Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

30 shtator 1993

Në kazermën ushtarake të Vushtrrisë u dëgjuan të shtëna gjatë natës

Komisioni për Informim i LDK-së së Vushtrrisë njofton se mbrëmë pas mesnate rreth orës 0.25 minuta, në kazermën ushtarake të këtij qyteti, në të cilën vijojnë mësimin edhe kadetët e shkollës së mesme të policisë, u dëgjuan të shtëna automatikësh dhe klithma, nga të cilat qytetarët shqiptarë që banojnë afër kësaj kazerme dolën nga shtëpitë e tyre të shqetësuar për të parë se ç’po ndodhte.

Qytetarët hetuan se afër depos së kazermës ishin të shtrirë dy veta, por nuk patën mundësi të dinë se a ishin të plagosur a të vrarë, si dhe a ishin ushtarë apo policë. Ndërkohë, siç njoftojnë dëshmitarët, dy personave të shtrirë u erdhi ndihma për bartje dhe me këtë rast sërish u shti me automatik në dy personat që ofruan ndihmë.

Qytetarët dëshmuan se rafalet e automatikëve vazhduan edhe më tej me ndërprerje të kohëpaskohshme. Përveç shtirjeve me automatik, thuhet se u dëgjuan edhe krisma pushkësh e revolesh.

30 shtator 1994

Nëna Terezë arriti dje në Shqipëri

Nëna Tereze arriti dje në Shqipëri dhe u takua me presidentin e Republikës së Shqipërisë dr. Sali Berisha.

Bamirësja shqiptare, fituese e Çmimit Nobel për Paqe ka qenë herën e fundit në Shqipëri në prill të vitit 1993 gjatë vizitës së Papa Gjon Palit II në Shqipëri.

Kjo vizitë lidhet me përpjekjet e Nënës Terezë për të ndihmuar Shqipërinë me rastin e shpërthimit të epidemisë së kolerës.

30 shtator 1995

“Le Mond”: Në Kosovë mbretëron aparteidi

Në Prishtinë, rreth 200 policë të nacionalitetit shqiptar, u nxorën para gjyqit me motiv se ata janë fajtorë ngase punuan rreth organizimit të policisë paralele. Atyre iu mohua e drejta që t’i mbrojnë gjykatësit shqiptarë, shkruan gazeta “Le Mond”.

Ky është vetëm njëri nga episodet që zbulon gjuhën e dyfishtë me të cilën shërbehet regjimi i Beogradit.

Shqiptarët, 85 për qind të popullatës në Kosovë, janë privuar nga të drejtat themelore, po ato të cilat serbët i kërkojnë për vëllezërit e tyre nga Bosnjë-Hercegovina dhe Kroacia. Autonomia e Kosovës e garantuar me Kushtetutën e vitit 1974, thjeshtë u pezullua. Arsimi tërësisht ka kaluar në duar të serbëve, ndërsa numri i shqiptarëve të larguar nga puna sa vjen e rritet, në mënyrë që kësisoj t’i largojnë nga të gjitha postet përgjegjëse.

Derisa Beogradi gëzon shumë privilegje kur është fjala për statusin e Bosnjë-Hercegovinës, në Kosovë asgjë e re, refuzohet çfarëdo diskutimi serioz në emër të parimit të mospërzierjes në punët e brendshme.

Është e qartë se koncepti ynë i së drejtës është larg atij “ballkanik”. Parimi i respektimit të kufijve të brendshëm të Jugosllavisë së dikurshme, që e shtron diplomacia jonë kur është fjala për Kroacinë dhe shtetin boshnjak, na ndalon të pëkrahim kërkesën për pavarësinë e Kosovës, ndonëse për atë ide angazhohen, njëzëri që të gjithë shqiptarët.

Në anën tjetër, asnjë serb kurrë nuk do të pranojë që Kosova, “djep i ortodoksizmit serb”, të shkëputet nga Serbia. Urtia kërkon të mos tundet faculeta e kuqe para hundës së popullit, i cili tashmë shumë herë ka dëshmuar iracionalitetin e tij.

Por, po ky koncept i së drejtës na obligon të merremi me atë që më nuk janë “punë të brendshme”, por fakte që vështirësojnë procesin e paqes dhe rrezikojnë të drejtat e njeriut.

Shkelja e të drejtave të njeriut krijon situata konfliktuoze të gatshme për shpërthim. Është i madh rreziku nga rebelimi në Kosovë, që do të mund të ketë jehonë edhe në Maqedoni e Shqipëri.

Pos kësaj, hapja e Serbisë ndaj Kosovës do të ishte dëshmi se në Beograd diç qenësore po ndryshon. Kjo njëkohësisht do t’i bindte evropianët se heqja përfundimtare e sanksioneve është mbështetur mbi baza të mirëfillta. Thënë sinqerisht, është vështirë të merret me mend normalizimi i plotë i marrëdhënieve ndërmjet Serbisë dhe Bashkësisë Evropiane, përderisa në Kosovë mbretëron regjimi i aparteidit, shkruan gazeta “Le Mond”, sipas transmetimit të gazetës “Bujku”.

30 shtator 1997

Nga Kragujevci në Kosovë janë sjellë 10 tonë gaz lotsjellës

Ditëve të fundit nga Kragujevci në Kosovë është sjellë një sasi e konsiderueshme e gazit lotsjellës, njofton gazeta e Beogradit “Blic”, duke u mbështetur në burimet e afërta me policinë. Burimet e kësaj gazete ndryshojnë në deklaratat e tyre për sasinë e gazit: një palë thotë se në Kosovë janë sjellë madje 10 tonë dhe se kjo lidhet me demonstratat e paralajmëruara në Prishtinë, ndërsa burimi tjetër pohon se fjala është për dërgimin e rregullt të disa mijëra paqetave të gazit lotsjellës në Kosovë, që do t’i shpërndahet stacioneve të policisë.

30 shtator 1998

Suharekë: Katër të vrarë në Budakovë, një në Mushtisht

Sot, në fshatin Budakovë u gjetën trupat e pajetë dhe të masakruar nga forcat serbe të Zymer Ali Buzhalës (rreth 55 vjeç), Murat Kurtish Kokollarit (55), Adem Imer Buzhalës (rreth 58 vjeç), që të tre nga Budakova, si dhe trupi i pajetë i një personi tjetër ende të paidentifikuar, njofton KI i Degës së LDK-së në Suharekë.

Trupat e pajetë të katër shqiptarëve të vrarë janë të masakruar dhe ata ende nuk janë varrosur.

I njëjti burim bë të ditur se në fshatin Budakovë është plagosur rëndë Sokol Bislim Buzhala (rreth 39 vjeç).

Po ashtu bëhet e ditur se dje në Mushtisht është vrarë edhe i riu Bajram Durmish Bytyçi (1969), ndërsa është plagosur Bedri Milazim Halitjaha (1982), që të dy nga Mushtishti.

Dyshohet se në fshatrat e Suharekës numri i të vrarëve dhe i të plagosurve shqiptarë është më i madh.

Kryesia e Degës së LDK-së në Suharekë apelon te organizatat ndërkombëtare humanitare që të ndihmojnë në evitmin e masakrave të tjera të mundshme, për shkak se në malet e komunës së Suharekës ende po qëndrojnë shumë civilë shqiptarë, që kanë drojë nga ndonjë masakër të mundshëm, por edhe ndihma në ushqime, ilaçe e gjësende të tjera.

Ferizaj: Dyshohet se në Jezerc ka shumë civilë shqiptarë të vrarë e të plagosur

Mbrëmë rreth orës 18:00, forcat serbe kanë ndërprerë granatimin e fshatit Jezerc, ndërsa vetëm nga fshati Nerodime e Epërme janë tërhequr mbi 90 tanksa të ushtrisë serbe njofton KI i Degës së LDK-së në Ferizaj.

Bëhet e ditur se gjatë tërheqjes, forcat e ushtrisë dhe të policisë serbe kanë hyrë në shumë shtëpi shqiptare në fshatin Pleshinë dhe kanë keqtrajtuar shumë banorë shqiptarë të këtij fshati, si dhe kanë demoluar shumë shtëpi të tyre.

Edhe gjatë ditës së sotme, po vazhdon djegia e shtëpive shqiptare në fshatrat Nerodime e Epërme dhe Nerodime e Poshtme.

I njëjti burim bën të ditur se dyshohet që në fshatin Jezerc nga forcat serbe janë vrarë e plagosur disa civilë shqiptarë, por depërtimi i aktivistëve të LDK-së në këtë fshat tash për tash i pamundur, pasi forcat serbe këtë fshat edhe më tej po e mbajnë në rrethim të plotë.

Dje dhe sot në qytetin e Ferizajt, kanë arritur edhe shumë civilë shqiptarë, kryesisht gra e fëmijë për t’u strehuar në këtë qytet.

Obri: Nga shpërthimi i minës, vdiq dr. Shpëtim Robaj

Dr. Shpëtim Robaj, anesteziolog dhe mësimdhënës i Fakultetit të Mjekësisë në UP vdiq sot nga plagët e marra nga shpërthimi i një mine derisa po udhëtonte me veturë me kolegët e tij dr. Ilir Tolajn, Lindita Bunjakun dhe një zyrtare të Zyrës në Prishtinë të Kryqit të Kuq Ndërkombëtar.

Nga Likoci u njoftua paradite se një veturë e Komitetit Ndërkombëtar të Kryqit të Kuq kishte shkelur në mëngjes në një minë të vendosur në rrugë në mes të fshatrave Obri e Epërme dhe Likofc.

Përfaqësuesi për shtyp i KNKK në Prishtinë tha se aksident ndodhi rreth orës 9,30 kur njëra nga veturat e kësaj organizate shkeli në një mjet shpërthyes.

Katër personat që ishin në veturë kishin marrë lëndime. Zëdhënësi i KNKK-së tha se nuk mund të konfirmonte për shkallën e lëndimeve por atyre u është dhënë ndihmë e menjëhershme nga personeli i automjetit tjetër që nuk ishte prekur nga shpërthimi.

Konvoji ishte në rrugë për t’iu ofruar ndihmë popullatës në këtë pjesë të Kosovës, tha zëdhënësi.

Më vonë u mor vesh se të lënduarit ishin dr. Robaj e dr. Tolaj dhe Lindita Bunjaku e një zyrtare e KKN.

Lajmin e zi për vdekjen e dr. Robajt e konfirmoi Beatris Veber, përgjegjëse e Zyrës së KKN, e cila gjendej pranë të plagosurve të tjerë në spital.

Prokuroria Themelore në Pejë, Departamenti i Krimeve të Rënda, ka ngritur aktakuzë ndaj të pandehurve E.M., E.E., E.I., K.Q., Sh.Xh., M.Q., I.B., L.H. dhe E.H., për shkak të dyshimit të bazuar mirë se kanë kryer veprat penale “Kultivimi i bimës së hashashit, shkurres së kokainës ose bimëve të kanabisit” dhe “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, si dhe vepra të tjera penale.

Sipas aktakuzës, të pandehurit kanë vepruar si anëtarë të një grupi të organizuar gjatë vitit 2024 në fshatrat Kliqinë dhe Sferkë të Komunës së Pejës, ku kishin mbjellë dhe përgatitur lëndë narkotike me qëllim të shitjes.

“Nga veprimet hetimore rezulton se të pandehurit dyshohet se kanë ndërmarrë veprime për mbjelljen, kultivimin, tërheqjen, tharjen dhe përpunimin e bimëve narkotike, si dhe për sigurimin e vendeve dhe mjeteve të nevojshme për transportin e tyre.”

Gjatë kontrollit të zbatuar më 27 shtator 2024, Policia e Kosovës ka gjetur në dy parcela gjithsej 2,850 bimë të llojit kanabis sativa. Nga këto bimë ishte përpunuar dhe siguruar narkotik në peshë të përgjithshme prej mbi 1,035 kilogramë e 712 gramë, e cila është sekuestruar nga organet e rendit.

Nga hetimet e zhvilluara është zbuluar gjithashtu se njërit prej të pandehurve i ishte premtuar shuma prej 15,000 eurosh për angazhimin e tij në këtë veprimtari. Po ashtu, gjatë kontrolleve ndaj njërit prej të akuzuarve janë gjetur dhe sekuestruar 1,540 euro në kartëmonedha të falsifikuara, të cilat dyshohet se posedoheshin me qëllim të hedhjes në qarkullim.

Përveç veprave penale që lidhen me narkotikët, njëri nga të pandehurit akuzohet edhe për veprën penale “Falsifikimi i parasë”, ndërsa një tjetër ngarkohet me veprën penale “Mbajtja në pronësi, kontroll ose posedim të paautorizuar të armëve”, pasi gjatë bastisjeve iu gjet dhe sekuestruar një armë e gjatë automatike AK-47 së bashku me municion.

Prokuroria Themelore në Pejë ka konfirmuar se mbetet e përkushtuar në luftimin e veprave penale që lidhen me narkotikët dhe në ndërmarrjen e të gjitha veprimeve ligjore ndaj personave të përfshirë në veprimtari të tilla kriminale. /E.A/

Lajm i përditësuar:

Kryeministri i Kosovës, Albin Kurti, ka deklaruar se vendi nuk duhet të shkojë në zgjedhje të reja parlamentare, duke bërë thirrje për përgjegjësi politike dhe stabilitet institucional përballë afateve kushtetuese për zgjedhjen e presidentit të ri.

Marrë parasysh aktgjykimin e Gjykatës Kushtetuese, sipas të cilit vendi shkon automatikisht në zgjedhje brenda 45 ditëve nëse presidenti nuk zgjidhet deri më 6 tetor, Kurti e ka cilësuar gjendjen si emergjente, duke theksuar se kanë mbetur vetëm edhe gjashtë ditë afat.

Duke arsyetuar nevojën për zgjidhje politike, kryeministri vuri në pah se zgjedhjet e jashtëzakonshme nuk do të zgjidhnin asgjë, por vetëm sa do ta thellonin krizën.

“Aktgjykimi që prodhoi normë të re kushtetuese lidhur me rrjedhjen e afatit për zgjedhjen e presidentit na vë para një situate emergjente për veprim. Kishim marrëveshje me LDK-në, por ajo u braktis nga gjashtë deputetë. Nga sot, kemi edhe gjashtë ditë për t’i dhënë vendit president të ri.”

Tutje, ai shtoi se klasës politike i duhet një unitet në zgjedhjen e presidentit.

“Andaj të ulemi bashkë, sepse edhe pse zgjedhjet do të shkaktoheshin nga moszgjedhja e presidentit, sërish nuk do të ishin zgjedhje për president. Ato, përveçse pa Kuvend, këtë herë do të na linin edhe me paqartësi për ushtrimin e detyrës së presidentit, ndërkaq Qeveria do të mbetej në detyrë”.

Kurti shtoi se secili proces i ri zgjedhor do të kthente vendin në të njëjtën pikë.

“Kosova nuk e ka luksin të humbasë kohë në kriza të panevojshme. Nuk ka nevojë të shkojmë në zgjedhje të panumërta vetëm për t’u kthyer në pikën e njëjtë. Secili proces zgjedhor është kontekst i ri mbi të cilin duhet të reflektojmë, por kësaj here nuk do të prodhohej rezultat ndryshe.”

Kërkohet mbrojtje juridike e diplomatike për ish-krerët e UÇK-së në Apel

Përveç krizës politike, Kurti theksoi se stabiliteti institucional është i domosdoshëm edhe për të përballuar sfidat shtetërore në rrafshin ndërkombëtar, veçanërisht pas vendimit dënues ndaj ish-drejtuesve të UÇK-së.

Ai rikujtoi takimet me krerët opozitarë, Bedri Hamza e Lumir Abdixhiku, si dhe Deklaratën e miratuar me 99 vota në Kuvend, si hapa drejt një bashkërendimi të nevojshëm:

“Në rrethana të reja, shteti ynë më së paku do të duhej të kishte mbi qafë kërcënimin e zgjedhjeve të reja. Vendit tonë më shumë se kurrë i duhet stabiliteti institucional, ashtu që të marrë përgjegjësinë për detyrat që i ka përpara, strategjinë e përbashkët shtetërore dhe mbrojtjen juridike e diplomatike ta kemi triumfuese nëpër botë.”

“Si kryeministër, do të bëjmë gjithë çfarë dimë e mundemi bashkë me kolegët nga Qeveria në Apel. UÇK-ja lindi si përgjigje ndaj represionit, vrasjeve, masakrave dhe dëbimeve,” përfundoi Kurti.

Kurti në mbledhjen e Qeverisë: Do të bëjmë gjithçka për korrigjimin e aktgjykimit ndaj ish-krerëve të UÇK-së

Kryeministri i Kosovës, Albin Kurti, ka deklaruar sot gjatë mbledhjes së Qeverisë se ekzekutivi do të angazhohet me të gjitha mundësitë për kundërshtimin dhe korrigjimin e aktgjykimit të 16 shtatorit ndaj ish-drejtuesve të UÇK-së: Hashim Thaçit, Kadri Veselit, Rexhep Selimit dhe Jakup Krasniqit, proces ky që pritet të vazhdojë në shkallën e Apelit.

Kurti bëri me dije se të diellën ka zhvilluar takime të ndara me kryetarin e PDK-së, Bedri Hamza, dhe atë të LDK-së, Lumir Abdixhiku, për të bashkërenduar hapat përballë këtij vendimi të cilin e quajti “të padrejtë dhe të rëndë”, si dhe për të diskutuar sfidat politike e shtetërore të vendit.

Kryeministri përshëndeti miratimin e Deklaratës në Kuvendin e Kosovës me 99 vota pro, duke e cilësuar atë si një hap fillestar që përfaqëson vullnetin e popullit.

“Deklarata e miratuar me 99 vota për në Kuvendin e Republikës është hapi i parë i përbashkët që, më shumë se sa që krijon efekt juridik, është shprehje e vullnetit të popullit nëpërmjet të zgjedhurve të tij”, u shpreh Kurti.

Ai bëri thirrje për bashkëpunim të ngushtë mes subjekteve politike, duke theksuar nevojën për bashkërendim të kujdesshëm me ekipet mbrojtëse dhe ekspertët e fushës, me qëllim që veprimet institucionale të mos dëmtojnë pozicionin e të akuzuarve.

Duke i dalë në mbrojtje luftës çlirimtare, Kurti ritheksoi se Ushtria Çlirimtare e Kosovës ishte bartëse e një cauze të drejtë popullore.

“Ushtria Çlirimtare e Kosovës lindi si përgjigje ndaj represionit, vrasjeve e masakrave, dëbimeve masive, spastrimit etnik e gjenocidit nga Serbia dhe ajo ishte bartëse e luftës së drejtë të popullit,” përmbylli kryeministri Kurti.

Safet Zejnullahu është një prej profesionistëve të brezit të gazetarëve kosovarë që e ka zhvilluar karrierën në pikëtakimin ndërmjet gazetarisë, komunikimit institucional dhe arsimit universitar. Me një përvojë që shtrihet nga fundi i viteve ’80 deri në ditët e sotme, ai ka qenë njëkohësisht reporter, redaktor, drejtues i komunikimit publik, profesor universitar dhe autor i një sërë botimesh profesionale e studimore mbi median dhe shkrimin.

Safet Zejnullahu është një nga ata gazetarë që profesionin nuk e kanë parë thjesht si vend pune, por si mision, përgjegjësi dhe detyrim ndaj publikut.

Safet Zejnullahu – gazetari që e mbajti etikën dhe standardin profesional edhe në ditët më të vështira të Kosovës

Pedant në punë, i komunikueshëm në raport me njerëzit dhe i përkushtuar ndaj etikës profesionale, Zejnullahu i takon brezit të gazetarëve që e ushtruan profesionin në rrethana të jashtëzakonshme – në vitet e okupimit dhe të represionit serb, kur fjala e lirë ishte e kufizuar dhe puna e gazetarit kërkonte jo vetëm dije e profesionalizëm, por edhe guxim.

Në periudhat më të vështira të Kosovës, ai ishte pjesë e një gazetarie që synonte të dokumentonte realitetin dhe t’i jepte zë shoqërisë. Angazhimi i tij në Qendrën për Informim të Kosovës (QIK) gjatë viteve 1995–1999 e vendosi në një prej pikave më të rëndësishme të informimit publik në kohën e okupimit, ndërsa përvoja e mëvonshme në gazetën “Zëri” e konsolidoi profilin e tij si profesionist i informacionit.

Por rrugëtimi i Zejnullahut nuk u kufizua vetëm në gazetarinë e shkruar. Ai e ndërtoi karrierën në disa nivele të profesionit – nga gazetaria dhe redaksia, te komunikimi institucional dhe televizioni publik. Në RTK, ku u angazhua nga viti 2016, ai ka ushtruar edhe funksionin e zëvendësdrejtorit, duke bartur në menaxhimin medial përvojën e fituar gjatë dekadave në gazetari dhe komunikim.

Ajo që e karakterizon këtë rrugëtim është vazhdimësia e një parimi: profesionalizmi duhet të mbetet mbi rrethanat, ndërsa etika duhet të jetë pikënisje e çdo informacioni që i komunikohet publikut.

Si gazetar dhe pedagog, Zejnullahu ka qenë i angazhuar edhe në formimin e gjeneratave të reja të profesionistëve të medias. Përmes mësimdhënies universitare dhe botimeve të tij, ai ka përcjellë te studentët rëndësinë e shkrimit të saktë, komunikimit të qartë, verifikimit të informacionit dhe respektimit të standardeve profesionale.

Nga ditët e vështira të okupimit, në Qendrën për Informim të Kosovës, te gazetaria profesionale, drejtimi në RTK dhe auditorët universitarë, Safet Zejnullahu e ka ndërtuar karrierën si një vazhdimësi të së njëjtës ide: gazetari duhet të jetë i saktë, i përgjegjshëm dhe i ndershëm ndaj publikut.

I lindur më 10 janar 1967 në Lladoc të Podujevës, Zejnullahu arsimin fillor e kreu në vendlindje, ndërsa studimet universitare në fushën e gjuhës dhe letërsisë shqipe dhe gazetarisë i vazhdoi në Prishtinë. Formimi i dyfishtë në gjuhë, letërsi dhe gazetari do të bëhej një nga shtyllat e profilit të tij profesional, duke ndërthurur gjatë gjithë karrierës përkushtimin ndaj gjuhës me kërkesat e komunikimit publik dhe të gazetarisë.

Nga gazetaria studentore në profesionin e informimit

Karrierën gazetarisht Safet Zejnullahu e nisi në vitin 1988, në gazetën e studentëve “Bota e Re”. Ky ishte fillimi i një rrugëtimi profesional që do ta çonte në disa prej institucioneve dhe mediave të rëndësishme të Kosovës.

Në vitet 1993–1994, ai ishte pjesë e revistës “Forumi”, ndërsa periudha 1995–1999 shënon angazhimin e tij në Qendrën për Informim të Kosovës (QIK). Kjo periudhë përkon me një nga fazat më të ndërlikuara të historisë moderne të Kosovës, kur informimi publik, dokumentimi i ngjarjeve dhe komunikimi me opinionin vendor e ndërkombëtar kishin rëndësi të veçantë.

Përvojën e fituar në këtë periudhë Zejnullahu e vazhdoi në gazetën ditore “Zëri”, ku punoi nga viti 2000 deri më 2009. Puna në një prej gazetave të njohura të kohës e konsolidoi profilin e tij si gazetar dhe profesionist i informacionit.

Kjo periudhë e gjatë në gazetari i dha mundësinë të përballet me transformimet e mëdha që kaloi media kosovare: nga gazetaria tradicionale e shtypit, te zhvillimi i formave të reja të komunikimit dhe, më vonë, te transformimi digjital i medias.

Përvoja institucionale dhe komunikimi me publikun

Pas një periudhe të gjatë në gazetari, Zejnullahu u angazhua në komunikimin institucional. Deri në vitin 2016, ai shërbeu si drejtor i Departamentit të Informacionit dhe Komunikimit me Publikun në Zyrën e Presidentit të Republikës së Kosovës.

Ky pozicion përfaqëson një dimension tjetër të karrierës së tij: kalimin nga prodhimi i informacionit gazetaresk në menaxhimin dhe organizimin e komunikimit publik institucional.

Përvoja në këtë fushë i dha mundësinë të punojë në një mjedis ku komunikimi nuk kufizohet vetëm te informimi, por përfshin edhe marrëdhënien ndërmjet institucioneve, mediave dhe publikut. Në këtë kuptim, karriera e tij përfshin të dyja anët e procesit komunikues – atë të gazetarit që kërkon, përpunon dhe transmeton informacionin dhe atë të institucionit që duhet ta komunikojë atë në mënyrë profesionale me publikun.

Akademia si vazhdimësi e profesionit

Një dimension i rëndësishëm i veprimtarisë së Safet Zejnullahut është angazhimi akademik.

Që nga viti 2006, ai është i angazhuar si mësimdhënës në UBT – Universiteti për Biznes dhe Teknologji, në Prishtinë, ku ka ligjëruar në fusha që lidhen drejtpërdrejt me komunikimin, gazetarinë dhe shkrimin akademik.

Në kuadër të veprimtarisë së tij akademike, ai ka ligjëruar lëndë si Shkrimi akademik, Proseminari, Shkathtësitë e shkrimit 1 dhe 2, Metodat e shkrimit, si dhe Media digjitale dhe sociale.

Kjo pjesë e karrierës së tij është veçanërisht e rëndësishme për faktin se përvoja praktike e gazetarisë është integruar me mësimdhënien universitare. Në këtë mënyrë, njohuritë e fituara gjatë dekadave të punës në media dhe komunikim janë përcjellë te brezat e rinj të studentëve.

Autor i botimeve për gazetarinë dhe median

Veprimtaria e tij profesionale është shoqëruar edhe me një angazhim të vazhdueshëm në shkrimin dhe botimin e literaturës profesionale.

Ndër veprat e tij përfshihen “Lufta për Kosovën” (2000), “Shkrimi dhe Komunikimi” (2014) dhe “Lajmi në kohë lufte dhe krize” (2017).

Në vitet e fundit, veprimtaria e tij akademike është zgjeruar edhe me botime të tjera, ndër të cilat përmenden “Shkathtësitë e Shkrimit” (2019), “Nocionet e Gazetarisë” (2022), “Tranzicioni i medies në Kosovë” (2024) dhe “Media dhe shtetndërtimi – Qendra për Informim e Kosovës” (2026).

Këto botime trajtojnë tema që prekin drejtpërdrejt zhvillimin e gazetarisë dhe medias në Kosovë, proceset e transformimit të tyre, mënyrën e ndërtimit të lajmit, shkrimin profesional dhe raportin ndërmjet medias dhe proceseve shoqërore e institucionale.

Safet Zejnullahu ka doktoruar në fushën e medias në Universitetin e Prishtinës “Hasan Prishtina”, Fakulteti i Filologjisë, duke mbrojtur doktoraturën me temën “Format e tranzicionit të medies shqipe në Kosovë në vitet 1988–2008”.

Me këtë arritje akademike, ai e ka kurorëzuar një rrugëtim të gjatë profesional në gazetari, komunikim dhe studime mediale.

Veçanërisht i rëndësishëm është studimi mbi tranzicionin e medias në Kosovë, i cili e vendos zhvillimin e gazetarisë në një perspektivë më të gjerë historike dhe shoqërore – nga sistemet e mëhershme politike deri te realiteti bashkëkohor mediatik.

Një karrierë në tri dimensione

Rrugëtimi profesional i Safet Zejnullahut mund të lexohet përmes tri dimensioneve kryesore: gazetarisë, komunikimit institucional dhe akademisë.

Në gazetari, ai ka kaluar nëpër disa prej periudhave më të rëndësishme të zhvillimit të medias kosovare.

Në komunikimin institucional, ka qenë pjesë e strukturave përgjegjëse për informimin dhe marrëdhëniet me publikun në nivelin më të lartë shtetëror.

Ndërsa në akademi, përmes mësimdhënies dhe botimeve, është angazhuar në formimin profesional të studentëve dhe në dokumentimin e zhvillimeve të medias.

Ky kombinim i përvojës praktike dhe asaj akademike i jep profilit të tij një karakter të veçantë. Ai nuk e ka trajtuar gazetarinë vetëm si profesion të ushtruar në redaksi, por edhe si fushë studimi, hulumtimi dhe edukimi profesional.

Safet Zejnullahu ka shërbyer si drejtor i Departamentit të Informacionit dhe Komunikimit me Publikun në Zyrën e Presidentit të Republikës së Kosovës, deri në vitin 2016, në periudhën kur institucioni presidencial drejtohej edhe nga Presidentja Atifete Jahjaga.

Kontributi në formimin e brezave të rinj

Në një periudhë kur gazetaria po përballet me ndryshime të shpejta teknologjike, transformimin e modeleve tradicionale të informimit dhe zgjerimin e mediave digjitale, përvoja e profesionistëve që kanë kaluar nëpër disa gjenerata të medias merr një rëndësi të veçantë.

Pikërisht në këtë kontekst mund të shihet edhe angazhimi i Zejnullahut në akademi: përvoja e gazetarisë tradicionale, njohja e periudhave të krizave dhe transformimeve politike e shoqërore, si dhe përballja me zhvillimin e teknologjive të reja të komunikimit, janë bërë pjesë e punës së tij mësimore dhe botuese.

Nga gazeta studentore “Bota e Re”, te QIK-u, “Zëri”, komunikimi institucional, RTK-ja dhe auditorët universitarë, rrugëtimi i Safet Zejnullahut paraqet një karrierë të lidhur ngushtë me zhvillimin e vetë gazetarisë dhe komunikimit publik në Kosovë.

Mbi katër dekada më vonë nga fillimi i tij në gazetari, ai vazhdon të jetë aktiv në profesion, në akademi dhe në autorësinë e veprave që trajtojnë median, shkrimin dhe komunikimin.

Në këtë kuptim, Safet Zejnullahu përfaqëson profilin e një gazetari që me kalimin e viteve e ka zgjeruar profesionin e tij nga raportimi i ngjarjes drejt studimit të saj, nga praktika drejt teorisë dhe nga puna individuale në redaksi drejt formimit të brezave të rinj të komunikuesve dhe gazetarëve./rajonipress/