë Saudite nga vizë sezonale në të përhershme. Për të përmbushur hapat e Agjendës së Reformës, Mali i Zi duhet të heqë dy vende nga regjimi i tij pa viza.

Qeveria e Malit të Zi ka mbrojtur vendimin e saj, duke theksuar se ky hap është në interes të zhvillimit ekonomik, veçanërisht për turizmin dhe investimet, dhe ka premtuar të punojë me BE-në për të gjetur zgjidhje që balancojnë interesat ekonomike dhe detyrimet për integrimin evropian.

Opozita e ka parë këtë veprim si një kërcënim për integrimin evropian të Malit të Zi, duke akuzuar partitë në pushtet për shkatërrimin e institucioneve shtetërore dhe sistemit të sigurisë.

Përveç kësaj, grupi studentor “Kamo Sjutra” ka ngritur padi për shpifje kundër Partisë Demokratike të Malit të Zi, duke akuzuar zyrtarët e partisë për akuzat të pavërteta ndaj organizatorëve të protestës studentore. Protestat vazhdojnë, me kërkesa për dorëheqjen e drejtuesve të sektorit të sigurisë pas një masakre në Cetinë, që la 13 të vdekur dhe 3 të plagosur. Protestat gëzojnë mbështetje të gjerë nga publiku i cili është i shqetësuar për ngadalësinë e reformave të policisë dhe problemet e tjera të brendshme të qeverisë./UBTNews/

Është ndarë nga jeta kryetari i Shoqatës “Zëri i Prindërve”, Bajram Qerkini. Qerkini vdiq pas një sëmundje që e mbajti shtrirë që disa muaj. Kështu është bërë me dije nga familjët e tij.

Varrimi i tij do të bëhet ditën e martë, më 25 shkurt 2025, në orën 12:00, në varrezat e qytetit në Shipol të Mitrovicës.

“Sot i mbylle sytë për të kaluar në amshim. Vdekja të mori dhe të ngjiti në Olimpin e njerëzve që lanë gjurmë për këtë vend. Vërtet, të Zotit jemi dhe vetëm tek Ai është kthimi. Ti sot shkove te Lartmadhëria e Tij. Sëmundja që të mbajti shtrirë tash e tre muaj ishte pushimi për një jetë plot sakrifica dhe brenga.

Sot, u bashkohesh Babës Zenel dhe Babës Sadik, të cilët ndërruan jetë pa e ditur fatin e baballarëve të tyre. Ti shkove me boshllëkun për Reshatin. Njëzet e pesë vite përpjekje për të ditur fatin e djalit dhe të personave të tjerë të pagjetur nga lufta në Kosovë. Njëzet e pesë vite me veshin dhe syrin hapur, duke pritur një lajm për ta. I mbylle sytë dhe veshët sot, pa e marrë atë lajm”, thuhet në njoftimin e familjarëve.

Për rreth 25 vite Qerkini është përpjekur për të ditur fatin e djalit të tij dhe të personave të tjerë të pagjetur nga lufta në Kosovë.