Presidenti amerikan, Donald Trump, ka deklaruar së fundmi se Shtetet e Bashkuara të Amerikës tashmë kanë fituar ushtarakisht përballë Iranit, duke shtuar se ka dyshime nëse Teherani është i gatshëm apo i denjë për një marrëveshje të re.

Gjatë një prononcimi në bordin e avionit presidencial “Air Force One”, menjëherë pas përfundimit të fjalimit të tij, Trump është deklaruar rreth tensioneve të fundit në Ngushticën e Hormuzit. “Ne sapo i goditëm ata shumë fuqishëm,” ka thënë Trump, duke iu referuar sulmeve ajrore amerikane mbi bregdetin iranian. Ai shtoi se SHBA-ja “tashmë ka fituar ushtarakisht” dhe se Iranit “i ka mbetur shumë pak”.

Megjithatë, përkundër pretendimeve të tij se pala iraniane ka kërkuar bisedime, Trump u shpreh skeptik për hapat e mëtejshëm. “Thjesht nuk e di nëse janë të denjë për të bërë një marrëveshje. Nuk e di nëse do ta respektojnë atë,” përfundoi ai, duke bërë që perspektiva për një zgjidhje diplomatike të duket edhe më e largët pas përshkallëzimit të fundit të luftimeve. /BBC/ /E.A/

Bashkimi Evropian ka miratuar zyrtarisht projektet e propozuara nga Kosova në kuadër të programeve IPA 2026 dhe IPA 2027, duke i siguruar vendit një mbështetje financiare prej gjithsej 206.4 milionë eurosh.

Njoftimin e ka bërë të ditur Kryeministri Albin Kurti, i cili përmes një komunikimi e ka cilësuar këtë si një lajm shumë të mirë për qytetarët dhe një hap të madh për zhvillimin e vendit, pas konfirmimit zyrtar që ka ardhur nga Komiteti i IPA-s më 7 korrik.

Nga kjo vlerë totale, 180.5 milionë euro do të ndahen për gjashtë fusha prioritare. Konkretisht, 44 milionë euro do të shkojnë për mjedisin dhe klimën, 34.5 milionë euro për sektorin e energjisë, kurse për konkurrueshmërinë, arsimin dhe punësimin janë ndarë 31.8 milionë euro. Po ashtu, menaxhimi i kufijve dhe migrimi do të mbështetet me 30.5 milionë euro, qeverisja e mirë dhe përafrimi me BE-në me 24.7 milionë euro, ndërsa 15 milionë euro janë alokuar për sundimin e ligjit.

Kryeministri ka bërë të ditur se rreth gjysma e këtyre fondeve do të shkojnë për investime infrastrukturore, ku shumica e projekteve do të realizohen në kombinim me partnerë të tjerë zhvillimorë dhe me bashkëfinancim nga institucionet vendore. Projektet do të fillojnë zbatimin fill pas miratimit nga Komisioni Evropian dhe ratifikimit të Marrëveshjes Financiare në Kuvend.

Përveç programeve IPA, Kosovës i janë miratuar edhe tri grante nga Korniza Investuese për Ballkanin Perëndimor (WBIF), në vlerë totale prej 25.9 milionë euro.

Në këtë kuadër përfshihet granti investues prej 24.3 milionë euro për impiantin e trajtimit të ujërave të zeza në Podujevë në bashkëpunim me BERZH-in, si dhe asistenca teknike për përgatitjen e investimeve në Hidrosistemin Ibër-Lepenc dhe për segmentin e autostradës Qafë e Duhlës–Banullë. Kryeministri Kurti ka shprehur falënderimin e tij ndaj Bashkimit Evropian për këtë mbështetje, duke garantuar se këto mjete do të shfrytëzohen plotësisht në funksion të qytetarëve dhe progresit ekonomik e social të vendit. /E.A/

Profesorët e UBT-së, Prof. Dr. Hazir S. Çadraku, Prof. Dr. Pajtim Bytyqi dhe Prof. Dr. Osman Fetoshi, në bashkëpunim me studiues nga universitete të vendeve të rajonit, Bashkimit Evropian dhe institucione të tjera ndërkombëtare, kanë publikuar studimin shkencor me titull “Seasonal and Spatial Assessment of Heavy Metal Contamination in Groundwater in the Republic of Kosovo” në revistën prestigjioze ndërkombëtare Limnological Review (MDPI).

Ky publikim paraqet një kontribut të rëndësishëm në fushën e shkencave mjedisore, duke analizuar shpërndarjen hapësinore dhe sezonale të metaleve të rënda në ujërat nëntokësore të Republikës së Kosovës. Studimi ofron të dhëna të rëndësishme shkencore për vlerësimin e cilësisë së ujërave nëntokësore, identifikimin e burimeve potenciale të ndotjes dhe mbështetjen e politikave për mbrojtjen e burimeve ujore dhe zhvillimin e qëndrueshëm.

Punimi është rezultat i një bashkëpunimi të gjerë ndërkombëtar mes studiuesve nga rajoni, Bashkimi Evropian dhe vende të tjera të botës, duke dëshmuar edhe një herë angazhimin e profesorëve të UBT-së në kërkimin shkencor dhe pjesëmarrjen aktive në projekte me ndikim ndërkombëtar.

Ky sukses përfaqëson një tjetër arritje të rëndësishme të stafit akademik të UBT-së në promovimin e ekselencës në kërkim shkencor dhe forcimin e bashkëpunimit me komunitetin akademik ndërkombëtar.

Punimi i plotë mund të lexohet në lidhjet e mëposhtme: Website

Akademia Verore e Fakultetit të Psikologjisë nisi me sukses aktivitetet e saj akademike dhe praktike, duke ofruar ligjërata dhe punëtori (workshop-e) interaktive të fokusuara në promovimin e shëndetit mendor dhe zhvillimin e kompetencave profesionale të studentëve.

Në kuadër të aktiviteteve të ditës së parë, PhD cand. Anita Sadikaj mbajti një ligjëratë me temën “Shëndeti mendor si prioritet për mirëqenien psikologjike, sociale dhe komunitare”, gjatë së cilës u trajtua rëndësia e promovimit dhe ruajtjes së shëndetit mendor si një komponent kyç për mirëqenien individuale dhe zhvillimin e një shoqërie të shëndetshme.

Gjithashtu, specialistja e psikologjisë klinike Fatime Sahiti Bekteshi zhvilloi një punëtori interaktive mbi terapinë me rërë (Sandplay Therapy), ku prezantoi rëndësinë e kësaj metode terapeutike në shprehjen e emocioneve, vetërregullimin, përpunimin e përvojave traumatike dhe lehtësimin e zgjidhjes së konflikteve të brendshme.

Dita e parë e Akademisë Verore u karakterizua nga pjesëmarrja aktive e studentëve, diskutime frytdhënëse dhe ushtrime praktike, duke krijuar një atmosferë bashkëpunimi, reflektimi dhe mësimi interaktiv.

Përmes aktiviteteve të tilla, UBT dhe Fakulteti i Psikologjisë vazhdojnë të ofrojnë mundësi për zhvillim profesional dhe praktik, duke i pajisur studentët me njohuri bashkëkohore dhe aftësi të nevojshme për praktikën psikologjike dhe promovimin e mirëqenies mendore.