Sport

Ademi: FIFA po i pranon të gjitha projektet e FFK-së

Agim Ademi javë më parë u rizgjodh në krye të federatës edhe për një mandat të ri katërvjeçar.

Published

4 years ago

May 31, 2022

Betim Gashi

Presidenti i Federatës së Futbollit të Kosovës, Agim Ademi ka dhënë një intervistë të shkurtër për faqen zyrtare të FIFA-s. Ai së fundi ishte i pranishëm në Paris ku vizitoi zyret e hapura nga FIFA në këtë qytet dhe vlerësoi se këto zyre do të mundësojnë qasje shumë më të lehtë për Federatën e Futbollit të Kosovës si dhe mundëson një bashkëpunim më të fuqishëm mes dy institucioneve.

“Në FIFA kemi ardhur sot me kërkesën tonë për të vizituar zyret e FIFA-së dhe ishim të surprizuar kur e pamë edhe presidentin Infantino sepse kemi rënë në kontakt me njerëzit të cilët do të punojnë në këtë zyrë. Është shumë mirë që është bërë kjo zyrë dhe është shumë më e lehtë qasja jonë me FIFA-në në Paris sepse Parisi është edhe më atraktiv dhe secili njëri dëshiron të jetë në Paris, jo vetëm për të parë zyret e FIFA-së por edhe për ta vizituar Parisin”, tha Ademi.

Më tutje, i pari i FFK-së tregon se cila ishte tema e diskutimit gjatë kësaj vizite dhe shtoi se FIFA vazhdon të përkrah të gjitha projektet që FFK i propozon për zhvillimin e futbollit në Kosovë.

“Sot diskutuam rreth çështjes së futbollit gjithsesi, federatave tona sepse ishim bashkë me presidentin e Federatës së Shqipërisë Armand Duka dhe sigurisht që të gjitha projektet të cilat i kemi në të ardhmen sot diskutuam për to dhe do t’i vazhdojmë…Rezultatet tona janë shumë të dukshme për vet faktin që FIFA ka bërë të gjitha projektet të cilat ne i kemi dorëzuar në FIFA, asnjë projekt nuk na është refuzuar , të gjitha projektet janë të aprovuara dhe mund të them lirisht që ne jemi zhvilluar krahas ndihmës dhe suportit të FIFA-s.

Agim Ademi javë më parë u rizgjodh në krye të federatës edhe për një mandat të ri katërvjeçar.

Sport

Kosova U20 niset drejt Bratislavës për Kampionatin Evropian

Published

17 hours ago

July 8, 2026

UBTNews

Përfaqësuesja e Kosovës U20 në konkurrencën e djemve do të marrë pjesë në FIBA U20 EuroBasket 2026, Divizioni B, që do të zhvillohet nga 10 deri më 19 korrik në Bratislavë të Sllovakisë.

Dardanët e rinj do të synojnë paraqitje sa më të mira në arenën evropiane dhe do të luftojnë për një renditje sa më të lartë në këtë kampionat. Kosova është pjesë e Grupit D, ku do të përballet me Qipron, Bosnje e Hercegovinën, Portugalinë, Islandën dhe Armeninë.

Para nisjes së Evropianit, përzgjedhësi Andin Rashica ka bërë publike listën përfundimtare me 12 basketbollistët që do ta përfaqësojnë Kosovën në këtë garë.

Lista e Kosovës U20:

Erolt Rrahmani
Ambri Bedra
Andi Ahmeti
Elon Hasanaj
Eden Cingu
Oltion Shatri
Mal Tusuni
Drin Tafilaj
Mal Syla
Orion Beseni
Lir Zeneli
Noa Istrefi

Përzgjedhës i ekipit është Andin Rashica, ndërsa pjesë e stafit teknik janë edhe ndihmësit Elbesar Gështenja dhe Granit Makolli.

D.L

Sport

Belgjika mposht bindshëm SHBA-në dhe siguron çerekfinalen e Botërorit

Published

24 hours ago

July 8, 2026

UBTNews

Belgjika është kualifikuar në çerekfinale të Kupës së Botës 2026, pasi mposhti bindshëm Shtetet e Bashkuara të Amerikës me rezultat 4:1 në ndeshjen e zhvilluar në Seattle, para 66.925 shikuesve.

Edhe pse ishte një nga përballjet më të përfolura të këtij Botërori për shkak të zhvillimeve jashtë fushës, sfida në fushën e lojës u dominua nga belgët.

Charles De Ketelaere kaloi Belgjikën në epërsi në minutën e nëntë, ndërsa Malik Tillman barazoi shifrat për SHBA-në në minutën e 31-të. Gëzimi i amerikanëve zgjati pak, pasi vetëm dy minuta më vonë De Ketelaere realizoi golin e dytë personal për t’i rikthyer epërsinë belgëve.

Në pjesën e dytë, Hans Vanaken shënoi për 3:1 në minutën e 57-të, ndërsa Romelu Lukaku vulosi fitoren me golin e realizuar në kohën shtesë, në minutën e 93-të.

Para ndeshjes pati zhvillime që shkaktuan reagime të shumta në botën e futbollit. FIFA vendosi të pezullojë dënimin me një ndeshje moslojë të sulmuesit amerikan Folarin Balogun, i cili ishte ndëshkuar me karton të kuq në sfidën e kaluar. Sipas raportimeve, vendimi erdhi pasi presidenti i SHBA-së, Donald Trump, zhvilloi një bisedë telefonike me presidentin e FIFA-s, Gianni Infantino, duke kërkuar rishqyrtimin e kartonit të kuq të Balogun. Sulmuesi ishte titullar ndaj Belgjikës, por nuk arriti të lërë gjurmë në ndeshje.

Me këtë fitore, Belgjika avancon në çerekfinale, ku do të përballet me Spanjën.

D.L

Sport

Argjentina siguron çerekfinalen pas një përmbysjeje dramatike ndaj Egjiptit

Published

24 hours ago

July 8, 2026

UBTNews

Argjentina ka siguruar një vend në çerekfinalet e Kupës së Botës 2026, pasi mposhti Egjiptin me një përmbysje dramatike në ndeshjen e zhvilluar mbrëmjen e djeshme në Atlanta.

Kampionët në fuqi treguan edhe një herë karakterin e tyre, duke reaguar pasi mbetën në disavantazh dhe duke arritur një fitore të rëndësishme që i mban në garë për mbrojtjen e titullit.

Pas suksesit të vështirë ndaj Kepit të Gjelbër në raundin e 1/16, skuadra e drejtuar nga Lionel Scaloni dëshmoi se di të fitojë edhe në momentet më të vështira. Vendosmëria, intensiteti dhe lufta deri në sekondën e fundit ishin elementët që bënë diferencën.

Leandro Paredes, Julián Álvarez dhe Lautaro Martínez ishin ndër protagonistët kryesorë, duke dhënë kontribut të madh në rikthimin e Argjentinës. Veprimet e tyre vendimtare simbolizuan shpirtin luftarak që ka karakterizuar këtë brez futbollistësh.

Pas ndeshjes, u rikujtua edhe deklarata e Lionel Messit, i cili kishte thënë: “Njerëzit duhet të kenë besim, ky grup nuk do t’i zhgënjejë.“ Një mesazh që vazhdon të pasqyrojë karakterin e kësaj skuadre, e cila edhe një herë tregoi se nuk dorëzohet kurrë.

Me këtë fitore të arritur mbrëmjen e djeshme, Argjentina avancon në çerekfinale dhe vazhdon rrugëtimin drejt mbrojtjes së titullit botëror.

Burimi: ESPN

D.L

Lajmet

Zvicra mposht Kolumbinë me penallti dhe prek çerekfinalen historike në Kupën e Botës

Published

1 day ago

July 8, 2026

UBTNews

Zvicra ka siguruar një vend në çerekfinalen e Kupës së Botës pas një drame të vërtetë nga pika e bardhë, ku mposhti Kolumbinë me rezultatin 4:3. Koha e rregullt dhe vazhdimet e ndeshjes së zhvilluar të martën mbrëma nuk ofruan gola dhe as shumë spektakël në fushë, duke bërë që gjithçka të vendosej në serinë e penalltive, e cila dhuroi emocione të jashtëzakonshme për tifozët.

Seria e gjuajtjeve nisi me saktësi nga kolumbianët, por kapiteni Granit Xhaka u përgjigj menjëherë duke realizuar me siguri. Gjerat u ndezën në serinë e dytë kur Davinson Sanchez i Kolumbisë goditi traversën, por helvetikët gabuan në serinë e tretë përmes Manuel Akanjit, i cili e dërgoi topin lart mbi portë. Heroi i mbrëmjes doli të jetë portieri Gregor Kobel, i cili në serinë e katërt ndali gjuajtjen e Cucho Hernandezit, duke shënuar edhe momentin vendimtar të kësaj përballjeje. Më pas, Cedric Itten, Luis Diaz dhe në fund Ruben Vargas u treguan të saktë, me këtë të fundit që nisi festën e madhe të zviceranëve.

Ky kualifikim mban një peshë të jashtëzakonshme historike, pasi Zvicra nuk kishte prekur fazën çerekfinale të një Botërori që nga viti i largët 1954. Suksesi i madh mban vulën e Granit Xhakës, i cili po vazhdon të shkruajë histori me fanellën helvetike, ndërsa në këtë arritje kontribuoi edhe Ardon Jashari, i cili luajti gjatë pjesës së parë. Në raundin tjetër, Zvicra do të ketë një punë edhe më të vështirë, ku do të përballet me Argjentinën për një vend në gjysmëfinale./E.A/