Oda Ekonomike e Kosovës ka përgatitur kërkesëpadinë për Gjykatën Supreme ndaj të paditurës Zyrës së Rregullatorit për Energji(ZRRE). Sipas tyre kjo kërkesëpadi është ushtruar me qëllim të mbrojtjes së bizneseve, ekonomisë së Kosovës dhe e mbrojtjen e qytetarëve të Republikës së Kosovës si konsumatorë të fundit.

Kryetari i Odës Ekonomike të Kosovës, Lulzim Rafuna, thekson se kjo odë, ka besim se drejtësia do të vendoset në të mirë të bizneseve, ekonomisë së vendit dhe duke marrë për bazë interesin publik të shtetit të Kosovës.

“Hapat e parë janë hapat ligjor, dihet që ne do t’i shfrytëzojmë të gjitha mekanizmat ashtu siç edhe e kemi misionin si Odë Ekonomike e Kosovës e themeluar me ligj dhe ne sot do t’i drejtohemi Gjykatës Supreme me kërkesë padi për anulimin e të gjitha akteve të Zyrës së Rregullatorit të Energjisë elektrike, po flas për aktet administrative. Deri sa në Gjykatën Komerciale nuk e kemi pasur një të drejtë ligjore të tillë që në emër të biznesit të shkojmë me padi ose me ankesë, ku kemi gjetur një hapësirë ligjore që në Gjykatën Supreme mund të drejtohemi në emër të anëtarëve dhe jo-anëtare të bizneseve”, deklaron Rafuna.

Ai po ashtu përmend se tashmë, 90 për qind e bizneseve që figurojnë në listat e KEDS dhe KESCO për shkyçje të energjisë elektrike veçse u janë ndërprerë kontratat dhe kanë mbetur pa energji elektrike.

“Sipas të dhënave që kemi nga KEDS dhe KESCO, janë 450 biznese që janë shkyçur deri më tani. Sipas njoftimit të tyre, kjo përbën nëntëdhjetë përqindëshin e atyre që i kanë në listë për shkyçje.”, theksoi ai

Ndërsa, biznesmeni Ramiz Kelmendi tha se për arsye të shkyçjes së energjisë elektrike do të ketë rritje të shpenzimeve, e kjo rritje sipas tij do të shtyjë në reduktimin e punonjësve, rritjen e çmimeve të produkteve.

Ai poashtu theksoi se për shkak të tregut të lirë ose çmimit të lartë të energjisë elektrike, shpenzimet totale të biznesit të tij do të rriten me 20 për qind.

“Oda duhet të dijë se janë disa veprimtari që nuk mund të shtyhen në mënyrë fizike por duhet të shtyhen në mënyrë juridike dhe profesionale. Situata duhet të zgjidhet përmes gjykatës, bisedave me institucione, me u paraqit të institucionet, takime grupore, me shkua në zyrat e tyre, me prit në zyrat e tyre, me nxjerrë në pah raportin që ekziston me institucionet dhe bizneset, duke i trajtuar bizneset sikur të dëmshme, si oligarkë. Duhet përfaqësuesit e odave të shkojnë atje dhe të presin publikisht në takim kryeministrin, presidenten dhe institucionet drejtpërdrejtë”, shprehet ai.

Dhoma e Tregtisë dhe Industrisë Kosovë përmes një reagimi ka thënë se procesi ka një mori shkeljesh ligjore dhe procedural, derisa ka apeluar Qeverinë e Kosovës dhe ZRRE-në që të pezullojnë menjëherë zbatimin e vendimit dhe të hapin një proces të rishqyrtimit transparent.

Instituti Demokratik i Kosovës (KDI) vlerëson se aktgjykimi i plotë i publikuar nga Gjykata Kushtetuese përbën një zhvillim të rëndësishëm drejt rivendosjes së rendit kushtetues dhe institucional, dhe se Kuvendi duhet të rifillojë menjëherë konstituimin.

Sipas KDI-së, përmes këtij vendimi, Gjykata ka sqaruar kufijtë kushtetues të seancës konstituive dhe ka konstatuar se veprimet e ndërmarra dhe seancat e mbajtura pas 26 qershorit ishin në kundërshtim me aktgjykimin e mëparshëm KO124/25.

KDI po ashtu vlerëson se është konstatuar se Kryesuesi i seancës, në ushtrimin e kompetencave të tij, ka tejkaluar mandatin kushtetues, duke ndryshuar rendin e ditës dhe shtyrë përpara veprime që bien ndesh me detyrimet e përcaktuara qartë nga Gjykata.

“Me këtë vendim, është rikthyer qartësia kushtetuese mbi rolin dhe përgjegjësitë e të gjitha palëve në këtë fazë të ndjeshme politike” theksoi KDI.

Ata i bëjnë thirrje Kryesuesit të seancës konstituive, z. Avni Dehari, që të thërrasë sa më parë vazhdimin e seancës konstituive dhe të përmbushë detyrimet që rrjedhin prej aktgjykimit, duke ftuar grupin më të madh parlamentar që të propozojë kandidatin/en për Kryetar/e të Kuvendit, si dhe të procedojë me votimin e hapur. Kjo përbën një detyrim të qartë, që nuk lë vend për interpretime politike apo zvarritje të mëtutjeshme procedurale.

“Gjithashtu, u bëjmë thirrje subjekteve parlamentare dhe të gjithë deputetëve që të veprojnë në përputhje me mandatin e tyre dhe me përgjegjësinë e tyre kushtetuese për të siguruar funksionalitetin e Kuvendit, si një institucion thelbësor i rendit demokratik në vend”, thuhet në reagimin e KDI-së.

Sipas KDI-së, Kuvendi duhet të rikthehet në funksion pa vonesa të mëtejme. Procesi i konstituimit nuk mund të mbetet peng i kalkulimeve politike apo përpjekjeve për interpretim të situatës përtej konturave që tashmë janë qartësuar nga Gjykata.

Në aktgjykimin e plotë të Gjykatës Kushtetuese thuhet se seanca e radhës e Kuvendit të Kosovës duhet të nisë nga pika e 3-të e rendit të ditës, e që është votimi në formë të hapur për kandidatin për kryekuvendar. Sipas vendimit kandidati i propozuar i njejtë mund të votohet vetëm deri në tri herë. 

“Rrjedhimisht, Gjykata konstaton që Kryesuesi i Seancës Konstituive duhet të vazhdojë me pikën 3 të rendit të ditës së Seancës Konstituive, të miratuar më 8 prill 2025, dhe në pajtim me paragrafin 2 të nenit 67 [Zgjedhja e Kryetarit dhe Nënkryetarëve] të Kushtetutës, të ftojë përfaqësuesin e grupit më të madh parlamentar për të propozuar kandidatin/en për Kryetar/e të Kuvendit të Republikës së Kosovës, i/e cili/cila zgjedhet përmes votimit të hapur, votimi i cili mund të realizohet vetëm deri në 3 (tre) herë për kandidatin/en e njëjtë. Rrjedhimisht, Gjykata në vijim përcakton që deputetët e zgjedhur të Kuvendit duhet të zgjedhin Kryetarin/en dhe nënkryetarët e Kuvendit të Republikës së Kosovës sipas pikave 3 dhe 4 të rendit të ditës të Seancës Konstituive brenda 30 (tridhjetë) ditëve nga dita e hyrjes në fuqi të këtij Aktgjykimi.” thuhet në aktgjykim.

Gjithashtu, Kushtetuesja tha se konstituimi duhet të përmbyllet brenda 30-ditësh. Deputetët e shpërfillën një aktgjykim të mëhershëm të Kushtetueses e cila pati kërkuar konstituimin e legjislaturës së nëntë brenda 30 ditësh.

“Gjykata në kuptim të detyrimeve të deputetëve për realizmin e Seancës Konstituive rithekson që zgjedhja e Kryetarit/es dhe nënkryetarëve të Kuvendit është parakusht që Kuvendi të fillojë të funksionojë, dhe në kontekst të përcaktimeve të neneve 4, 7 dhe 74 të Kushtetutës, kjo kërkon nga të gjithë deputetët e zgjedhur që gjatë votimit të kandidatëve për Kryetar/e dhe nënkryetarë të Kuvendit të jenë të pranishëm dhe të votojnë. Gjykata rithekson që në rrethanat e rastit konkret, nuk ka interes më të mirë të Republikës së Kosovës, se sa konstituimi i organit më të lartë përfaqësues”, thuhet në aktgjykimin e Kushtetueses.

Forma e votimit të kryeparlamentarit është ngritur nga Partia Demokratike e Kosovës dhe Lidhja Demokratike, ndërsa lidhet edhe me lëndën e dorëzuar paraprakisht nga Aleanca për Ardhmërinë e Kosovës.

Gjykata nuk ka treguar se cilat do të jenë pasojat e mos zbatimit të këtij aktgjykimi dhe Kushtetuesja obligon të gjithë deputetët për të marrë pjesë në votim.

Pas publikimit të plotë të aktgjykimit nga Gjykata Kushtetuese, Lëvizja Vetëvendosje ka reaguar, duke e cilësuar vendimin si një tejkalim të hapur të juridiksionit dhe si krijim të një rregulli të ri që cenon parimet demokratike dhe përfaqësimin politik.

“Pas 10 ditësh Gjykata pranoi që përmes Aktgjykimit të publikuar ka shkruar rregull të ri. Tejkalimi i juridiksionit nuk justifikohet me asgjë. Ditët vonesë për publikimin e vendimit njoftojnë pamundësinë për ta justifikuar vendimin arbitrar që cënon demokracinë. Kufijtë e ngushtë të arsyetimit sot janë rrjedhojë e gjerësisë së tejkalimeve që ia ka lejuar vetes Gjykata”, thuhet në reagimin e Vetëvendosjes në Facebook.

Më tej thuhet se se votimi i fshehtë nuk është në kundërshtim me Kushtetutën, zhurma opozitare u rrëzua përsëri, por paragjykimi i Gjykatës për mungesën e konsensuesit politik sa kohë që nuk është hedhur asnjëherë në votim është ecje në rrugën e subjekteve bllokuese.

Sipas Vetëvendosjes, analogjia që përdor Gjykata nuk ka ku të qendrojë.

“Kushtetuta ndryshe nga zgjedhja e Kryetarit dhe Nënkryetarëve të Kuvendit, për zgjedhjen e Presidentit i përcakton qartë raundet e votimit edhe pasojat juridike të moszgjedhjes brenda një afati. Në arsyetimin e Gjykatës dallohet se nuk ka asgjë tjetër përpos frazave të përdorura nga PDK mbi analogjinë. Në bazë të tezës së analogjisë me zgjedhjet e institucioneve të tjera, duket se Gjykata po përgatit terrenin për dhënien e së drejtës së propozimit ndonjë partie tjetër pas 30 ditëve nëse dështon partia e parë për të zgjedhur kryetarin e Kuvendit. Këtë po e kërkojnë dhe thonë eksponentët opozitarë, madje edhe në komentet dërguar kushtetueses”, thuhet më tej në reagim.

VV vlerëson se si rrallë herë, Gjykata Kushtetuese nuk iu referua asnjë kushtetute evropiane dhe botërore, as nuk kërkoi mendime të gjykatave kushtetuese homologe për krahasueshmëri rastesh.

“Një rast pra si asnjë rast tjetër”, thuhet në reagim.

Deputetët e shpërfillën një aktgjykim të mëhershëm të Kushtetueses të 26 qershorit, e cila pati kërkuar konstituimin e legjislaturës së nëntë brenda 30 ditësh. Por, gjykata nuk pati treguar se cilat do të jenë pasojat e mos zbatimit të këtij aktgjykimi.

Kosova është futur në krizë politike dhe procesi ka ngecur te votimi për kryetar të kuvendit, pozitë për të cilën Lëvizja Vetëvendosje e ka propozuar Albulena Haxhiun por, ajo nuk ka marrë 61 votat e nevojshme.